1. Yinki diambu Yesu zabisaka banlonguki na yandi na yina metadila ntangu ya nsuka, mpe yinki nduengoso yandi pesaka bau?

 BILUMBU fioti tekila Yesu kufua, banlonguki na yandi yiya (4) yuvusaka yandi: ‘Yinki kevuanda kidimbu . . . ya nsuka ya mambu ya ntangu yayi?’ (Mat. 24:3) Kondua ntembe banlonguki yango vuandaka sosa kuzaba ntangu yina Yerusaleme mpe tempelo na yau kebebisama. Samu na kupesa bau mvutu, Yesu tubilaka kaka ve kubebisama ya Yerusaleme mpe tempelo na yau kasi yandi tubilaka diaka ‘nsuka ya mambu ya ntangu yayi’ yina beto kena kuzinga na yau. Samu na yina metadila kilokola yina nsuka kekuiza, Yesu tubaka: ‘Na yina metadila kilumbu to ntangu yango, ata muntu mosi ve mezaba yau, yavuanda bambasi na dizulu to Muana, kasi Tata kaka mezaba yau.’ Na manima, Yesu pesaka banlonguki na yandi dilongi ti ‘beno leka pongi ve’ mpe ‘beno kenga.’​—Mar. 13:32-37.

2. Samu na yinki yavuandaka na mfunu samu na Baklisto ya siekle ya ntete batatamana kukenga?

² Yalombaka na Bayuda yina vuandaka Baklisto na siekle ya ntete babikana ya kukenga; samu bavukisa luzingu na bau. Yesu zabisaka banlonguki na yandi mambu yina bafueti zaba yina kemonisa kubebisama ya Yerusaleme mpe tempelo na yau. Yandi tubaka: ‘Ntangu beno kemona basoda mezinga Yerusaleme, beno zaba ti kubebisama na yau mekuma pene.’ Na ntangu yango, yalombaka bazitisa nduengoso ya Yesu mpe ‘kubanda kutina na bamongo.’ (Luka 21:20, 21) Bantu yina tulaka dikebi na nduengoso yango bavukaka ntangu basoda ya Roma bebisaka Yerusaleme.

3. Yinki beto ketubila na disolo yayi?

³ Bubu yayi beto kena kuzinga na ntangu ya nsuka ya mambu  ya ntangu yayi ya yimbi. Na yau, beto diaka beto fueti tanina mabanza na beto mpe kutatamana kukenga. Na disolo yayi, beto ketubila mutindu beto lenda vuanda na bukatikati ntangu beto kena kutala mambu yina kena kuluta na yinza, mutindu beto lenda keba, mpe mutindu beto lenda sadila mbote kuluta ntangu yayi mebikana.

4. Samu na yinki beto fueti tula dikebi na kumona mutindu mambu yina kena kuluta na yinza kena kukokisa bambikudulu ya Biblia?

⁴ Beto kele na bamfunu ya mbote ya kusepela kumona mutindu mambu yina kena kuluta na yinza kena kukokisa bambikudulu ya Biblia. Na kifuani, Yesu tubilaka mambu ya sikisiki yina kesadisa beto samu na kuzaba ntangu yina nsuka ya yinza ya Satana kekuma pene. (Mat. 24:3-14) Ntumua Petelo kindisaka beto beto tula dikebi na kukokisama ya bambikudulu samu kiminu na beto tatamana kuvuanda ngolo. (2 Pi. 1:19-21) Mukanda ya nsuka ya Biblia mebanda na bampova yayi: ‘Kusonga ya Yesu Klisto, yina Nzambi pesaka yandi, samu na kutubila bananga na yandi mambu yina fueti salama ntama mingi ve.’ (Kus. 1:1) Beto kesepelaka kutula dikebi na mambu yina kena kuluta na yinza mpe kumona mutindu yakena kukokisa bambikudulu ya Biblia. Mpe beto kevuandaka na nsatu ya ngolo ya kutubila bantu yankaka mambu yango.

5. Yinki diambu beto fueti manga, kasi yinki diambu beto fueti sala? (Tala diaka bafoto.)

⁵ Kasi, ntangu beto kena kutubila bambikudulu ya Bibila, beto fueti keba na mambu yina beto kena kuwa. Samu na yinki? Samu beto kezola ve kutuba mambu yina kebebisa bumosi ya kimvuka. Na kifuani, beto lenda kuwa ti bamfumu ya yinza kena kutubila mutindu bakebaka solision samu na mantata mosi, mpe mutindu ya kunata kiyenge mpe luvuvamu. Na kisika ya kupanza nsangu ya mutindu yina ti yakena kukokisa bambikudulu yina 1 Batesalonika 5:3 metubila, beto fueti zaba mambu ya yimpa yina bimaka. Kana beto kena kutubila mambu yina mesimbama na mikanda yina nkubukulu ya Yehova kebimisaka, beto kesadisa kimvuka samu yatatamana kuvuanda na bumosi ‘na dibanza kaka mosi.’​—1 Bk. 1:10; 4:6.

6. Yinki dilongi beto lenda baka na 2 Piere 3:11-13?

⁶ Tanga 2 Piere 3:11-13. Ntumua Petelo kena kusadisa beto beto vuanda na bukatikati ntangu beto kena kutadila bambikudulu ya Biblia. Yandi mekindisa beto beto ‘lundaka ntangu nionso na makanisi na beto kilumbu ya Yehova.’ Samu na yinki? Yakele ve samu beto zaba ‘kilumbu mpe ntangu’ yina Yehova kebandisa mvita ya Armagedoni, kasi yakele samu beto sadila ntangu yina mebikana samu na kumonisa ‘bikadulu ya nlongo mpe kusala mambu yina kena kumonisa kukangama na Nzambi.’ (Mat. 24:36; Luka 12:40) Na bampova yankaka, beto kezolaka kuvuanda na bikadulu ya mbote mpe kundimisama ti bangolo yina beto kena kusala na kisalu ya Yehova kena kumonisa nzola yina beto kele na yau samu na yandi. Samu na kununga kusala mutindu yina, beto fueti keba.

7. Yinki mutindu beto kemonisaka ti beto kena kukeba? (Luka 21:34)

⁷ Yesu tubilaka banlonguki na yandi bakeba kaka ve samu na mambu yina kena kuluta na yinza, kasi bakeba diaka samu na bau mosi. Diambu yango kele puelele na Luka 21:34. (Tanga.) Tala bampova ya Yesu: “Beno keba.” Muntu yina kekebaka kele muntu yina kezabaka bivonza nionso yina lenda tula nguizani na yandi na Yehova na kivonza, mpe yandi kesosaka kutina yau. Mutindu yina nde, yandi  kebikana na nzola ya Nzambi.​—Bin. 22:3; Yude 20, 21.

8. Yinki dilongi ntumua Paulo pesaka Baklisto?

⁸ Ntumua Paulo zabisaka Baklisto bakeba. Na kifuani, yandi zabisaka Baklisto ya Efezo: ‘Beno keba mbotembote ti mutindu na beno ya kutambula vuanda ve lokola bazoba kasi lokola bantu ya mayele.’ (Efe. 5:15, 16) Satana kesosaka ntangu nionso kubebisa nguizani na beto na Yehova, na yau Biblia mepesa beto dilongi yayi: ‘Beno tatamana kubakusa yina kele lukanu ya Yehova.’ Yau kesala ti beto nunga kutelemina Satana.​—Efe. 5:17.

9. Yinki mutindu beto fueti bakusa lukanu ya Yehova samu na beto?

⁹ Biblia tubila ve mambu nionso yina kebebisaka nguizani na beto na Yehova. Mbala mingi yakelombaka beto baka banzengolo na mambu yina Biblia tubila ve mbotembote. Samu na kusala bansodolo ya mbote, beto fueti sosa kubakusa, to kuzaba yina kele ‘lukanu ya Yehova.’ Beto lenda sala yau na kulongukaka mbala na mbala Mpova ya Nzambi mpe kuyindulaka na mpinda na zulu na yau. Ntangu beto kena kubakusa lukanu ya Nzambi mpe kusosa kuvuanda na ‘mabanza ya Klisto,’ kondua ntembe beto ketambula lokola ‘bantu ya nduenga,’ ata kana beto kele ve na bansiku ya sikisiki samu na kutuadisa bikadulu na beto. (1 Bk. 2:14-16) Bivonza yankaka kele mpasi ve samu na kumona yau; kasi yankaka kevuandaka mpasi samu na kumona yau.

10. Yinki kele ndambu ya bivonza yina beto fueti manga?

¹⁰ Ndambu ya bivonza yina beto fueti manga kele kusala mambu yina ketinda mpangi ya nketo to ya bakala kanisa ti nge kekuela yandi, kunua malavu na kulutisa ndilu mpe kudia na kulutisaka ndilu, kutuba bampova yina keluadisa bantu yankaka, bandutusulu ya ntangu yina kena kumonisa kinkesi, pornografi, mpe mambu yankaka ya yimbi. (Nk. 101:3) Mbeni na beto, Diabulu, kesosaka mbala na mbala maluaku samu na kubebisa kinkundi na beto na Yehova. (1 Pi. 5:8) Kana beto kenga ve, Satana lenda kuna na bantima to na mabanza na beto kikadulu ya kulula, luvunu, lokoso, kuyinana, lulendo mpe kulunda nganzi. (Bag. 5:19-21) Na ebandeli, banguilu yango lenda vuanda mpenza ngolo ve. Kasi kana beto sala ve diambu samu na kuvuza yau kondua kuvingila, banguilu yango ketatamana kukula lokola yinti ya puazon yina kenatina beto kivonza.​—Yak. 1:14, 15.

11. Yinki kele kivonza mosi yina kevuandaka mpasi na kumona yina beto fueti manga?

¹¹ Mosi ya kivonza yina kevuandaka mpasi na kumona kele bankundi ya yimbi. Beto tadila kifuani yayi. Nge kesalaka kintuadi na muntu mosi yina kele ve Mbangi ya Yehova. Nge kele na nsatu nkundi na nge ya kisalu vuanda na makanisi ya mbote samu na Bambangi ya Yehova, na yau nge kemonisinaka yandi kimpombo mpe nge kepesaka yandi lusadusu. Bantangu yankaka nge kesepelaka kudia kintuadi na yandi. Na manima nge mebanda kudia kintuadi na yandi mbala na mbala. Na maluaku yankaka, nkundi yango mebanda kukotisa masolo ya nsoni. Na ebandeli nge kena kumanga kutudila yau dikebi. Na manima, nge memesana na masolo yango yina nge vuandaka manga na ebandeli. Kilumbu mosi, nkundi yango ya kisalu mebokidisa nge samu beno kunua malavu na manima ya kisalu, mpe nge mendima. Nsukansuka, nge mekuma na makanisi mutindu mosi na nkundi na nge ya kisalu. Na yau, ntangu yikua yakelomba samu nge banda kusala mambu lokola yandi? Kondua ntembe, beto kevuandaka na kimpombo mpe beto kezitisaka bantu nionso, kasi beto fueti zimbakana ve ti bantu yina beto kelutisaka na bau ntangu kintuadi kevuandaka na bupusi ya ngolo na zulu na beto. (1 Bk. 15:33) Mutindu Yesu  kindisaka beto, kana beto mekeba, beto kemanga kusala kinkundi yina mekondua mfunu na bantu yina kezitisaka ve bansikudukusu ya Yehova. (2 Bk. 6:15) Beto kemona kivonza mpe beto ketina yau.

12. Yinki yalombaka banlonguki ya Yesu sala lokola bavuandaka vingila nsuka ya mambu ya ntangu yayi?

¹² Yesu zolaka ti banlonguki na yandi vuanda na mambu mingi ya kusala ntangu bakena kuvingila nsuka ya mambu ya ntangu yayi. Yesu pesaka bau kisalu ya kusala. Yandi pesaka bau ntumu ya kusamuna nsangu ya mbote ‘na Yerusaleme, na Yudea nionso mpe Samaria, mpe na kisika yina meluta ntama ya ntoto.’ (Bis. 1:6-8) Yavuandaka kiyekua mosi ya nene yina banlonguki ya Yesu bakaka! Na kukipesaka na kisalu yango, basadilaka ntangu na bau na mutindu ya mbote kuluta.

13. Samu na yinki beto fueti sadila ntangu na beto na mutindu ya mbote kuluta? (Bakolosai 4:5)

¹³ Tanga Bakolosai 4:5. Samu na kukeba, beto fueti tadila mutindu na beto ya kusadila ntangu. ‘Ntangu mpe mambu ya kukondua kukana’ lenda kumina mosimosi kati na beto. (Lon. 9:11) Beto lenda kufua na kintulumukina.

14-15. Yinki mutindu beto lenda sadila ntangu na beto na mutindu ya mbote kuluta? (Baebreo 6:11, 12) (Tala diaka foto.)

 ¹⁴ Beto lenda sadila ntangu na beto na mutindu ya mbote kuluta na kusalaka lukanu ya Yehova mpe kukumisa nguizani na beto na yandi ngolo. (Yoa. 14:21) Beto fueti ‘telema ngui, [beto] ningana ve, [beto] vuanda ntangu nionso na mambu mingi ya kusala na kisalu ya Mfumu.’ (1 Bk. 15:58) Ntangu nsuka kekuiza​—yavuanda nsuka ya luzingu na beto to ya yinza yayi ya yimbi—​beto kenionga ve.​—Mat. 24:13; Bar. 14:8.

¹⁵ Bubu yayi, Yesu kena kutatamana kutuadisa banlonguki na yandi na kisalu ya kusamuna nsangu ya Kimfumu ya Nzambi na ntoto ya mvimba. Yandi mekokisa nsilulu na yandi. Na nzila ya nkubukulu ya Yehova, Yesu kena kupesa beto formasion samu na mutindu ya kusamuna mpe yandi kena kupesa beto bisadulu yina beto kele na yau nsatu samu na kumuangisa nsangu ya mbote. (Mat. 28:18-20) Beto kekokisaka kiyekua na beto na kusalaka ngolo samu na kusamuna mpe kulonga mpe na kutatamanaka kukenga lokola beto kena kuvingila Yehova tula nsuka na yinza yayi. Na kusadilaka dilongi yina kele na Baebreo 6:11, 12, beto kesimba ngolo kivuvu na beto “tii na nsuka.”​—Tanga.

16. Yinki nzengolo beto fueti baka?

¹⁶ Yehova metulaka kilumbu mpe ntangu yina yandi kesukisa yinza yayi ya Satana. Ntangu kilumbu yango kekuiza, Yehova kekokisa bambikudulu yina yandi sonikisaka na Mpova na yandi. Kasi na bantangu yankaka, beto lenda kanisa ti nsuka ya mambu ya ntangu yayi kele ntete ntama samu yakuiza. Kasi, kilumbu ya Yehova ‘kekuma ve na manima ya ntangu’! (Hab. 2:3) Na yau, bika beto baka nzengolo ya ‘kutatamana kutadila Yehova,’ na kumonisaka ‘kikadulu ya kuvingila Nzambi ya luvuluzu na [beto].’​—Mika 7:7.