1. Yinki biuvu lenda kuizila beto na makanisi kana beto kena kukanisa na bima nionso yina Yehova salaka?

NTANGU beto kena kukanisa na bima nionso yina Yehova salaka, beto lenda kukimona lokola Davidi, nsoniki ya nkunga, yina salaka kisambu na Yehova mpe yuvusaka yandi: ‘Kana munu metala dizulu na nge, bisalu ya misapi na nge, ngonda mpe bambuetete yina nge kubikaka, muntu kele nani samu nge yindula yandi, mpe muana ya muntu kele nani samu nge tudila yandi dikebi?’ (Nk. 8:3, 4) Lokola Davidi, beto lenda mona ti kisika yina beto kele na yau na luyalanganu kele fioti mpe beto lenda kamua na kuzaba ti Yehova ketudilaka beto dikebi. Kasi, mutindu beto kemona yau, Yehova vuandaka tudila bantu ya ntete Adamu mpe Eva kaka dikebi ve, kasi diaka yandi kumisaka bau bantu ya dibuta na yandi.

2. Yinki vuandaka lukanu ya Yehova samu na bana na yandi ya ntete awa na ntoto?

² Adamu mpe Eva vuandaka bana ya ntete ya Yehova awa na ntoto, mpe Yehova vuandaka Tata na bau ya dizulu ya nzola. Yandi vuandaka lomba na bankuelani yango babuta bantu yankaka ya dibuta. Nzambi tubilaka bau ti: ‘Beno buta mingi mpe beno kuma mingi, beno fulusa ntoto, mpe beno yadila yau.’ (Kuy. 1:28) Yandi lombaka bau babuta bana mpe batanina ntoto, kisika na bau ya kuvuanda. Kana bavuandaka na luzitu mpe basadilaka mambu yina Nzambi lombaka bau, Adamu mpe Eva na bana na bau zolaka bikana bantu ya dibuta ya Nzambi mvimbamvimba.

3. Samu na yinki beto lenda tuba ti Yehova pesaka Adamu mpe Eva kisika ya lokumu na kati ya dibuta na yandi?

³ Adamu mpe Eva vuandaka na kisika ya lokumu na dibuta ya Yehova. Mutindu Nkunga 8:5 mpe noti na yinsi ya paje memonisa  yau, Davidi tubaka samu na mutindu Yehova salaka muntu ti: ‘Nge kitisaka yandi mua fioti na yinsi ya bambasi, mpe nge pesaka yandi nkembo mpe lokumu.’ Ya kedika, Yehova pesaka ve bantu kilendo, mayele, mpe makoki mutindu mosi na bambasi. (Nk. 103:20) Kasi, bantu kele kaka ‘mua fioti na yinsi’ ya bisemua yango ya kilendo ya kimpeve. Yakele diambu ya kukamua! Yehova pesaka bibuti na beto ya ntete luzingu ya mbote.

4. Yinki kuminaka Adamu mpe Eva lokola bamangaka kuzitisa Yehova mpe yinki beto ketubila na disolo yayi?

 ⁴ Diambu ya kiadi, lokola Adamu mpe Eva mangaka kuzitisa Yehova, bazimbisaka kisika na bau na dibuta na yandi. Yau bimisaka mambu ya mpasi na bana na bau, mutindu kaka beto kemona yau na disolo yayi na baparagrafe yina kele na ntuala. Kasi lukanu ya Yehova sobaka ve. Yandi zola bantu ya luzitu bakuma bana na yandi samu na mvimbamvimba. Samu na kubanda, beto tubila mutindu Yehova monisaka beto ti beto kele na valere na meso na yandi. Na manima, beto ketubila yinki beto lenda sala samu na kumonisa ti beto zola vuanda na kati ya dibuta ya Nzambi. Na nsuka, beto kemona balusakumunu yina bantu ya dibuta ya Yehova kebaka awa na ntoto samu na mvimbamvimba.

5. Yinki mutindu beto lenda monisa Yehova ti beto kele na butondi lokola yandi salaka beto na kifuani na yandi?

⁵ Yehova monisaka ti beto kele na valere na meso na yandi na mutindu yandi salaka beto na kifuani na yandi. (Kuy. 1:26, 27) Lokola beto salamaka na kifuani ya Nzambi, beto lenda kudisa mpe kumonisa bikadulu mingi ya mbote yina yandi kele na yau, na kifuani, nzola, kiadi, kukuikama, mpe lunungu. (Nk. 86:15; 145:17) Kana beto mekuna bikadulu yango, beto kekumisa Yehova mpe beto kemonisa ti beto kele na butondi na yandi. (1 Pi. 1:14-16) Kana beto kena kusala mambu yina kena sepedisa Tata na beto ya dizulu, beto kevuanda na kiese. Mpe na kusalaka beto na kifuani na yandi, Yehova pesaka beto dikoki ya kukuma mutindu ya bantu yina yandi zola bavuanda na dibuta na yandi.

6. Yinki mutindu Yehova pesaka bantu valere ntangu yandi bongisaka ntoto?

⁶ Yehova bongisaka kisika ya kuvuanda ya mbote samu na beto. Bamvula mingi tekila yandi sala muntu ya ntete, Yehova bongisaka ntoto samu na bantu. (Yobi 38:4-6; Yer. 10:12) Lokola Yehova kele na kimpombo mpe yandi kekabaka, yandi salaka bima mingi ya kitoko samu beto vuanda na kiese. (Nk. 104:14, 15, 24) Yandi bakaka ntangu samu na kukanisa na zulu ya bima yina yandi salaka, mpe yandi ‘monaka ti yavuandaka mbote.’ (Kuy. 1:10, 12, 31) Yandi pesaka bantu valere na kupesaka bau ‘kiyekua na zulu’ ya bima nionso ya kitoko yina yandi salaka na ntoto. (Nk. 8:6) Lukanu ya Nzambi kele ti bantu ya kukoka nde sepela kutanina bima ya kitoko yina yandi salaka. Nge kepesaka ntangu nionso Yehova matondo samu na nsilulu yango ya mbote?

7. Yinki mutindu Yozue 24:15 memonisa ti muntu kele na kimpuanza ya kupona?

⁷ Yehova pesaka beto dikabu ya kimpuanza ya kupona. Beto lenda pona yinki beto kesala na luzingu na beto. (Tanga Yozue 24:15.) Bakebokidilaka dikoki yango ya kupona kimpuanza ya kupona. Nzambi na beto ya nzola kesepelaka kana beto mepona kusadila yandi. (Nk. 84:11; Bin. 27:11) Beto lenda sadila kimpuanza na beto ya kupona samu na kubaka banzengolo mingi ya mbote. Beto tadila kifuani yina Yesu bikaka.

8. Wapi mosi ya mitindu yina Yesu sadilaka kimpuanza na yandi ya kupona?

⁸ Na kulandaka kifuani ya Yesu, beto lenda pona kutula mambote ya bantu yankaka na ntuala na kisika ya kutula yina ya beto mosi. Kilumbu mosi ntangu Yesu mpe bantumua na yandi vuandaka mpenza ya kulemba, bakuendaka kisika mosi samu na kupema. Kasi, bapemaka ve. Kimvuka mosi ya bantu monaka bau, mpe  bavuandaka na nsatu ya ngolo ti Yesu longa bau. Kasi Yesu fuemaka ve. Kutu, yandi monaka kiadi samu na bantu yango. Na yau, yinki Yesu salaka? ‘Yandi bandaka kulonga bau mambu mingi.’ (Mar. 6:30-34) Kana beto kena kulanda kifuani ya Yesu na kusadilaka ntangu mpe ngolo na beto samu na kusadila bantu yankaka, beto kepesa Tata na beto ya dizulu nkembo. (Mat. 5:14-16) Beto kemonisa diaka Yehova ti beto zola vuanda na kati ya dibuta na yandi.

9. Yinki dikabu ya mfunu Yehova pesaka bantu?

⁹ Yehova pesaka bantu dikoki ya kuvuanda na bana, ata mpe kiyekua ya kulonga bau bazola mpe basadila yandi. Kana nge kele kibuti, nge kesepelaka na dikabu yango ya mbote? Atako Yehova mepesaka bambasi makoki mingi ya kitoko, kasi yandi pesaka bau ve dikoki ya kuvuanda na bana. Na yau, kana nge kele kibuti, nge fueti sepela na diluaku yina nge kele na yau ya kuvuanda na bana. Bibuti mebakaka kiyekua ya mfunu ya kuyundula bana na bau na ‘malongi mpe na banduengoso ya Yehova.’ (Efe 6:4; Kul. 6:5-7; Nk. 127:3) Samu na kusadisa bibuti, nkubukulu ya Nzambi mebimisa bisadulu yina kesasilaka Biblia, na kifuani, mikanda, bavideo, bamiziki, mpe bima yankaka yina kele na Internet. Yakele puelele ti, Tata na beto ya dizulu mpe Muana na yandi kezolaka bantuenia na beto. (Luka 18:15-17) Kana bibuti kena kutudila Yehova ntima mpe bakena kusala yina balenda sala samu na kutanina bana na bau yina kele mfunu, Yehova kesepelaka. Mpe bibuti yango kepesaka bana na bau kivuvu ya kuvuanda bantu ya dibuta ya Yehova samu na mvimbamvimba!

10-11. Yinki diluaku Yehova pesaka beto na nzila ya nkudulu?

¹⁰ Yehova pesaka muana na yandi yina meluta mfunu samu na nzila na yandi beto lenda kuma diaka bantu ya dibuta na yandi. Mutindu beto monaka yau na  paragrafe 4, ntangu Adamu mpe Eva salaka disumu, bazimbisaka kisika na bau na kati ya dibuta ya Yehova, mpe bazimbisaka yau diaka samu na bana na bau. (Bar. 5:12) Adamu mpe Eva mangaka kuzitisa Nzambi na nko, na yau, yabongaka yandi katula bau na dibuta na yandi. Kasi yinki yalombaka kusala samu na bana na bau? Na nzola nionso, Yehova bakaka nkubukulu samu na bana na bau yina kezitisa yandi bandimama samu na kukota na dibuta na yandi. Yandi salaka yau na nzila ya nkayilu ya Muana na yandi kaka mosi, Yesu Klisto. (Yoa. 3:16; Bar. 5:19) Nkayilu ya Yesu pesaka bantu 144 000 yina kebikana ya kukuikama nzila ya kukuma bana ya Nzambi.—Bar. 8:15-17; Kus. 14:1.

¹¹ Buela diaka, bamilion ya bantu ya kukuikama yina kena kuzitisa lukanu ya Nzambi. Bakele na kivuvu ya kukuma bantu ya dibuta ya Nzambi na manima ya kumekama ya nsuka na nsuka ya luyalu ya bamvula 1000. (Nk. 25:14; Bar. 8:20, 21) Lokola bakele na kivuvu yango, banda bubu yayi bakebokidilaka Yehova Mvangi na bau, “Tata.” (Mat. 6:9) Bantu yina diaka kefutumuka kevuanda na diluaku ya kulonguka mambu yina Yehova kena kulomba bau. Bayina diaka kena kupona lutuadusu na yandi kekuma mbala mosi bantu ya dibuta na yandi.

12. Yinki kiuvu beto zola bakila mvutu?

¹² Mutindu beto monaka yau, Yehova bakaka nkubukulu samu na kupesa bantu valere na mitindu mingi. Yandi mendimaka bantu yina metulua mafuta na kimpeve lokola bana na yandi, mpe yandi pesaka ‘kimvuka ya nene’ kivuvu ya kukuma bana na yandi na yinza ya yimpa. (Kus. 7:9) Yinki beto lenda sala banda bubu yayi samu na kumonisa Yehova ti beto zola vuanda bantu ya dibuta na yandi?

13. Yinki beto lenda sala samu na kukota na dibuta ya Nzambi? (Marko 12:30)

¹³ Monisa nzola na nge samu na Yehova na kusadilaka yandi na ntima na nge ya mvimba. (Tanga Marko 12:30.) Nzambi pesaka beto na  nzola nionso bima mingi, mbala yankaka mosi ya makabu na yandi yina meluta nene kele dikoki ya kusambila yandi. Beto kemonisa Yehova ti beto kezolaka yandi kana beto kena ‘zitisa bansiku na yandi.’ (1 Yoa. 5:3) Mosi ya bansiku yina Yehova zola beto zitisa kele nsiku yina Yesu pesaka ya kukumisa bantu banlonguki, mpe kupesa bau mbotama. (Mat. 28:19) Yandi lombaka beto diaka ti beto zolanaka. (Yoa. 13:35) Yehova kekotisa bantu yina kezitisaka bansiku na yandi na kati ya dibuta na yandi ya yinza ya mvimba yina mesangisa bisadi na yandi.—Nk. 15:1, 2.

14. Yinki mutindu beto lenda monisa nzola na bantu yankaka? (Matayo 9:36-38; Baroma 12:10)

¹⁴ Monisa nzola samu na bantu yankaka. Nzola kele kikadulu ya mfunu ya Yehova. (1 Yoa. 4:8) Yehova monisinaka beto nzola tekila kutu beto zaba yandi. (1 Yoa. 4:9, 10) Beto kelanda kifuani na yandi kana beto kena kumonisa nzola samu na bantu yankaka. (Efe 5:1) Mosi ya mitindu meluta mbote yina beto lenda monisina bantu nzola kele na kusadisaka bau balonguka mambu ya Yehova lokola ntangu kele ntete. (Tanga Matayo 9:36-38.) Na kusalaka yau, beto kepesa bau diluaku ya kukuma na kivuvu ya kukota na dibuta ya Nzambi. Kana muntu mebaka mbotama, beto fueti tatamana kuzola mpe kuzitisa yandi. (1 Yoa. 4:20, 21) Yinki mutindu beto fueti sadila yau? Na ndambu mosi, beto tudila yandi ntima. Na kifuani, kana beto zaba ve samu na yinki yandi mesala diambu mosi, beto fueti kanisa ve ti yandi mesala yau samu na mambote na yandi mosi. Na kisika ya kusala mutindu yina, beto kepesa mpangi na beto lokumu, na kumonaka ti yandi meluta beto.—Tanga Baroma 12:10; Fil 2:3.

15. Banani beto fueti monisina ntima kiadi mpe kimpombo?

¹⁵ Monisa ntima kiadi mpe kimpombo na muntu nionso. Kana beto zola vuanda mvimbamvimba na kati ya bantu ya dibuta ya Yehova, beto fueti sadila Mpova ya Nzambi na luzingu na beto. Na kifuani, Yesu longaka ti beto fueti monisa ntima kiadi mpe kimpombo na muntu nionso, ata na bambeni na beto. (Luka 6:32-36) Na bantangu yankaka yalenda vuanda mpasi samu na beto kusala yau. Kana yakele plina, beto fueti longuka mpe kusala mambu mutindu mosi na Yesu. Kana beto kena kusala yina beto lenda sala samu na kuzitisa Yehova mpe kulanda kifuani ya Yesu, beto kemonisa Tata na beto ya dizulu ti beto zola vuanda mvimbamvimba na kati ya dibuta na yandi.

16. Yinki mutindu beto lenda tanina lokumu ya dibuta ya Yehova?

¹⁶ Tanina lokumu ya dibuta ya Yehova. Na dibuta, mbala mingi muana yina kele leki kelandaka kifuani ya mpangi na yandi ya mbuta. Kana muana yina ya mbuta kena kusadila bansikudukusu ya Biblia na luzingu na yandi, yandi kevuanda kifuani ya mbote samu na leki na yandi. Kana muana ya mbuta kena kusala mambu yina kele yimbi, leki kelanda kifuani na yandi ya yimbi. Yakele kaka mutindu mosi na dibuta ya Yehova. Kana Muklisto mosi yina vuandaka ya kukuikama mekuma mopengui to yandi mepona kusala mambu ya yimbi to ya mvindu, bantu yankaka lenda landa kifuani na yandi ya kusala mambu ya yimbi. Bantu yina kesalaka plina kebebisaka lokumu ya dibuta ya bisadi ya Yehova. (1Te 4:3-8) Beto fueti manga kulanda bifuani ya yimbi mpe beto bika pesa nzila ata na diambu mosi yina kebebisa nguizani na beto na Tata na beto ya dizulu yina kezolaka beto.

17. Yinki makanisi beto fueti manga, mpe samu na yinki?

¹⁷ Tudila Yehova ntima kasi na bima ya kinsuni ve. Yehova pesaka nsilulu ti yandi kepesa beto bima ya kudia, bilele, mpe kisika ya kuvuanda, kana beto kena kusosa ntete Kimfumu na yandi mpe kana beto kena kuzitisa bansikudukusu na yandi ya lunungu. (Nk. 55:22; Mat. 6:33) Kana beto metudila nsilulu yango ntima, beto kekanisa ve ti bima ya kinsuni ya yinza yayi ketanina beto mpe yakepesa beto kiese. Beto mezaba ti mutindu kaka mosi yina beto lenda bakila  kiyenge ya kedika ya makanisi kele na kusalaka lukanu ya Yehova. (Fil 4:6, 7) Ata kana beto mesumba bima mingi, beto fueti kukiyuvusa kana beto kele mpenza na ntangu to ngolo ya kusadila mpe kutanina bima yango. Yalenda salama ti beto kukipesa mingi na bima ya kinsuni yina beto kele na yau? Beto bika zimbakana ti Nzambi mepesa beto kisalu ya kusala na kati ya dibuta na yandi. Yazola monisa ti beto fueti sala yau na diseki ve. Beto kesepela ata fioti ve kukokana na ntuenia yina mangaka diluaku yina yandi vuandaka na yau ya kusadila Yehova mpe ya kuvuanda mosi ya bana na yandi—kaka samu yandi kukipesaka na bima yina yandi vuandaka na yau awa na ntoto!—Mar. 10:17-22.

18. Yinki kele lokumu ya nene mpe balusakumunu bantu ya luzitu kebaka samu na mvula na mvula?

¹⁸ Bantu ya luzitu kebaka lokumu ya nene yina meluta nionso—diluaku ya kuzola mpe kusadila Yehova mvula na mvula! Bayina kele na kivuvu ya kuzinga na ntoto kevuanda diaka na diluaku ya kutanina ntoto yayi ya kitoko yina Yehova pesaka samu yavuanda kisika na bau ya mbote ya kuvuanda. Ntama ve Kimfumu ya Nzambi kekumisa ntoto mpe luzingu nionso yina kele na yau ya yimpa. Yesu kebongisa mambu nionso ya mpasi yina Adamu mpe Eva bimisaka ntangu babakaka nzengolo ya kubika dibuta ya Nzambi. Yehova kefutumuna bamilion ya bantu mpe yandi kepesa bau luzingu ya mvula na mvula na nzutu ya kukoka na ntoto yina kekuma paradiso. (Luka 23:42, 43) Ntangu kitini ya dibuta ya bansambidi ya Yehova awa na ntoto kekuma ya kukoka, konso muntu kebaka ‘nkembo mpe lokumu.’—Nk. 8:5.

19. Yinki beto fueti zimbakana ve?

¹⁹ Kana nge kele kati na bantu yina kele na ‘kimvuka ya nene,’ zaba ti nge kele na kivuvu mosi ya mbote. Nzambi kezolaka nge; yandi zola nge vuanda muntu ya dibuta na yandi. Na yau, sala nionso yina nge lenda samu na kusepedisa yandi. Konso kilumbu zinga na kulundaka bansilulu ya Nzambi na makanisi mpe na ntima na nge. Sepela na diluaku yina nge kele na yau ya kusambila Tata na beto ya dizulu, mpe sepela na diluaku ya kukumisa yandi samu na mvimbamvimba!