Ya kedika, Yehova zola ti bantu zole yina mekuelana bavuanda na kiese mpe basepela kuvuanda na luzingu mosi yina kezingila. (Mat. 19:4-6) Kana nge kele na nsatu ya kukuela, yinki mutindu nge lenda sosa nkuelani ya mbote? Lokola Yehova kele Mvangi na beto, Yandi mezaba yina beto fueti sala samu na kuvuanda na dikuela mosi ya kiese. Na yau, kana nge mesadila bansikudukusu yina yandi pesaka beto, nge kevuanda mpenza na kiese. Bika beto tadila ndambu ya bansikudukusu yango.

Ya ntete, beto fueti bakusa ntete diambu yayi samu na beto mosi: ‘Ntima kele luvunu kuluta konso kima yankaka mpe yakele yimbi mpenza.’ (Yer. 17:9) Kana muntu kena kusosa to yandi kena kubendama na muntu mosi yina yandi zola kuela, banguilu kekumaka ngolo, yakekulaka malumalu mpe yakekatulaka mabanza ya mbote. Kana bantu kena kubika nde banguilu tinda bau babaka nzengolo ya kukuelana, mbala mingi bakekuizaka nionga na manima. (Bin. 28:26) Yau yina, yakele diambu ya nduenga ve na bantu zole na kumonasana banguilu ya kati ya ntima kaka na ebandeli ya kuzabana to kubaka banzengolo ya kukuelana tekila ya kutoma zabana mbote.

Bingana 22:3 metuba: ‘Muntu ya kukenga kemonaka kivonza mpe kesuamaka, kasi bantu yina mekondua mayele kekuendaka kaka na ntuala mpe bakekutanaka na bampasi.’ Yinki bivonza lenda bima kana beto kena kusosa nkuelani na basite ya Internet? Diambu ya kiadi kele, bantu mingi bandaka kuzolana na bantu yankaka yina bazabana ve na nzila ya Internet mpe bakuizaka bakusa na manima ti bantu yina bavuandaka zolana na bau vunaka bau. Katula yau, bantu yankaka ya yimbi kezibudisaka bakonte na Internet yina kele na bankumbu na bau ve samu na kuvuna bantu ya mbote mpe kuyiba bau mbongo. Mbala yankaka, bantu yango ya yimbi ketubaka ti bakele Bambangi ya Yehova.

Bika beto tadila kivonza yankaka. Basite yankaka ya Internet yina bantu kesosilaka bankuelani, kesadilaka baprograme ya ordinatere yina kesala ti bantu vuanda na dikoki ya kumona bantu yina balenda kuelana na bau. Nzokande, yakele na kidimbu mosi ve yina kena kundimisa ti mayele yango kesimbaka mpenza. Yalenda vuanda diambu ya nduenga kutula ntima na programe mosi ya ordinatere yina muntu salaka samu na kubaka nzengolo na diambu ya mfunu lokola dikuela? Baprograme ya ordinatere lenda fuanana ata fioti ve na bansikudukusu ya Biblia.—Bin. 1:7; 3:5-7.

Nsikudukusu beto kekuta na Bingana 14:15 metuba: ‘Muntu yina mekondua mayele kendimaka mambu nionso, kasi muntu ya kukenga ketadilaka konso  kitambi na yandi.’ Tekila nge baka nzengolo ya kundima muntu mosi samu yandi vuanda nkuelani yina mebonga na nge, nge fueti sosa kuzaba muntu yango mbote. Kasi kukutana na muntu kaka na nzila ya Internet lenda sala ti yavuanda mpasi samu na kuzaba muntu yango mbote. Ata kana nge kena kumona mambu metadila muntu yango mpe nge kena kulutisa ntangu mingi ya kusolola na yandi na nzila ya Internet, nge lenda tuba mpenza ti nge mezaba muntu yango? Bantu yankaka yina kanisaka ti bamekutana na bantu ya mbote yina bakekuelana na bau na nzila ya Internet, baniongaka na mambu yina bakuizaka kuzaba ntangu bakutanaka na bantu yango mbunzu na mbunzu.

Nsoniki ya nkunga tubaka: ‘Munu kesala ve kinkundi na bantu ya luvunu, mpe munu kemanga bantu yina kesuekaka kimuntu na bau.’ (Nk. 26:4) Bantu mingi kemonaka ti yakele kuandi yimbi ve kutula mambu ya luvunu yina metadila bau na basite ya Internet samu bamonana mbote na ntadisi ya bantu. Balenda lunda bikadulu na bau ya yimbi to bikadulu na bau ya yimbi lenda monana ve ntangu bakena kutindila bantu yankaka bamesaje. Ata kana bantu yankaka metuba ti bakele Bambangi ya Yehova, bakele mpenza Baklisto yina mebakaka mbotama? Bakele ya kuyela na kimpeve? Bakele na nguizani ya mbote na Yehova? Bakepesaka bau luzitu na kimvuka na bau? To balendaka vuanda bifuani ya yimbi to ‘bankundi ya yimbi’? (1Bk. 15:33; 2 Tm. 2:20, 21) Mpe bakele na kimpuanza ya kukuela na kutadila Masonukua? Nge fueti zaba mambu nionso yayi, kasi yalenda vuanda mpasi kuzaba mambu yango kondua kusolola na Bambangi ya Yehova yankaka yina mezaba muntu yango mbote. (Bin. 15:22) Mpe ya kedika, kisadi ya kukuikama ya Yehova kezola ve kuvuanda na ‘kikangulu ya yimbi’ na muntu yina kele nkuikizi ve.—2Bk 6:14; 1Bk. 7:39.

Lokola yakele na bivonza kusadila basite ya Internet samu na kusosa nkuelani, yakele na mutindu ya mbote ya kusosa mpe kukudisa nguizani yina lenda nata tii na dikuela ya lokumu. Yinki bisika nge lenda monina muntu yina ya mbote nge kekuelana na yandi? Ntangu beto kevuandaka na diluaku ya kukutakana kintuadi, beto lenda zabana na bantu yankaka na balukutakanu ya kimvuka, na balukutakanu ya nene, mpe na maluaku yankaka.

Ntangu beto kele na dikoki ve ya kusala balukutakanu kintuadi, na kifuani na ntangu ya maladi ya yimbi ya COVID-19, beto kesadilaka baapareyi samu na kusala balukutakanu ya kimvuka, kuna nde beto kevuandaka na diluaku ya kukutana na Bambangi ya Yehova yina kele bampupa. Nge lenda mona mutindu bakesadilaka balukutakanu na bau mpe nge kekuwa mutindu bakena kutubila kiminu na bau. (1 Tm. 6:11, 12) Nge lenda sadila diaka aplikasion yina bakebokidilaka breakout room samu na kusolola na bayankaka kana kimvuka na beno kesadilaka aplikasion yango. Na nzila ya balukutakanu yango yina kesalamaka na nzila ya baaplikasion ya kumonana na video kintuadi na mua bimvuka ya Bambangi ya Yehova, nge lenda mona mutindu muntu yina kena kusepedisa nge kena kulutisa ntangu na bantu yankaka, yau nde lenda monisa mpenza bikadulu na yandi. (1 Pi. 3:4) Na manima, kana nge mezaba muntu yango mbote, nge lenda zaba kana beno zole beno kele na balukanu mosi mpe kana beno mefuana samu na kukuelana.

Kana bampupa kena kusosa bankuelani ya mbote na nguizani na bansikudukusu ya Biblia, bakemona mpenza kedika ya kingana yayi metuba: ‘Muntu yina mebaka nketo ya mbote [to bakala ya mbote] yandi mebaka kima mosi ya mbote, mpe Yehova kendima yandi.’—Bin. 18:22.