1-2. Samu na yinki Yehova salaka beto na dikoki ya kumona kiese kana beto mepesa bantu yankaka?

 NTANGU Yehova salaka bantu, yandi pesaka bau dikoki ya kumona kiese mingi ya kupesa kuluta ya kubaka. (Mis. 20:35) Yazola monisa ti beto kebakaka ata kiese ve na kubaka? Ve. Beto nionso beto kevuandaka na kiese kana beto mebaka dikabu mosi. Kasi, beto kevuandaka na kiese kuluta kana beto nde mepesa muntu. Mpe ya kedika, yakele mbote mutindu Yehova mesalaka beto mutindu yango. Samu na yinki?

² Na kusalaka beto mutindu yango, Yehova pesaka beto dikoki ya kukudisa kiese na beto. Beto lenda kudisa kiese na beto na kusosaka maluaku mingi ya kupesa. Yakele mpenza kitoko mutindu Yehova mesalaka beto mutindu yina.​—Nz. 139:14.

3. Samu na yinki beto lenda tuba ti Yehova kele “Nzambi ya kiese”?

³ Masonukua mendimisa beto ti kupesa kenataka kiese, na yau yakele diambu ya kukamua ve mutindu Biblia metuba ti Yehova kele “Nzambi ya kiese.” (1 Tim. 1:11) Yandi nde muntu ya ntete yina pesaka bantu yankaka mpe muntu mosi ve kepesaka kuluta Yehova. Mutindu ntumua Paulo tubaka yau, yakele samu na yandi nde “beto kele na luzingu mpe beto ketambulaka mpe beto kele.” (Mis. 17:28) Kutu, “dikabu nionso ya mbote mpe kado nionso” kekatukaka na Yehova.​—Yak. 1:17.

4. Yinki kesadisa beto samu beto baka kiese mingi?

⁴ Beto nionso beto kesepelaka kubaka diaka mingi kiese yina kekatukaka na kupesa. Beto lenda sala yau na kulandaka kifuani ya kukaba ya Yehova. (Ef. 5:1) Ntangu beto kena kutadila kifuani yango, beto tala mambu yina beto lenda sala kana beto kena kumona ti bantu yankaka kele na butondi ve na mambu yina beto kena kusadila bau. Makundoli yango kesadisa beto beto tanina mpe beto kudisa kiese yina beto kebakaka na kupesa.

 LANDA KIFUANI YA KUKABA YA YEHOVA

5. Yinki bima ya kinsuni Yehova kepesaka beto?

⁵ Yinki kele ndambu ya mitindu yina Yehova kemonisaka kikadulu ya kukaba? Beto tadila ndambu ya bifuani. Yehova kepesaka beto bima yina beto kele na yau nsatu. Mbala yankaka beto kevuandaka ve ntangu nionso na bima yina meluta mbote mpenza, kasi na lusadusu ya Yehova, mingi kati na beto kevuandaka na bima yina beto kele na yau nsatu. Na kifuani, yandi kesalaka ti beto baka bima ya kudia, bilele, mpe yinzo ya kuvuanda. (Nz. 4:8; Mat. 6:31-33; 1 Tim. 6:6-8) Yehova kekokisaka bansatu na beto ya kinsuni kaka samu yakele kiyekua na yandi? Yakele ve mutindu yina! Na yau samu na yinki Yehova kekokisaka bansatu na beto?

6. Yinki dilongi beto mebaka na Matai 6:25, 26?

⁶ Yehova kekokisaka bansatu na beto ya kinsuni samu yandi kezolaka beto. Beto tadila bampova ya Yesu yina kele na Matai 6:25, 26. (Tanga.) Yesu sadilaka bifuani yina mekatuka na nsemono. Na kutubilaka bandeke, Yesu tubaka: ‘Yakekunaka ve, yakebukaka mbuma ve, mpe yakelundaka ve bima na bayinzo ya kulunda bima.’ Kasi, tala mambu yina yandi metuba na manima: “Tata na beno ya dizulu kedikilaka yau.” Na manima Yesu yuvusaka: “Beno luta yau ve na mfunu?” Yinki kele dilongi? Yehova ketadilaka bisadi na yandi na valere mingi kuluta bibulu. Kana Yehova kekokisaka bansatu ya bibulu, beto lenda kukindimisa ti yandi kekokisa bansatu na beto! Mutindu mosi na tata mosi ya nzola, Yehova kekokisaka bansatu ya dibuta na yandi na nzola nionso.​—Nz. 145:16; Mat. 6:32.

7. Yinki kele mosi ya mitindu yina beto lenda landa kifuani ya kukaba ya Yehova? (Tala diaka foto.)

⁷ Mutindu mosi na Yehova, beto diaka beto lenda pesa bantu yankaka bima yina bakele na yau nsatu samu beto kezolaka bau. Na kifuani, nge mezaba mpangi mosi Muklisto yina kele na nsatu ya bima ya kudia to ya bilele? Yehova lenda sadisa nge samu nge pesa yandi kima yina lenda sadisa yandi na kukokisa nsatu yango. Bisadi ya Yehova mezabana mingimingi samu na kikadulu ya kukaba yina bakemonisaka ntangu kisumbula mosi mesalama. Na kifuani, na ntangu ya maladi ya yimbi ya COVID-19, bampangi kabulaka bima ya kudia, bima ya kuvuata, mpe bima yankaka samu na kusadisa bantu yina vuandaka na nsatu ya lusadusu. Bampangi mingi diaka pesaka makabu ya nzola samu na kisalu yina kena kusalama na yinza ya mvimba. Yasadisaka samu na kubaka lusadusu ya kupesa bampangi na yinza ya mvimba. Basadilaka bampova yina kele na Baebre 13:16: “Beno zimbakana ve kusala mambote mpe kukabila bantu yankaka bima, samu Nzambi kesepelaka mpenza na bankayilu ya mutindu yina.”

8. Na yinki mitindu beto kebakaka mambote na kilendo ya Yehova? (Bafilipi 2:13)

 ⁸ Yehova kepesaka kilendo. Yehova kevuandaka na kiese ya kukabula ngolo na yandi yina mekondua nsuka na bisadi na yandi ya kukuikama. (Tanga Bafilipi 2:13.) Nge mesambilaka deja samu na kulomba ngolo ya kutelemina ntotolo to samu na kulomba kilendo samu na kukanga ntima na nzomono mosi ya mpasi? Mbala yankaka, nge mesambilaka kaka samu na kulomba ngolo ya kusala mambu yina nge vuandaka na nsatu ya kusala na kilumbu. Ntangu nge bakaka mvutu na kisambu na nge samu na kulomba ngolo, nge ndimaka makanisi ya ntumua Paulo, yina sonikaka: “Na mambu nionso, munu kebakaka ngolo na lusadusu ya Nzambi, muntu yina kepesaka munu kilendo.”​—Flp. 4:13.

9. Yinki mutindu beto lenda landa kifuani ya Yehova na mutindu yandi kesadilaka kilendo na yandi? (Tala diaka foto.)

⁹ Beto kele ve na kilendo yina mekondua nsuka lokola Yehova, mpe beto lenda pesa ve bantu yankaka ngolo mutindu Yehova kepesaka bau. Kasi beto lenda landa kifuani na yandi na kusadilaka ngolo na beto samu na kusadisa bantu yankaka. Na kifuani, beto lenda sadisa mpangi mosi Muklisto yina mepusana na bamvula to yina kele na kieta samu na kusumbila yandi bima to samu na kusadisa yandi na bisalu ya yinzo. Kana mambu ya luzingu na beto kena kupesa beto nzila, beto lenda kukipesa samu na kubongisa mpe kutanina Yinzo ya Kimfumu. Kusadila kilendo na beto na mitindu yina kenatinaka bantu yankaka yina kesambilaka Yehova mambote.

10. Yinki mutindu beto lenda sadila kilendo ya bampova samu na mambote ya bantu yankaka?

¹⁰ Diaka, kuzimbakana ve ti bampova kevuandaka na kilendo. Nge mezaba muntu mosi yina nge lenda pesa bafelisitasion yina mekatuka na ntima? Nge mezaba muntu mosi yina kele na nsatu babomba yandi? Kana yakele mutindu yina, samu na yinki ve kusolola to kukuenda tala muntu yango? Nge lenda kuenda tala muntu yango mbunzu na mbunzu, kubokila yandi na telefone, to mbala yankaka kutindila yandi letre to mesaje. Kukitungisa mingi ve samu na mambu yina nge ketuba. Mua bampova ya fioti yina mekatuka na ntima lenda vuanda mpenza bampova yina mpangi na nge Muklisto vuandaka na yau nsatu samu yandi tatamana kubikana ya kukuikama to samu yandi kuma na makanisi ya mbote.​—Mas. 12:25; Ef. 4:29.

11. Yinki mutindu Yehova kesadilaka nduenga na yandi?

¹¹ Yehova kepesaka nduenga. Nlonguki Yakobo sonikaka: “Kana mosi na beno mekondua nduenga, yandi tatamana kulomba Nzambi, samu yandi kepesaka bantu nionso na ntima ya mvimba, mpe yandi kesosaka ve banzimbala.” (Yak. 1:5; nyp.) Mutindu bampova yango memonisa yau, Yehova kelundaka ve nduenga na yandi samu na yandi mosi kaka. Yandi kepesaka yau na bantu yankaka na nzola nionso. Simba diaka ti, ntangu Yehova kepesaka nduenga na yandi, yandi kesalaka  yau “kondua kusemba,” to “kondua kusosa banzimbala.” Yandi kezolaka ata fioti ve beto kukimona yimbi ntangu beto kele na nsatu ya lutuadusu na yandi. Ya kedika, yandi kekindisaka beto beto sosa yau.​—Mas. 2:1-6.

12. Yinki maluaku beto kevuandaka na yau ya kukabula nduenga na beto?

¹² Bosi samu na beto? Beto lenda landa kifuani ya Yehova na kukabulaka nduenga na beto? (Nz. 32:8) Bisadi ya Yehova kevuandaka na maluaku mingi ya kukabula mambu yina balongukaka. Na kifuani, mbala mingi beto kepesaka bansamuni ya yimpa formasion na kisalu ya kusamuna. Bankulutu kesadisaka na ntima yinda nionso bansadisi ya kisalu mpe bampangi ya bakala yina mebakaka mbotama samu bazaba mutindu ya kukokisa biyekua na bau na kimvuka. Mpe bampangi yina mezaba kisalu ya kutunga mpe ya kutanina bayinzo kesadisaka na kupesaka formasion na bampangi yankaka samu basala na kisalu ya kutunga bayinzo ya teokrasi.

13. Ntangu beto kena kupesa bantu yankaka formasion, yinki mutindu beto lenda landa kifuani ya mutindu Yehova kekabulaka nduenga?

¹³ Bantu yina kepesaka formasion kesalaka mbote kana bakena kulanda kifuani ya mutindu Yehova kekabulaka nduenga na yandi. Kuzimbakana ve ti Yehova kepesaka nduenga na ntima ya mvimba. Mutindu mosi, beto kesepelaka kukabula mambu yina beto mezaba na bantu yina beto kena kupesa formasion. Beto kelundaka ve ndambu ya nzayilu na beto samu beto kena kubanga ti bantu yina beto kena kupesa formasion kuiza baka kisika na beto. Beto ketubaka mpe ve: ‘Muntu mosi ve mepesaka munu formasion! Bika yandi longuka yandi mosi.’ Makanisi ya mutindu yina kele na kisika ve na kati ya bisadi ya Yehova. Kutu, na nzola nionso beto kepesaka kaka ve nzayilu na beto na bantu yina beto kena kupesa formasion “kasi mpe luzingu na beto mpenza.” (1 Tes. 2:8) Beto kele na kivuvu ti, “bau diaka bakevuanda na makoki ya kulonga bantu yankaka.” (2 Tim. 2:1, 2) Kana beto nionso beto kena kukabula nduenga na beto na nzola nionso, beto mpe bantu yankaka beto kevuanda na nduenga mingi mpe na kiese mingi.

KANA YAKENA KUMONANA LOKOLA BANTU KENA KUMONISA VE BUTONDI

14. Yinki bantu mingi kesalaka kana beto mekabila bau?

¹⁴ Kana beto kekabaka, mingimingi na bampangi na beto, mbala mingi, bau diaka bakemonisinaka beto butondi. Balenda tindila beto letre to kumonisina beto butondi na bau na mutindu yankaka. (Kol. 3:15) Kuyamba bampova ya butondi ya mutindu yina kebuelaka kiese na beto.

15. Yinki diambu beto fueti zimbakana ve ntangu bantu yankaka kena kumonisa ve butondi?

¹⁵ Diambu ya kedika kele ti, bantu yankaka kemonisaka ve ntangu nionso butondi na bampova to na bisalu na bau. Na maluaku yankaka, beto lenda pesa ntangu na beto, ngolo na beto, to bima na beto kasi na manima beto lenda kukiyuvusa kana bantu yina beto mesadila mambu yango mesepela na yau. Kana yamesalama mutindu yina, yinki mutindu beto lenda tanina kiese na beto mpe kubika kulemba nzutu? Kuzimbakana ve bampova ya verse yina mesimba disolo na beto, Misala 20:35. Kiese na beto ya kupesa simbama ve na mutindu bantu kena kusepela na mambu yina beto kena kusala. Beto lenda pona kusepela na kupesa ata kana bantu yankaka kena kumonisa ve butondi. Na yinki mutindu? Beto tadila ndambu ya mitindu.

16. Yinki lenda sadisa beto beto tatamana kupesa na kiese?

¹⁶ Tula makanisi na nge na kulanda kifuani ya Yehova. Yandi kepesaka bima ya mbote na bantu, yavuanda kana bakemonisa butondi to ve. (Mat. 5:43-48) Yehova melaka ti kana beto diaka beto mepesa “kondua kuvingila ti bavutudila beto kima, . . . n’sendo [na beto] kevuanda nene.” (Luka 6:35) Na yau, kulemba nzutu ve kana bantu kena kumonisina nge ve ntangu nionso butondi. Kuzimbakana ve ti, Yehova kepesa nge ntangu nionso n’sendo samu na mambu nionso  ya mbote yina nge kena kusala samu na kusadisa bantu yankaka, samu nge kele “muntu yina kepesaka na kiese.”​—Mas. 19:17; 2 Ko. 9:7.

17. Yinki mutindu beto lenda tanina makanisi ya mbote? (Luka 14:​12-14)

¹⁷ Na diambu metadila kutanina makanisi ya mbote ntangu beto kena kupesa bantu yankaka, beto lenda baka nsikudukusu mosi ya mfunu na Luka 14:12-14. (Tanga.) Yakele yimbi ve kumonisa na mitindu yankaka kikadulu ya kuyamba banzenza to ya kukaba na bantu yina lenda sala mpe mutindu yina samu na beto. Kasi, yinki beto fueti sala kana beto mebakusa ti beto kepesaka na kivuvu ti bau diaka bakepesa beto? Kana yakele mutindu yina, meka kusala mambu yina Yesu tubaka. Beto lenda monisa kikadulu ya kuyamba banzenza na muntu yina beto mezaba ti yandi kele ve na makoki ya kuyamba beto. Na manima beto kevuanda na kiese samu beto kena kulanda kifuani ya Yehova. Mutindu yango ya kutadila mambu kesadisa beto diaka samu beto tanina kiese na beto kana bantu yankaka kena kumonisa ve butondi.

18. Yinki diambu beto fueti sala ve mpe samu na yinki?

¹⁸ Kukanisina ve bantu yankaka yimbi. (1 Ko. 13:7) Kana bantu yankaka kena kumonisa ve butondi, beto lenda kukiyuvusa: ‘Bamekondua mpenza butondi, to bamezimbakana kaka nde kumonisa butondi na bau?’ Mbala yankaka bakele na bamfunu yankaka yina mesala ti babika sala mambu mutindu beto vuandaka kukivingila na yau. Bantu yankaka lenda vuanda na butondi ya mpinda kasi bakekakatanaka samu na kutuba yau. Mbala yankaka bakemonaka nsoni na kubaka lusadusu, mingimingi kana na ntama bavuandaka bantu yina vuandaka sadisa bantu yankaka. Yavuanda mutindu yina to ve, nzola ya Buklisto ketinda beto beto bika kanisina bampangi na beto yimbi mpe beto ketatamana kupesa na kiese.​—Ef. 4:2.

19-20. Samu na yinki yakele na mfunu kuvuanda na ntima yinda ntangu beto kepesaka bantu yankaka? (Tala diaka foto.)

¹⁹ Vuanda na ntima yinda. Samu na diambu metadila kukaba, Ntinu ya nduenga Salomo sonikaka: “Loza dimpa na nge na maza, samu na manima ya bilumbu mingi nge kebaka yau diaka.” (Mos. 11:1) Mutindu bampova yango memonisa yau, bantu yankaka lenda monisa butondi na kukaba na beto “na manima ya bilumbu mingi.”  Beto tadila kifuani mosi yina mendimisa mpenza kedika yango.

²⁰ Bamvula mingi na ntuala, nketo ya nkengi ya kizungidila mosi tindaka letre mosi ya kusimba ntima na mpangi mosi ya nketo yina bakaka mbotama ntama mingi ve, yandi kindisaka yandi yandi bikana ya kukuikama. Bamvula 8 na manima, mpangi yango ya nketo pesaka mvutu na letre yango na kutubaka: “Munu monaka ti yalombaka munu sonikina nge samu munu zabisa nge lusadusu yina nge pesaka munu bamvula yayi nionso kondua ti nge zaba yau.” Yandi buelaka: “[Letre na nge] vuandaka mpenza ya kusimba ntima, yavuandaka na verse yina simbaka mpenza ntima na munu, mpe munu salaka zimbakana yau ata fioti ve.” a Na manima ya kusasila ndambu ya mambu ya mpasi yina yandi kutanaka na yau, mpangi yango ya nketo tubaka: “Na bantangu yankaka munu vuandaka na nsatu ya kubika mambu nionso mpe kubika kuvuanda Mbangi ya Yehova. Kasi verse yina nge sonikinaka munu vuandaka simba ntima na munu mpe munu vuandaka na nsatu . . . ya kutatamana kusadila Yehova.” Yandi mebuela diaka: “Ata diambu mosi ve na bamvula 8 yayi meluta, vuandaka na bupusi ya mutindu yina na zulu na munu.” Kanisa na kiese yina nketo ya nkengi ya kizungidila vuandaka na yau na kuyambaka letre yango “na manima ya bilumbu mingi”! Beto diaka balenda monisina beto butondi ntangu mingi na manima ya kusala diambu mosi ya mbote samu na muntu mosi.

21. Samu na yinki nge kele na nzengolo ya kutatamana kulanda kifuani ya kukaba ya Yehova?

²¹ Mutindu beto tubilaka yau, Yehova mesalaka beto na dikoki mosi ya spesiale. Atako beto kesepelaka kubaka, beto kebakaka diaka kiese mingi kuluta ntangu beto kepesaka bantu yankaka. Beto kekukimonaka mbote ntangu beto kele na dikoki ya kusadisa bampangi na beto Baklisto. Mpe beto kevuandaka na kiese ntangu bakemonisinaka beto butondi. Nzokande, yavuanda bamemonisina beto butondi to ve, beto lenda vuanda na kiese samu beto mesala diambu ya mbote. Kuzimbakana ve ti yavuanda yinki kima nge mepesa, “Yehova kele na makoki ya kupesa mingi kuluta yina.” (2 Nt. 25:9) Na yau, nge lenda ata fioti ve kupesa bantu yankaka mingi kuluta yina Yehova lenda pesa nge! Mpe yakevuandaka na kiese mingi kuluta kufutama na Yehova yandi mosi. Na yau, bika beto vuanda na nzengolo ya kutatamana kulanda kifuani ya kukaba ya Tata na beto ya dizulu.