1. Yinki mutindu kukanisa na mpinda na nsilulu ya Yehova ya luzingu ya mvula na mvula kesadisaka beto?

 YEHOVA mepesa nsilulu ti bantu yina kezitisaka yandi kebaka “luzingu ya mvula na mvula.” (Bar. 6:23) Ntangu beto kena kuyindula na mpinda na zulu ya mambu yina Yehova kepesaka beto, kondua ntembe nzola na beto samu na yandi kekumaka diaka ngolo. Kanisa na diambu yayi: Tata na beto na dizulu kezolaka beto mingi na yau beto kesala kabuana ata fioti ve na yandi.

2. Yinki mutindu nsilulu ya luzingu ya mvula na mvula kesadisaka beto?

² Nsilulu ya Nzambi ya luzingu ya mvula na mvula kesadisaka beto na kukanga ntima na bampasi yina kekuminaka beto. Ata kana bambeni na beto metuba ti bakekufua beto, beto kebika ve kusadila Yehova. Samu na yinki? Mosi ya bamfunu kele samu beto mezaba ti kana beto mekufua ya kukuikama na Yehova, yandi kefutumuna beto na kivuvu ya kufua diaka ve. (Yoa. 5:28, 29; 1 Bk. 15:55-58; Ebr. 2:15) Samu na yinki beto lenda ndimisama ti beto lenda zinga mvula na mvula? Beto tadila bamfunu yayi melanda.

3. Samu na yinki beto lenda ndimisama ti Yehova kele na dikoki ya kutanina beto na luzingu mvula na mvula? (Nkunga 102:12, 24, 27)

³ Beto mezaba ti Yehova kele na dikoki ya kutanina beto na luzingu samu yandi kele Yinto ya luzingu mpe yandi kezingaka mvula na mvula. (Nk. 36:9) Tadila ndambu ya baverse ya Biblia yina kena kundimisa ti Yehova kele na ebandeli ve mpe yandi kele na nsuka ve. Nkunga 90:2 metuba ti Yehova kele Nzambi yina kezingaka ‘kubanda mvula na mvula tii mvula na mvula.’ Nkunga 102 diaka metubila diambu ya mutindu yina. (Tanga Nkunga 102:12, 24, 27.) Mpe mbikudi Habakuki sonikaka samu na Tata na beto ya dizulu ti: ‘O Yehova, nge  kezingaka ve kubanda mvula na mvula? O Nzambi na munu, Nlongo na munu, nge kekufuaka ve.’—Hab. 1:12.

4. Beto fueti tungisama kana yakele mpasi samu na beto na kubakusa dibanza ti Yehova kezingaka mvula na mvula? Sasila.

⁴ Yakevuandaka mpasi samu na nge na kubakusa dibanza ti Yehova kezingaka “mvula na mvula”? (Yez. 40:28) Bantu mingi mpe kemonaka mpasi samu na kubakusa dibanza yango. Elihu tubaka samu na Nzambi: ‘Muntu lenda bakusa ve ntalu ya bamvula na yandi.’ (Yobi 36:26) Kasi kana beto kena kubakusa ve diambu mosi, yazola monisa ve ti diambu yango kele luvunu. Na kifuani, atako beto kemonaka ve kisika yina ntemo kekatukaka, yazola monisa ti yakevuandaka ve? Yakele mutindu yina ve! Mutindu mosi mpe, samu na beto bantu, mbala yankaka beto lenda bakusa ve na yinki mutindu Yehova kele na ebandeli ve mpe yandi kesala vuanda na nsuka ve. Kasi yazola monisa ve ti Nzambi kezingaka ve mvula na mvula. Kedika metadila Mvangi tadila ve mambu yina beto lenda bakusa to yina beto lenda bakusa ve. (Bar. 11:33-36) Mpe yandi kevuandaka deja na luzingu tekila bima nionso yina kevuandaka na luyalanganu salama—buela diaka bima yina kepesaka ntemo na kifuani muini to bambuetete. Beto kendimisamaka ti Yehova kele ‘Muntu yina salaka ntoto na ngolo na yandi.’ Ya kedika, yandi vuandaka na luzingu tekila yandi ‘tanda dizulu.’ (Yer. 51:15; Bis. 17:24) Yinki kele mfunu yankaka yina lenda sala beto ndimisama ti beto lenda zinga mvula na mvula?

5. Yinki kivuvu bankuelani ya ntete vuandaka na yau?

⁵ Yehova salaka bima nionso yina kele na ntoto na luzingu mosi yina kele ya nkufi, katula kaka bantu. Yandi pesaka bantu kivuvu yina yandi pesaka ve na bisemua yankaka, kuzanga kufua. Kasi, Yehova luengisaka Adamu: ‘Nge fueti kudia ve mbuma ya yinti ya kuzaba mambu ya mbote mpe ya yimbi, samu kilumbu nge kekudia yau, nge kekufua mpenza.’ (Kuy. 2:17) Kana Adamu mpe Eva zitisaka Yehova, bazolaka kufua ve. Yakele mbote kundima ti nsukansuka Yehova lendaka pesa bau yinsua ya kudia mbuma ya ‘yinti ya luzingu.’ b—Kuy. 3:22.

6-7. (a) Yinki kele mambu yankaka yina kena kundimisa ti bantu salamaka ve samu bakufua? (b) Kisalu ya yinki mutindu nge kesepela kusala na paradiso? (Tala bafoto.)

⁶ Bantu yankaka ya sianse bakusaka ti ntofi na beto lendaka lunda mambu mingi kuluta mambu yina beto lendaka lunda na luzingu na beto bubu yayi. Na 2010 disolo ya zulalunalo  mosi (Scientific American Mind) tubaka ti ntofi na beto lendaka vuanda na dikoki ya kulunda mambu pene ya bamilion 2,5 ya gigabytes, yina mekokana na bawola kana bamilion 3 (bamvula kuluta 300) ya baprograme ya TV. Kutu ntofi na beto lenda lunda mambu mingi kuluta yina bametubila. Kasi, kifuanusu yango kena kumonisa ti Yehova salaka ntofi na beto samu yalunda mambu mingi kuluta bamvula 70 to 80 yina beto lendaka sala na luzingu.—Nk. 90:10.

⁷ Yehova salaka beto diaka na nsatu ya ngolo ya kuzinga mvula na mvula. Biblia metuba samu na bantu ti Nzambi ‘tuluka ata ngindu ya kuzinga mvula na mvula na ntima na bau.’ (Lon. 3:11) Yakele mosi ya mfunu yina kesalaka ti beto tadila lufua lokola mbeni na beto. (1 Bk. 15:26) Kana beto mebanda kubela ngolo, beto kesalaka ata kima mosi ve mpe kuvingila kaka lufua? Ve. Mbala mingi, beto kesosaka munganga to mbala yankaka bilongo samu na kunuanisa maladi yango. Yazola monisa, beto kesalaka nionso yina beto lenda sala samu beto bika kufua. Mpe kana beto mefuila muntu yina beto kezolaka mingi, yavuanda kana yandi kele ntuenia to kiboba, yakesalaka beto mpasi mingi na ntima mpe mbala mingi mpasi yango kezingilaka. (Yoa. 11:32, 33) Kondua ntembe, Mvangi na beto ya nzola zolaka pesa beto ve nsatu mpe dikoki ya kuzinga mvula na mvula kana lukanu na yandi vuandaka ve ti bantu tatamana kuzinga. Kasi beto kele na bamfunu mingi yina kena kundimisa beto ti beto lenda zinga mvula na mvula. Beto tadila ndambu ya bisalu ya Yehova ya ntama mpe ya bilumbu na beto yina kena kundimisa ti yandi sobaka ve lukanu na yandi ya ebandeli.

8. Na kutadila lukanu yina Yehova kele na yau samu na beto, yinki mukanda ya Yezaya 55:11 mendimisa beto?

⁸ Atako Adamu na Eva salaka disumu mpe banatinaka bana na bau lufua, Yehova sobaka ve makanisi na yandi na diambu metadila lukanu na yandi. (Tanga Yezaya 55:11.) Lukanu na yandi kele ti bantu ya kukuikama zinga mvula na mvula. Beto mezaba yau na kutadila mambu yina Yehova tubaka mpe mambu yina yandi salaka samu na kukokisa lukanu na yandi.

9. Yinki kele nsilulu yina Nzambi pesaka bantu? (Daniele 12:2, 13)

⁹ Yehova pesaka nsilulu ti yandi kefutumuna bantu ya kufua mpe yandi kepesa bau luzingu ya mvula na mvula. (Bis. 24:15; Tito 1:1, 2) Yobi, bakala ya kukuikama ndimisamaka ti Yehova kele na nsatu ya kufutumuna bantu yina mekufuaka. (Yobi 14:14, 15) Mbikudi Daniele zabaka ti bantu vuandaka na kivuvu ya kufutumuka mpe na diluaku ya kuzinga mvula na mvula. (Nk. 37:29; tanga Daniele 12:2, 13.) Katula yau, Bayuda na ntangu ya Yesu zabaka ti Yehova kepesa bisadi na yandi ya kukuikama ‘luzingu ya mvula na mvula.’ (Luka 10:25; 18:18) Yesu vuandaka tubila mbala na mbala nsilulu yango, mpe yandi mosi diaka bafutumunaka yandi na Tata na yandi.—Mat. 19:29; 22:31, 32; Luka 18:30; Yoa. 11:25.

10. Yinki dilongi beto mebaka na bamfutumukunu yina salamaka na ntama? (Tala foto.)

¹⁰ Yehova kele Muntu yina kepesaka luzingu mpe yandi kele na kilendo ya kufutumuna bantu. Yandi pesaka mbikudi Eliya kilendo ya kufutumuna muana ya bakala ya nketo mosi yina mefuilaka bakala ya buala ya Zarefate. (1 Bn. 17:21-23) Na manima, mbikudi Elisha futumunaka muana ya bakala ya nketo mosi ya Shuneme, na lusadusu ya Nzambi. (2 Bn. 4:18-20, 34-37) Bantu yango mpe bantu yankaka yina futumukaka memonisa ti Yehova kele na kilendo ya kufutumuna bantu. Ntangu Yesu vuandaka awa na ntoto, yandi monisaka ti Tata na yandi pesaka yandi kilendo yango ya kufutumuna bantu. (Yoa. 11:23-25, 43, 44) Bubu yayi Yesu kele na dizulu, mpe bapesaka yandi ‘kimfumu nionso . . . na dizulu mpe na ntoto’. Na yau, yandi kele na dikoki ya kukokisa nsilulu yina metuba ti ‘bantu nionso yina kele na maziamu ya kukanisama’ kefutumuka na diluaku ya kubaka luzingu ya mvula na mvula.—Mat. 28:18; Yoa. 5:25-29.

11. Yinki mutindu nkudulu mepesaka beto nzila ya kubaka luzingu ya mvula na mvula?

¹¹ Samu na yinki Yehova bikaka nzila samu Muana na yandi ya nzola kufua lufua mosi ya mpasi? Yesu monisaka mfunu yango, na kutubaka: ‘Samu Nzambi zolaka yinza mingi mpenza yau yina yandi pesaka Muana na yandi mosi kaka ya kubutuka, samu konso muntu yina kemonisa kiminu na yandi yandi kufua ve kasi yandi baka luzingu ya mvula na mvula.’ (Yoa. 3:16) Nzambi salaka nionso samu na beto beto baka luzingu ya mvula na mvula, na kupesaka Muana na yandi lokola nkudulu samu na kufuka masumu na beto. (Mat. 20:28) Ntumua Paulo sasilaka mfunu ya kitini ya lukanu yango ya Nzambi ntangu yandi sonikaka: ‘Lokola lufua kuizaka na nzila ya muntu mosi, mfutumukunu mekuiza mpe na nzila ya muntu mosi. Samu mutindu mosi na Adamu bantu nionso kekufuaka, mutindu mosi mpe na nzila ya Klisto bantu nionso kebaka luzingu.’—1 Bk. 15:21, 22.

12. Yinki mutindu Kimfumu ya Nzambi kepesa maboko samu na kukokisa lukanu ya Nzambi samu na beto?

¹² Yesu longaka banlonguki na yandi basambilaka samu Kimfumu ya Nzambi kuiza mpe luzolo ya Nzambi salama awa na ntoto. (Mat. 6:9, 10) Mosi ya balukanu ya Nzambi kele ti  bantu zinga awa na ntoto luzingu ya mvula na mvula. Samu na kukokisa lukanu yango, Yehova ponaka Muana na yandi Ntinu ya Kimfumu ya Masiya. Nzambi bandaka kupona bantu 144000 awa na ntoto samu na kusala kintuadi na Yesu samu na kukokisa lukanu ya Nzambi.—Kus. 5:9, 10.

13. Yinki Yehova kena kusala bubu yayi, mpe yinki nge fueti sala?

¹³ Bubu yayi Yehova kena kusangisa ‘kimvuka ya nene’ ya bantu mpe yandi kena kupesa bau formasion samu bavuanda bantu ya Kimfumu na yandi. (Kus. 7:9, 10; Yak. 2:8) Atako bubu yayi yinza kele ya kukabuka samu na kuyinana mpe bamvita, bantu yina kele na kati ya kimvuka ya nene kesalaka ngolo samu na kununga mitindu nionso ya kuyinana na bantima na bau. Bakemonisaka na bisalu na bau ti bakena kukumisa mipanga na bau ya mvita ya kifuani bima ya kubaludila ntoto. (Mika 4:3) Na kisika ya kupesa maboko na bamvita yina kesalaka ti bantu mingi kufua, bakena kusadisa bantu babaka ‘luzingu ya kedika’ na kulongaka bau mambu metadila Nzambi ya kedika mpe lukanu na yandi. (1 Tm. 6:19) Bantu ya mabuta na bau lenda telemina bau to balenda kutana na mambu lokola kuzanga mbongo samu bakena kupesa maboko na Kimfumu ya Nzambi, kasi Yehova kesalaka nionso samu babaka yina bakele na yau nsatu. (Mat. 6:25, 30-33; Luka 18:29, 30) Mambu yango kena kundimisa beto ti Kimfumu  ya Nzambi kele mpenza kedika mpe yaketatamana kukokisa lukanu ya Yehova.

14-15. Yinki mutindu nsilulu ya Yehova ya kukatula lufua samu na mvimbamvimba kekokisama?

¹⁴ Bubu yayi Yesu kele Ntinu na Kimfumu ya Nzambi na dizulu mpe yandi kekokisa bansilulu nionso yina Yehova pesaka. (2 Bk. 1:20) Banda 1914, Yesu tulaka bambeni na yandi na yinsi ya makulu na yandi. (Nk. 110:1, 2) Ntama mingi ve, Yesu mpe bantu 144000 kekufua bantu nionso ya yimbi yina kele na ntoto ya mvimba.—Kus. 6:2.

¹⁵ Na ntangu ya Luyalu ya bamvula 1000 ya Yesu, bantu ya kufua kefutumuka mpe bantu ya luzitu kekuma na nzutu ya kukoka. Na manima ya kumekama ya nsuka, bantu yina Yehova kendima lokola bantu ya lunungu ‘kebaka ntoto, mpe bakezinga muvula na mvula na zulu na yau.’ (Nk. 37:10, 11, 29) Diambu ya kiese, yandi ‘kekatula lufua,’ ‘mbeni ya nsuka.’—1 Bk. 15:26.

16. Yinki kele mfunu ya ngudi yina ketindaka beto beto sadila Yehova?

¹⁶ Mutindu beto mekatuka mona yau na disolo yayi, kivuvu na beto ya kuzinga luzingu ya mvula na mvula mesimbama na Mpova ya Nzambi. Kivuvu yango kesadisa beto samu beto bikana ya kukuikama na bilumbu yayi ya nsuka ya mpasi. Kasi samu na kusepedisa Yehova, beto fueti suka kaka ve na kuvuanda na nsatu ya kuzinga mvula na mvula. Kasi mfunu na beto ya ngudi yina beto kebikanaka ya kukuikama na Yehova mpe Yesu kele samu beto kezolaka bau mingi. (2 Bk. 5:14, 15) Nzola yango ketindaka beto beto landa kifuani na bau mpe beto tubila bantu yankaka kivuvu yina beto kele na yau. (Bar. 10:13-15) Lokola beto kena kulonguka kuvuanda na kikadulu ya kumanga muyimi mpe kukuma na kikadulu ya kukaba, beto kekuma mitindu ya bantu yina Yehova zola bavuanda bankundi na yandi.—Ebr. 13:16.

17. Yinki kiyekua mosimosi kati na beto kele na yau? (Matayo 7:13, 14)

¹⁷ Beto kevuanda na kati ya bantu yina kebaka luzingu ya mvula na mvula? Yehova mepesaka diluaku yango na muntu nionso. Kasi beto mosi fueti pona kubikana na nzila yina kenataka na luzingu. (Tanga Matayo 7:13, 14.) Yinki mutindu luzingu kevuanda ntangu beto kebaka luzingu ya mvula na mvula? Disolo yina melanda kepesa beto mvutu na kiuvu yango.