Beto fueti kanisa ve ti lokola kaka bavuandaka ve ntangu Yesu bandisaka Madia ya nkokila ya Mfumu, yazola monisa ti banlonguki yango 70 ndimamaka ve na Yesu mpe basundolaka yandi. Yesu zolaka kaka kuvuanda kintuadi na bantumua na yandi na diluaku yango.

Yandi vuandaka ndima yavuanda bantumua 12 mpe banlonguki yango 70. Yesu ponaka ntete na kati ya mingi ya banlonguki na yandi babakala 12, bayina yandi vuandaka bokidila bantumua. (Luka 6:12-16) Yandi vuandaka na Galile ntangu “yandi bokilaka bantumua 12” mpe “yandi tindaka bau bakuenda samuna Kimfumu ya Nzambi mpe babelusa bantu ya maladi.” (Luka 9:1-6) Na manima, ntangu Yesu vuandaka na Yudea, yandi “ponaka banlonguki yankaka 70 mpe yandi tindaka bau zolezole.” (Luka 9:51; 10:1) Na yau, Yesu vuandaka na banlonguki yina vuandaka samuna nsangu na yandi na bambanza ya kusuasana.

Bayuda yina kumaka banlonguki ya Yesu tatamanaka kusala Paki konso mvula, kondua ntembe kintuadi na mabuta na bau. (Kob. 12:6-11, 17-20) Lokola ntangu ya lufua na yandi kumaka pene, Yesu mpe bantumua na yandi kuendaka na Yerusaleme. Kasi yandi bokilaka ve balonguki na yandi nionso yina vuandaka na Yudea, na Galile, mpe na Perea bakuiza samu basala nkinzi ya Paki kintuadi. Yamemonana puelele ti Yesu vuandaka na nsatu ya kuvuanda kaka kintuadi na bantumua na yandi na diluaku yango. Yandi tubilaka bau: “Munu vuandaka na nsatu ya ngolo ya kudia Paki yayi kintuadi na beno tekila munu niokuama.”​—Luka 22:15.

Yandi vuandaka na mfunu ya mbote ya kusala yau. Yesu kumaka pene ya kufua lokola “Muana Dimeme ya Nzambi yina kena kukatula disumu ya yinza.” (Yoa. 1:29) Yalombaka yandi kufua na Yerusaleme, kuna bavuandaka pesa banda ntama bankayilu samu na Nzambi. Lufua ya Yesu pesaka kimpuanza ya nene kuluta yina babakaka na nzila ya muana dimeme yina Bayisaele kudiaka na mpipa yina babimaka na Ezipito. (1 Ko. 5:7, 8) Diambu yina Yesu salaka pesaka Bantumua yango 12 nzila ya kukuma kitini ya fondasion ya kimvuka ya Buklisto. (Ef. 2:20-22) Yakele na mfunu beto zaba ti Yerusaleme mbanza ya nlongo, kele na “mabanga 12 ya fondasion” yina na zulu na yau bamesonika “bankumbu 12 ya bantumua 12 ya Muana Dimeme.” (Em. 21:10-14) Ee, bantumua yango ya kukuikama kekokisa kiyekua mosi ya mfunu na kukokisama ya lukanu ya Nzambi. Na yau, beto lenda bakusa samu na yinki Yesu vuandaka na nsatu bavuanda kintuadi na yandi samu na Paki ya nsuka mpe samu na nkinzi yina landaka​—Madia ya nkokila ya Mfumu.

Banlonguki yango 70 mpe banlonguki yankaka vuandaka ve kintuadi na Yesu na Madia yango ya nkokila. Kasi, banlonguki nionso yina monisaka kiminu kebaka mambote na diambu yina Yesu bandisaka​—Madia ya nkokila ya Mfumu. Bantu nionso yina kumaka na manima Baklisto yina metulua mafuta na kimpeve lendaka kota na luwawanu samu na kimfumu, yina Yesu tubilaka bantumua na nkokila yango.​—Luka 22:29, 30.