1. Yinki Yesu kesala ntama mingi ve?

 BETO kena kuzinga na ntangu mosi yina bansobolo ya nene kena kusalama! Ntama mingi ve, Yesu kesambisa bantu nionso yina kezingaka na ntoto. Yesu tubilaka mambu yina kesalama na yinza tekila yandi banda nsambusulu yango. Yandi pesaka banlonguki na yandi “kidimbu” ya kuvuanda na yandi mpe ya “nsungi ya nsuka ya yinza.” (Mat. 24:3) Mbikudulu yango kele na Matai kikapu 24 mpe 25, na Marko kikapu 13 mpe na Luka kikapu 21.

2. Yinki beto ketubila na disolo yayi, mpe samu na yinki yakesadisa beto?

² Yesu pesaka banduengoso ya mfunu na nzila ya bifuani tatu. Yakele kifuani ya mameme mpe bankombo, kifuani ya banketo ya mayele mpe bazoba yina zabaka ntete ve babakala, mpe kifuani ya batalanta. Konso kifuani kesadisa beto na kubakusa ti Yesu kesambisa konso muntu na kutadila mambu yina yandi kesalaka. Ntangu beto kena kutadila bifuani yango, beto mona malongi mpe mutindu beto lenda sadila yau. Kifuani ya ntete yina beto ketubila kele kifuani ya mameme mpe bankombo.

MAMEME MPE BANKOMBO

3. Yinki ntangu Yesu kesambisa bantu?

³ Na kifuani ya mameme mpe bankombo, Yesu metubila nsambusulu ya bantu yina vuandaka na diluaku ya kuwa nsangu ya mbote mpe ya kupesa bampangi na yandi maboko. (Mat. 25:31-46) Na ntangu ya “mpasi ya nene,” yandi kesala nsambusulu yango tekila Armagedoni banda. (Mat. 24:21) Kaka mutindu mvungi kekabulaka mameme mpe bankombo, Yesu kekabula bantu yina pesaka maboko na kukuikama nionso na banlonguki na yandi yina metulua mafuta na kimpeve mpe bantu yina pesaka bau ve maboko.

4. Na kutadila Yisaya 11:3, 4, samu na yinki beto lenda ndimisama ti Yesu kesambisa bantu na kukuikama nionso? (Tala diaka ya kuvertire.)

⁴ Biblia memonisa ti lokola Yesu kele Zuzi yina Yehova ponaka, yandi kesambisa na lunungu. (Tanga Yisaya 11:3, 4.) Yandi ketala  ndiatulu, bikadulu, mpe bampova ya bantu, buela diaka mutindu bakena kusadila bampangi na yandi yina metulua mafuta na kimpeve mambu. (Mat. 12:36, 37; 25:40) Yesu kezaba bantu yina pesaka maboko na bampangi na yandi yina metulua mafuta na kimpeve mpe kisalu na bau. a Mosi ya mitindu ya mfunu yina muntu lenda pesa bampangi ya Klisto maboko kele na kusadisaka bau na kisalu ya kusamuna. Yesu ketadila bantu yina kepesaka lusadusu yango lokola “bantu ya lunungu” mpe bakevuanda na dikoki ya kubaka luzingu ya mvula na mvula na ntoto. (Mat. 25:46; Em. 7:16, 17) N’sendo mosi ya kitoko samu na bantu yina ketanina kukuikama na bau! Na kubikanaka ya kukuikama na ntangu ya mpasi ya nene mpe na manima na yau, baketanina bankumbu na bau na “mukanda ya luzingu.”​—Em. 20:15.

5. Yinki dilongi beto mebaka na kifuani ya mameme mpe bankombo, mpe banani fueti tudila yau dikebi?

⁵ Monisa ti nge kele muntu ya kukuikama mpe ya lunungu. Kifuani ya Yesu ya mameme mpe bankombo kena kutubila ntetentete bantu yina kele na kivuvu ya kuzinga na ntoto. Bamonisaka kiminu na bau kaka ve na kupesaka bampangi ya Klisto maboko na kisalu ya kusamuna kasi bandimaka diaka na kukuikama nionso kulanda lutuadusu ya mua grupe ya bampangi yina metulua mafuta na kimpeve yina Yesu ponaka. (Mat. 24:45) Kasi bantu yina diaka kele na kivuvu ya kuzinga na dizulu fueti tula dikebi na nsangu ya nduengoso ya kifuani yango. Samu na yinki? Samu Yesu ketalaka ndiatulu na bau, bikadulu na bau, mpe bampova na bau. Bau diaka bafueti monisa kukuikama. Ya kedika, Yesu pesaka bifuani yankaka zole yina kele na banduengoso ya sikisiki samu na Baklisto yina metulua mafuta na kimpeve. Bifuani yango kele diaka na Matai kikapu 25. Beto tadila kifuani ya banketo ya mayele mpe bazoba yina zabaka ntete ve babakala.

BANKETO YA MAYELE MPE BAZOBA YINA ZABAKA NTETE VE BABAKALA

6. Yinki mutindu banketo 5 yina zabaka ve babakala monisaka ti bavuandaka mayele? (Matai 25:6-10)

⁶ Na kifuani ya banketo yina zabaka ntete ve babakala, Yesu tubilaka banketo 10 yina zabaka ntete ve babakala yina kuendaka kutana na bakala ya dikuela. (Mat. 25:1-4) Bau nionso bavuandaka na kivuvu ya kukuenda na bakala ya dikuela na feti na yandi ya dikuela. Yesu tubilaka 5 kati na banketo yango lokola banketo ya “mayele” mpe 5 yankaka lokola banketo ya “bazoba.” Banketo yango ya mayele yina zabaka ntete ve babakala kukibongisaka mpe bavuandaka ya kukenga. Bavuandaka ya kubongama samu na kuvingila bakala ya dikuela yavuanda yinki ntangu yandi kekuiza, ata kana yandi kekuiza na mpipa ya ngolo. Na yau, banataka minda ya mafuta samu yapesa bau kukia na kitombe. Banataka ata mpe mafuta yankaka na pembeni samu mbala yankaka bakala ya dikuela kezingila samu na kukuiza. Na yau bakukibongisaka samu na kutanina minda na bau ya kupela. (Tanga Matai 25:6-10.) Ntangu bakala yango ya dikuela kuizaka, banketo ya mayele yango yina zabaka ve babakala kuendaka kintuadi na yandi na feti ya dikuela. Mutindu mosi, Baklisto yina metulua mafuta na kimpeve yina monisaka ti bavuandaka ya kubongama na kubikanaka ya kukenga mpe ya kukuikama tii ntangu Klisto kekuiza, kebaka n’sendo ya kukuenda kutana na Bakala ya dikuela, Yesu, na Kimfumu na yandi na dizulu. b (Em. 7:1-3) Bosi samu na banketo 5 ya bazoba yina zabaka ve babakala?

7. Yinki mambu kuminaka banketo 5 yango ya bazoba yina zabaka ve babakala, mpe samu na yinki?

 ⁷ Na lusuasanu na banketo ya mayele yina zabaka ve babakala, banketo 5 ya bazoba yina zabaka ve babakala vuandaka ve ya kubongama ntangu bakala ya dikuela kuizaka. Minda na bau vuandaka pene ya kuzima, mpe banataka ve mafuta yankaka na pembeni. Ntangu bakuwaka ti bakala ya dikuela zola kuiza, yalombaka bakuenda sumba mafuta. Bakukivutukilaka ve ntangu bakala ya dikuela kuizaka. Na ntangu yango, “banketo yina zabaka ve babakala yina kukibongisaka bakotaka na yandi na feti ya dikuela, mpe porte kangamaka.” (Mat. 25:10) Na manima ntangu banketo ya bazoba yina zabaka ve babakala kuizaka mpe vuandaka na nsatu bakota, bakala ya dikuela tubilaka bau: “Munu zaba beno ve.” (Mat. 25:11, 12) Banketo yango yina zabaka ve babakala vuandaka ve ya kubongama samu na kuvingila bakala ya dikuela samu na ntangu mosi ya yinda. Yinki kele dilongi samu na Baklisto yina metulua mafuta?

8-9. Yinki dilongi Baklisto yina metulua mafuta na kimpeve lenda baka na kifuani ya banketo yina zabaka ve babakala? (Tala diaka foto.)

⁸ Monisa ti nge kele ya kubongama mpe ya kukenga. Yesu tubaka ve ti yakevuanda na bagrupe zole ya Baklisto yina metulua mafuta na kimpeve​—yina mosi na yau kukibongisaka samu na kuvingila tii na nsuka ya yinza yayi mpe yankaka kukibongisaka ve. Kasi, yandi vuandaka sasila mambu yina kekumina Baklisto yina metulua mafuta na kimpeve kana bakele ve ya kubongama samu na kukanga ntima na kukuikama nionso tii na nsuka. Kana bakele ve ya kubongama, bakebaka ve n’sendo na bau. (Yoa. 14:3, 4) Yafueti tinda beto na kukanisa! Yavuanda kana beto kele na kivuvu ya kuzinga na dizulu to na ntoto, beto nionso beto fueti tula mpenza dikebi na nduengoso ya kifuani ya banketo yina zabaka ve babakala. Konso muntu kati na beto fueti tatamana kuvuanda ya kukenga mpe ya kubongama, pene ya kukanga ntima tii na nsuka.​—Mat. 24:13.

⁹ Na manima ya kutubila kifuani ya banketo yina zabaka ve babakala mpe kumonisa mfunu ya kuvuanda ya kubongama mpe ya kukenga, Yesu tubilaka kifuani ya batalanta. Kifuani yango kena kumonisa puelele mfunu ya kuvuanda muntu yina kesalaka kisalu ya ngolo.

 BATALANTA

10. Yinki mutindu bananga zole monisaka kukuikama? (Matai 25:19-23)

¹⁰ Na kifuani ya batalanta, Yesu tubilaka bananga zole yina vuandaka ya kukuikama na mfumu na bau mpe nanga mosi yina vuandaka ve ya kukuikama. (Mat. 25:14-18) Bananga yango zole monisaka kukuikama na bau na kusalaka kisalu ya ngolo samu na kubuela mbongo ya mfumu na bau. Tekila mfumu yango sala vuayaje na buala ya kinzenza, yandi bikilaka bau batalanta​—ntalu mosi ya mbongo mingi. Bananga yango zole ya kukuikama salaka kisalu ya ngolo mpe basadilaka mbongo yina babikilaka bau na nduenga nionso. Yinki mambu yabimisaka? Ntangu mfumu na bau vutukaka, babuelaka mbala zole mbongo yina yandi bikilaka bau. Mfumu yango pesaka bau felisitasion​—mpe ‘basepelaka kintuadi na mfumu na [bau].’ (Tanga Matai 25:19-23.) Kasi yinki salamaka samu na nanga yina ya tatu? Yinki yandi sadilaka mbongo yina mfumu na yandi pesaka yandi?

11. Yinki mambu kuminaka nanga ya “molo,” mpe samu na yinki?

¹¹ Nanga ya tatu bakaka talanta mosi kasi yandi vuandaka “molo.” Mfumu na yandi vuandaka kukivingila ti yandi sadila talanta yango na mutindu ya mbote. Kasi, yandi suekaka yau na ntoto. Ntangu mfumu yango vutukaka, nanga yango vutudilaka yandi kaka talanta mosi. Nanga yango vuandaka ve na makanisi ya mbote. Na kisika yandi lomba nlemvo lokola yandi kokaka ve kukumisa mbongo ya mfumu na yandi mingi, nanga yango bokidilaka mfumu na yandi na mutindu yina bonga ve, “muntu ya matata.” Nanga yango ndimamaka ve na mfumu na yandi. Katula yau, bazionaka yandi talanta yango mpe bakukaka yandi na yinzo ya mfumu.​—Mat. 25:24, 26-30.

12. Bananga zole ya kukuikama kena kumonisa banani bubu yayi?

¹² Bananga zole ya kukuikama kena kumonisa Baklisto yina metulua mafuta na kimpeve. Mfumu, yazola tuba Yesu, mebokidisa bau ‘bakuiza sepela kintuadi na mfumu na [bau].’ Bakena kubaka n’sendo na bau ya dizulu, mfutumukunu ya ntete. (Mat. 25:21, 23; Em. 20:5b) Na ndambu yankaka, kifuani ya yimbi ya nanga ya molo kena kupesa nduengoso na Baklisto yina metulua mafuta na kimpeve. Na yinki mutindu?

13-14. Yinki dilongi Baklisto yina metulua mafuta na kimpeve mebaka na kifuani ya batalanta? (Tala diaka foto.)

 ¹³ Monisa ti nge kele muntu yina kesalaka kisalu ya ngolo. Na kifuani ya batalanta, mutindu mosi na kifuani ya banketo yina zabaka ve babakala, Yesu vuandaka samuna ve ti Baklisto yina metulua mafuta na kimpeve kekuma bamolo. Kasi, yandi vuandaka sasila diambu yina kesalama kana bamezimbisa vema na bau. Bakekoka diaka ve kutanina “mbokodoso mpe kuponama [na bau],” mpe bakevuanda diaka ve na diluaku ya kukota na Kimfumu ya dizulu.​—2 Pe. 1:10.

¹⁴ Kifuani ya Yesu ya banketo yina zabaka ve babakala mpe ya batalanta memonisa puelele ti Baklisto nionso yina metulua mafuta na kimpeve fueti vuanda ya kubongama mpe ya kukenga, mpe bafueti vuanda bantu yina kesalaka kisalu ya ngolo. Kasi Yesu tubaka ata diambu mosi ve samu na kuluengisa Baklisto yina metulua mafuta na kimpeve? Ee, yandi luengisaka bau! Beto lenda mona nduengoso yango na mambu yina Yesu tubaka na Matai 24:40, 41.

NANI YINA ‘BAKEBAKA’?

15-16. Yinki mutindu Matai 24:40, 41 kena kusadisa Baklisto yina metulua mafuta na kimpeve na kumona ti bafueti tatamana kukenga?

¹⁵ Tekila Yesu tubila bifuani yango tatu, yandi tubilaka nsambusulu ya nsuka ya Baklisto yina metulua mafuta na kimpeve, yina kemonisa kana banani mendimama kati na bau. Yandi tubilaka babakala zole yina kena kusala na bilanga mpe banketo zole yina kena kusala na kinikunu ya maboko. Na kifuani mosimosi, yamemonana ti bantu yango zole vuandaka sala kisalu mosi, kasi Yesu tubaka ti ‘bakebaka mosi mpe bakesundola yankaka.’ (Tanga Matai 24:40, 41.) Na manima yandi kindisaka banlonguki na yandi na kutubaka: “Yau yina, beno tatamana kukenga samu beno zaba ve yinki kilumbu Mfumu na beno kekuiza.” (Mat. 24:42) Yesu tubaka diambu ya mutindu yina na manima ya kutubila kifuani ya banketo yina zabaka ve babakala. (Mat. 25:13) Bampova yango vuandaka na nguizani? Yamemonana ti yavuandaka na nguizani. Yesu keyamba na Kimfumu ya dizulu mpe yandi ‘kebaka,’ kaka Baklisto ya kedikakedika yina metulua mafuta na kimpeve mpe yina kele ya kukuikama.​—Yoa. 14:3.

¹⁶ Monisa ti nge kele ya kukenga. Muklisto nionso yina metulua mafuta na kimpeve yina kebikana ve ya kukenga kesangisama ve na “bantu yina meponamaka.” (Mat. 24:31) Nzokande, bisadi nionso ya Nzambi, yavuanda yinki kivuvu bakele na yau, bafueti tadila bampova ya Yesu lokola nduengoso samu na kutatamana kukenga mpe kubikana ya kukuikama.

17. Samu na yinki beto fueti kukitungisa ve kana Yehova mepona kutula mafuta na Baklisto ya ntangu na beto?

¹⁷ Beto mezaba Yehova mbote, yau yina beto ketudilaka nsambusulu na yandi ntima. Beto kekukitungisaka ve kana Yehova mepona kutula mafuta na ndambu ya Baklisto ya kukuikama ya ntangu na beto. c Beto kekukibambulaka na bampova yina Yesu tubaka samu na bantu yina kuizaka sala na wola ya 11 na kifuani na yandi ya bilanga ya vinu. (Mat. 20:1-16) Bantu yina babokilaka bakuiza sala na bilanga ya vinu na nsuka ya kilumbu bakaka mfutu mutindu mosi na bantu yina bandaka kusala na ebandeli ya kilumbu. Mutindu mosi, yavuanda yinki ntangu Baklisto yina metulua mafuta na kimpeve ponamaka, bakebaka n’sendo ya dizulu kana bamebikana ya kukuikama.

TULA DIKEBI NA BANDUENGOSO

18-19. Yinki malongi mpe banduengoso beto metadila?

¹⁸ Yinki beto metadila? Samu na bantu yina kele na kivuvu ya kuzinga mvula na mvula na ntoto, kifuani ya mameme mpe bankombo kena kumonisa ti yakele na mfunu samu na bau na kubikana  bantu ya kukuikama mpe ya lunungu na Yehova​—banda bubu mpe na ntangu ya mpasi ya nene yina kena kuiza. Na bilumbu yango kena kuiza, Yesu ketadila bantu ya kukuikama lokola bantu yina mebonga kubaka “luzingu ya mvula na mvula.”​—Mat. 25:46.

¹⁹ Beto metadila diaka bifuani zole yina kena kupesa banduengoso na Baklisto yina metulua mafuta na kimpeve. Na kifuani ya Yesu ya banketo ya mayele mpe bazoba yina zabaka ve babakala, 5 kati na bau monisaka ti bavuandaka na nduenga. Bavuandaka ya kubongama mpe ya kukenga, bavuandaka pene samu na kuvingila bakala ya dikuela yavuanda ntangu yikua yakelomba. Kasi banketo ya bazoba yina zabaka ve babakala vuandaka ve ya kubongama. Na yau, bakala yango ya dikuela mangaka kukotisa bau na feti na yandi ya dikuela. Beto diaka beto fueti vuanda ya kubongama samu na kuvingila, yavuanda yinki ntangu ya kelomba tii Yesu ketula nsuka ya yinza yayi. Diaka, na kifuani ya Yesu ya batalanta, beto tubilaka bananga zole ya kukuikama yina vuandaka bantu yina kesalaka kisalu ya ngolo. Basalaka kisalu ya ngolo samu na mfumu na bau mpe mfumu na bau ndimaka bau. Kasi, yandi ndimaka ve nanga yina vuandaka molo. Yinki kele dilongi? Beto fueti vuanda na mambu mingi ya kusala na kisalu ya Yehova banda bubu yayi tii na nsuka. Na nsuka, beto tubilaka mutindu Baklisto yina metulua mafuta na kimpeve fueti bikana ya kukenga samu Yesu ‘baka’ bau mpe yandi nata bau na n’sendo na bau ya dizulu. Bakevingilaka na nsatu ya ngolo “kusangisama” na Yesu na dizulu. Na manima ya mvita ya Armagedoni, bakevuanda lokola nketo ya Yesu na dikuela ya Muana ya Dimeme.​—2 Tes. 2:1; Em. 19:9.

20. Yinki Yehova kesala samu na bantu yina kekuwaka banduengoso na yandi?

²⁰ Ata kana kilumbu ya nsambusulu kena pusana na nsualu, beto kele na mfunu ve ya kubanga. Kana beto mebikana ya kukuikama, Tata na beto ya nzola ya dizulu kepesa beto “kilendo yina meluta ngolo” samu beto “koka . . . kutelema na ntuala ya Muana ya muntu.” (2 Ko. 4:7; Luka 21:36) Yavuanda beto kele na kivuvu ya kuzinga na dizulu to na ntoto, beto kesepedisa Tata na beto kana beto kena kuwa banduengoso yina kele na bifuani ya Yesu. Na nzila ya nlemvo ya nene ya Yehova, bankumbu na beto kevuanda “ya kusonama na mukanda” ya luzingu.​—Dan. 12:1; Em. 3:5.