1. Yinki Yehova salaka samu na nge?

YINKI mutindu nge kumaka Mbangi ya Yehova? Ya ntete, nge kuwaka ‘nsangu ya mbote’—mbala yankaka na bibuti na nge, na nkundi na nge ya kisalu to ya kalasi, to ntangu Bambangi ya Yehova kuizaka na yinzo na nge ntangu bavuandaka samuna. (Mar. 13:10) Na manima, muntu mosi lutisaka ntangu mingi mpe bangolo samu na kutuadisa ndongokolo ya Biblia na nge. Ntangu ndongokolo yango vuandaka luta, nge bandaka kuzola Yehova mpe nge longukaka ti yandi kezolaka nge. Yehova bendaka nge na kedika, mpe bubu yayi lokola nge kele nlonguki ya Yesu Klisto, nge kele na kivuvu ya kuzinga mvula na mvula. (Yoa. 6:44) Kondua ntembe nge kele na butondi na Yehova mutindu yandi sadilaka muntu samu na kulonga nge kedika mpe yandi ndimaka nge lokola mosi ya bisadi na yandi.

2. Yinki beto ketadila na disolo yayi?

² Ntangu yayi lokola beto mezaba kedika, beto kele na diluaku ya kusadisa bantu yankaka bakuiza sangana na beto na nzila ya luzingu. Yalenda vuanda pete samu na beto na kusamuna yinzo na yinzo, kasi yalendaka vuanda mpasi samu na beto samu na kubanda mpe kutuadisa bandongokolo ya Biblia. Nge kekukimonaka mutindu yina? Kana yakele mutindu yina, mbala yankaka nge kemona ndambu ya mambu yina kesadisa nge na disolo yayi. Beto ketubila mambu yina ketindaka beto beto kumisa bantu banlonguki. Beto kemona diaka mutindu ya kununga mambu ya mpasi yina lenda pekisa beto beto tuadisa ndongokolo ya Biblia. Ya ntete, beto tadila samu na yinki beto fueti vuanda kaka ve bansamuni kasi mpe banlongisi ya nsangu ya mbote.

3. Samu na yinki beto kesamunaka?

³ Ntangu Yesu vuandaka awa na ntoto, yandi pesaka banlonguki na yandi ntumu ya kusala kisalu mosi yina mekabuka na bitini zole.  Ya ntete, yandi zabisaka bau basamuna nsangu ya mbote ya Kimfumu, mpe yandi monisaka bau yinki mutindu bafueti sala yau. (Mat. 10:7; Luka 8:1) Na kifuani, Yesu tubilaka banlonguki na yandi yina bafueti sala kana bantu mendima nsangu ya Kimfumu, mpe yina bafueti sala kana bantu memanga kundima yau. (Luka 9:2-5) Yandi samunaka diaka mutindu kisalu na bau ya kusamuna kemuangana na bisika mingi, na kutubaka ti banlonguki na yandi kepesa ‘kimbangi na makanda nionso.’ (Mat. 24:14; Bis. 1:8) Kondua kutula dikebi na mutindu bantu ketadila kisalu yango, banlonguki fueti zabisa bantu Kimfumu ya Nzambi mpe mambu yina yakena kusala.

4. Na kutadila Matayo 28:18-20, yinki diambu yankaka beto fueti sala katula kusamuna Kimfumu?

⁴ Yinki vuandaka ntumu ya zole yina Yesu pesaka? Yandi tubilaka banlonguki na yandi balonga bantu mambu nionso yina yandi pesaka bau. Kasi kisalu yango ya kusamuna mpe ya kulonga pesamaka kaka na Baklisto ya siekle ya ntete, mutindu bantu yankaka ketubaka? Ve, Yesu monisaka ti kisalu yango ya mfunu ketatamana tii na bilumbu na beto, ‘tii na nsuka ya mambu ya ntangu yayi.’ (Tanga Matayo 28:18-20.) Yalenda vuanda Yesu pesaka ntumu yango ntangu yandi biminaka banlonguki na yandi kuluta 500. (1Bk. 15:6) Mpe na mbonosono yina yandi pesaka Yoane, Yesu monisaka puelele ti banlonguki na yandi nionso kele na kiyekua ya kusadisa bantu yankaka bazaba Yehova.—Kus. 22:17.

5. Na kutadila 1 Bakorinto 3:6-9, yinki mutindu Paulo monisaka nguizani yina kele kati na kusamuna mpe kulonga?

⁵ Ntumua Paulo fuanikisaka kisalu ya kukumisa bantu banlonguki na kisalu ya kukuna bilanga, na kumonisaka ti beto fueti suka kaka ve na kukuna. Yandi bambulaka Baklisto ya Korinto ti: ‘Munu kunaka, Apolosi lozaka maza . . . beno kele bilanga ya Nzambi yina yandi kena kukuna.’ (Tanga 1 Bakorinto 3:6-9.) Lokola beto kele bisadi na ‘bilanga ya Nzambi,’ beto kena kukuna kaka mbutu ve kasi beto kena kulozila yau diaka maza mpe beto ketalaka mbala na mbala mutindu bilanga na beto kena kukula. (Yoa. 4:35) Mpe beto kezimbakanaka ve ti Nzambi nde kekudisaka mbutu.

6. Ntangu beto kena kulonga bantu, beto fueti sadisa bau basala yinki?

⁶ Beto kesosaka bantu yina kele na ‘kikadulu ya mbote samu na kubaka luzingu ya mvula na mvula.’ (Bis. 13:48) Samu na kusadisa bantu yango bakuma banlonguki, beto fueti sadisa bau samu (1) babakusa, (2) bandima, mpe (3) basadila mambu yina bakena kulonguka na Biblia. (Yoa. 17:3; Kol. 2:6, 7; 1Te 2:13) Beto nionso na kati ya kimvuka lenda sadisa banlonguki ya Biblia na kumonisinaka bau kifuani ya mbote, na kumonisaka bau nzola mpe kuyambaka bau ntangu bamekuiza na balukutakanu. (Yoa. 13:35) Muntu yina kena kutuadisa ndongokolo fueti lutisaka diaka ntangu mingi mpe kusala ngolo samu na kusadisa nlonguki yandi katula bindimeli to mambu yina yandi kesalaka yina ‘mekangamaka ngolo’ na yandi. (2Bk 10:4, 5) Yalenda baka bangonda mingi samu na kusadisa muntu yandi sala bansobolo yango na luzingu na yandi samu yandi ndimama na kubaka mbotama. Kasi kusala bansobolo yango kele na mfunu mingi.

7. Yinki ketindaka beto beto kukipesa na kisalu ya kusamuna mpe ya kukumisa bantu banlonguki?

⁷ Samu na yinki beto kekukipesaka na kisalu ya kusamuna mpe ya kukumisa bantu banlonguki? Ya ntete, samu beto kezolaka Yehova. Kana nge kena kusala nionso yina nge lenda sala samu na kuzitisa ntumu ya kusamuna mpe ya kukumisa bantu banlonguki, nge kemonisa ti nge kezolaka Nzambi. (1 Yoa. 5:3) Kanisa ntete diambu yayi: Nzola na nge samu na Yehova nde ketindaka nge nge samunina bantu yankaka na bayinzo na bau. Ntumu yango kele pete samu na kuzitisa yau? Mpenza ve. Ntangu nge pusanaka samu na mbala ya ntete na porte ya muntu na kisalu ya kusamuna, nge vuandaka banga? Kondua ntembe  yabangisaka nge! Kasi nge zabaka ti yau nde kisalu yina Yesu zola nge sala, mpe nge zitisaka ntumu yango. Mpe ya kedika, na manima ya mua ntangu, yakumaka pete samu na nge kusala kisalu ya kusamuna. Kasi yinki mutindu nge kekukimonaka samu na diambu metadila kutuadisa ndongokolo ya Biblia? Yakebangisaka nge? Mbala yankaka yakebangisaka nge. Kasi, kana nge melomba Yehova yandi sadisa nge nge nunga kubanga na nge mpe nge vuanda na kibakala ya kubanda kutuadisa ndongokolo mosi ya Biblia, Yehova lenda sadisa nge nge kokisa nsatu na nge ya kukumisa bantu banlonguki.

8. Na kutadila Marko 6:34, yinki diaka lenda tinda beto beto longa bantu yankaka?

⁸ Ya zole, Nzola samu na bafinangani na beto ketindaka beto beto longa bau kedika. Na diluaku mosi, Yesu mpe banlonguki na yandi lembaka nzutu samu basamunaka mingi. Bavuandaka na nsatu ya kusosa kisika mosi samu na kupema, kasi kimvuka ya bantu mingi monaka bau mpe balandaka bau. Kiadi kangaka Yesu, mpe yandi bandaka kulonga bantu yango ‘mambu mingi.’ (Tanga Marko 6:34.) Yandi salaka kisalu ya ngolo atako yandi vuandaka ya kulemba. Samu na yinki? Yesu kukitulaka na kisika ya kimvuka yango ya bantu. Yandi monaka mpasi yina bavuandaka na yau—bavuandaka na nsatu ya kivuvu—mpe yandi zolaka kusadisa bau. Bubu yayi diaka bantu kele na mpasi mpe bakele na nsatu ya kivuvu. Ata kana bakena kumonana lokola bakele na kiese mpe luzingu na bau kele ya mbote. Bakele lokola mameme yina mezimbana mpe mekondua ngolo, bakele ve na mvungi yina ketuadisa bau. Ntumua Paulo tubaka ti bantu yango zaba Nzambi ve mpe bamekondua kivuvu. (Efe 2:12) Bakele na ‘nzila ya nene yina kenataka na lufua’! (Mat. 7:13) Kana beto mekanisa na mutindu bantu ya terituare na beto kele na nsatu ya kuzaba Nzambi, nzola mpe kiadi ketinda beto beto sadisa bau. Mpe mutindu ya mbote yina beto lenda sadisa bau kele na kulongukaka na bau Biblia.

9. Na kutadila Bafilipi 2:13, yinki mutindu Yehova lenda sadisa nge?

⁹ Mbala yankaka nge kebangaka kutuadisa ndongokolo ya Biblia samu nge mezaba ti yakelomba nge lutisa ntangu mingi na kubongisa mpe na kutuadisa ndongokolo yango. Kana yakele mutindu yina, tubila Yehova banguilu na nge. Lomba yandi yandi sadisa nge nge kuma na nsatu ya kusosa muntu mosi yina nge lenda longa Biblia. (Tanga Bafilipi 2:13.) Ntumua Yoane tubaka ti Nzambi kepesaka mvutu na bisambu yina kele na nguizani na lukanu na Yandi. (1 Yoa. 5:14, 15) Na yau nge lenda ndimisama ti Yehova kesadisa nge nge kuma na nsatu ya kukumisa bantu banlonguki.

10-11. Yinki lenda pekisa beto samu beto tuadisa ndongokolo ya Biblia?

¹⁰ Beto kebakaka na diseki ve ntumu na beto ya kulonga ata kana beto kena kukutana na mambu ya mpasi yina lenda pekisa beto beto sala yina beto lenda samu na kukumisa bantu banlonguki. Beto tadila ndambu ya mambu yango ya mpasi mpe mutindu beto lenda nunga yau.

¹¹ Beto lenda kanisa ti beto kele ve na dikoki ya kusala mingi mutindu beto zola. Na kifuani, bansamuni yankaka mepusana na bamvula to bakele na mavimpi ya mbote ve. Yau nde diambu kena kukumina nge? Kana yakele mutindu yina, kanisa diambu ya ntete yina beto melonguka na ntangu ya maladi yayi ya yimbi ya COVID-19. Beto melonguka ti beto lenda tuadisa bandongokolo ya Biblia ya mbote na nzila ya telefone! Na yau nge lenda vuanda na dikoki ya kubanda mpe kutuadisa ndongokolo ya Biblia kaka na yinzo na nge. Mpe yakele na diambu yankaka ya mbote. Yakele na bantu yankaka yina kesepelaka kulonguka Biblia, kasi bakevuandaka na ntangu ve na wola yina bampangi na beto memesanaka kusamuna. Kasi, balenda baka ntangu na sunka sunka to na nkokila. Nge lenda vuanda na dikoki ya kubongisa ntangu na nge samu na kulonga muntu na wola  yina? Yesu longaka Nikodeme na mpipa, yau nde vuandaka ntangu ya mbote samu na Nikodeme.—Yoa. 3:1, 2.

12. Yinki mambu lenda sadisa beto beto ndimisama ti beto lenda kuma banlongisi ya mbote?

¹² Beto lenda kanisa ti beto kelenda ve kutuadisa ndongokolo ya Biblia. Mbala yankaka beto kena kukanisa ti beto fueti kuma na nzayilu mingi to kukuma banlongisi ya mbote kuluta tekila beto vuanda na dikoki ya kulonguka na muntu. Kana nge kekanisaka mutindu yina, tala mambu tatu yina lenda sadisa nge nge ndimisama ti nge lenda longuka na muntu. Ya ntete, Yehova kena kumona nge ti nge mefuana samu na kulonga bantu. (2Bk 3:5) Ya zole, Yesu, yina kele ‘na kimfumu nionso na dizulu mpe na ntoto,’ mepesa nge ntumu ya kulonga. (Mat. 28:18) Mpe ya tatu, nge lenda tula ntima ti bantu yankaka kesadisa nge. Yesu tulaka ntima na mambu yina Tata na yandi longaka yandi yandi tuba, mpe nge lenda sala kaka mutindu yina. (Yoa. 8:28; 12:49) Katula yau, nge lenda lomba nkengidi ya mua kimvuka na beno ya kisalu ya kusamuna, mpasudi nzila yina kele na makoki, to nsamuni yina kele na makoki yandi sadisa nge nge banda kutuadisa ndongokolo ya Biblia. Mosi ya mitindu nge lenda kuma na makoki kele kana nge kena kuvuanda ntangu mosi ya bansamuni yango kena kutuadisa ndongokolo ya Biblia.

13. Samu na yinki beto kele na makoki ya kumesana kulonga na mitindu mesuasana?

¹³ Beto lenda mona ti yakele mpasi kumesana na mitindu ya yimpa ya kusamuna mpe na bisadulu ya yimpa. Bubu yayi mutindu na beto ya kutuadisa bandongokolo ya Biblia sobaka. Mukanda na beto ya ngudi samu na kulonga, Zinga mvula na mvula na kiese!, kena kulomba beto beto kukibongisaka samu na ndongokolo mpe beto tuadisa yau na mutindu yina mesuasana na mutindu beto vuandaka sadila na ntama. Beto ketangaka kaka fioti baparagrafe mpe beto kesolola nde mingi na nlonguki. Ntangu beto kena kulonga, beto kesadila mingi bavideo mpe bisadulu yankaka yina kele na Internet, na kifuani JW Library^®. Kana nge kena kulenda ve kusadila bisadulu yango, solola na muntu mosi yina lenda sadisa nge nge longuka kusadila yau. Beto bantu beto kemonaka mbote kusala mambu mutindu beto memesanaka. Yakele pete ve samu na beto na kumesana na mitindu ya yimpa ya kusala mambu. Kasi na lusadusu ya Yehova mpe ya bantu yankaka, yalenda vuanda pete samu na beto kumesana mpe kusepela kulonguka na bantu Biblia. Mpasudi nzila mosi tubaka, mayele yayi ya ndongokolo “kena kupesa mambote na nlonguki mpe nlongisi.”

14. Yinki beto fueti zimbakana ve kana beto kena kusala na terituare yina kele mpasi, mpe yinki mutindu 1 Bakorinto 3:6, 7 kena kukindisa beto?

¹⁴ Mbala yankaka beto kele na terituare yina kele mpasi samu na kubanda bandongokolo ya Biblia. Yalenda monana ti bantu yankaka kena kusepela ve na nsangu na beto ata mpe kutelemina yau. Yinki lenda sadisa beto beto ndima ti bantu ya mutindu yina lenda ndima nsangu ya Biblia? Kuzimbakana ve ti luzingu ya bantu lenda soba na nsualu na yinza yayi mefuluka na mambu ya mpasi, mpe bantu yina vuandaka sepela ve na nsangu na beto na ebandeli lenda kuma na nsatu ya lutuadusu ya Nzambi. (Mat. 5:3) Bantu yankaka yina vuandaka manga ntangu nionso mikanda na beto na ntama ndimaka ndongokolo ya Biblia na manima. Beto mezaba diaka ti Yehova nde kele Mfumu ya kisalu ya kubuka mbuma. (Mat. 9:38) Yandi zola beto tatamana kukuna mpe kumuangisa maza, kasi yandi mosi nde kele na kiyekua ya kukudisa. (1Bk. 3:6, 7) Mpe yakele diambu ya kukindisa kuzaba ti atako beto kele na dikoki ve ya kutuadisa bandongokolo ya Biblia bubu yayi, Yehova kesakumunaka beto samu na bangolo yina beto kesalaka, kasi ve samu na kifunda ya bantu yina beto kepesaka mikanda to yina beto kelongukaka na bau! *

15. Yinki mutindu Yehova kekukimonaka kana muntu mendima ndongokolo ya Biblia mpe yandi kena kusadila mambu yina yandi kena kulonguka?

¹⁵ Yehova kesepelaka kana muntu mosi mendima kedika ya Biblia mpe yandi mebanda kuzabisa bantu yankaka kedika yango. (Bin. 23:15, 16) Yehova kevuandaka na kiese mingi ntangu yandi kemonaka bantu yango kena kusamuna mpe kulonga na vema! Na kifuani, atako maladi yayi ya yimbi kena kutungisa bantu na yinza ya mvimba, kasi na mvula ya kisalu ya 2020, beto tuadisaka bandongokolo ya Biblia 7 705 765, yina sadisaka bantu 241 994 bakukipesa na Yehova mpe babaka mbotama. Na ndambu na bau, banlonguki yango ya yimpa ketuadisa bandongokolo ya Biblia mpe bakekumisa bantu mingi banlonguki. (Luka 6:40) Kondua ntembe, beto kepesaka Yehova kiese ntangu beto kesalaka kisalu ya kukumisa bantu banlonguki.

16. Yinki kele lukanu ya mbote beto lenda kukitudila ?

¹⁶ Kisalu ya kukumisa bantu banlonguki kele mpasi, kasi na lusadusu ya Yehova beto lenda pesa maboko na kulonga bantu ya yimpa bazola Tata na beto ya dizulu. Beto lenda kukitudila lukanu ya kubanda mpe kutuadisa ata ndongokolo mosi ya Biblia? Beto lenda kamua na kumona diambu yina kesalama kana beto kena kulutisa ata diluaku mosi ve samu na kuyuvusa bantu yina beto kekutana na bau kana bakesepela kulonguka na beto Biblia. Tolenda ndimisama ti Yehova kesakumuna bangolo na beto.

17. Yinki mutindu beto kekukimona kana beto mekuma na dikoki ya kutuadisa ndongokolo mosi ya Biblia?

¹⁷ Yakele lokumu samu na beto kusala kisalu ya kusamuna mpe kulonga bantu yankaka kedika! Kisalu yango kepesaka beto mpenza kiese. Ntumua Paulo, yina sadisaka bantu mingi ya Tesalonika bakuma banlonguki, monisaka banguilu na yandi na bampova yayi: ‘Yinki kele kivuvu, kiese to yimpu na beto ya kimfumu na ntuala ya Mfumu na beto? Yakele nde beno ve? Ya kedika beno kele nkembo mpe kiese na beto.’ (1Te 2:19, 20; Bis. 17:1-4) Bubu yayi bantu mingi kekukimonaka mutindu yina. Mpangi mosi ya nketo na nkumbu ya Stéphanie yina, kintuadi na bakala na yandi, sadisaka bantu mingi bakuma tii na kubaka mbotama metuba, “Yakele na kiese mosi ve yina mekokana na kusadisa bantu bakukipesa na Yehova.”