1. Ntangu fioti tekila Yesu kufua, yinki yandi tubilaka muntu ya yimbi yina vuandaka pembeni na yandi? (Luka 23:39-43)

 YESU mpe bantu ya yimbi zole yina vuandaka pembeni na yandi vuandaka mona mpasi ntangu bavuandaka pusana malembemalembe na lufua. (Luka 23:32, 33) Bantu yango zole ya yimbi vuandaka tuba na mutindu ya yimbi samu na Yesu, na yau yamemonana puelele ti bavuandaka ve banlonguki na yandi. (Mat. 27:44; Mar. 15:32) Kasi mosi na kati na bau zole sobaka makanisi na yandi. Yandi tubaka: ‘Yesu, kanisaka munu ntangu nge kekuiza na Kimfumu na nge.’ Yesu vutudilaka yandi: ‘Ya kedika munu kena kutubila nge bubu yayi ti, nge kevuanda na munu na Paradiso.’ (Tanga Luka 23:39-43.) Diambu mosi ve kena kumonisa ti muntu yango ya yimbi vuandaka ndima nsangu metadila ‘Kimfumu ya dizulu,’ yina Yesu vuandaka samuna ntangu yandi vuandaka sala kisalu na yandi ya kusamuna. Mpe Yesu tubaka ata fioti ve ti muntu yango kevuanda na Kimfumu ya dizulu. (Mat. 4:17) Yesu vuandaka tubila nde paradiso na ntoto na bilumbu kena kuiza. Samu na yinki beto lenda tuba mutindu yina?

2. Yinki kena kumonisa ti muntu ya yimbi yina balulaka ntima vuandaka Muyuda?

² Kondua ntembe muntu yango ya yimbi yina balulaka ntima vuandaka Muyuda. Muntu yango ya yimbi tubilaka nkundi na yandi ti: ‘Nge kena banga ve Nzambi ata fioti, ntangu yayi nge mebaka kitumbu ya mutindu mosi?’ (Luka 23:40) Bayuda vuandaka sambila Nzambi kaka mosi, kasi bantu ya makanda yankaka vuandaka ndimina banzambi mingi. (Kub. 20:2, 3; 1 Bk. 8:5, 6) Kana bantu yango ya yimbi vuandaka Bayuda ve, kiuvu zolaka vuanda, “Nge kena kubanga ve banzambi ata fioti?” Diaka, Yesu tindamaka ve samu na bantu ya makanda yankaka, kasi samu ‘na mameme yina mezimbanaka ya yinzo ya Yisaele.’ (Mat. 15:24) Nzambi monisaka Bayisaele ti yandi kefutumuna bantu ya kufua. Mbala yankaka muntu yango ya yimbi yina balulaka ntima zabaka  diambu yango, mpe bampova na yandi memonisa ti, yandi vuandaka ndima ti Yehova kefutumuna Yesu na Kimfumu ya Nzambi. Yamonanaka ti muntu yango vuandaka na kivuvu ti Nzambi lendaka futumuna diaka yandi.

3. Mbala yankaka yinki kuizaka na makanisi ya muntu ya yimbi yina balulaka ntima ntangu Yesu tubilaka paradiso? Sasila. (Kuyantika 2:15)

³ Lokola yandi vuandaka Muyuda, kondua ntembe muntu ya yimbi yina balulaka ntima zabaka mambu metadila Adamu, Eva, mpe paradiso kisika yina Yehova tulaka bau. Na yau, kondua ntembe muntu ya yimbi zabaka ti paradiso yina Yesu tubilaka lendaka vuanda bilanga ya kitoko awa na ntoto.—Tanga Kuyantika 2:15.

4. Bampova yina Yesu tubilaka muntu ya yimbi fueti tinda beto na kukanisa yinki?

⁴ Bampova yina Yesu tubilaka muntu ya yimbi fueti tinda beto beto kanisa mutindu luzingu kevuanda na paradiso. Ya kedika, beto lenda longuka mambu yankaka yina metadila paradiso na nzila ya luyalu ya kiyenge ya Ntinu Salomo. Mpe beto lenda kukivingila ti Yesu, muntu yina meluta Salomo, kesala kintuadi na bantu yina keyala kintuadi na yandi samu na kukumisa ntoto paradiso ya kitoko. (Mat. 12:42) Yakele puelele ti, ‘mameme yankaka’ fueti vuanda na kiese samu na mambu yina kena kulombama basala samu bandimama samu na kuzinga mvula na mvula na paradiso.—Yoa. 10:16.

5. Nge kekanisaka luzingu kevuanda yinki mutindu na paradiso?

⁵ Yinki kekuizilaka nge na makanisi ntangu nge kena kukanisa luzingu na paradiso? Mbala yankaka nge kekanisaka parke mosi ya kitoko, lokola bilanga ya Edeni. (Kuy. 2:7-9) Mbala yankaka nge keyindulaka mbikudulu yina Mika sonikaka ti bantu ya Nzambi kevuanda ‘konso muntu na yinsi ya yinti na yandi ya vinu mpe na yinsi ya yinti na yandi ya bafigi.’ (Mika 4:3, 4) Mbala yankaka nge kekanisaka diaka baverse ya Biblia yina metuba ti bima ya kudia kevuanda mingi. (Nk. 72:16; Yez. 65:21, 22) Na yau, nge lenda kukimona na kati ya bilanga mosi ya kitoko, nge mevuanda na ntuala ya meza mosi yina mefuluka na madia ya kitoko. Nge lenda kanisa mupepe yina mefuluka na nsunga ya kitoko yina kena kukatuka na bayinti mpe na bafololo. Mutindu mosi mpe nge lenda kanisa dibuta na nge mpe bankundi na nge, buela diaka bantu yina kefutumuka—kena kuseka kintuadi mpe kena kulutisa ntangu kintuadi na kiese. Mambu nionso yina kele bandozi ve. Beto lenda ndimisama ti mambu yango nionso kekokisama. Kasi na paradiso beto kesala diaka bisalu ya kitoko.

6. Yinki beto kebanda kusala na paradiso? (Tala foto.)

⁶ Yehova salaka beto samu beto vuanda na kiese na kisalu yina beto kena kusala. (Lon. 2:24) Beto kekondua ve kisalu na bamvula 1000 ya Luyalu ya Klisto. Bantu yina kevuka na mpasi ya nene, buela diaka bamilion ya bantu yina kefutumuka, kevuanda na nsatu ya bilele, madia, mpe bisika ya kuvuanda. Samu na kukokisa bansatu yango, yakelomba beto beto sala bisalu  mingi ya kitoko. Mutindu kaka Nzambi zabisaka Adamu mpe Eva bakuna bima na ntoto, beto kevuanda na kisalu ya kitoko ya kukumisa ntoto paradiso. Kanisa diaka kiese yina kevuanda ya kulonga bamilion ya bantu yina kefutumuka yina mezaba Yehova mpe lukanu na yandi kaka fioti mpe kusadisa bantu ya kukuikama yina zingaka tekila Yesu kuiza samu bazaba mambu mingi!

7. Na yinki beto lenda tula kivuvu, mpe samu na yinki?

⁷ Beto lenda tula kivuvu ti luzingu na paradiso yina kena kuiza kevuanda na kiyenge, kima mosi ve kekondua, mpe mambu kevuanda na mulongo. Samu na yinki? Samu Yehova mepesaka beto deja kifuani ya mutindu luzingu kevuanda na yinsi ya luyalu ya Muana na yandi. Beto lenda mona yau na disolo ya luyalu ya Ntinu Salomo.

8. Yinki mutindu bampova yina kele na Nkunga 37:10, 11, 29 kokisamaka na manima ya kusonama na yau na Ntinu Davidi? (Tala “Biuvu ya bantangi” na nimero yayi.)

⁸ Mpeve ya nlongo tindaka Ntinu Davidi yandi sonika mutindu luzingu kevuanda ntangu ntinu ya nduenga mpe ya kukuikama kebaka kiti ya Kimfumu. (Tanga Nkunga 37:10, 11, 29.) Mbala mingi beto ketangilaka bantu yankaka Nkunga 37:11 ntangu beto kena kutubila paradiso yina kekuiza. Beto kele na mfunu ya mbote ya kusala yau samu Yesu tubilaka verse yango na Disolo na yandi na zulu ya mongo, na kutubaka ti kukokisama na yau kevuanda na bilumbu kena kuiza. (Mat. 5:5) Kasi bampova ya Davidi monisaka yau diaka ti luzingu kevuanda lokola na kilumbu ya Ntinu Salomo. Ntangu Salomo vuandaka yadila Yisaele, bantu ya Nzambi vuandaka na kiyenge mingi mpe bakonduaka kima ve na ntoto yina kele ‘na miliki mpe mafuta ya niosi mingi.’ Nzambi tubaka: ‘Kana beno metatamana kuzitisa bansiku na munu . . . , munu ketula kiyenge na yinsi yango, beno keleka mpe muntu mosi ve kebangisa beno.’ (Lev. 20:24; 26:3, 6) Bansilulu yango kokisamaka na luyalu ya Solomo. (1 Bs. 22:9; 29:26-28) Mpe Yehova pesaka nsilulu ti bantu ya yimbi yina vuandaka sambila banzambi yankaka ‘kevuanda diaka ve.’ (Nk. 37:10) Na yau, mambu yina kele na Nkunga 37:10, 11, 29 kokisamaka na ntama mpe yakekokisama diaka na bilumbu kena kuiza.

9. Yinki ntinu ya nketo Sheba tubaka samu na luyalu ya Ntinu Salomo?

⁹ Ntinu ya nketo Sheba kuwaka nsangu ya kiyenge  mpe kimvuama ya dikanda ya Yisaele ntangu Salomo vuandaka ntinu. Ntinu yango ya nketo yina vuandaka vuanda na buala ya ntama salaka vuayaje tii na Yerusaleme samu na kumona mambu yandi mosi na meso. (1 Bn. 10:1) Na manima ya kutala kimfumu ya Salomo, yandi tubaka: ‘Mambu yina batubilaka munu kuma ve ata na katikati. . . . Kiese na bantu na nge, mpe kiese na bisadi yina kevuandaka ntangu nionso na nge, mpe kekuwaka nduenga na nge!’ (1 Bn. 10:6-8) Kasi mutindu mambu vuandaka na yinsi ya luyalu ya Salomo vuandaka kaka kifuani ya mambu yina Yehova kesala samu na bantu na yinsi ya luyalu ya Muana na Yandi, Yesu.

10. Na yinki mambu Yesu meluta Salomo?

¹⁰ Yesu meluta Salomo na mambu mingi. Salomo vuandaka muntu ya kuzanga kukoka yina salaka banzimbala ya nene yina nsukansuka natinaka bisadi ya Nzambi mambu ya mpasi. Na ndambu yankaka, Yesu kele Ntinu ya kukoka yina kesalaka ve banzimbala. (Luka 1:32; Ebr. 4:14, 15) Yesu kutanaka na kumekama ya ngolo yina Satana bimisinaka yandi. Klisto monisaka ti yandi kesala ata disumu mosi ve to diambu yina kenatina bantu ya kukuikama yina yandi keyadila mpasi. Yakele mpenza lokumu samu na beto ti yandi vuanda Ntinu na beto.

11. Banani kepesa Yesu maboko na luyalu na yandi?

¹¹ Yesu kevuanda na bantu 144000 yina keyala kintuadi na yandi samu na kunatina bantu mambote mpe kukokisa lukanu ya Yehova samu na ntoto. (Kus. 14:1-3) Bantu yango kutanaka na mambu mingi ya mpasi mpe baniokuamaka ntangu bavuandaka na luzingu awa na ntoto, na yau bakebakusa mambu yina bantu kezingaka na ntoto kena kukutana na yau. Na yau, yinki kiyekua ban’yadi yango kevuanda na yau?

12. Yinki kisalu Yehova kepesa bantu 144000?

¹² Yesu mpe bantu yina keyala kintuadi na yandi kele na kisalu mingi ya kusala kuluta yina Salomo salaka. Yavuandaka lomba Ntinu Salomo kokisa mambote ya bamilion ya bantu yina vuandaka vuanda na buala kaka mosi. Kasi, bantu yina keyala na Kimfumu ya Nzambi kesadisa bamilion ya bantu na yinza ya mvimba. Yehova pesaka mpenza bantu 144000 lokumu ya nene!

13. Yinki kiyekua ya spesiale bantu yina keyala kintuadi na Yesu kevuanda na yau?

¹³ Mutindu mosi na Yesu, bantu 144000 kesala lokola bantinu mpe banganga-nzambi. (Kus. 5:10) Na yinsi ya minsiku ya Mose, banganga-nzambi nde vuandaka bantu ya ntete yina vuandaka na kiyekua ya kutanina mavimpi ya kinsuni ya bantu mpe kusadisa bau babikana na nguizani ya mbote na Yehova. Minsiku vuandaka ‘kinsisikila ya mambu ya mbote yina kena kuiza,’ na yau yakele mbote beto tuba ti bantu yina keyala kintuadi na Yesu kepesa maboko na kiyekua kaka mosi ya kusadisa bantu ya Nzambi bavuanda na mavimpi ya mbote na kinsuni mpe bavuanda penepene na Yehova. (Ebr. 10:1) Bubu yayi beto zaba ve mutindu masolo kebanda kuluta kati na bantinu mpe banganga-nzambi mpe bantu yina Kimfumu ya Nzambi keyadila awa na ntoto. Tekila Yehova kokisa mambu yango, beto lenda tula ntima ti na paradiso yina kena kuiza, bantu yina kevuanda na ntoto kebaka lutuadusu yina bakele na yau nsatu.—Kus. 21:3, 4.

14. Yinki nguizani kele kati na ‘mameme yankaka’ mpe kimvuka ya fioti?

¹⁴ Yesu bokidilaka bantu yina keyala kintuadi na yandi “kimvuka ya fioti.” (Luka 12:32) Yandi tubilaka diaka grupe ya zole yina yandi bokidilaka ‘mameme yankaka.’ Bagrupe yango nionso zole mesala kimvuka kaka mosi yina kele na bumosi. (Yoa. 10:16) Bagrupe yango nionso zole kena kusala deja kintuadi mpe yaketatamana kusala kintuadi ntangu paradiso na ntoto kekuiza. Mpe na manima, bantu yina kele na kati  ya “kimvuka ya fioti” kevuanda na dizulu mpe bantu yina kele na kati ya ‘mameme yankaka’ kevuanda na kivuvu ya kuzinga mvula na mvula na ntoto. Kasi yakele na mambu yina “mameme yankaka” fueti sala bubu yayi samu bandimama kuvuanda na paradiso.

15. (a) Yinki mutindu ‘mameme yankaka’ kesalaka kintuadi na bampangi ya Klisto? (b) Yinki mutindu nge lenda landa kifuani ya mpangi yina bametubila awa? (Tala foto.)

¹⁵ Muntu ya yimbi yina balulaka ntima kufuaka tekila yandi vuanda na diluaku ya kumonisa ti yandi kele na butondi samu na yina Klisto salaka samu na yandi. Nzokande, beto ‘mameme yankaka’ beto kele na maluaku banda bubu yayi ya kumonisa mutindu beto kekukimonaka samu na Yesu. Na kifuani, beto kemonisa ti beto kele na nzola samu na yandi na mutindu beto kesadilaka bampangi na yandi yina metulua mafuta na kimpeve mambu. Yesu tubaka ti yandi kesambisa mameme na kutadila mutindu bakesadilaka bampangi na yandi mambu. (Mat. 25:31-40) Beto lenda pesa bampangi ya Klisto maboko na kusadisaka bau na vema na kisalu ya kusamuna mpe kukumisa bantu banlonguki. (Mat. 28:18-20) Samu na yau, beto kele na nsatu ya kusadila mbote bisadulu ya Biblia yina bakepesaka beto, na kifuani mukanda Zinga mvula na mvula na kiese!. Kana nge tuadisa ntete ve ndongokolo ya Biblia na muntu, samu na yinki ve kukitudila lukanu ya kutuadisa bandongokolo ya Biblia na bantu mingi na kutadila makoki na nge?

16. Yinki beto fueti sala banda bubu yayi samu na kuvuanda bana ya buala ya Kimfumu ya Nzambi?

¹⁶ Beto fueti vingila ve tii ntangu beto kevuanda na paradiso samu na kukuma mutindu ya bantu yina Yehova kezola bavuanda kuna. Banda bubu yayi beto lenda sala ngolo samu na kuvuanda bantu ya kukuikama na bampova mpe na bisalu na beto mpe kuvuanda na luzingu ya bukatikati. Mpe beto lenda vuanda ya kukuikama na Yehova, na nkuelani na beto mpe na bampangi na beto Baklisto. Kana beto kena kuzitisa Yehova bubu yayi na yinza yayi ya yimbi, yakevuanda pete samu na beto na kuzitisa na paradiso. Beto lenda kudisa diaka makoki mpe bikadulu na beto samu na kumonisa ti beto kele ya kukubama samu na kuzinga kuna. Tala disolo “Nge mekubama samu na ‘kubaka ntoto’?” yina kele na nimero yayi.

17. Beto fueti lemba nzutu samu na masumu na beto ya ntama? Sasila.

 ¹⁷ Beto fueti sala diaka ngolo samu na kukatula kutungisama ya makanisi yina kevuandaka na beto samu na masumu ya nene yina beto mesalaka ntama. Kasi, beto fueti sadila ata fioti ve nkayilu ya nkudulu samu na ‘kusala masumu na nko.’ (Ebr. 10:26-31) Kasi beto lenda ndimisama ti kana beto mebalulaka mpenza ntima na masumu na beto ya nene, mpe beto melombaka lusadusu ya Yehova mpe ya bankulutu, mpe beto mesobaka kikadulu na beto, yandi menlemvukilaka beto na ntima ya mvimba. (Yez. 55:7; Bis. 3:19) Kanisa bampova ya Yesu na Bafalisai: ‘Munu kuizaka ve samu na kubokila bantu ya lunungu, kasi bansumuki.’ (Mat. 9:13) Nkayilu ya nkudulu kele na kilendo mingi ya kufuka masumu na beto nionso.

18. Yinki nge kesepela kusolola kintuadi na muntu ya yimbi yina kufuaka pembeni ya Yesu?

¹⁸ Nge lenda kukimona na paradiso nge kena kusolola na muntu ya yimbi yina sololaka na Yesu? Kondua ntembe beno zole beno kemonisa butondi na beno samu na nkayilu ya Yesu. Nge lenda lomba yandi yandi tubila nge mambu yina salamaka na bawola ya nsuka ya luzingu ya Yesu awa na ntoto mpe mutindu yandi kukimonaka ntangu Yesu pesaka mvutu na diambu yina yandi lombaka yandi. Na ndambu yankaka, yandi lenda yuvusa nge mutindu luzingu vuandaka na bilumbu ya nsuka ya yinza ya Satana. Yakevuanda lokumu kulonguka Mpova ya Nzambi kintuadi na bantu yina kele lokola muntu yango!—Efe. 4:22-24.

19. Samu na yinki luzingu na paradiso kelembisa ve? (Tala foto ya kuvertire.)

¹⁹ Luzingu na paradiso kelembisa ata fioti ve. Beto kevuanda ntangu nionso na bantu ya mbote yina beto kebanda kukutana na bau mpe beto kevuanda na bisalu ya mfunu ya kusala. Yina meluta nionso, konso kilumbu beto kevuanda na dikoki ya kuzaba Tata na beto ya dizulu mbote mpe kusepela na bima yina yandi kepesa beto. Beto kevuanda ntangu nionso na mambu mingi ya kulonguka samu na yandi, mpe samu na nsemono na yandi. Ntangu nionso yina beto kezinga kuna, nzola na beto samu na Nzambi kekuma ngolo. Beto kele na butondi mingi samu na Yehova mpe Yesu na mutindu bapesaka beto nsilulu ti beto lenda zinga mvula na mvula na paradiso!