1. Ntangu fioti tekila lufua ya ntumua Petelo, Yehova sadilaka yandi samu na kusala yinki?

 NTUMUA Petelo sadilaka Yehova na kukuikama bamvula mingi. Yandi vuandaka tambula na Yesu ntangu Yesu vuandaka samuna, yandi bandisaka kisalu ya kusamuna na bantu yina vuandaka Bayuda ve, mpe na manima yandi kumaka mosi ya bampangi ya kimvuka ya ntuadisi. Pene ya nsuka ya luzingu na yandi, ntangu yandi zabaka ti ntama mingi ve yandi kekufua, Yehova pesaka yandi mambu mingi ya kusala. Pene na bamvula 62 tii 64 N.B., Nzambi sadilaka yandi samu na kusonika mikanda zole​—mukanda ya 1 mpe ya 2 Piere. Petelo vuandaka na kivuvu ti mikanda yango kesadisa Baklisto na manima ya lufua na yandi.​—2 Pi. 1:12-15.

2. Samu na yinki mikanda yina Petelo sonikaka kuizaka na ntangu yina mebonga?

² Petelo sonikaka mikanda na yandi na nzila ya mpeve ya nlongo na ntangu yina bampangi na yandi ya babakala mpe ya banketo vuandaka na ‘kiadi . . . samu na banzomono ya mutindu na mutindu.’ (1 Pi. 1:6) Bantu ya yimbi vuandaka sosa kukotisa malongi ya luvunu mpe bikadulu ya mvindu na kati ya kimvuka ya Buklisto. (2 Pi. 2:1, 2, 14) Yabikanaka ntangu mingi ve, samu Baklisto yina vuandaka zinga na Yerusaleme kutana na ‘nsuka ya mambu nionso’​—kubebisama ya mbanza yango mpe ya Bayuda na nzila ya basoda ya Roma. (1 Pi. 4:7) Kondua ntembe, mikanda ya Petelo sadisaka Baklisto bamona yinki balendaka sala samu na kukanga ntima na banzomono yina bavuandaka kutana na yau, mpe kubongisa bau samu na banzomono yina kekuiza na ntuala. b

3. Samu na yinki beto fueti tadila mikanda ya Petelo?

 ³ Atako Petelo sonikaka mikanda na yandi na Baklisto ya siekle ya ntete, Yehova kotisaka mikanda yango na kati ya Mpova na Yandi. Na yau, bubu yayi beto lenda bakila mikanda yango mambote. (Bar. 15:4) Lokola Baklisto yina ya siekle ya ntete, beto kena kuzinga na yinza yina mefuluka na bikadulu ya mvindu, yau lenda sala ti yavuanda mpasi kusadila Yehova. Diaka, ntama mingi ve beto kekutana na mpasi ya nene kuluta mpasi yina sukisaka nkubukulu ya Bayuda. Mikanda yango zole ya Petelo, kele na makundoli ya mfunu. Yakesadisa beto na kuvuanda ya kubongama samu na kilumbu ya Yehova, beto nunga kubanga bantu, mpe kuvuanda na nzola ya ngolo kati na beto. Makundoli ya mutindu yina lenda sadisa diaka bankulutu na kuzaba mutindu ya kupesa lusadusu na bampangi ya babakala mpe ya banketo samu babikana ngolo.

4. Na kutadila 2 Piere 3:3, 4, yinki lenda lembisa kiminu na beto?

⁴ Beto kezingaka na bantu yina kendiminaka ve mambu yina Biblia metuba samu na bilumbu kena kuiza. Bantu yina keteleminaka beto, lenda seka beto samu beto ketubaka banda bamvula mingi ti nsuka kena kuiza. Bantu yankaka ketubaka ti yakesala kuiza ata fioti ve. (Tanga 2 Piere 3:3, 4.) Kana beto mekuwa bampova ya mutindu yina na muntu mosi yina beto kelongaka, na nkundi mosi ya kisalu, to na mpangi mosi ya dibuta, yalenda lembisa kiminu na beto. Petelo sasilaka mambu yina lenda sadisa beto.

5. Yinki kesadisa beto beto vingila na ntima yinda nionso nsuka ya yinza yayi? (2 Piere 3:8, 9)

⁵ Yalenda monana na bantu yankaka ti Yehova kena kusala mambu na malembe samu na kutula nsuka na yinza yayi ya yimbi. Bampova ya Petelo lenda sadisa beto, samu yakena kubambula beto ti mutindu ya Yehova ya kutadila ntangu mesuasana ngolo na mutindu ya bantu ya kutadila ntangu. (Tanga 2 Piere 3:8, 9.) Samu na Yehova bamvula 1 000 kele lokola kilumbu mosi. Yehova kele ntima yinda, yandi zola ve ata muntu mosi kufua. Kasi ntangu kilumbu na yandi kekoka, yinza yayi kesuka. Yakele diluaku mosi ya nene na kusadila ntangu yayi mebikana samu na kupesa kimbangi na bantu ya makanda nionso.

6. Yinki mutindu beto ‘kelunda na makanisi’ kilumbu ya Yehova? (2 Piere 3:11, 12)

⁶ Petelo kindisaka beto na ‘kulunda ntangu nionso na makanisi’ kilumbu ya Yehova. (Tanga 2 Piere 3:11, 12.) Yinki mutindu beto lenda sala yau? Beto fueti kanisaka na mpinda​—konso kilumbu, kana dikoki kele—​na balusakumunu yina beto kebaka na yinza ya yimpa. Kukimona na paradiso nge kena kupema mupepe mosi ya kitoko, nge kena kudia madia mosi ya kitoko, mpe nge kena kuyamba bampangi mpe bankundi na nge yina nge vuandaka zola mingi ntangu bamefutumuka, mpe nge kena kulonga bantu yina mezingaka bamvula mingi meluta mambu metadila kukokisama ya bambikudulu ya Biblia. Kukanisa na mpinda ya mutindu yina, kesadisa nge nge kukibongisa mpe nge zaba ti beto kena kuzinga na bilumbu ya nsuka. Kana beto ‘mezaba mambu yango na ntuala’ beto ‘kenatumuka ve’ na banlongisi ya luvunu.​—2 Pi. 3:17.

7. Kubanga bantu lenda vuanda na yinki bupusi na zulu na beto?

⁷ Kana beto kena kulunda ntangu nionso na makanisi kilumbu ya Yehova, beto kevuanda na nsatu ya kusamunina bantu nionso nsangu ya mbote. Kasi na bantangu yankaka, beto lenda banga kusala mutindu yina. Samu na yinki? Samu beto kena kubanga mambu yina bantu kena kukanisa samu na beto to yina balenda sala beto. Yau kuminaka Petelo. Na mpipa yina Yesu kutanaka na banzomono, Petelo bangaka  kutuba ti yandi vuandaka mosi ya banlonguki ya Yesu mpe yandi wanganaka mbala na mbala ti yandi zabaka yandi ve. (Mat. 26:69-75) Kasi kaka ntumua yango, tubaka na kibakala nionso ti: ‘Mambu yina bakena kubanga, beno banga yau ve, beno bulungana mpe ve.’ (1 Pi. 3:14) Bampova ya Petelo kena kukindisa beto ti beto lenda nunga kubanga bantu.

8. Yinki lenda sadisa beto beto nunga kubanga bantu? (1 Piere 3:15)

⁸ Yinki lenda sadisa beto na kununga kubanga bantu? Petelo metubila beto: ‘Beno santisa Klisto lokola Mfumu na bantima na beno.’ (Tanga 1 Piere 3:15.) Beto lenda bambuka beto mosi ti Yesu Klisto kele Ntinu na beto mpe yandi kele na kilendo ya nene. Kana nge kena kubanga ntangu diluaku memonana ya kutubila muntu nsangu ya mbote, kanisa Ntinu na beto. Mona yandi yandi kena kuyala na dizulu pembeni ya bamilion ya bambasi. Zaba ti yandi kele na ‘kimfumu nionso na dizulu mpe na ntoto’ mpe yandi kevuanda ‘kintuadi na [nge] bilumbu nionso tii na nsuka ya mambu ya ntangu yayi.’ (Mat. 28:18-20) Petelo mekindisa beto na kuvuanda ‘ntangu nionso ya kukubama’ samu na kukotila kuminu na beto. Nge kesepela kupesa kimbangi na kisalu, na ekole to na kisika yankaka? Kanisa ntete na ntangu yina nge kevuanda na dikoki ya kusala yau, mpe na manima bongisa mambu yina nge ketuba. Sambila samu na kulomba kibakala, mpe tula ntima ti Yehova kesadisa nge, samu nge nunga kubanga bantu.​—Bis. 4:29.

9. Na diluaku mosi yinki mutindu Petelo konduaka kumonisa nzola? (Tala diaka foto.)

⁹ Petelo longukaka mutindu ya kumonisa nzola. Yandi vuandaka vana ntangu Yesu tubaka: ‘Munu kena kupesa beno nsiku mosi ya yimpa, ti beno zolanaka beno na beno; mutindu kaka munu zolaka beno, beno diaka beno zolanaka beno na beno.’ (Yoa. 13:34) Atako plina, Petelo mangaka kudia kintuadi na bampangi na yandi ya babakala mpe ya banketo yina vuandaka ve Bayuda, samu yandi vuandaka banga Baklisto yina vuandaka Bayuda. Ntumua Paulo bokidilaka mambu yina Petelo salaka “luvunu.” (Bag. 2:11-14) Petelo ndimaka nsembolo yango mpe yandi bakaka malongi na yau. Na mikanda na yandi zole, yandi sonikaka ti beto fueti mona kaka ve ti beto kele na nzola samu na bampangi na beto ya babakala mpe ya banketo, kasi beto fueti monisa nzola yango.

10. Yinki kesadisaka beto na kumonisa ‘nzola ya kedika ya kimpangi’? (1 Piere 1:22)

¹⁰ Petelo metuba ti beto fueti vuanda na ‘nzola ya kedika ya kimpangi’ samu na bampangi na beto ya kimvuka. (Tanga 1 Piere 1:22.) Beto kevuanda na nzola ya mutindu yina kana beto kena kuzitisa malongi nionso yina beto kena kulonguka na ‘kedika.’ Kedika yango mesangisa dilongi yina ketubaka ‘Nzambi keponaponaka ve.’ (Bis. 10:34, 35) Beto lenda zitisa ve nsiku ya Yesu yina metadila nzola kana beto kena kumonisa nzola na ndambu ya bantu ya kimvuka kasi na bantu yankaka ve. Ya kedika, beto lenda kukimona penepene ya bampangi yankaka, mutindu yavuandaka samu na Yesu. (Yoa. 13:23; 20:2) Kasi Petelo mebambula beto ti, beto fueti nuana samu na kuvuanda na ‘nzola ya kimpangi’​—kukangama mosi ya ngolo lokola dibuta—​samu na bampangi na beto nionso ya babakala mpe ya banketo.​—1 Pi. 2:17.

11. Yinki zola monisa ‘kuzola [bantu yankaka] ngolo na ntima ya mvimba’?

¹¹ Petelo kindisaka beto beto “zolana ngolo na ntima ya mvimba.” Na kikapu yango, kuzola “ngolo” zola monisa kuzola muntu ata kana yakele mpasi kumonisina yandi nzola. Na kifuani, yinki beto kesala kana mpangi mosi meluadisa beto na mutindu mosi to yankaka? Na ebandeli beto lenda vuanda na nsatu ya kusadila yandi mambu mutindu yandi sadilaka beto na kisika ya kumonisina yandi nzola. Nzokande, Petelo longukaka na Yesu ti kuvutula yimbi kesepedisaka Nzambi ve. (Yoa. 18:10, 11) Petelo sonikaka: ‘Beno vutula ve yimbi na yimbi to kufinga na kufinga. Kasi, beno sakumuna.’ (1 Pi. 3:9) Kana nge kele na nzola ya ngolo, nge kevuanda na kimpombo ata na bantu yina salaka nge mpasi.

12. (a) Nzola ya ngolo kesadisa beto diaka na kusala yinki? (b) Mutindu video Batelá likabo kitoko—Bomoko na biso memonisa yau, beto kesala ngolo ya kusala yinki?

¹² Na mukanda na yandi ya ntete, Petelo mesadila bampova ‘nzola ya ngolo.’ Nzola ya mutindu yina kefukaka kaka ve masumu fioti, kasi “masumu mingi.” (1 Pi. 4:8) Mbala yankaka Petelo kanisaka dilongi yina Yesu pesaka yandi na diambu metadila kunlemvukila bamvula mingi na ntuala. Na ntangu yango, kondua ntembe Petelo vuandaka kanisa ti yandi vuandaka muntu ya mbote ntangu yandi tubaka ti yandi kenlemvukila mpangi na yandi ‘mbala nsambuadi.’ Kasi Yesu longaka yandi​—mpe beto—​na kunlemvukila “mbala 77,” yazola monisa kondua nsuka. (Mat. 18:21, 22) Kana nge kemonaka mpasi kusadila dilongi yango, kulemba nzutu ve! Yavuandaka ntangu yankaka mpasi na bisadi ya Yehova nionso ya kukondua kukoka na kunlemvukila. Diambu meluta mfunu ntangu yayi samu na nge kele kusala nionso yina nge lenda samu na kunlemvukila mpangi na nge mpe kutula kiyenge na yandi. c

13. Yinki lenda sala ti yavuanda mpasi samu na bankulutu na kutanina bampangi na bau?

¹³ Kondua ntembe Petelo zimbakanaka ata fioti ve mambu yina Yesu tubilaka yandi na manima ya kufutumuka: ‘Tanina mameme na munu ya fioti.’ (Yoa. 21:16) Kana nge kele nkulutu nge mezaba ti bampova yango metadila diaka nge. Kasi yalenda vuanda mpasi samu na nkulutu, na kubaka ntangu ya kukokisa kiyekua yango ya mfunu. Bankulutu fueti tanina ntete mabuta na bau na kinsuni, na makanisi, mpe na kimpeve. Bakevuandaka diaka na vema na kisalu ya kusamuna, na kubongisa mpe na kusala masolo na balukutakanu, mpe na balukutakanu ya nene. Bayankaka kele bampangi ya Komite samu na kusosa lusadusu ya munganga to na departema ya LDC. Bankulutu kevuandaka mpenza na mambu mingi ya kusala!

14. Yinki lenda tinda bankulutu na kutanina mameme? (1 Piere 5:1-4)

¹⁴ Petelo kindisaka bampangi na yandi bankulutu na ‘kutanina mameme ya Nzambi.’ (Tanga 1 Piere 5:1-4.) Kana nge kele nkulutu, beto mezaba ti nge kezolaka bampangi na nge ya babakala mpe ya banketo mpe nge kele na nsatu ya kutanina bau. Kasi, na bantangu yankaka nge lenda kukimona lokola nge kele na mambu mingi ya kusala to nge kele ya kulemba nzutu samu na kukokisa kiyekua yango. Yinki nge lenda sala? Tubila Yehova mutindu nge kena kukimona. Petelo sonikaka: ‘Kana muntu kena kusadila bayankaka, yandi sala yau na lusadusu ya ngolo yina Nzambi kepesaka.’ (1 Pi. 4:11) Bampangi na nge ya babakala mpe ya banketo lenda kutana na mambu ya mpasi yina balenda bakila ve solision na yinza yayi. Zaba ti ‘mvungi ya nene’ Yesu Klisto lenda sadisa bau na mutindu ya mbote kuluta muntu nionso yankaka. Yandi lenda sala yau bubu yayi, mpe na yinza ya yimpa. Nzambi kena kulomba kaka bankulutu na kuzola bampangi na bau, na kutanina bampangi na bau, mpe na kukuma ‘bifuani samu na mameme.’

15. Yinki mutindu nkulutu mosi ketaninaka mameme? (Tala diaka foto.)

¹⁵ William, yina mezingila lokola nkulutu, kezabaka mfunu ya kutanina mameme. Ntangu COVID-19 bandaka, yandi mpe bankundi na yandi bankulutu yankaka, bakaka lukanu ya kubokila konso sabala muntu nionso ya grupe yina bapesaka yandi. Yandi mesasila mfunu yina bavuandaka sala mutindu yina: “Bampangi mingi  vuandaka bau mosi na yinzo mpe balendaka kuma na makanisi ya yimbi na nsualu.” Kana mpangi mosi kena kukutana na mambu ya mpasi, William kekuwaka na dikebi samu na kuzaba bansatu na yandi mpe mitungisi na yandi. Na manima, yandi kesosaka mikanda to bavideo na site na beto yina yandi lenda sadila samu na kukindisa mpangi yango. Yandi metuba: “Kutanina mameme kele na mfunu mingi bubu yayi kuluta. Beto kesalaka bangolo mingi samu na kusadisa bantu balonguka mambu ya Yehova; beto fueti sala kaka bangolo ya mutindu yina samu na kutanina mameme, na kusadisaka mameme ya Yehova babikana na kedika.”

16. Na yinki mitindu beto lenda sadila malongi yina beto mebaka na mikanda ya Petelo?

¹⁶ Beto metubila kaka ndambu ya malongi yina kele na mikanda zole ya Petelo. Mbala yankaka nge memona kisika yina nge kele na nsatu ya kubongisa. Na kifuani, nge kesepela kuyindulaka na mpinda mbala na mbala na balusakumunu yina kena kuiza na yinza ya yimpa? Nge mekukitudila lukanu ya kupesa kimbangi na kisalu, na ekole to na kisika yankaka? Nge kena kumona mitindu yina nge lenda monisa nzola ya ngolo mingi kuluta na bampangi? Bankulutu, beno kele na nzengolo ya kuvuanda pene mpe na nsatu ya ngolo ya kutanina mameme ya Yehova? Kukiyuvusa mutindu yina na kedika nionso lenda monisa ti nge kele na mua babulembu, kasi kulemba nzutu ve. “Mfumu kele ntima ya mbote,” mpe yandi kesadisa nge nge bongisa. (1 Pi. 2:3) Petelo mendimisa beto ti: ‘Nzambi . . . kemanisa kubongisa beno. Yandi kekumisa beno ngui, yandi kekumisa beno ngolo, yandi ketula beno lokola fondasion ya ngolo.’​—1 Pi. 5:10.

17. Kana beto metatamana kusadila Yehova mpe beto mebika yandi manisa kubongisa beto, yinki mambote beto kebaka?

¹⁷ Petelo kukimonaka ntete lokola yandi bonga ve kuvuanda na ntuala ya Muana ya Nzambi. (Luka 5:8) Kasi na lusadusu ya nzola ya Yehova mpe ya Yesu, Petelo tatamanaka kusala lokola nlonguki ya Klisto. Yau salaka ti Yehova pesa Petelo nzila ya kukota ‘na Kimfumu ya mvula na mvula ya Mfumu mpe Mvuluzi na beto Yesu Klisto.’ (2 Pi. 1:11) N’sendo mosi ya kitoko mpenza! Kana nge metatamana kusadila Yehova lokola Petelo, mpe nge mebika Yehova bongisa nge, nge diaka nge kebaka n’sendo ya luzingu ya mvula na mvula. Nge ‘kekokisa lukanu ya kiminu na [nge], luvuluzu na [nge].’​—1 Pi. 1:9.