Samu na kusepedisa Yehova, beto fueti vuanda na kiminu. Kasi Biblia metuba ti ‘bantu nionso ve kevuandaka na kiminu.’ (2 Bate. 3:2) Ntangu ntumua Paulo vuandaka tuba mutindu yina, yandi vuandaka tubila ‘bantu yina kemonisaka bantu mpasi mpe bantu ya yimbi,’ yina vuandaka niokola yandi. Kasi mambu yina yandi tubaka samu na kiminu vuandaka diaka diambu ya kedika samu na bantu yankaka. Bantu yankaka keponaka kumanga bidimbu ya puelele yina kemonisaka ti Nzambi salaka bima nionso. (Bar. 1:20) Bantu yankaka lenda tuba ti bakendiminaka kima to muntu mosi yina kele na kilendo mingi. Kasi kusala mutindu yina kele ve kiminu ya kedika.

Beto fueti kukindimisa ti Yehova kele mpe yandi kele ‘muntu yina kepesaka n’sendo’ na bantu yina kele na kiminu ya ngolo na yandi. (Baeb. 11:6) Kiminu kele mosi ya bikadulu ya mbuma ya mpeve ya nlongo. Mpe samu na kubaka mpeve ya nlongo, beto fueti sambila Yehova samu yandi pesa beto yau. (Luka 11:9, 10, 13) Sekele samu na kubaka mpeve yango kele kutanga Mpova ya Nzambi yina kele ya kupemama. Na manima beto lenda kanisa na zulu ya mambu yina beto kena kutanga mpe kusosa kusadila yau. Mpeve ya Yehova lenda vuanda na bupusi na luzingu na beto, yakesadisa beto beto vuanda na kiminu yina kesepedisa yandi.