DISOLO YA NDONGOKOLO 43
MUYIMBU 90 Tólendisanaka
Mutindu ya kununga bantembe
“Beno sosa kuzaba mambu nionso kana yakele kedika.”—1 TES. 5:21.
MAMBU YINA BETO KELONGUKA
Mutindu ya kununga bantembe yina lenda pekisa beto beto tatamana kusadila Yehova.
1-2. (a) Yinki kele ndambu ya bantembe yina bisadi ya Yehova lenda vuanda na yau? (b) Yinki beto ketubila na disolo yayi?
NA BANTANGU yankaka, bantu ya bamvula nionso kevuandaka na bantembe. a Na kifuani, kanisa ntuenia mosi yina kele nsamuni kena kukiyuvusa kana Yehova ketudilaka yandi mpenza dikebi. Yandi lenda vuanda na bantembe samu na kubaka mbotama. Kifuani yankaka kele ya mpangi mosi ya bakala yina ntangu yandi vuandaka ntuenia, yandi ponaka kutula kisalu ya Yehova na kisika ya ntete na luzingu na yandi na kisika ya kusosa kukuma na mbongo mingi. Ntangu yayi yandi mekuma mbuta mpe mbongo yina yandi kele na yau, kena kusadisa yandi kaka samu na kukokisa bansatu ya dibuta na yandi. Yandi lenda kukiyuvusa kana yandi bakaka nzengolo ya mbote ntangu yandi vuandaka ntuenia. Kanisa diaka na mpangi mosi ya nketo yina mepusana na bamvula mpe yina kele diaka ve na ngolo mingi. Mbala yankaka yandi lenda lemba nzutu samu yandi kele diaka ve na makoki ya kusala mambu yina yandi vuandaka sala na ntama. Nge mekukiyuvusaka deja biuvu lokola: ‘Yehova ketudilaka munu mpenza dikebi? Yabongaka mpenza munu kukiyimina mambu samu na Yehova? Munu kele kaka na mfunu na meso ya Yehova?’
2 Kana beto sosa ve bamvutu na biuvu yango, yalenda bebisa nsambudulu na beto. Na disolo yayi, beto ketubila mutindu kutula makanisi na bansikudukusu ya Biblia lenda sadisa beto ntangu beto kena kukiyuvusa (1) kana Yehova ketudilaka beto dikebi, (2) kana beto bakaka banzengolo ya mbote na ntama, to (3) kana beto kele kaka na mfunu na meso ya Yehova.
MUTINDU NGE LENDA NUNGA BANTEMBE NA NGE
3. Yinki kele mutindu mosi yina beto lenda nunga bantembe na beto?
3 Mutindu mosi yina beto lenda nunga bantembe na beto kele na kutangaka Mpova ya Nzambi samu na kubaka bamvutu na biuvu na beto. Kana beto mesala mutindu yina, beto kebaka lukindusu, beto kekula na kimpeve, mpe beto kevuanda na dikoki mingi ya “kutelema ngui na kiminu.”—1 Ko. 16:13.
4. Yinki mutindu beto lenda “sosa kuzaba mambu nionso kana yakele kedika”? (1 Batesaloniki 5:21)
4 Tanga 1 Batesaloniki 5:21. Beto simba ti Biblia mekindisa beto na “kusosa kuzaba mambu nionso kana yakele kedika.” Yinki mutindu beto lenda sala yau? Beto lenda sosa kukindimisa ti mambu yina beto kendiminaka kele ya kedika na kukokanisaka yau na mambu yina Biblia metuba. Na kifuani, beto tadila kifuani ya ntuenia ya bakala yina vuandaka kukiyuvusa kana yandi kele na valere na meso ya Nzambi. Yandi fueti kanisa ti lokola yandi kena kukiyuvusa kiuvu yango yazola monisa ti Yehova ketudilaka yandi ve dikebi? Ve, Yandi fueti “sosa kuzaba mambu nionso kana yakele kedika” na kulongukaka Biblia samu na kuzaba mutindu Yehova ketadilaka yandi mpenza.
5. Yinki mutindu beto “kekuwaka” bamvutu ya Yehova na biuvu na beto?
5 Ntangu beto ketangaka Mpova ya Nzambi, beto “kekuwaka” Yehova kena kutuba na beto. Kasi samu na kuzaba makanisi na yandi na diambu mosi ya sikisiki, yakelombaka beto sala bangolo. Ntangu beto kena kutanga Biblia beto fueti tula makanisi na beto na diambu yina kena kutungisa beto. Samu na kusala yau, beto lenda sosasosa na mikanda na beto yina kesasilaka Biblia. (Mas. 2:3-6) Beto fueti sambila Yehova samu na kulomba yandi sadisa beto beto mona mvutu na yandi na biuvu na beto. Na manima beto lenda sosa bansikudukusu ya Biblia mpe malongi ya mfunu yina beto lenda sadila na diambu yango. Beto lenda baka diaka mambote na kutadilaka masolo ya Biblia ya bantu yina kutanaka na mambu ya mutindu mosi na beto.
6. Yinki mutindu balukutakanu kesadisaka beto samu beto nunga bantembe na beto?
6 Beto “kekuwaka” diaka Yehova kena kutubila beto na balukutakanu na beto. Kana beto kekuendaka na balukutakanu mbala na mbala, beto lenda kuwa diskur mosi to komantere ya mpangi mosi yina lenda vuanda mpenza mvutu na kiuvu yina beto vuandaka kukiyuvusa. (Mas. 27:17) Ntangu yayi beto tadila mutindu beto lenda nunga bantembe yayi ya sikisiki.
NTANGU NGE KENA KUKIYUVUSA KANA YEHOVA KETUDILAKA NGE DIKEBI
7. Yinki kiuvu bantu yankaka lenda kukiyuvusa?
7 Nge mekukiyuvusaka deja: ‘Yehova ketudilaka munu mpenza dikebi?’ Kana nge kena kukimona ti nge kele ve na mfunu, nge lenda kanisa ti yalenda salama ve samu nge kuma nkundi ya Mvangi ya luyalanganu ya mvimba. Mbala yankaka makanisi ya mutindu yina kuminaka Ntinu Davidi. Yandi kanisaka yavuandaka diambu ya kukamua ti Yehova tudila bantu dikebi. Yandi tubaka: “Ee Yehova, muntu kele nani samu nge kanisa yandi, muana ya muntu, yina kekufuaka samu nge tudila yandi dikebi?” (Nz. 144:3) Yinki kisika nge lenda bakila mvutu na kiuvu yango?
8. Mutindu 1 Samwele 16:6, 7, 10-12 memonisa yau, yinki Yehova kemonaka na bantu?
8 Biblia kelongaka beto ti Yehova ketulaka dikebi na bantu yina kekukimonaka lokola bakele na mfunu ve na meso ya bantu yankaka. Na kifuani, Yehova tindaka Samuele na yinzo ya Yese samu na kutula mosi ya bana na yandi mafuta lokola muntu yina kekuma ntinu ya Yisaele. Yese bokilaka 7 kati na bana na yandi 8 samu bakutana na Samuele, kasi yandi bokilaka ve Davidi muana na yandi ya nsuka. b Nzokande, Yehova ponaka nde Davidi. (Tanga 1 Samwele 16:6, 7, 10-12.) Yehova monaka kimuntu ya kati ya Davidi—ntuenia mosi yina vuandaka baka mambu ya kimpeve na valere.
9. Samu na yinki nge lenda kukindimisa ti Yehova ketudilaka nge dikebi? (Tala diaka foto.)
9 Kanisa ntete mutindu Yehova memonisaka deja ti yandi ketudilaka nge dikebi. Yandi kepesaka nge malongi yina meluta mbote samu na mambu ya sikisiki yina kekuminaka nge. (Nz. 32:8) Yinki mutindu yandi lenda pesa malongi ya mutindu yina kondua ti yandi zaba nge mbote? (Nz. 139:1) Kana nge mesadila malongi ya Yehova mpe nge memona ti yamesadisa nge, nge kekukindimisa ti Yehova ketudilaka nge dikebi. (1 Nt. 28:9; Mis. 17:26, 27) Yehova kemonaka bangolo na nge. Yandi kemonaka diaka bikadulu na nge ya mbote mpe yandi kele na nsatu nge vuanda nkundi na yandi. (Yir. 17:10) Yandi kevuandaka na kiese mpenza kana nge diaka nge kele na nsatu ya kukuma nkundi na Yandi.—1 Yoa. 4:19.
“Kana nge mesosa [Yehova], yandi kesala ti nge mona yandi.”—1 Nt. 28:9 (Tala paragrafe 9) c
NTANGU NGE KENA KUKIYUVUSA KANA NGE BAKAKA BANZENGOLO YA MBOTE
10. Ntangu beto kena kukanisa na banzengolo yina beto mebakaka na ntama, yinki biuvu beto lenda kukiyuvusa?
10 Bamvula mingi na manima, bantu yankaka lenda kukiyuvusa kana banzengolo yina babakaka na ntama vuandaka ya mbote. Mbala yankaka babakaka nzengolo ya kumanga kisalu mosi ya mbote yina kefutaka mbongo mingi to bamangaka kubanda mumbongo mosi samu basala mingi na kisalu ya Yehova. Kasi mbala yankaka bamvula mingi meluta. Balenda kutana na bantu yankaka yina bamezaba yina landaka balukanu ya kinsuni mpe yina kena kumonana bubu yayi ti bakele na mbongo mingi. Yalenda sala ti bakukiyuvusa: ‘Yabongaka mpenza munu kukiyimina mambu yango samu na Yehova? To mambu yango salaka ti munu kondua maluaku yankaka?’
11. Yinki vuandaka tungisa nsoniki ya Nzembo 73?
11 Kana biuvu ya mutindu yina kena kutungisa nge, kanisa mutindu nsoniki ya Nzembo 73 kukimonaka. Yandi vuandaka mona bantu yina vuandaka sadila Yehova ve kasi bakena kimvuama, bakena na mbongo mingi, mpe bakena monana lokola bakena mitungisi ata fioti ve. (Nz. 73:3-5, 12) Ntangu yandi vuandaka tala bau mpe mutindu bavuandaka monana mbote, yandi monaka ti bangolo yina yandi vuandaka sala samu na kusadila Yehova vuandaka mpamba. Samu na makanisi yango ya kulembisa, yandi “vuandaka kukitungisa kilumbu ya mvimba.” (Nz. 73:13, 14) Yinki mutindu yandi nungaka banguilu na yandi ya yimbi?
12. Na kutadila Nzembo 73:16-18, yinki mutindu nsoniki ya nkunga nungaka banguilu na yandi ya yimbi?
12 Tanga Nzembo 73:16-18. Nsoniki ya nkunga yango kuendaka na kisika ya nlongo ya Yehova. Kuna, yandi vuandaka na dikoki ya kukanisa na mutindu ya puelele. Yandi bakusaka ti atako luzingu ya bantu yankaka lendaka monana lokola yakele ya mbote, bantu yango vuandaka na kivuvu ve samu na bilumbu kena kuiza. Na yau yandi vuandaka diaka ve ya kulemba nzutu mpe yandi kukindimisaka ti kusadila Yehova vuandaka nzengolo yina meluta mbote mpenza. Yandi kumaka diaka na nzengolo ya kutatamana kusadila Yehova.—Nz. 73:23-28.
13. Yinki mutindu nge lenda baka kiyenge ya makanisi kana nge kele na bantembe na banzengolo ya ntama yina nge mebakaka? (Tala diaka foto.)
13 Nge lenda baka kiyenge ya makanisi ya mutindu yina na nzila ya Mpova ya Nzambi. Na yinki mutindu? Kanisa mambu ya mbote yina nge kele na yau, na kifuani Yehova kendimaka nge mpe zaba ti bantu yina kesadilaka Yehova ve kebakaka ve lusadusu na yandi. Balenda tula ntima na bau nionso na mambu yina bakena kusala bubu yayi samu bamezaba ti bakele na kivuvu ve samu na bilumbu kena kuiza. Kasi samu na nge, Yehova melaka ti yandi kesakumuna nge kuluta mutindu yina nge lenda kanisa. (Nz. 145:16) Diaka, beto kanisa na diambu yayi: Beto lenda zaba mpenza mutindu luzingu na beto zolaka vuanda kana beto bakaka banzengolo yankaka? Diambu yina beto mezaba kele ti: Bantu yina kebakaka banzengolo yina mesimbama na nzola na bau samu na Nzambi mpe samu na bafinangani na bau kekonduaka ata fioti ve bima ya mbote.
Tala balusakumunu yina Yehova melaka nge na bilumbu kena kuiza (Tala paragrafe 13) d
NTANGU NGE KENA KUKIYUVUSA KANA NGE KELE KAKA NA MFUNU NA MESO YA YEHOVA
14. Samu na yinki bantu yankaka kekonduaka kivuvu, mpe yinki kiuvu lenda tungisa bau?
14 Bisadi yankaka ya Yehova kele diaka ve na makoki ya kusala mingi mutindu bavuandaka sala samu bamepusana na bamvula, bakele na mitungisi ya mavimpi, to bakele diaka na makoki ve. Na yau balenda kanisa ti bakele diaka na mfunu ve na meso ya Yehova. Balenda kukiyuvusa, ‘Munu kele kaka na mfunu na meso ya Yehova?’
15. Na yinki diambu nsoniki ya Nzembo 71 kukindimisaka na yau?
15 Nsoniki ya Nzembo 71 monisaka banguilu ya mutindu yina. Yandi sambilaka: “Kusundola munu mpe ve ntangu ngolo na munu kena kumanisa.” (Nz. 71:9, 18) Nzokande, nsoniki ya nkunga yango tatamanaka kukindimisa ti kana yandi kena kusadila Yehova na kukuikama nionso, Yehova ketatamana kutuadisa mpe kusadisa yandi. Mutindu nsoniki ya nkunga yango bakusaka yau, Yehova kesepelaka na bantu yina kesalaka nionso yina balenda samu na kusadila Yandi atako mambu yankaka kena kupekisa bau kusala mingi.—Nz. 37:23-25.
16. Na yinki mitindu bampangi yina mepusana na bamvula kele na mfunu na meso ya Yehova? (Nzembo 92:12-15)
16 Beno bampangi yina mepusana na bamvula, beno tadila mambu ya luzingu na beno mutindu Yehova ketadilaka yau. Yandi lenda sadisa beno samu beno sadila yandi na kukuikama atako beno kele na mitungisi ya mavimpi. (Tanga Nzembo 92:12-15.) Na kisika ya kutula makanisi na mambu yina beno kele diaka ve na makoki ya kusala, beno tula makanisi na mambu yina beno kele na makoki ya kusala. Na kifuani, beno lenda kindisa bantu yankaka na nzila ya kifuani na beno ya kukuikama mpe na nzila ya dikebi yina beno ketudilaka mosimosi kati na bau. Beno lenda tubila mutindu Yehova sadisaka beno samu na bamvula mingi. Beno lenda tubila diaka kivuvu na beno ya ngolo samu na kukokisama ya bansilulu ya Yehova. Mpe beno zaba ti bisambu na beno yina mekatuka na ntima lenda sadisa mingi bantu yankaka. (1 Pe. 3:12) Yavuanda mambu ya luzingu na beto kele yinki mutindu, beto nionso beto kele na kima yina beto lenda pesa Yehova mpe bantu yankaka.
17. Samu na yinki beto fueti manga kukifuanikisa na bantu yankaka?
17 Kana nge kena kukitungisa samu nge kele diaka ve na makoki ya kusala mingi na kisalu ya Yehova, ndima ti yandi kesepelaka na mambu nionso yina nge kele na makoki ya kusala. Mbala yankaka nge lenda fuanikisa mambu yina nge kena kusala na mambu yina bantu yankaka lenda sala. Kasi, kukifuanikisa ve na bantu yankaka! Samu na yinki? Samu Yehova kefuanikisaka nge ve na bantu yankaka. (Gal. 6:4) Na kifuani, Maria pesaka Yesu kado ya mafuta mosi ya ntalu mingi. (Yoa. 12:3-5) Na ndambu yankaka, nketo ya mputu yina mefuilaka bakala tulaka mbongo zole ya bisengo ya valere fioti mpenza na tempelo. (Luka 21:1-4) Kasi, Yesu fuanikisaka ve banketo yango nionso zole. Kutu, yandi monaka ti Maria mpe nketo yango ya mputu yina mefuilaka bakala monisaka kiminu. Tata na yandi, Yehova, kebakaka na valere mpenza konso diambu yina nge kesalaka yina mesimbama na kukipesa mpe nzola na nge samu na yandi, ata kana yalenda monana fioti samu na nge.
18. Yinki lenda sadisa beto samu beto nunga bantembe? (Tala diaka ankadre “ Mpova ya Yehova lenda sadisa nge samu nge nunga bantembe na nge.”)
18 Na bantangu yankaka, beto nionso beto kevuandaka na bantembe. Kasi mutindu beto memona yau, Biblia, Mpova ya kedika ya Nzambi, lenda sadisa beto samu beto nuanisa bantembe yango. Na yau, sala ngolo samu nge nunga bantembe na nge, mpe bika kivuvu baka kisika ya mitungisi na nge. Kondua ntembe, Yehova ketudilaka mosimosi kati na beto dikebi. Yandi kesepelaka mutindu nge kekukiyiminaka mambu mingi samu na yandi mpe yandi melaka ti yandi kepesa nge n’sendo. Kukindimisa ti Yehova ketadilaka bisadi na yandi nionso ya kukuikama lokola bantu yina mebonga kubaka nzola mpe dikebi na yandi.
MUYIMBU 111 Ntina ya esengo na biso
a MPOVA YINA BAMESASILA: Na disolo yayi, beto kena kutubila bantembe yina kesalaka beto kukimona ti beto kele ve na valere na meso ya Yehova to yina kesalaka beto kukiyuvusa kana beto bakaka banzengolo ya mbote na ntama. Yakele ve bantembe yina Biblia metubila yina lenda monisa puelele ti beto kele ve na kiminu na Yehova mpe na bansilulu na yandi.
b Atako Biblia tubila ve bamvula ya sikisiki yina Davidi vuandaka na yau ntangu Yehova ponaka yandi, yalenda vuanda ti yandi vuandaka ntete ntuenia.—Tala Linɔ́ngi ya Mosɛnzɛli ya 1 septembre 2011 paje 29, paragrafe 2.
