Nge tangaka mbotembote banimero ya Yinzo’a zulu ya Nkengi ya mvula yayi? Na yau, tala kana nge lenda pesa bamvutu na biuvu yayi melanda:

Yinki mambote beto kebaka kana beto kelutisaka ntangu mingi na kusolola, na kuwa, mpe na kukanisa na mambu yina metadila Yehova?

Beto kebaka banzengolo ya mbote, beto kevuanda banlongisi ya mbote, beto kevuanda na kiminu ya ngolo, mpe nzola na beto samu na Yehova kekula.—w22.01, p. 30-31.

Yinki mutindu beto kebaka lusadusu kana beto melonguka kutudila Yehova mpe nkubukulu na yandi ntima?

Yayi kele ntangu ya kulonguka kutula ntima na mutindu ya Nzambi ya kusadila mambu na kumangaka ve balutuadusu mpe banzengolo yina bankulutu kebakaka. Ntangu mpasi ya nene kebanda, beto kevuanda ya kukubama samu na kuzitisa ata kana bamepesa beto malako yina kena kumonana ya yimbi to yabonga ve.—w22.02, p. 4-6.

Yinki vuandaka dibanza ya mbasi ntangu yandi tubilaka Zekaria na yina metadila ‘singa ya bamason na diboko ya [guvernere ya Yuda] Zorobabele’? (Zek. 4:8-10)

Mbona meso yango ndimisaka bisadi ya Nzambi ti tempelo yina vuandaka tungama kemanisa kutungua mpe yakekokisa bansikudukusu ya Nzambi.—w22.03, p. 16-17.

Yinki mutindu beto lenda vuanda ‘kifuani . . . na kutuba’? (1 Tm. 4:12)

Beto ketuba na kimpombo mpe na luzitu ntangu beto kele na kisalu ya kusamuna, beto keyimbila na ntima na beto ya mvimba, beto kepesa mbala na mbala bakomantere na balukutakanu, mpe beto ketuba kedika mpe beto kesadila bampova na beto samu na kutunga bantu yankaka, na kumangaka bampova ya yimbi.—w22.04, p. 6-9.

Samu na yinki bidimbu yina kena kumonana na bibulu yiya (bimfumu) yina Daniele kikapu 7 metubila kena kumonana kaka na kibulu mosi yina Kusonga 13: 1, 2 metubila?

Kibulu yina Kusonga 13 metubila kena kumonisa ve kimfumu kaka mosi, lokola Roma. Kasi, yakena kumonisa bilendo nionso ya politiki yina yadilaka bantu.—w22.05, p. 9.

Yinki kele mutindu mosi ya mfunu ya kumonisa kivuvu na beto na lunungu ya Nzambi?

Kana muntu mosi mefinga beto, mesala beto mpasi, to mesadila beto disumu, beto kesosaka kusala nionso samu na kukatula nganzi mpe kutanina banguilu na beto, na kubikaka nionso na maboko ya Yehova. Yandi kekatula mambu nionso ya yimbi yina masumu kebimisaka.—w22.06, p. 10-11.

Yinki diambu mpangi yina kena kusala kisambu na lukutakanu fueti lunda na makanisi?

Kisambu fueti sadulua ve samu na kupesa malongi na kimvuka to samu na kupesa malako. Yakele ve na mfunu kuvutukila ‘bampova mingi,’ mingimingi na ebandeli ya lukutakanu. (Mat. 6:7)—w22.07, p. 24-25.

Na yinki mutindu ‘bantu yina salaka mambu ya yimbi’ kebaka ‘mfutumukunu ya kusambisa’? (Yoane 5:29)

Bakesambisa bau ve na mutindu ya yimbi samu na mambu ya yimbi yina basalaka na luzingu na bau tekila bakufua. Bakesambisa bau na kutadila mambu yina bakesala mpe bikadulu yina bakemonisa na manima ya mfutumukunu na bau.—w22.09, p. 18.

Yinki diambu ya kukindisa yina mpangi J. F. Rutherford pesaka na lukutakanu ya nene yina salamaka na Septembre 1922?

Na lukutakanu ya nene yina salamaka na Cedar Point, na Ohio, na buala ya États-Unis, yandi tubaka: “Beno tala Mfumu kena kuyala! Beno kele na kiyekua ya kutubila bantu diambu yango. Na yau, beno samuna, beno samuna, beno samuna, Mfumu mpe Kimfumu na yandi!”—w22.10, p. 3-5.

Yinki mambu tatu yina mukanda ya Yezaya kikapu 30 metubila yina Nzambi kesadilaka samu na kusadisa beto beto kanga ntima na bampasi?

Kikapu yango memonisa ti yandi (1) kekuwaka mpe kepesaka mvutu na bisambu na beto, (2) yandi kepesaka beto lutuadusu, mpe (3) yandi kesakumunaka beto bubu mpe yandi kesala yau na bilumbu kena kuiza.—w22.11, p. 9.

Samu na yinki beto lenda tuba ti bampova yina kele na Nkunga 37:10, 11, 29 kokisamaka na Yisaele ya ntama mpe yakekokisama na bilumbu kena kuiza?

Bampova yina Davidi sadilaka na mutindu ya mbote monisaka balusakumunu yina Yisaele bakaka, na kifuani na luyalu ya Salomo. Yesu tubilaka paradiso na bilumbu kena kuiza mpe yandi tubilaka bampova yina kele na verse 11. (Mat. 5:5; Luka 23:43)—w22.12, p. 8-10, 14.