1-2. Yinki mbokodoso Yehova kena kupesa na bisadi na yandi ya kukuikama?

 KANA muntu meyuvusa nge Yehova kele nani na luzingu na nge? Yinki nge lenda tubila yandi? Nge lenda tuba, ‘Yehova kele Tata na munu, Nzambi na munu, mpe Nkundi na munu.’ Nge lenda vuanda diaka na mitindu yankaka ya kutuba samu na Yehova. Kasi nge lenda tadila yandi diaka lokola Muntu yina kena kubokidisa nge?

² Ntinu Davidi fuanikisaka kinkundi yina Yehova kevuandaka na yau na bisadi na Yandi ya kukuikama na nguizani yina kevuandaka kati na muntu yina mebokidisa banzenza mpe banzenza na yandi. Yandi yuvusaka: ‘O Yehova, nani lenda vuanda nzenza na tenta na nge? Nani lenda zinga na mongo na nge ya nlongo?’ (Nk. 15:1) Beto kelongukaka na kati ya bampova yango yina mepemama ti, beto lenda kuma banzenza ya Yehova​—bankundi na yandi. Yakele mpenza mbokodoso ya nene yina mekatuka na Yehova!

YEHOVA ZOLA BETO VUANDA BANZENZA NA YANDI

3. Nani vuandaka nzenza ya ntete ya Yehova, yinki mutindu Yehova vuandaka tadila nzenza na yandi mpe yinki mutindu nzenza na yandi vuandaka tadila yandi?

³ Tekila Yehova banda kusala bima, yandi vuandaka yandi mosi. Kasi na ntangu mosi, yandi yambaka Muana na yandi ya ntete na tenta na yandi ya kifuani. Yehova vuandaka na kiese mingi na kiyekua na yandi ya yimpa yina yandi vuandaka na yau lokola Muntu yina kena kuyamba banzenza. Biblia metuba ti Yehova vuandaka “zola mingi” Muana na yandi. Na manima nzenza na yandi ya ntete ‘vuandaka na kiese na ntuala ya [Yehova] konso ntangu.’​—Bing. 8:30.

4. Banani Yehova bokilaka na manima samu bavuanda banzenza na yandi?

⁴ Na manima, Yehova salaka bisemua yankaka ya kimpeve,  yina yandi bokidisaka samu bau diaka bavuanda banzenza na yandi. Biblia kebokidilaka bambasi “bana . . . ya Nzambi” mpe yamemonisa ti bakevuandaka na kiese kuvuanda kintuadi na Yehova. (Yobi 38:7; Dan. 7:10) Samu na bamvula mingi, banzenza ya Nzambi vuandaka kaka bisemua yina vuandaka zinga kintuadi na yandi na dizulu. Na manima, yandi salaka bantu mpe bau diaka bavuandaka na dikoki ya kuvuanda banzenza na yandi. Ndambu ya banzenza yango vuandaka Enoka, Noa, Abrahami, mpe Yobi. Biblia ketubilaka bisadi yango ya kukuikama lokola bankundi ya Nzambi to bantu yina vuandaka tambula ‘kintuadi na Nzambi ya kedika.’​—Kuy. 5:24; 6:9; Yobi 29:4; Yez. 41:8.

5. Yinki dilongi beto lenda baka na mbikudulu yina kele na Ezekiele 37:26, 27?

⁵ Basiekle mingi na manima, Yehova tatamanaka kubokidisa bankundi na yandi samu bavuanda banzenza na yandi. (Tanga Ezekiele 37:26, 27.) Na kifuani, na mbikudulu ya Ezekiele beto kelongukaka ti Nzambi kevuandaka mpenza na nsatu bisadi na yandi ya kukuikama vuanda na nguizani ya penepene na yandi. Yandi mepesa nsilulu ti yandi kesala ‘luwawanu ya kiyenge kintuadi na bau.’ Mbikudulu yango kena kutubila ntangu mosi yina bantu yina kele na kivuvu ya kuzinga na dizulu mpe bantu yina kele na kivuvu ya kuzinga na ntoto kevuanda kintuadi na tenta na yandi ya kifuani lokola ‘kimvuka kaka mosi.’ (Yoa. 10:16) Yayi nde kele ntangu yango!

NZAMBI KETUDILAKA BETO DIKEBI YAVUANDA YINKI KISIKA BETO KELE

6. Yinki mutindu muntu kekumaka nzenza na tenta ya Yehova, mpe yinki kisika beto lenda mona tenta na Yandi?

⁶ Na Biblia, tenta vuandaka kisika mosi yina muntu lendaka kuenda pema mpe kusuama mupepe, mvula, madidi to muini. Nzenza yina vuandaka kuenda na tenta ya muntu vuandaka kukivingila ti mfumu ya tenta tudila yandi dikebi. Ntangu beto kepesaka luzingu na beto na Yehova, beto kekumaka banzenza na tenta na yandi ya kifuani. (Nk. 61:4) Beto kebakaka madia mingi ya kimpeve mpe beto kekumaka bankundi ya bantu yankaka yina kele diaka banzenza ya Yehova. Kasi tenta na Yandi ya kifuani kele kaka ve na kisika mosi. Nge lenda kuenda na buala ya kinzenza, mbala yankaka samu na kukutakana na lukutakanu mosi ya nene, mpe kukutana na bantu yankaka yina kele na kiese ya kuvuanda na tenta ya Nzambi. Tenta ya Yehova kevuandaka bisika nionso yina bisadi na yandi ya kukuikama kele.​—Kus. 21:3.

7. Samu na yinki beto lenda tuba ti bantu ya kukuikama yina mekufuaka kele kaka banzenza na kati ya tenta ya Yehova? (Tala diaka foto.)

⁷ Yinki beto ketuba samu na bantu ya kukuikama yina mekufuaka? Beto lenda tuba ti bakele  kaka banzenza na tenta ya Yehova? Ee! Samu na yinki beto lenda tuba mutindu yina? Lokola bantu yango kele na makanisi ya Yehova, samu na yandi bakele kaka na luzingu. Yesu sasilaka ti: “Na disolo ya mua yinti ya bansende, Mose mpe monisaka ti bantu ya kufua kefutumuka, ntangu yandi kena kubokidila Yehova ‘Nzambi ya Abrahami, Nzambi ya Yisaka, mpe Nzambi ya Yakobi.’ Yandi kele Nzambi ya bantu ya kufua ve, kasi ya bantu yina kele na luzingu, samu na meso na yandi bau nionso kele na luzingu.”​—Luka 20:37, 38.

MAMBOTE YINA BETO KEBAKAKA MPE MAMBU YINA KELOMBAMAKA SAMU NA KUVUANDA NZENZA YA YEHOVA

8. Yinki mambote banzenza ya Yehova kebakaka na kuvuandaka na tenta na yandi?

⁸ Mutindu kaka tenta ya kedika lenda vuanda kisika ya kutina mupepe, madidi, mvula to muini, tenta ya Yehova kepesaka banzenza na yau lutanunu na mambu yina lenda bebisa kimpeve na bau mpe na mambu yina lenda katula kivuvu na bau. Kana beto kena kubikana penepene ya Yehova, Satana lenda sala diambu mosi ve yina lenda sala beto mpasi samu na mvimbamvimba. (Nk. 31:23; 1 Yoa. 3:8) Na yinza ya yimpa, Yehova ketatamana kutanina bankundi na yandi ya kukuikama kaka ve na mambu yina lenda bebisa kimpeve na bau, kasi yandi ketanina bau mpe na lufua.​—Kus. 21:4.

9. Yinki Yehova kelombaka banzenza na yandi sala?

⁹ Yakele mpenza lokumu ya nene kuvuanda nzenza na tenta ya Yehova. Beto lenda vuanda na nguizani ya penepene na yandi, nguizani yina lenda zingila mvula na mvula. Yinki beto fueti sala kana beto zola tatamana kuvuanda banzenza na yandi? Kana muntu mosi mebokidisa nge na yinzo na yandi, nge fueti sala mambu yina kesepedisa muntu yango. Na kifuani, yandi lenda lomba nge nge katula mapapa tekila nge kota mpe nge fueti vuanda pene ya kundima kusala yau. Mutindu mosi, beto kevuandaka na nsatu ya kuzaba mambu yina Yehova kelombaka bantu yina zola tatamana kuvuanda banzenza na tenta na yandi. Nzola na beto samu na Yehova ketindaka beto beto sala diambu nionso yina beto kele na dikoki ya kusala samu na ‘kupesa yandi kiese mpenza.’ (Bakol. 1:10) Mpe kana beto kena kutadila Yehova lokola Nkundi na beto, beto kendima ti yandi kele Nzambi mpe Tata na beto, yina mebonga beto zitisa yandi. (Nk. 25:14) Na kulundaka yau na makanisi, beto kezimbakana ve ti beto fueti pesa yandi luzitu ya mpinda, mpe beto fueti sala yau ntangu nionso. Luzitu ya mpinda ya mutindu yina kesadisa beto beto manga kusala mambu yina kesala yandi mpasi. Kondua ntembe beto kevuandaka na nsatu ya ‘kutambula na bopolo’ na Nzambi na beto.​—Mika 6:8.

YEHOVA VUANDAKA SADILA BAYISAELE MAMBU KONDUA KUPONA BILUNGI

10-11. Yinki mutindu Yehova vuandaka sadila Bayisaele mambu na dezere ya Sinai mpe na yinki mutindu yakena kumonisa ti yandi keponaka bilungi ve?

¹⁰ Yehova kesadilaka bankundi na yandi mambu kondua kupona bilungi. (Bar. 2:11) Beto lenda longuka diambu yango na mutindu yandi sadilaka Bayisaele mambu na dezere ya Sinai.

¹¹ Na manima ya kubimisa bisadi na yandi na kinanga na Ezipito, Yehova ponaka banganga-nzambi samu basala na tabernakle. Yandi pesaka Balevi kiyekua ya kukokisa biyekua yankaka na tenta yango ya nlongo. Yehova vuandaka kokisa bansatu ya bantu yina vuandaka sala na kati ya tabernakle to bantu yina vuandaka zinga penepene na yau mbote kuluta bansatu ya bantu yankaka? Ve! Yehova keponaka bilungi ve.

12. Yinki mutindu Yehova monisaka ti yandi keponaka bilungi ve ntangu Yandi yambaka dikanda na yandi ya yimpa? (Kubasika 40:38) (Tala diaka foto.)

¹² Konso muntu yina vuandaka na kan vuandaka na diluaku ya kuvuanda na kinkundi ya mutindu mosi na Yehova, yavuanda yinki kiyekua  yandi kele na yau to yandi kevuandaka na kisika ya ntama to ya penepene na tabernakle. Na kifuani Yehova vuandaka kukindimisa ti dikanda ya mvimba ya Yisaele vuandaka na dikoki ya kumona kimangu ya dikunzi ya dituti mpe dikunzi ya tiya yina vuandaka na zulu ya tabernakle. (Tanga Kubasika 40:38.) Ntangu dituti bandaka kukuenda na kisika ya yimpa, ata bantu yina vuandaka zinga ntama mpenza na tabernakle vuandaka na dikoki ya kumona yau, na manima bavuandaka sangisa bima na bau, bavuandaka kanga batenta ya mabuta na bau, mpe bavuandaka kuenda kintuadi na dikanda ya mvimba. (Kut. 9:15-23) Bantu nionso vuandaka na dikoki ya kuwa makelele ya ngolo mpe yina mesuasana ya batrompete zole ya palata, yina vuandaka monisa konso muntu ti bafueti banda kukuenda. (Kut. 10:2) Yamemonana puelele ti, kuzinga penepene ya tabernakle vuandaka ve kidimbu ya kuvuanda na kinkundi ya penepene na Yehova. Kutu, konso Muyisaele lendaka vuanda nzenza ya Yehova mpe kundima ti Yehova ketanina mpe ketuadisa yandi. Mutindu mosi bubu yayi, yavuanda yinki kisika beto kele na ntoto, beto lenda baka mambote na nzola, na dikebi, mpe na lutanunu ya Yehova.

BIFUANI YA BUBU YAYI YINA KENA KUMONISA TI YEHOVA KEPONAKA BILUNGI VE

13. Yinki kele mutindu mosi yina Yehova kemonisaka ti yandi keponaka bilungi ve bubu yayi?

¹³ Bisadi yankaka ya Nzambi bubu yayi kevuandaka pene ya Biro ya nene to ya filiale mosi ya Bambangi ya Yehova. Bayankaka kesalaka na bisika yango. Yau kesalaka ti bantu yango vuanda na dikoki ya kusala bisalu mingi yina kesalamaka na bisika yango, mpe kuvuanda kintuadi na bantu yina ketuadisaka beto. Bayankaka kesalaka lokola bankengi bantambudi to na mitindu yankaka ya kisalu ya spesiale ya ntangu nionso. Ata kana nge kele ve mosi na kati ya bantu yango, nge lenda kukindimisa ti nge kele kaka nzenza ya Yehova mpe Yandi kezolaka banzenza na yandi nionso. Yandi mezaba nge mbotembote mpe yandi ketudilaka nge dikebi. (1 Pie. 5:7) Bisadi nionso ya Nzambi kebakaka madia ya kimpeve,  lutuadusu mpe lutanunu yina bakele na yau nsatu.

14. Yinki kele kifuani yankaka yina kena kumonisa ti Yehova kele Muntu yina keyambaka banzenza kondua kupona bilungi?

¹⁴ Mutindu yankaka yina Yehova kemonisaka ti Yandi keponaka bilungi ve kele na mutindu yandi kena kusala ti muntu nionso na yinza vuanda na dikoki ya kutanga Biblia. Masonukua ya nlongo ya ebandeli sonamaka na bandinga tatu: Ebreo, Arameyen, mpe Greki. Bantu yina lenda tanga Biblia na bandinga yango ya ebandeli kevuandaka na nguizani ya penepene na Yehova kuluta bantu yina zaba ve bandinga yango? Ve, yakele mutindu yina ve.​—Mat. 11:25.

15. Yinki kena kumonisa ti Yehova keponaka bilungi ve? (Tala diaka foto.)

¹⁵ Yehova kendimaka beto ve na kutadila bakalasi yina beto metanga to makoki yina beto kele na yau ya kuzaba bandinga. Kutu na kisika ya kupesa nduenga na yandi kaka na bantu yina metangaka bakalasi ya yinda, Yehova kepesaka nduenga na yandi na bantu nionso na ntoto, yavuanda bantu yina metangaka bakalasi mingi to ve. Biblia Mpova na yandi yina mepemama, banguluaka na mafunda ya bandinga; mpe bantu na yinza ya mvimba lenda bakila malongi na yau mambote mpe kulonguka mutindu balenda kuma bankundi na yandi.​—2 Tim. 3:16, 17.

TATAMANA KUVUANDA MUNTU YINA YEHOVA ‘KENDIMAKA’ LOKOLA NZENZA NA YANDI

16. Na kutadila Bisalu 10:34, 35, yinki mutindu beto lenda tatamana kundimama na Yehova?

¹⁶ Yakele lokumu ya nene kuvuanda banzenza na tenta ya Yehova ya kifuani. Yandi kele na kimpombo, na nzola, mpe yandi kele Muntu yina keyambaka mbote banzenza kuluta bantu nionso yina keyambaka banzenza. Katula yau, yandi keponaka bilungi ve, yandi kena kubokila bantu nionso kondua kutala kisika bakevuandaka, buala na bau, kalasi bametangaka, nkanda na bau, dikanda na bau, mvula na bau, to kana bakele babakala to banketo. Kasi, Yehova kendimaka kaka bantu yina kezitisaka yandi samu bavuanda banzenza na yandi.​—Tanga Bisalu 10:34, 35.

17. Yinki kisika beto lenda mona mambu yankaka yina beto lenda sala samu na kuvuanda banzenza na tenta ya Yehova?

¹⁷ Mutindu Nkunga 15:1 memonisa yau, Davidi yuvusaka biuvu: ‘O Yehova, nani lenda vuanda nzenza na tenta na nge? Nani lenda zinga na mongo na nge ya nlongo?’ Na manima Yehova sadilaka Davidi samu na kupesa bamvutu na biuvu yango na Nkunga kikapu 15. Na disolo melanda beto ketubila mambu yina kelombamaka yina beto fueti zitisa samu Yehova tatamana kundima beto.