Ve. Mambu yina Davidi sonikaka vuandaka kedika mpe yandi vunaka ve.

Beto tala mambu yina yandi sonikaka na verse yango mpe na baverse yina mekokana na yau: ‘Munu keyimbila bankunga samu na kukumisa nkumbu na nge samu na mvimbamvimba ntangu munu kekokisa bansilulu na munu konso kilumbu.’ ‘Munu kepesa nge nkembo, O Yehova Nzambi na munu, na ntima na munu ya mvimba, mpe munu kepesa nkumbu na nge nkembo samu na mvimbamvimba.’ ‘Munu kekumisa nkumbu na nge samu na mvimbamvimba.’—Nk. 61:8; 86:12; 145:1, 2.

Ntangu Davidi sonikaka bampova yango, yandi kanisaka ve ti yandi kesala kufua ve. Yandi zabaka ti bantu kekufuaka samu na masumu na bau. Mpe Davidi zabaka diaka ti yandi vuandaka muntu ya masumu. (Kuy. 3:3, 17-19; Nk. 51:4, 5) Yandi zabaka ti ata bantu ya kukuikama lokola Abrahama, Yisaka, mpe Yakobo, kufuaka. Mpe Davidi zabaka ti yandi mpe yandi kekufua. (Nk. 37:25; 39:4) Kasi bampova na yandi yina kele na Nkunga 61:8 monisaka nsatu mpe nzengolo na yandi ya kukumisa Nzambi samu na mvimbamvimba, yazola monisa, ntangu nionso yina Davidi vuandaka na luzingu.—2 Sa. 7:12.

Na bantangu yankaka Davidi sonikaka mambu yina tadilaka luzingu na yandi mosi, mutindu beto lenda mona yau na bampova yina kele na zulu ya Nkunga 18, Nkunga 51, mpe 52. Na Nkunga 23, Davidi metubila Yehova lokola mvungi ya mameme yina kepesaka lutuadusu, yina kebombaka, mpe yina ketaninaka. Davidi vuandaka mvungi ya mameme. Mpe yandi vuandaka na nsatu ya kusadila Nzambi ‘bilumbu nionso ya luzingu na yandi.’—Nk. 23:6.

Beto zimbakana ve ti Yehova nde tindaka Davidi yandi sonika mambu yina yandi sonikaka. Mambu yina yandi sonikaka sangisaka bambikudulu yina kesalama na manima ya bamvula. Na kifuani, na Nkunga 110, Davidi tubilaka kilokola mosi ntangu Mfumu na yandi ‘kevuanda na diboko ya kibakala ya [Nzambi]’ na dizulu mpe kubaka kilendo ya nene. Samu na kusala yinki? Samu na kutula bambeni ya Nzambi na yinsi ya makulu na yandi mpe ‘kupesa makanda nsambusulu’ na ntoto. Davidi vuandaka nkaka ya Masiya, muntu yina keyala na dizulu mpe yina kevuanda ‘nganga-nzambi samu na mvula na mvula.’ (Nk. 110:1-6) Yesu tubaka ti mbikudulu yina kele na Nkunga 110 tadilaka yandi mpe yakekokisama na bilumbu kena kuiza.—Mat. 22:41-45.

Ya kedika, Yehova tuadisaka Davidi na nzila ya mpeve ya nlongo na yandi samu yandi sonika mambu zole yina tadilaka kilokola na yandi mpe yina tadilaka bilumbu kena kuiza ntangu yina yandi kefutumuka mpe yandi kevuanda na kiese ya kukumisa Yehova samu na mvimbamvimba. Yau kena kusadisa beto na kumona ti beto lenda bakusa Nkunga 37:10, 11, 29 lokola mambu yina vuandaka na mfunu na Yisaele ya ntama mpe mambu yina kesalama na mvimba na yau na bilumbu kena kuiza ntangu Nzambi kekokisa bansilulu na yandi.—Tala paragrafe 8 ya disolo “Nge kevuanda na munu na Paradiso” na nimero yayi.

Nkunga 61:8 mpe baverse yankaka yina mekokana na yau memonisa ti Davidi vuandaka na nsatu ya kukumisa Yehova na Yisaele ya ntama tii na lufua na yandi. Mpe baverse yango kena kumonisa yina Davidi kevuanda na dikoki ya kusala na bilumbu kena kuiza ntangu Nzambi kevutusa yandi na luzingu.