1-2. Yinki kepesaka bisadi ya Nzambi kiese? (Yakobo 1:22-25)

 YEHOVA mpe Muana na yandi ya nzola kezolaka beto vuanda na kiese. Nsoniki ya Nzembo 119:2 metuba: ‘Kiese na bantu yina kena kuzitisa makundoli ya Yehova, bantu yina kena kusosa yandi na ntima na bau ya mvimba.’ Yesu pesaka nsilulu yankaka na kutubaka ti: “Kiese nde na bantu yina kena kuwa mpova ya Nzambi mpe kena kuzitisa yau!”​—Luka 11:28.

² Lokola beto kele bisadi ya Yehova, beto kele na dibuta mosi ya kiese. Samu na yinki? Beto kele na bamfunu mingi, kasi mosi ya bamfunu yango kele ti beto ketangaka mbala na mbala Mpova ya Nzambi mpe beto kesalaka nionso yina beto lenda samu na kusadila mambu yina beto kelongukaka.​—Tanga Yakobo 1:22-25.

3. Yinki mambote beto kebakaka ntangu beto kesadilaka mambu yina beto ketangaka na Mpova ya Nzambi?

³ Yakele na mitindu mingi yina beto kebakaka mambote ntangu beto ‘kezitisaka ntangu nionso mpova ya Nzambi.’ Na kifuani, beto mezaba ti yakele diambu mosi ya mfunu samu na kusepedisa Yehova. Kuzaba yau kepesaka beto kiese. (Mos. 12:13) Ntangu beto kesadilaka mambu yina beto ketangaka na Mpova ya Nzambi yina mepemama, beto kekumisaka nguizani na beto ngolo na bantu ya dibuta na beto mpe na bampangi na beto ya kimvuka. Kondua ntembe, diambu yango monanaka ti yakele kedika na luzingu na nge. Katula yau, beto kekutanaka ve na mambu mingi ya mpasi yina kekuminaka bantu yina kemangaka kuzitisa bantumu ya Yehova. Ya kedika, beto kendimaka diambu yina Ntinu Davidi tubaka. Na manima ya kutubila nsiku, bantumu, mpe bansambusulu ya Yehova na muyimbu mosi, yandi sukisaka na kutubaka: ‘Kuzitisa yau, kele na mambote mingi.’​—Nz. 19:7-11.

4. Samu na yinki yakevuandaka ntangu nionso pete ve na kuzitisa ntangu nionso mambu yina beto ketangaka na Mpova ya Nzambi?

⁴ Ya kedika, yakevuandaka ntangu nionso pete ve samu na beto na kuzitisa ntangu nionso Mpova ya Nzambi. Atako beto kevuandaka  na mambu mingi ya kusala na luzingu na beto, beto fueti bakaka ntangu ya kutanga mpe ya kulonguka Biblia samu beto bakusa mambu yina Yehova zola beto sala. Na yau bika beto tadila ndambu ya mambu yina lenda sadisa beto samu beto tangaka yau mbala na mbala. Beto ketadila diaka mambu yina lenda sadisa beto samu beto kanisa na zulu ya mambu yina beto kena kutanga, mpe beto kemona mutindu beto lenda sadila mambu yina beto kena kulonguka na luzingu na beto.

BAKAKA NTANGU SAMU NA KUTANGA MPOVA YA NZAMBI

5. Yinki kele biyekua yina kebakaka beto ntangu mingi?

⁵ Bisadi mingi ya Yehova kevuandaka na mambu mingi ya kusala na luzingu. Beto kelutisaka ntangu mingi samu na kukokisa mambu yina Biblia metuba ti yakele mfunu. Na kifuani, mingi kati na beto kesalaka kisalu ya kinsuni samu na kukokisa bansatu na beto ya kinsuni mpe bansatu ya mabuta na beto. (1 Tim. 5:8) Baklisto mingi ketaninaka bampangi na bau ya dibuta yina kena kubela to yina mepusana na bamvula. Mpe beto nionso beto fueti tanina mavimpi na beto mosi, diambu yina kebakaka ntangu mingi. Katula biyekua yango, beto kele diaka na biyekua na kimvuka. Mosi ya biyekua yina meluta mfunu kele kukipesa na vema nionso na kisalu ya kusamuna. Na kutadila biyekua nionso yina nge kele na yau, yinki mutindu nge lenda baka ntangu ya kutanga Biblia mbala na mbala, ya kuyindula na mpinda na zulu ya mambu yina nge kena kutanga, mpe ya kusadila mambu yango?

6. Yinki mutindu nge lenda tula ntangulu ya Biblia na kisika ya ntete? (Tala diaka foto.)

⁶ Kutanga Biblia kele mosi ya “mambu yina meluta mfunu” samu na beto Baklisto, na yau beto fueti tula yau na kisika ya ntete. (Flp. 1:10) Samu na kutubila muntu ya kiese, muyimbu ya ntete na mukanda ya Nzembo metuba: “Yandi kesepelaka na nsiku ya Yehova, mpe yandi ketangaka nsiku na Yandi na ndinga ya yinsi mpipa muini.” (Nz. 1:1, 2) Yakele puelele, yazola monisa ti beto fueti bakaka ntangu ya kutanga Biblia. Yinki kele ntangu yina meluta mbote samu na kutanga Biblia? Mvutu lenda vuanda ya kusuasana samu na mosimosi kati na beto. Kasi diambu ya mfunu kele ti beto fueti pona ntangu yina kesadisa beto samu  beto tangaka Biblia mbala na mbala. Mpangi mosi ya bakala na nkumbu ya Victor metuba: “Munu kesepelaka kutanga Biblia na sunka. Atako munu kesepelaka ve kulamuka na sunka ya ngolo, yakevuandaka ntangu yina mambu lenda katula dikebi na munu kevuandaka mingi ve. Makanisi na munu kevuandaka mbote mpe yakevuandaka pete samu na munu na kutula dikebi na mambu yina munu kena kutanga.” Yakele mutindu yina samu na nge? Kukiyuvusa, ‘Yinki kele ntangu yina meluta mbote samu na munu na kutanga Biblia?’

YINDULAKA NA MPINDA NA ZULU YA MAMBU YINA NGE KENA KUTANGA

7-8. Yinki lenda sala ti beto bika baka mpenza mambote na mambu yina beto kena kutanga? Pesa kifuani.

⁷ Nzokande, diambu ya kedika kele ti beto lenda tangaka mbala na mbala mambu mingi kondua ti beto kanga mpenza mfunu na yau. Nge metangaka deja diambu mosi mpe ntangu fioti na manima nge kena kubambuka diaka ve na diambu yina nge metanga? Diambu yango mekuminaka deja beto nionso. Diambu ya kiadi, yalenda vuanda mutindu yina samu na ntangulu na beto ya Biblia. Mbala yankaka beto kukitudilaka lukanu ya kutanga bikapu mingi ya Biblia konso kilumbu. Yakele diambu ya mbote. Beto fueti kukitudila balukanu mpe beto fueti sala ngolo samu na kukokisa yau. (1 Ko. 9:26) Kasi, kutanga Biblia kele ebandeli​—yakele diambu ya mbote, kasi yakele kaka ebandeli. Yakelombaka mambu mingi kana beto zola bakila ntangulu na beto ya Mpova ya Nzambi mambote.

⁸ Kanisa na kifuani yayi: Mbala mingi, maza ya mvula kevuandaka na mfunu samu na luzingu. Kasi kana bamvula menoka mingi samu na ntangu mosi ya nkufi, ntoto lenda fuluka na maza. Kana diambu ya mutindu yina mesalama, bamvula yango mingi kenata ve mambote mingi. Ntoto kevuandaka na nsatu ya ntangu samu na kubenda maza ya mvula yina menoka mpe kusala ti yabutisa bima. Mutindu mosi, beto fueti tangaka ve Biblia na zuluzulu, yazola tuba nsualunsualu na mutindu yina kesala ti beto bika kanga mfunu na yau, beto bika bambukila yau, mpe beto sadila ve mambu yina beto kena kutanga.​—Yak. 1:24.

9. Yinki beto fueti sala kana beto kudisaka kikadulu ya kutanga Biblia nsualunsualu?

⁹ Nge kemonaka ti na bantangu yankaka yakekuminaka nge nge tanga Biblia na nsualunsualu?  Yinki nge fueti sala? Tangaka malembemalembe. Sala ngolo samu na kukanisa na zulu ya mambu yina nge kena kutanga to mambu yina nge mekatuka kutanga. Sala ti yabika vuanda mpasi samu na nge. Kana nge kemonaka ti kuyindula na mpinda kele mpasi samu na nge, zaba ti kuyindula na mpinda zola monisa kaka kukanisa mbotembote na zulu ya mambu yina nge metanga. Nge lenda baka nzengolo ya kukumisa ntangu na nge ya ndongokolo yinda samu nge baka ntangu ya kukanisa to ya kuyindula na mpinda. Na ndambu yankaka, nge lenda pona kutanga baverse fioti samu na kusadila ntangu yina mebikana samu na kukanisa na zulu ya mambu yina nge tangaka. Victor yina beto tubilaka na ebandeli metuba: “Munu kumisaka ntangulu na munu ya Biblia nkufi, mbala yankaka munu vuandaka tanga kaka kikapu mosi. Lokola munu ketangaka na sunka ya ngolo, munu kevuandaka na dikoki ya kutatamana kukanisa na zulu ya mambu yina munu metanga kilumbu ya mvimba.” Yavuanda yinki mayele nge kesadilaka, yakele na mfunu kutanga na mutindu yina kesadisa nge nge baka ntangu ya kukanisa na zulu ya mambu yina nge kena kutanga.​—Nz. 119:97; tala diaka ankadre “ Biuvu ya kutadila.”

10. Pesa kifuani yina kena kumonisa mutindu nge lenda sadila mambu yina nge kena kulonguka. (1 Batesaloniki 5:17, 18)

¹⁰ Yavuanda yinki ntangu nge kesalaka ntangulu na nge ya Biblia mpe ntangu yikua nge kelutisaka na kusala yau, sala ngolo ya kusosa mitindu ya kusadila mambu yina nge ketangaka. Ntangu nge kena kutanga kitini mosi ya Mpova ya Nzambi, kukiyuvusa, ‘Yinki mutindu munu lenda sadila bubu yayi to na bilumbu kena kuiza mambu yina munu melonguka?’ Na kifuani, kanisa ti nge metanga 1 Batesaloniki 5:17, 18. (Tanga.) Na manima ya kutanga baverse yango zole, nge lenda telema mpe kukanisa mbala yikua nge kesambilaka mpe kana bisambu na nge kevuandaka ya mpinda. Diaka, nge lenda kanisa na zulu ya mambu yina nge kele na butondi samu na yau. Mbala yankaka nge lenda baka nzengolo ya kupesa Yehova matondo samu na mambu tatu ya sikisiki. Ata kana nge mebaka ntangu fioti samu na kukanisa na zulu ya malongi yina nge mebaka na Biblia, yalenda sadisa nge nge bakusa Mpova ya Nzambi mpe nge sadila mambu yina yametuba. Kanisa na mambote yina nge kebaka kana nge kena kusala mutindu yina konso kilumbu na bitini nionso ya Biblia yina nge kena kutanga! Ee, nge kekuma mpenza muntu yina kezitisaka ntangu nionso Mpova ya Nzambi. Kasi yinki nge fueti sala kana yakele na mambu mingi yina nge fueti bongisa?

KUKITUDILA BALUKANU YINA KELE NA MAKOKI NA NGE

11. Samu na yinki na bantangu yankaka beto lenda mona mpasi kusala bansobolo? Pesa kifuani.

¹¹ Kana nge kena kutanga Biblia mpe nge kena kusosa mitindu ya kusadila lutuadusu na yau, mbala yankaka nge lenda mona ti nge kele na  mambu mingi ya kubongisa. Kanisa na kifuani yayi: Kanisa ti kilumbu mosi ntangulu na nge ya Biblia kele na malongi na diambu metadila kupona bilungi. (Yak. 2:1-8) Nge memona ti nge lenda bongisa mutindu na nge ya kusadila bantu yankaka mambu, na yau nge mebaka nzengolo ya kusala mua bansobolo. Yakele mbote! Na manima, kilumbu melanda nge metanga mua baverse yina memonisa mfunu ya kukenga na bampova na nge. (Yak. 3:1-12) Nge mebakusa ti na diluaku mosi bampova na nge vuandaka ya yimbi. Na yau nge mebaka nzengolo ti nge kebanda kutuba na mutindu ya kukindisa ntangu nge kena kusolola na bantu yankaka. Ntangulu na nge ya Biblia ya kilumbu melanda metubila nduengoso mosi na diambu metadila kukuma nkundi ya yinza. (Yak. 4:4-12) Nge mebakusa ti nge fueti kengaka mpenza samu na mambu yina nge ketangaka, nge ketalaka, mpe nge kekuwaka. Na kilumbu ya yiya, nge lenda kukimona ti yakele mpasi mingi mpenza kusala bansobolo yango nionso.

12. Samu na yinki nge fueti lemba nzutu ve kana ntangulu na nge ya Biblia memonisa ti nge fueti sala bansobolo? (Tala diaka noti na yinsi ya paje.)

¹² Kana yakelomba nge sala bansobolo mingi to nge bongisa mambu mingi, kulemba nzutu ve. Yakele kidimbu yina kena kumonisa ti nge kele na kumikitisa mpe na makanisi ya mbote. Muntu yina kele na kumikitisa mpe ya kukuikama na yandi mosi ketangaka Masonukua na makanisi ya kumona bisika yina yandi fueti bongisa. a Kuzimbakana diaka ve ti, yakelombaka ntangu samu na kuvuata “kimuntu ya yimpa.” (Kol. 3:10) Yinki kesadisa nge nge tatamana kuvuanda muntu yina kezitisaka ntangu nionso Mpova ya Nzambi?

13. Yinki mutindu nge lenda kukitudila mua balukanu yina kele na makoki na nge? (Tala diaka foto.)

¹³ Na kisika ya kusosa kusadila na mbala mosi mambu nionso yina nge kena kutanga, kukitudila balukanu yina kele na makoki na nge.  (Mas. 11:2) Nge lenda meka mayele yayi: Sala liste ya mambu yina nge fueti bongisa, mpe na manima pona mosi to zole kati na mambu yango yina nge kesepela ntete kubanda kubongisa, mpe bongisa mambu yina yankaka na manima. Na yinki mambu nge fueti bandila?

14. Na yinki balukanu nge lenda bandila?

¹⁴ Nge lenda baka nzengolo ya kubanda na lukanu yina meluta pete na kukokisa samu na nge. To nge lenda pona kubongisa diambu mosi yina nge kena kumona ti nge kele mpenza na nsatu ya kubongisa. Ntangu kaka nge memona diambu yina nge fueti bongisa, sosasosa na mikanda na beto, mbala yankaka na kusadilaka Index des publications Watch Tower to na Buku ya bolukiluki mpo na Batatoli ya Yehova. Sambila samu na lukanu na nge, lomba Yehova samu yandi pesa nge “nsatu mpe kilendo ya kusala.” (Flp. 2:13) Na manima sadila mambu yina nge longukaka. Kana nge mekoka kusala nsobolo mosi to kubongisa kikadulu mosi ya Buklisto, yakekindisa nge nge tatamana kusala bansobolo. Mpe yakekuma pete kuluta samu na nge na kusala bansobolo yankaka.

BIKA MPOVA YA NZAMBI ‘SALA KISALU NA KATI NA NGE’

15. Yinki mutindu bisadi ya Yehova kele ya kusuasana na bantu mingi yina ketangaka Biblia? (1 Batesaloniki 2:13)

¹⁵ Bantu yankaka ketubaka ti bametangaka Biblia mbala mingi. Kasi bakendiminaka mpenza Biblia? Bakesadilaka yau to bakebikaka yavuanda na bupusi na luzingu na bau? Ve. Bantu mingi kezitisaka ve malongi ya Biblia. Bakele mpenza ya kusuasana na bisadi ya Yehova! Mutindu mosi na Baklisto ya siekle ya ntete, beto kendiminaka Biblia “mutindu yakele mpenza, lokola mpova ya Nzambi.” Katula yau, beto kesalaka ngolo samu na kusadila malongi ya Biblia na luzingu na beto.​—Tanga 1 Batesaloniki 2:13.

16. Yinki lenda sadisa beto samu beto kuma bantu yina kezitisaka Mpova?

¹⁶ Yakevuandaka ntangu nionso pete ve kutanga mpe kusadila Mpova ya Nzambi. Beto lenda sala bangolo samu na kubaka ntangu ya kutanga. To beto lenda tanga Biblia na nsualu mpe kukondua kubaka ntangu ya kukanisa na zulu ya mambu yina beto kena kutanga. To beto lenda mona ti yakele mpasi mingi kusala bansobolo yina yamelomba beto sala. Yavuanda yinki diambu ya mpasi nge lenda vuanda na yau, nge lenda nunga yau. Na lusadusu ya Yehova, nge lenda nunga yau. Beto vuanda na nzengolo ya kundima lusadusu na yandi mpe beto vuanda ve bantu yina kezimbakanaka mambu yina bamekuwa, kasi bantu yina kezitisaka Mpova. Kondua ntembe, kana beto kena kutanga Mpova ya Nzambi mpe beto kena kusadila yau na luzingu na beto, beto kevuanda na kiese mingi.​—Yak. 1:25.