1-2. Yinki muntu fueti sala tekila ya kubaka mbotama?

 NA BAMVULA 5 yayi meluta, bantu kuluta milion mosi bakaka mbotama samu na kukuma Bambangi ya Yehova. Mutindu mosi na nlonguki ya siekle ya ntete Timote, mingi kati na bau longukaka kedika banda ‘bumuana.’ (2 Tm. 3:14, 15) Bayankaka longukaka mambu metadila Yehova na kimbuta, bayankaka ntangu bapusanaka na bamvula. Yameluta mua bamvula, nketo mosi longukaka Biblia na Bambangi ya Yehova mpe yandi bakaka mbotama ntangu yandi kumaka na bamvula 97!

² Kana nge kele nlonguki ya Biblia to nge kena kuyunduka na bibuti yina kele Bambangi ya Yehova, nge kena kukanisa diambu metadila kubaka mbotama? Yakele lukanu mosi ya mbote mpenza! Kasi tekila nge baka mbotama, nge fueti kukipesa na Yehova. Disolo yayi kesasila yinki zola monisa kupesa luzingu na nge na Nzambi. Yakesadisa nge diaka nge mona samu na yinki nge fueti kakatana ve kupesa luzingu na nge na Nzambi mpe kubaka mbotama, kana nge kele ya kubongama samu na kusala yau.

YINKI ZOLA MONISA KUKIPESA?

3. Pesa bifuani ya Biblia ya bantu yina kukipesaka na Yehova.

³ Na Biblia, kukipesa zola monisa kukitula na pembeni samu kusala lukanu mosi ya nlongo. Bayisaele vuandaka dibuta yina kukipesaka na Yehova. Kasi bantu yankaka ya dibuta yango kukipesaka na Yehova na mutindu mosi ya spesiale. Na kifuani, Arona vuandaka vuata ‘kidimbu ya nlongo ya kukipesa’​—plake mosi ya wolo na ntuala ya tirban na yandi. Plake yango ya wolo vuandaka monisa ti yandi ponamaka samu na kusadila Yehova na mutindu mosi ya spesiale​—lokola nganga-nzambi ya nene ya Yisaele.  (Levi 8:9) Banaziri diaka vuandaka kukipesa na Yehova na mutindu mosi ya spesiale. Mpova “Munaziri,” yina mekatuka na mpova ya Ebreo nazirʹ, zola monisa “Muntu yina bamevambula,” to “Muntu yina mekukipesa.” Yalombaka na Banaziri bazitisa bansiku ya spesiale yina sonamaka samu na bau na Nsiku ya Mose.​—Kut. 6:2-8.

4. (a) Na yinki mutindu bantu yina kekukipesaka na Yehova kekukitulaka na pembeni samu na kusala lukanu mosi ya nlongo? (b) ‘Kukimanga’ zola monisa yinki? (Tala diaka foto.)

⁴ Kana nge mekukipesa na Yehova, nge mepona kukuma nlonguki ya Yesu Klisto mpe nge kesala ti kusala luzolo ya Nzambi kuma diambu yina meluta mfunu na luzingu na nge. Kukipesa kelombaka yinki? Yesu tubaka: ‘Kana muntu zola landa munu, yandi kukimanga.’ (Mat. 16:24) Bampova ya Greki yina bamebangula na ‘yandi kukimanga’ lenda monisa diaka “kuzinga diaka ve samu na nge mosi.” Lokola nge kele kisadi ya Yehova yina mekukipesaka, nge fueti manga konso diambu yina kesepedisaka Yehova ve. (2 Bk. 5:14, 15) Yazola monisa kumanga ‘bisalu ya nzutu,’ lokola pite. (Bag. 5:19-21; 1 Bk. 6:18) Kuzitisa bansiku yango kekumisa luzingu na nge mpasi? Ve kana nge kezolaka Yehova mpe nge kendimisamaka ti bansiku na yandi kele samu na mambote na nge. (Nk. 119:97; Yez. 48:17, 18) Mpangi mosi ya bakala na nkumbu ya Nicholas metuba: “Nge lenda tadila bansikudukusu ya Yehova lokola bisengo ya porte to ya fenetre ya buloko yina kena kupekisa nge kusala mambu yina nge zola to lokola bisengo ya kaje ya nkosi yina kena kutanina nge na kivonza.”

5. (a) Yinki mutindu nge lenda kukipesa na Yehova? (b) Yinki lusuasanu kele kati na kukipesa na Yehova mpe kubaka mbotama? (Tala diaka foto.)

⁵ Kukipesa na Yehova kele yinki? Kukipesa na Yehova kele kulaka yandi na kisambu ti nge kesambila kaka yandi mpe nge ketula luzolo na yandi na kisika ya ntete na luzingu na nge. Ya kedika, ntangu nge kena kusala mutindu yina nge kena kulaka Yehova ti nge ketatamana kuzola yandi ‘na ntima na nge ya mvimba, na muela na  nge ya mvimba, na mabanza na nge nionso, mpe na ngolo na nge nionso.’ (Mar. 12:30) Kukipesa na nge fueti salama na kinsueki, kati na nge na Yehova. Nzokande, mbotama kesalamaka na meso ya bantu mingi; yakemonisaka bantu yankaka ti nge kukipesaka na Yehova. Kukipesa na nge kele ndefi mosi ya nlongo, mpe Yehova kena kulomba nge nge vuanda na luzingu yina kele na nguizani na kukipesa yango. Lukanu na nge fueti vuanda ya kukokisa nsilulu yango.​—Lon. 5:4, 5.

SAMU NA YINKI NGE FUETI KUKIPESA NA YEHOVA?

6. Yinki ketindaka muntu na kukipesa na Yehova?

⁶ Mfunu ya ngudi yina nge fueti kukipesa na Yehova kele samu nge kezolaka yandi. Nzola na nge fueti simbama ve na banguilu ya mpamba. Kasi, yafueti simbama na “nzayilu ya sikisiki” mpe na ‘mbakusulu ya kimpeve’​—mambu yina nge longukaka samu na Yehova yina salaka ti nzola na nge samu na yandi kula. (Kol. 1:9) Ndongokolo na nge ya Masonukua ndimisaka nge (1) ti Yehova kele kedika, (2) ti Biblia kele Mpova na yandi yina mepemama, mpe (3) ti yandi kesadilaka nkubukulu na yandi samu na kukokisa luzolo na yandi.

7. Yinki beto fueti sala tekila beto kukipesa na Nzambi?

⁷ Bantu yina kekukipesaka na Yehova fueti zaba malongi ya ngudi yina kele na Mpova ya Nzambi mpe bafueti vuanda na luzingu yina kele na nguizani na bansikudukusu na yau. Bakesalaka ngolo samu na kutubila bantu yankaka mambu yina balongukaka. (Mat. 28:19, 20) Nzola na bau samu na Yehova kekulaka, mpe nsatu ya ntima na bau kevuandaka ya kusambila kaka yandi. Yakele mutindu yina samu na nge? Kana nge kele na nzola ya mutindu yina samu na Yehova, nge ketadila ve kukipesa na Yehova mpe  kubaka mbotama lokola diambu mosi yina nge kena kusala kaka samu na kusepedisa nlongisi na nge ya Biblia to bibuti na nge; to samu bankundi na nge nionso kena kubaka nzengolo yango.

8. Yinki mutindu butondi kesadisa nge samu nge baka nzengolo ya kukipesa na Yehova? (Nkunga 116:12-14)

⁸ Kana nge kena kukanisa na mambu nionso yina Yehova mesalaka samu na nge, nge kevuanda na butondi samu na yandi mpe nge kevuanda na nsatu ya kupesa luzingu na nge na yandi. (Tanga Nkunga 116:12-14.) Yau yina Biblia mebokidila Yehova Muntu yina kepesaka ‘konso dikabu ya mbote mpe konso kado ya kukoka.’ (Yak. 1:17) Dikabu meluta nene na makabu yango nionso kele nkayilu ya Muana na yandi, Yesu. Kanisa ntete! Nkudulu salaka ti nge vuanda na dikoki ya kuvuanda na nguizani ya mbote na Yehova. Mpe yapesaka nge kivuvu ya kuzinga mvula na mvula. (1 Yn. 4:9, 10, 19) Kukipesa na Yehova kele mutindu ya kumonisa ti nge kele na butondi samu na diambu yango yina monisaka nzola yina meluta nene yina mesalamaka ntete ve, mpe samu na balusakumunu yankaka nionso yina Yehova mepesaka nge. (Kul. 16:17; 2 Bk. 5:15) Bametubila butondi ya mutindu yina na dilongi 46 poin 4, ya mukanda Zinga mvula na mvula na kiese!, yina kele na video ya miniti tatu Pesa makabu na nge na Nzambi.

NGE KELE YA KUBONGAMA SAMU NA KUKIPESA NA YEHOVA MPE KUBAKA MBOTAMA?

9. Samu na yinki muntu fueti mona ve ti yandi fueti kukipesa kaka na Yehova?

⁹ Nge lenda kukimona ti nge kele ve ya kubongama samu na kukipesa mpe kubaka mbotama. Mbala yankaka nge fueti sala diaka bansobolo na luzingu na nge samu yavuanda na nguizani na bansikudukusu ya Yehova, to mbala yankaka yakena kulomba nge baka diaka ntangu samu na kukumisa kiminu na nge ngolo. (Kol. 2:6, 7) Banlonguki nionso ve kekulaka mutindu mosi, mpe bantuenia nionso ve kevuandaka ya kubongama na mvula mosi samu na kukipesa mpe kubaka mbotama. Meka kutala bansobolo yina nge fueti sala, sala yina nge kele na dikoki ya kusala mpe kukifuanikisa ve na muntu yankaka.​—Bag. 6:4, 5.

10. Yinki nge fueti sala kana nge memona ti nge kele ntete ve ya kubongama samu na kukipesa mpe kubaka mbotama? (Tala diaka ankadre “ Samu na bantu yina meyundukaka na kedika.”)

¹⁰ Ata kana nge memona ti nge kele ntete ve ya kubongama samu na kukipesa na Yehova, tatamana kutula yau lukanu na nge. Lomba Yehova sadisa nge samu nge sala bansobolo ya mfunu na luzingu na nge. (Fil. 2:13; 3:16) Nge lenda ndimisama ti yandi kekuwa mpe yandi kepesa mvutu na kisambu na nge.​—1 Yn. 5:14.

SAMU NA YINKI BANTU YANKAKA KEKAKATANAKA?

11. Yinki mutindu Yehova kesadisa beto samu beto bikana ya kukuikama na yandi?

¹¹ Bantu yankaka yina kele ya kubongama samu na kukipesa mpe kubaka mbotama kena kukakatana ntete. Balenda kukiyuvusa, ‘Bosi kana mesala disumu ya nene mpe mebimisama na kimvuka?’ Kana nge kele na wonga ya mutindu yina, ndimisama ti Yehova kepesa nge konso kima yina nge kele na yau nsatu samu na ‘kutambula na mutindu yina mefuana na [yandi] samu na kupesa yandi kiese mpenza.’ (Kol. 1:10) Yandi kepesa nge diaka ngolo ya kusala mambu ya mbote. Yandi mesadisaka deja bantu mingi samu basala mambu ya mbote. (1 Bk. 10:13) Yakele mosi ya bamfunu yina kesalaka ti bantu fioti kaka bimisama na kimvuka ya Buklisto. Yehova kesadisaka bisadi na yandi samu babikana ya kukuikama.

12. Yinki mutindu beto lenda manga kusala disumu ya nene?

¹² Konso muntu ya kukondua kukoka kemekamaka na kusala mambu ya yimbi. (Yak. 1:14) Kasi, nge fueti pona diambu yina nge kesala kana nge mekutana na ntotolo. Diambu  ya kedika kele ti nsukansuka nge mosi fueti zaba mutindu nge ketuadisa luzingu na nge. Ata kana bantu yankaka kemanga dibanza yango, nge lenda yala banguilu na nge. Na yau ata kana nge mekutana na ntotolo nge lenda manga kusala diambu ya yimbi. Samu na kununga kumanga kusala diambu ya yimbi sambilaka konso kilumbu. Tanina mimeseno na nge ya mbote ya kusalaka ndongokolo na nge mosi ya Mpova ya Nzambi. Kuendaka na balukutakanu ya Buklisto. Tubilaka kiminu na nge na bantu yankaka. Kusala mambu yango ntangu nionso kepesa nge ngolo ya kuzinga na nguizani na ndefi na nge ya kukipesa. Mpe kuzimbakana ata fioti ve ti Yehova kesadisa nge na kusala mutindu yina.​—Bag. 5:16.

13. Yinki kifuani ya mbote Yozefi mebikilaka beto?

¹³ Yakevuanda pete samu na nge na kubikana ya kukuikama na Yehova kana nge mezaba deja na ntuala diambu nge kesala kana nge mekutana na ntotolo. Biblia kena kutubila beto bantu mingi yina salaka plina, atako bavuandaka bantu ya kukondua kukoka. Na kifuani, nketo ya Potifare vuandaka sosa mbala na mbala kubuisa Yozefi. Kasi Yozefi zabaka deja diambu yina yandi fueti sala. Biblia metubila beto ti ‘yandi mangaka,’ mpe yandi tubaka: ‘Yinki mutindu munu lenda sala yimbi yayi ya nene mpe kusala mpenza disumu na ntuala ya Nzambi?’ (Kuy. 39:8-10) Yakele puelele ti, Yozefi zabaka deja na ntuala diambu yina yandi fueti sala kana nketo yango memeka kuntota yandi. Yasalaka ti yavuanda pete samu na yandi na kusala diambu ya mbote ntangu yandi kutanaka na ntotolo.

14. Yinki mutindu beto lenda longuka kutuba, ve na ntuala ya bantotolo?

¹⁴ Yinki mutindu nge lenda landa kifuani ya Yozefi ntangu nge mekutana na ntotolo? Nge fueti baka nzengolo banda bubu yayi ya kuzaba diambu yina nge kesala kana nge mekutana na ntotolo. Zabaka kutuba mbala mosi, ve na mambu yina Yehova keyinaka, mpe manga ata kukanisa yau. (Nk. 97:10; 119:165) Na mutindu yina nge kesala disumu ve ntangu nge mekutana na ntotolo. Nge kezaba deja diambu yina nge kesala.

15. Yinki mutindu muntu lenda monisa ti yandi kena kusosa Yehova na ‘kedika nionso’? (Baebreo 11:6)

¹⁵ Mbala yankaka, nge mezaba ti nge meyambaka kedika mpe nge kele na nsatu ya kusadila Yehova na ntima na nge ya mvimba, kasi yakele na diambu mosi yina kena kupekisa nge kukipesa na Nzambi mpe kubaka mbotama. Nge lenda sala diambu yina Ntinu Davidi salaka. Nge lenda lomba Yehova: ‘Fimpa munu, O Nzambi,  mpe zaba ntima na munu. Tala munu, mpe zaba makanisi yina kena kutungisa munu. Tala kana na kati na munu yakele na nzila yina kepesaka mpasi, mpe tuadisa munu na nzila ya mvula na mvula.’ (Nk. 139:23, 24) Yehova kesakumunaka bantu yina ‘kesosaka yandi na kedika nionso.’ Bangolo yina nge kena kusala samu na kukokisa lukanu na nge ya kukipesa mpe kubaka mbotama kena kumonisa yandi ti nge kena kusosa yandi na kedika nionso.​—Tanga Baebreo 11:6.

TATAMANA KUPUSANA PENEPENE YA YEHOVA

16-17. Na yinki mutindu Yehova kebendaka bantu yina meyundukaka na kedika? (Yoane 6:44)

¹⁶ Yesu tubaka ti Yehova nde kebendaka banlonguki na yandi. (Tanga Yoane 6:44.) Kanisa ntete bampova yango ya kusimba ntima mpe yina yazola monisa samu na nge. Yehova kemonaka diambu ya mbote na konso muntu yina yandi kebendaka. Yandi ketadilaka bantu yango lokola “kima na yandi ya mfunu mingi,” to “kima na yandi ya ntalu.” (Kul. 7:6; nyp.) Mutindu yina nde yandi ketadilaka nge.

¹⁷ Yalenda vuanda ti, nge kele ntuenia yina bibuti na nge kele Bambangi ya Yehova, mbala yankaka nge kemonaka ti nge kesadilaka Yehova samu bibuti na nge kesadilaka yandi, kasi ve samu Yehova bendaka nge. Nzokande Biblia metuba: ‘Beno pusana penepene na Nzambi, mpe yandi kepusana penepene na beno.’ (Yak. 4:8; 1 Bs. 28:9) Kana nge mebaka dikanisi ya kupusana penepene na Yehova, yandi diaka yandi kepusana penepene na nge. Yehova ketadilaka nge ve lokola muntu mosi yina kele kaka na kati ya grupe mosi. Yandi kebendaka muntu mosimosi​—yavuanda konso muntu yina bibuti na yandi kele Bambangi ya Yehova. Kana muntu ya mutindu yina mebaka dikanisi ya kupusana penepene na Yehova, Yandi diaka kepusanaka penepene na yandi, mutindu Yakobo 4:8 metuba yau.​—Fuanikisa yau na 2 Batesalonika 2:13.

18. Yinki beto ketubila na disolo melanda? (Nkunga 40:8)

¹⁸ Kana nge mekukipesa na Yehova mpe nge mebaka mbotama, nge kemonisa kikadulu ya Yesu. Yandi vuandaka pene ya kukimonisa na ntuala ya Tata na yandi samu na kusala konso diambu yina yandi lombaka yandi. (Tanga Nkunga 40:8; Ebr. 10:7) Na disolo kelanda, beto ketubila mambu yina kesadisa nge samu nge tatamana kusadila Yehova na kukuikama na manima ya mbotama na nge.