1. Yinki Yehova salaka na mosi mosi kati na beto

YEHOVA bendaka konso muntu kati na beto na yandi. (Yoa. 6:44) Kanisa ntete yina yazola monisa. Yehova talaka na dikebi bamilion ya bantu awa na ntoto, yandi monaka kima mosi ya mfunu kati na nge—yandi monaka ti nge kele na ntima mosi ya mbote mpe nge lenda zola yandi. (1 Bs 28:9) Yehova mezaba nge mbote, yandi kebakusaka nge, mpe yandi kezolaka nge. Yakele mpenza lukindusu!

2. Yinki kifuani Yesu pesaka samu na kumonisa mutindu Yehova ketudilaka konso muntu kati na beto dikebi?

² Yehova ketudilaka nge mpenza dikebi, mpe yandi ketudilaka diaka bampangi na nge nionso ya banketo mpe babakala yina kele Baklisto dikebi. Samu beto bakusa diambu yango, Yesu fuanikisaka Yehova na mvungi ya mameme. Kana dimeme mosi kati na nkama (100) mezimbana, yinki mvungi ya mameme kesala? Yandi ‘kebika mameme 99 na zulu ya bamongo samu na kukuenda sosa dimeme yina mezimbana.’ Kana mvungi memona dimeme yango, yandi kefuemina yau ve samu yazimbanaka. Yandi kesepela. Yinki kele dilongi? Konso dimeme kele na mfunu na meso ya Yehova. Yesu tubaka: ‘Mutindu mosi samu na Tata na munu yina kele na dizulu yakele ve diambu ya mbote ti ata muntu mosi kati na bantu yayi ya fioti kufua.’—Mat. 18:12-14.

3. Yinki beto ketubila na disolo yayi?

³ Beto kesepela ve kuvuanda bantu yina kesala ti bampangi na beto lemba na kimpeve. Yinki mutindu beto lenda manga kubudisa bantu yankaka dibaku? Mpe yinki beto kesala kana muntu meluadisa beto? Beto kebaka bamvutu na biuvu yango na disolo yayi. Samu na kubanda, beto longuka ntete diambu metadila ‘bantu yayi ya fioti’ yina Matayo kikapu 18 metubila.

4. Banani kele ‘bantu yayi ya fioti’?

⁴ ‘Bantu yayi ya fioti’ kele banlonguki ya Yesu ya konso mvula. Yavuanda yinki mvula bakele na yau, bakele lokola ‘bana fioti’ samu bamebonga kulongua na Yesu. (Mat. 18:3) Atako bamekatuka na bisika ya kusuasana, bakele na nzingulu mpe kimuntu ya kusuasana, kasi bau nionso kele na kiminu na Klisto. Mpe Klisto kezolaka bau mingi.—Mat. 18:6; Yoa. 1:12.

5. Yinki mutindu Yehova kekukimonaka kana muntu mosi kena kubudisa dibaku to kena kuniokola mosi ya bisadi na yandi?

⁵ ‘Bantu yayi ya fioti,’ bau nionso kele na mfunu na meso ya Yehova. Samu na kubakusa mutindu Yehova kekukimonaka samu na bau, beto kanisa mutindu beto kekukimonaka samu na bana na beto. Bakele na mfunu samu na beto. Beto kesepelaka kutanina bau samu bamekondua ngolo, mayele mpe nduenga lokola bambuta. Ya kedika, Beto kesepelaka ve kumona bakena kuniokola muntu mosi—beto kemonaka mpasi mingi kuluta ata mpe nganzi—kana bakena kuniokola muana fioti. Mutindu mosi, Yehova kesepelaka kutanina beto—mpe yandi kemonaka mpasi ata mpe nganzi—kana muntu mosi kena kubudisa dibaku to kena kuniokola mosi ya bisadi na yandi!—Yez. 63:9; Marko 9:42.

6. Na kutadila 1 Bakorinto 1:26-29, yinki mutindu yinza ketadilaka banlonguki ya Yesu?

⁶ Na yinki mutindu diaka banlonguki ya Yesu kele lokola ‘bantu ya fioti’? Banani yinza ketadilaka lokola bantu ya mfunu? Bamvuama, bantu ya lokumu, mpe bantu ya kilendo. Nzokande, baketadilaka banlonguki ya Yesu lokola bantu ya kukondua mfunu, to ‘bantu ya fioti.’ (Tanga 1 Bakorinto 1:26-29.) Kasi Yehova ketadilaka bau mutindu yina ve.

7. Yehova kezolaka beto kukimona yinki mutindu samu na bampangi na beto ya babakala mpe ya banketo?

⁷ Yehova kezolaka bisadi na yandi nionso, ata kana bakesadilaka yandi banda ntama to bakele bantu ya yimpa na kedika. Bampangi na beto nionso ya babakala mpe ya banketo kele na mfunu na meso ya Yehova, yau yina bafueti vuanda diaka na mfunu samu na beto. Beto ‘fueti zola dibuta ya mvimba ya bampangi,’ ndambu na bau kaka ve. (1 Pi. 2:17) Beto fueti vuanda pene ya kusala yina beto lenda samu na kutanina bau mpe kutudila bau dikebi. Kana beto mebakusa ti beto luadisaka to beto salaka muntu mosi mpasi, beto fueti bika sala lokola diambu kele kuandi ve, mpe kukanisa ti muntu yango kelemvukila beto kaka mpe yandi kezimbakana yau. Yinki kesalaka ti bantu yankaka mona mpasi na ntima? Mbala yankaka yalenda vuanda kisika to mutindu bayundukilaka lenda sala ti bakukimona mfunu ve. Bayankaka kele bantu ya yimpa na kedika; balonguka ntete ve mutindu ya kukanga ntima na banzimbala ya bantu. Beto fueti sala nionso beto tula kiyenge ata kana beto meluadisa muntu to muntu yankaka nde meluadisa beto. Katula yau, muntu yina kekukimonaka ntangu nionso ti bakena kuluadisa yandi, yandi fueti sala nionso yandi katula kikadulu yina ya yimbi. Kana yandi mesala yau, yandi kevuanda na kiese mpe na nguizani ya mbote na bampangi yankaka.

8. Yinki kikadulu bantu mingi na ntangu ya Yesu vuandaka na yau yina vuandaka na bupusi na banlonguki na yandi?

⁸ Yinki tindaka Yesu yandi tuba mambu na yina metadila ‘bantu yayi ya fioti?’ Banlonguki na yandi yuvusaka yandi kiuvu: ‘Nani kele mpenza nene na Kimfumu ya dizulu?’ (Mat. 18:1) Bayuda mingi na ntangu ya Yesu vuandaka mona ti kuvuanda na lokumu mpe muntu ya nene kele mfunu mpenza. Muntu mosi ya mayele metuba: “Bantu zingaka mpe kufuaka na kusosaka lokumu, kuzabana, kusala nkumbu, kusosa kundimama mpe luzitu.”

9. Yalombaka banlonguki ya Yesu sala yinki?

⁹ Yesu zabaka ti banlonguki na yandi fueti sala ngolo samu bavuza na ntima na bau mpeve  ya kuwelana yina vuandaka ya kukunama na mumeseno ya Bayuda. Yandi zabisaka bau: ‘Muntu yina kele muntu ya kuluta nene kati na beno vuanda lokola muana fioti na beno nionso, mpe muntu yina kena kutuadisa beno vuanda lokola muntu yina kena kusadila bayankaka.’ (Luka 22:26) Beto kevuandaka lokola ‘muana fioti’ ntangu beto kena ‘kutadila bayankaka ti bameluta’ beto. (Fil 2:3) Kana beto kena kukuna kikadulu yango, beto kebudisa ve bantu yankaka mabaku.

10. Yinki dilongi ya Paulo beto fueti lunda na ntima?

¹⁰ Bampangi na beto nionso ya babakala mpe banketo meluta beto na mutindu mingi. Yakele mpasi ve samu na kumona yau ntangu beto kena kutula mabanza na beto na bikadulu na bau ya mbote. Beto fueti lunda na ntima dilongi yina ntumua Paulo pesaka na Baklisto ya Korinto: ‘Nani mesuasikisa nge na muntu yankaka? Yinki kima yina nge kele na yau bamepesaka nge ve? Na yau, kana bamepesaka nge yau mpenza, samu na yinki nge kena kukikumisa lokola nde bamepesaka nge yau ve?’ (1Bk. 4:7) Beto fueti manga kukimona ti beto meluta bantu yankaka. Na kifuani, bampangi ya babakala yina kele na dikoki ya kusala badiskur ya mbote to bampangi ya banketo yina kele na makoki ya kubanda bandongokolo mingi ya Biblia, bafueti pesa ntangu nionso lokumu na Yehova samu na makoki yina bakele na yau.

11. Yinki Yesu melonga beto na kifuani ya mfumu mpe nanga na yandi?

¹¹ Ntangu fioti na manima ya kukebisa banlonguki na yandi na diambu metadila kubudisa bantu yankaka dibaku, Yesu pesaka kifuani mosi yina tubilaka mfumu mpe nanga na yandi. Mfumu tubilaka nanga na yandi yandi bika diaka kufuta mfuka yango ya nene samu yandi vuandaka na dikoki ve ya kufuta yau. Na manima, kaka nanga yango mangaka kulemvukila muninga na yandi nanga samu na mfuka na yandi ya fioti. Nsuka nsuka, mfumu lozaka nanga yango ya yimbi na buloko. Yinki kele dilongi? Yesu tubaka: ‘Tata na munu yina kele na dizulu kesadila beno mambu mutindu yina kana konso muntu kati na beno kelemvukila ve mpangi na yandi na ntima ya mvimba.’—Mat. 18:21-35.

12. Na yinki mutindu beto kesalaka bantu yankaka mpasi kana beto memanga kulemvukila bau?

¹² Mambu yina nanga salaka luadisaka kaka yandi mosi ve kasi mpe bantu yankaka. Ya ntete, yandi luadisaka muninga na yandi nanga na ‘kulozaka yandi na buloko tii ntangu yandi kefuta mfuka na yandi.’ Ya zole, yandi luadisaka bananga yankaka yina vuandaka tala mambu yina yandi vuandaka sala. Ntangu ‘bankundi na yandi bananga monaka mambu yina salamaka, yapesaka bau kiadi mingi.’ Mutindu mosi, mambu beto kesalaka lenda sepedisa to kusala bantu yankaka kiadi. Kana muntu mosi mesadila beto diambu ya yimbi mpe beto memanga kulemvukila yandi, yinki lenda salama? Ya ntete, beto kesala yandi mpasi na kumangaka kulemvukila yandi, kutudila yandi dikebi, mpe kumonisina yandi nzola. Ya zole, beto kesala ti bampangi yankaka na kimvuka kondua kiese mutindu bakemona ti beto kele ve na kiyenge na muntu yango.

13. Yinki dilongi beto mebaka na disolo ya mpangi mosi ya nketo yina kele mpasudi nzila?

¹³ Ntangu beto kena kulemvukila bampangi na beto, yakesala ti beto kukimona mbote mpe yakesadisa bau bakukimona mbote. Yau nde kuminaka mpangi mosi ya nketo yina beto kena kubokidila Crystal yina kele mpasudi nzila. Mpangi mosi ya nketo ya kimvuka luadisaka yandi. Crystal kena kubambuka diaka ti: “Bampova na yandi ya kukondua nzola vuandaka zenga munu lokola mbele na bantangu yankaka. Na kisalu ya kusamuna, munu vuandaka zola ve kubima na yandi. Mubandaka kuzimbisa vema mpe kiese na munu.” Crystal monaka ti yandi kele na mfunu ya kukitungisa. Kasi yandi bikaka ve makanisi ya yimbi samu na mpangi mpe samu na yandi mosi nunga yandi. Na kumikitisa nionso, yandi sadilaka malongi ya Biblia yina kele na Linɔ́ngi ya Mosɛnzɛli  ya 15 Octobre 1999 na disolo “Limbisa na motema moko.” Yandi lemvukilaka mpangi na yandi ya nketo. Crystal metuba: “Ntangu yayi munu mebakusa ti beto nionso beto kena kusala ngolo samu na kusala bansobolo mpe Yehova kevuandaka pene ya kulemvukila beto konso kilumbu. Munu kena kukimona nde lokola munu bamekatula kizitu ya yinza ya mvimba yina vuandaka na zulu ya mapeka na munu. Muvutukilaka kiese na munu.”

14. Na kutadila Matayo 18:21, 22, yinki diambu ntumua Petelo vuandaka nunga mpe yinki dilongi nge mebaka na mvutu ya Yesu?

¹⁴ Beto mezaba ti beto fueti lemvukila; yau nde kele diambu ya mbote ya kusala. Kasi yalenda vuanda mpasi samu na beto kusala yau. Yalenda vuanda ntumua Petelo vuandaka na makanisi ya mutindu yina. (Tanga Matayo 18:21, 22.) Yinki lenda sadisa beto? Ya ntete, kanisa mbala yikua Yehova melemvukilaka nge. (Mat. 18:32, 33) Beto fuana ve kubaka mlevo na yandi, kasi yandi kelemvukilaka beto na ntima ya mvimba. (Nk. 103:8-10) Mutindu mosi mpe, ‘beto diaka beto fueti zolana.’ Kulemvukila kele ve diambu yina beto lenda baka nzengolo ya kusala to kusala ve. Yakele diambu yina beto fueti sala na bampangi na beto ya babakala mpe ya banketo. (1 Yoa. 4:11) Ya zole, yindula na mpinda mambote yina kulemvukila kenataka. Beto lenda sadisa muntu yina salaka beto mpasi, beto lenda sala ti bumosi vuanda na kimvuka, beto lenda tanina nguizani na beto na Yehova, mpe kukatula kizitu na mapeka na beto. (2Bk 2:7; Kol. 3:14) Ya nsuka, sambila muntu yina kelongaka beto beto lemvukila bantu yankaka. Kubika ve nzila na Satana katula kiyenge yina nge kele na yau na bampangi na nge ya kimvuka. (Efe 4:26, 27) Beto kele na nsatu ya lusadusu ya Yehova samu beto tina kubua na ntambu ya Satana.

15. Na nguizani na Bakolosai 3:13, yinki beto lenda sala kana mpangi mosi mesala beto diambu mesala beto mpasi?

¹⁵ Bosi kana mpangi mosi mesala nge diambu yina mesala nge mpasi? Yinki nge kesala? Sala  nionso samu nge tula kiyenge. Tubila Yehova banguilu na nge na nzila ya kisambu. Lomba Yehova sakumuna muntu yina salaka nge yimbi mpe yandi sadisa nge nge mona bikadulu ya mbote yina kele na muntu yango—bikadulu yina Yehova kesepelaka na yau kele na muntu yango. (Luka 6:28) Kana nge kena kukoka ve kuzimbakana mambu ya yimbi yina mpangi na nge salaka, sosa kusolola na yandi. Yakele ntangu nionso mbote kutula na makanisi ti mpangi na nge luadisaka nge na nko ve. (Mat. 5:23, 24; 1Bk. 13:7) Ntangu nge kena kusolola na yandi, sala nionso nge monisa na bampova na nge ti nge kena kupesa yandi foti ve. Bosi kana yandi zola kutula kiyenge ve? ‘Tatamana kukanga ntima.’ Tatamana kuvuanda na ntima yinda samu na mpangi na nge. (Tanga Bakolosai 3:13.) Diambu meluta mfunu, kuvuanda na makanisi ya yimbi ve samu na yandi, samu yalenda bebisa nguizani na nge na Yehova. Kubika ata diambu mosi ve budisa nge dibaku. Na kusalaka mutindu yina, nge kemonisa ti nge kezolaka Yehova kuluta bima nionso.—Nk. 119:165.

16. Yinki kiyekua mosi mosi kati na beto kele na yau?

¹⁶ Beto kesepelaka na diluaku ya kusadila Yehova na bumosi lokola ‘kimvuka mosi’ na lutuadusu ya ‘mvungi mosi’! (Yoa. 10:16) Mukanda Tobongisami mpo na kosala mokano ya Yehova paje 165, metuba: “Lokola bumosi yango kena kupesa nge mambote, nge kele na kiyekua ya kutanina yau.” Na yau, beto fueti “sala ngolo samu na kutadila bampangi na beto Baklisto mutindu Yehova ketadilaka bau.” Na yau, na meso ya Yehova beto nionso beto kele ‘bantu ya fioti’ yina kele mfunu. Yakele mutindu yina nde nge ketadilaka bampangi na nge? Yehova kemonaka mpe yandi kebakaka na mfunu mambu yina nge kesalaka samu na kusadisa bau mpe kutudila bau dikebi.—Mat. 10:42.

17. Yinki lukanu beto kele na yau?

¹⁷ Beto kezolaka bampangi na beto Baklisto. Na yau beto kele ‘na lukanu ya kutula ve kima mosi yina kebudisa dibaku to kebuisa na ntuala ya mpangi na beto.’ (Bar. 14:13) Beto ketadilaka bampangi na beto ya babakala mpe ya banketo ti bameluta beto, mpe beto zola kulemvukila bau na ntima na beto ya mvimba. Beto bika nzila ve ti beto bula dibaku na banzimbala ya bantu yankaka. Kasi, beto pona nde ‘kulanda mambu yina ketulaka kiyenge, mpe mambu yina kesadisaka na kukindasana.’—Bar. 14:19.