1-2. Yinki kele mutindu meluta mbote ya kutanga mpe kulonguka Biblia? Pesa kifuani.

 KANISA ntete nge kena kubaka nzengolo kana nge kesumba yinzo to ve. Yinki nge kesepela kumona tekila nge baka nzengolo na nge? Kaka foto ya ntuala ya yinzo yango? Kondua ntembe nge kesepela kukuenda kuna mpe kumona yinzo yango. Nge ketambula nzinganzinga na yau, nge kekota na kati samu na kutala bashambre, mpe nge ketala mbotembote konso kitini ya yinzo yango. Yalenda vuanda mpe mbote kuluta kana nge mesolola na muntu mosi yina mezaba mutindu batungilaka yinzo yango. Ya kedika, nge kesepela kutala mambu nionso yina metadila yinzo yango.

² Beto lenda sala kaka mutindu mosi ntangu beto kena kutanga mpe kulonguka Biblia. Muntu mosi ya mayele na mambu metadila Biblia tubaka ti, “Biblia kele lokola yinzo mosi ya nene, yina kele na baetaje ya yinda, mpe bafondasion ya mpinda.” Na yau, yinki mutindu nge lenda zaba mbotembote mambu yina kele na kati ya Biblia? Kana nge kena kulonguka yau kaka malumalu, nge lenda longuka kaka mambu ya ngudi​—‘malongi ya ebandeli ya mambu ya nlongo ya Nzambi.’ (Ebr. 5:12) Kasi, mutindu mosi kaka na yinzo, kota na kati samu na kulonguka mambu mingi yina metadila yau. Mutindu meluta mbote ya kulonguka Biblia kele ya kumona mutindu mambu yina Biblia metubila na kisika mosi kele na nguizani na yina yametubila na kisika yankaka. Sala ngolo samu na kusuka kaka ve na kuzaba yinki bakedika yina nge kendiminaka kasi mpe samu na yinki nge kendiminaka yau.

3. Ntumua Paulo kindisaka bampangi na yandi Baklisto na kusala yinki, mpe samu na yinki? (Baefezo 3:14-19)

³ Samu na kubakusa mambu nionso yina metadila Mpova ya Nzambi, yakele na mambu yina beto fueti longuka na mpinda. Ntumua Paulo kindisaka bampangi na yandi Baklisto na kulonguka Mpova ya Nzambi na vema samu bakoka ‘kubakusa mbotembote bunene, yinda, ntela, mpe mpinda’ ya kedika. Mpe yau kesala ti ‘bapika misisa mpe batelema ngolo na zulu ya fondasion’  ya kiminu na bau. (Tanga Baefezo 3:14-19.) Beto fueti sala kaka mutindu yina. Beto tala mutindu beto lenda longuka na mpinda Mpova ya Nzambi samu na kubakusa mbotembote bansasulu na yau.

4. Yinki beto lenda sala samu na kupusana penepene ya Yehova? Pesa bifuani.

⁴ Lokola beto kele Baklisto, beto kezolaka ve kubakusa kaka malongi ya ngudi ya Biblia. Na lusadusu ya mpeve ya nlongo ya Nzambi, beto kele na nsatu ya ngolo ya kulonguka ‘ata mambu ya mpinda ya Nzambi.’ (1 Bk. 2:9, 10) Samu na yinki ve kubanda ndongokolo ya Biblia na lukanu ya kukumisa nguizani na nge na Yehova ngolo? Na kifuani, nge lenda longuka na mpinda mutindu yandi monisaka nzola na yandi na bisadi na yandi ya ntama mpe mutindu yandi kena kumonisa ti yandi kezolaka diaka nge. Nge lenda longuka diaka mutindu Yehova vuandaka zola bana ya Yisaele sambila yandi mpe fuanikisa yau na mutindu yandi kena kuzola beto sambila yandi bubu yayi. To mbala yankaka nge lenda longuka bambikudulu yina Yesu kokisaka na luzingu mpe kisalu na yandi awa na ntoto.

5. Yakele na diambu mosi yina nge kesepela kulonguka na ndongokolo na nge mosi?

⁵ Bayuvusaka ndambu ya bantu yina kelongukaka Biblia na mpinda kana yinki mambu ya mpinda yina bakesepela kulonguka na Mpova ya Nzambi. Nge lenda mona ndambu ya mambu yina batubaka na ankadre “ Mambu yina muntu lenda sadila ndongokolo na yandi mosi.” Nge lenda baka kiese mingi na kulonguka masolo ya mutindu yina na kusadilaka Index des publications des Témoins de Jéhovah to Buku ya bolukiluki mpo na Batatoli ya Yehova. Kusala ndongokolo ya Biblia ya mpinda lenda sadisa nge na kukumisa kiminu na nge ngolo mpe yalenda sadisa nge na ‘kubaka nzayilu ya Nzambi.’ (Bin. 2:4, 5) Beto tadila ndambu ya bakedika ya mpinda yina beto lenda longuka na dikebi nionso.

6. (a) Yinki lusuasanu kele kati na plan mpe lukanu? (b) Samu na yinki beto lenda tuba ti lukanu ya Yehova samu na bantu mpe ntoto kele samu na ‘mvula na mvula’? (Baefezo 3:11)

⁶ Beto tadila na kifuani mambu yina Biblia metuba na diambu metadila lukanu ya Nzambi.  Yakele na lusuasanu ya nene kati na plan mpe lukanu. Beto lenda fuanikisa plan na nzila mosi yina lenda nata na kisika yina nge kele na nsatu ya kukuenda. kasi, kana kima mosi mekanga nzila yango, nge lenda kuma ve na kisika yina nge kele na nsatu ya kukuenda. Na ndambu yankaka beto lenda fuanikisa lukanu na kisika yina nge kele na nsatu ya kukuenda. Ya kedika, beto mezaba kisika yina beto kele na nsatu ya kukuenda, kasi beto lenda sadila banzila mutindu na mutindu samu na kukuma kuna. Kana nzila mosi kele ya kukangama, beto lenda baka nzila yankaka. Diambu ya kiese, Yehova monisaka malembemalembe ‘lukanu [na yandi] ya kukondua nsuka’ na Biblia. (Efe. 3:11.) Na mutindu mosi mpe yankaka, Yehova lenda pona banzila ya mutindu na mutindu samu na kukokisa lukanu na yandi, mpe yandi kenungaka kaka samu yandi ‘mesalaka ti mambu nionso kokisama samu na lukanu na yandi.’ (Bin. 16:4) Mpe mambote ya mambu yina Yehova kesalaka kezingila mvula na mvula. Yinki kele lukanu ya Yehova, mpe yinki bansobolo yandi salaka samu na kukokisa yau?

7. Na manima ya butomboki ya bantu ya ntete, yinki mutindu Yehova sobaka mutindu ya kukokisa lukanu na yandi? (Matayo 25:34)

⁷ Nzambi tubilaka Adamu mpe Eva yinki vuandaka lukanu na yandi samu na bau. Yalombaka ‘babuta mingi mpe bakuma mingi, bafulusa ntoto mpe bayala yau, mpe bayala . . . konso kisemua’ na ntoto. (Kuy. 1:28) Ntangu Adamu mpe Eva tombukaka, basalaka ti disumu kota na yinza, kasi yalendaka pekisa ve Yehova kokisa lukanu na yandi. Yandi sobaka mutindu ya kukokisa yau. Kondua kuvingila, yandi bakaka nzengolo ya kutula Kimfumu mosi na dizulu samu yakokisa lukanu na yandi ya ebandeli samu na bantu mpe ntoto. (Tanga Matayo 25:34.) Na ntangu yango, Yehova tindaka Muana na yandi ya ntete na ntoto samu na kulonga bantu mambu metadila Kimfumu mpe kupesa luzingu na yandi samu na kuvukisa beto na disumu mpe na lufua. Na manima ya kufutumuka, Yesu vutukaka na dizulu samu na kuyala lokola Ntinu na Kimfumu ya Nzambi. Kasi yakele na mambu mingi ya kulonguka samu na lukanu ya Nzambi.

8. (a) Yinki kele yintu ya diambu ya Biblia? (b) Mutindu Baefezo 1:8-11 memonisa yau, yinki kele lukanu ya Yehova yina meluta mfunu? (Tala foto ya kuvertire.)

⁸ Yintu ya diambu ya ngudi ya Biblia kele ti nkumbu ya Yehova vuanda nlongo mpe lukanu na yandi kokisama na ntoto na nzila ya Kimfumu na yinsi ya lutuadusu ya Klisto. Lukanu ya Yehova lenda soba ve. Yandi pesaka nsilulu ti mambu nionso kesalama mutindu yandi tubaka yau. (Yez. 46:10, 11; Ebr. 6:17, 18) Malembemalembe, ntoto kekuma paradiso kisika yina bana ya kukoka mpe ya kukuikama ya Adamu mpe Eva ‘kevuanda na luzingu ya mvula na mvula.’ (Nk. 22:26) Kasi, yau kaka ve mambu yina Yehova kekokisa. Yandi kesangisa diaka bisadi na yandi nionso na dizulu mpe na ntoto. Na manima bantu nionso kezitisa Yehova lokola N’yadi na bau na kukuikama nionso. (Tanga Baefezo 1:8-11.) Yakena kukamuisa nge ve na kutadila mutindu ya mbote yina Yehova kekokisa lukanu na yandi?

9. Na kutangaka Biblia, beto lenda mona mambu yina kesalama yinki ntangu?

⁹ Beto tadila mbikudulu yina Yehova tubaka na bilanga ya Edeni, yina kele na Kuyantika 3:15. b Yakena kutubila mambu yina kekokisa lukanu na yandi, kasi mambu yango kesalama mafunda ya bamvula na manima. Na kifuani Yehova tubilaka Abrahami ti na manima ya bambandu mingi, muana mosi yina kebima na nzila na yandi kekuma Klisto. (Kuy. 22:15-18) Na yau, na mvula 33 N.B., batatikaka Yesu na kitambi mutindu  yatubamaka. (Bis. 3:13-15) Bamvula kuluta 1 000 mebikana samu diambu ya nsuka ya mbikudulu yango mutindu Yesu kediata yintu ya Satana kokisama. (Kus. 20:7-10) Mpe Biblia metubila mambu mingi yina kesalama ntangu kimbeni kati na yinza ya Satana mpe nkubukulu ya Yehova kekuma ngolo.

10. (a) Yinki mambu kesalama ntama mingi ve? (b) Yinki mutindu beto lenda bongisa makanisi mpe ntima na beto? (Tala noti na yinsi ya paje.)

¹⁰ Kanisa na mambu ya kukamua yina Biblia metubila. Ya ntete, makanda kesamuna ‘kiyenge mpe luvuvamu!’ (1 Te. 5:2, 3) “Na kintulumukina,” mpasi ya nene kebanda ntangu makanda kebalukila mabundu ya luvunu. (Kus. 17:16) Na manima na yau, kumonana na mutindu ya kukamua ya ‘Muana ya muntu [yina] kena kuiza na zulu ya matuti ya dizulu na ngolo mpe nkembo ya nene’ lenda salama. (Mat. 24:30) Yesu kesambisa bantu, na kukabulaka mameme mpe bankombo. (Mat. 25:31-33, 46) Na ntangu yango, Satana ketatamana kutelemina Nzambi. Lokola yandi keyinaka mingi bisadi ya Nzambi, yandi ketinda kimvuka ya makanda yina Biblia kebokidilaka Gogi na yinsi ya Magogi yanuanisa bisadi ya Yehova. (Eze. 38:2, 10, 11) Kaka na ntangu yango, Baklisto yina metulua mafuta na kimpeve yina kevuanda ntete awa na ntoto, kekuenda na dizulu samu na kusangana kintuadi na Klisto mpe makesa na yandi ya dizulu samu na kunuana mvita ya Armagedoni. c (Mat. 24:31; Kus. 16:14, 16) Na manima, Luyalu ya bamvula 1 000 ya Klisto kebanda na ntoto ya mvimba.​—Kus. 20:6.

11. Yinki zola monisa kivuvu ya luzingu ya mvula na mvula samu na nge? (Tala diaka foto.)

¹¹ Ntangu yayi kanisa ntete mutindu luzingu na nge kevuanda na manima ya Luyalu ya bamvula 1 000. Biblia metuba ti Mvangi na beto ‘tulaka ata ngindu ya kuzinga mvula na mvula na ntima na [beto].’ (Lon. 3:11) Kanisa yina yazola monisa samu na nge mpe nguizani na nge na Yehova. Mukanda Pusana penepene na Yehova, na paje 319, mebenda dikebi na beto na bampova yayi: “Na manima ya kuzinga  bamvula nkama na nkama, mafunda na mafunda, bamilion na bamilion, ata mpe bamiliare na bamiliare, beto kezaba Yehova Nzambi mbote kuluta mutindu beto mezaba yandi bubu yayi. Kasi beto kemona kaka ti mambu ya mbote ya kulonguka kele ntete mingi. . . . Beto lenda ata fioti ve kukanisa mambu ya kusepedisa ya mutindu na mutindu yina kevuanda na luzingu ya mvula na mvula, mpe kupusana penepene na Yehova nde kevuanda ntangu nionso diambu yina meluta mbote na luzingu yango.” Na ntangu yayi, lokola beto kena kutatamana kulonguka Mpova ya Nzambi, yinki diaka beto lenda longuka na mpinda?

12. Yinki mutindu beto lenda tula makanisi na beto na dizulu? Pesa kifuani.

¹² Mpova ya Nzambi metubila beto mua ndambu ya mambu yina metadila kuvuanda ya Yehova ‘kuna na dizulu.’ (Yez. 33:5) Biblia metubila mambu ya kukamua yina metadila Yehova mpe kitini ya nkubukulu na yandi kuna na dizulu. (Yez. 6:1-4; Dan. 7:9, 10; Kus. 4:1-6) Na kifuani, beto lenda tanga mambu ya kukamua yina Ezekiele monaka ntangu ‘dizulu zibukaka mpe [yandi] bandaka kumona bambona meso ya Nzambi.’​—Eze. 1:1.

13. Yinki kesepedisaka nge na yina metadila kiyekua yina Yesu kele na yau na dizulu, mutindu Baebreo 4:14-16 mesasila yau?

¹³ Kanisa diaka na kiyekua yina Yesu kele na yau na dizulu lokola Ntinu na beto yina kena kuyala mpe Nganga-nzambi ya nene ya ntima kiadi. Na nzila na yandi beto lenda pusana na ‘kiti ya kimfumu [ya Nzambi] ya nlemvo ya nene’ na nzila ya kisambu mpe na kulomba Nzambi monina beto kiadi mpe yandi sadisa beto ‘na ntangu yina mebonga.’ (Tanga Baebreo 4:14-16.) Beto bikaka ve kilumbu mosi luta kondua ti beto kanisa na yina Yesu mpe Yehova salaka mpe kena kusala samu na beto kuna na dizulu. Nzola na bau samu na beto fueti simba ngolo bantima  na beto mpe yafueti tinda beto na kuvuanda na vema na kisalu mpe na nsambudulu na beto.​—2 Bk. 5:14, 15.

14. Yinki kele mosi ya mambu yina meluta mbote yina beto lenda monisina butondi na Yehova mpe Yesu? (Tala diaka bafoto.)

¹⁴ Mosi ya mitindu yina meluta mbote ya kumonisa ti beto kele na butondi na Nzambi mpe Muana na yandi kele ya kusala nionso samu na kusadisa bantu bakuma Bambangi ya Yehova mpe bakuma banlonguki ya Klisto. (Mat. 28:19, 20) Yau nde ntumua Paulo salaka samu na kumonisa butondi na Nzambi mpe Klisto. Yandi zabaka ti luzolo ya Nzambi kele ti ‘bantu ya mitindu nionso vuka mpe babaka nzayilu ya sikisiki ya kedika.’ (1 Tm. 2:3, 4) Yandi salaka ngolo mpenza na kisalu na yandi samu na kusadisa bantu mingi yina yandi lendaka sadisa ‘samu [na] kuvukisa bantu yankaka na mitindu nionso.’​—1 Bk. 9:22, 23.

15. Na kutadila Nkunga 1:2, yinki kepesa beto kiese?

¹⁵ Na mutindu mosi yina mebonga, nsoniki ya nkunga monisaka muntu ya kiese mpe yina kenungaka lokola muntu yina ‘kevuandaka na kiese na nsiku ya Yehova’ mpe yina ‘keyindulaka nsiku na Yandi mpipa mpe muini.’ (Nk. 1:1-3; nyp.) Mbangudi mosi tubaka samu na baverse yango ti, “Muntu yango fueti zola lutuadusu ya Nzambi na kusosaka yau, na kulongukaka yau, mpe na kukanisaka na mpinda na zulu na yau.” Yandi buelaka diaka ti, “Kana kilumbu mosi meluta mpe muntu tanga ve Biblia, yandi melutisa kilumbu yango mpamba.” Nge lenda mona kiese ya kulonguka Biblia na kusepelaka na mambu mingi ya mfunu yina kele na kati mpe na kumonaka mutindu mambu yango nionso kele na nguizani. Yakele kiese kulonguka na mpinda Mpova ya Nzambi!

16. Yinki beto ketubila na disolo melanda?

¹⁶ Bakedika ya kitoko yina Yehova kena kulonga beto na Mpova na yandi kele ve mpasi samu na beto na kubakusa. Na disolo melanda, beto ketadila mosi ya bakedika yango ya mpinda​—tempelo ya nene ya Yehova ya kimpeve, yina Paulo metubila na mukanda na yandi na Baklisto ya Ebreo. Bika ti kulonguka disolo yango na mpinda natina nge kiese mingi.