Ntangu Yehova pesaka bantu kiyekua ti ‘bafulusa ntoto mpe bayadila yau,’ yandi monisaka ti ntoto ya mvimba kekuma paradiso. (Kuy. 1:28) Ntumu yango yina Nzambi pesaka bantu na ebandeli kena kuvingila bantu yina kezinga mvula na mvula awa na ntoto. Na ebandeli ntoto kevuanda ve paradiso—samu bilanga ya Edeni kevuandaka diaka ve. Kaka na manima ya mvita ya Armagedoni, beto kevuanda na bisalu mingi ya kusala samu na kubongisa ntoto yina bebisamaka. Yau kelomba kisalu ya ngolo mpenza!

Yau kena kubambula beto kisalu yina Bayisaele salaka ntangu bakatukaka na kinanga na Babiloni. Yalutaka bamvula 70 buala na bau vuandaka ata na muntu mosi ve. Kasi Yezaya samunaka ti na lusadusu ya Yehova, bakevuanda na dikoki ya kubongisa diaka buala na bau. Mbikudulu yango tubaka: ‘Yandi kekumisa dezere na yandi lokola Edeni mpe yinsi ya patatalu na yandi ya kuyuma lokola bilanga ya Yehova.’ (Yez. 51:3) Na lusadusu ya Yehova Bayisaele nungaka kukumisa yinsi na bau kisika mosi ya kitoko. Mutindu mosi mpe, na lusadusu ya Yehova, bayina kebaka ntoto kenunga kukumisa yau paradiso ya  kitoko. Mpe ata bubu yayi nge lenda monisa ti nge kele na nsatu ya kupesa maboko na kisalu yango.

Mutindu mosi nge lenda monisa yau kele na kusala nionso yina nge kele na dikoki ya kusala samu na kutanina yinzo na nge mpe kisika nge kezingaka bunkete mpe kusala ti bima vuanda na mulongo. Nge lenda nunga kusala yau, ata kana bafinangani na nge kesalaka yau ve. Nge lenda pesa diaka maboko na kutulaka bunkete mpe kutaninaka Yinzo ya Kimfumu na beno mpe ya balukutakanu ya nene. Kana diluaku memonana, nge lenda fulusa diaka formilere samu nge kuma volontere yina kesadisaka na kisika kisumbula mebima. Yau kemonisa ti nge kele na nsatu ya kusadisa bampangi na nge ya babakala mpe ya banketo yina kele na nsatu ya lusadusu. Kukiyuvusa, ‘Mulenda longuka kukudisa makoki na mambu yankaka yina munu lenda sadila kana Yehova mepesa munu nzila munu zinga na ntoto mvula na mvula?’

Kaka na manima ya kufutumuna muana ya nketo ya Yairusi, Yesu tubaka ti muana yango kele na nsatu bapesa yandi kima ya kudia. (Mar. 5:42, 43) Yamemonana ti yavuandaka ve kisalu ya mpasi samu na kusadisa muana yango ya bamvula 12. Kasi, kanisa na kisalu yina kelombama ntangu Yesu kekokisa nsilulu na yandi ti ‘bantu nionso yina kele na maziamu ya kukanisama bakekuwa ndinga na yandi mpe bakebima.’ (Yoa. 5:28, 29) Atako Biblia tubila ve mbotembote mambu yankaka, kasi beto lenda mona na makanisi mutindu bantu yina kefutumuka kevuanda na nsatu ya kubaka madia, kisika ya kuvuanda, mpe bilele. Ata bubu yayi, nge lenda monisa ti nge kele ya kukubama samu na kupesa lusadusu? Tala ndambu ya biuvu yina nge fueti tadila.

Ntangu bamepesa mazayisu ti nkengi ya kizungidila kekuiza tala kimvuka na beno, nge kebokidisaka yandi yandi kuiza kudia madia na yinzo na nge? Ntangu Betele metinda bampangi yina kele na kisalu ya ntangu nionso na kimvuka na beno, to ntangu nkengi ya kizungidila memanisa kisalu na yandi ya kutala bimvuka, nge kesadisaka bau samu na kusosila bau kisika ya kuvuanda? Kana lukutakanu ya nene ya kizungidila ya bilumbu tatu to lukutakanu ya spesiale kesalama na kizungidila na beno, nge kesepela kuvuanda volontere samu na kupesa maboko na kisalu yina kelutaka na manima to tekila  balukutakanu yango banda to kuyamba banzenza yina kekuizaka?

Na kutadila yina mukanda ya Bisalu 24:15 metuba, beto kevingilaka bamilion ya bantu yina kefutumuka. Mingi kati na bantu yango bakaka ve diluaku ya kuzaba Yehova tekila bakufua. Kasi bakebaka diluaka yango na manima ya kufutumuka. a Bisadi ya kukuikama, mpe ya makoki ya Nzambi kepesa maboko na kisalu yango ya kulonga bantu yina kefutumuka. (Yez. 11:9) Mpangi Charlotte, yina samunaka na Europe, na Amérique du Sud, mpe na Afrique, kena kuvingila na nsatu ya ngolo ntangu yango. Yandi metuba na kiese nionso ti: “Munu kena kuvingila na nsatu ya ngolo kulonga bantu yina kefutumuka. Ntangu muketangaka disolo mosi ya muntu yina mezingaka na ntama, mbala mingi mukekanisaka: ‘Kana muntu yango zabaka Yehova, luzingu na yandi zolaka vuanda mutindu yankaka.’ Mukena kuvingila na ntima zulu kutubila bantu yina kefutumuka mambu metadila Yehova mpe mutindu luzingu na bau kevuanda mbote kana bamesadila yandi.”

Ata mpe bisadi ya Yehova ya kukuikama yina zingaka tekila Yesu kuiza awa na ntoto kelonguka mambu mingi. Kanisa na kiese mpe diluaku yina beto kevuanda na yau ya kusasila Daniele kukokisama ya bambikudulu yina yandi sonikaka atako yandi bakusaka yau mbotembote ve. (Dan. 12:8) To na yina metadila kusadisa Riti mpe Naomi na kulonguka diaka mutindu dibuta na bau nataka tii na Masiya? Yakevuanda kiese kupesa maboko na programe ya kulonga yina kesalama na yinza ya mvimba, kondua mitungisi mpe banzomono ya yinza yayi ya Satana!

Yinki mutindu bubu yayi nge lenda monisa ti nge kele ya kukubama samu na kupesa maboko na programe yango? Mutindu mosi nge lenda sala yau kele ya kukudisa makoki na nge na kulonga mpe kusamunaka mbala na mbala. (Mat. 24:14) Ata kana bamvula na nge mepusana to mambu yankaka yina kena kutungisa luzingu na nge mpe kena kupekisa nge nge sala mingi bubu yayi, bangolo yina nge kesalaka bubu kemonisa nsatu na nge ya kulonga bantu yina kefutumuka.

Ee, kiuvu ya mfunu kele, nge kena kuvingila mpenza na ntima yinda nionso samu na kubaka ntoto? Nge kena kuvingila na nsatu ya ngolo kukumisa ntoto paradiso, kuyamba mpe kulonga bantu yina kefutumuka? Nge lenda monisa ti nge kele ya kukubama na kusadilaka maluaku nionso yina nge kele na yau bubu yayi samu na kupesa maboko na bisalu yina mekokana na yina beto kesala ntangu beto kebaka ntoto mpe beto kevuanda kuna mvula na mvula!