DISOLO YA NDONGOKOLO 42
Kukindimisa ti nge kele na kedika
‘Beno sosa kuzaba mambu nionso; beno kangama ngolo na mambu ya mbote.’—1Te 5:21.
MUYIMBU 142 Tósimba makasi elikya na biso
NA NKUFI *
1. Samu na yinki bantu mingi kele na mukakatano ya kuzaba Baklisto ya kedika?
YAKELE na mabundu mingi bubu yayi yina ketubaka ti bakele Baklisto mpe baketubaka ti bakesambilaka Nzambi na mutindu yina kesepedisaka yandi. Yau kena kusala ti bantu mingi vuanda na mukakatano ya kuzaba Baklisto ya kedika! Bakeyuvusaka: “Yakele na dibundu mosi kaka ya kedika, to mabundu nionso kesepedisaka Nzambi?” Beto kekukindimisaka mpenza na mabanza na beto ti beto Bambangi ya Yehova beto kelongaka kedika mpe mutindu yina beto kesambilaka Yehova kele mutindu kaka mosi yina kesepedisaka yandi? Beto kele na dikoki ya kuzaba mambu yango samu na kukindimisa? Beto tadila mambu yina kena kundimisa beto.
2. Na kutadila 1 Batesalonika 1:5, samu na yinki Paulo ndimisamaka ti mambu yina yandi vuandaka ndimina yavuandaka kedika?
2 Ntumua Paulo kukindimisaka mpenza ti yandi kele na kedika. (Tanga 1 Batesalonika 1:5.) Yandi vuandaka kukindimisa kaka ve samu yavuandaka pesa yandi kiese. Paulo vuandaka longuka Mpova ya Nzambi na dikebi nionso. Yandi ndimaka ti ‘Masonukua nionso kele ya kupemama na Nzambi.’ (2Tm. 3:16) Yinki mambu yandi longukaka? Na Masonukua, Paulo monaka bidimbu ya kedika yina monisaka ti Yesu nde vuandaka Masiya yina lakamaka—bidimbu yina bamfumu ya dibundu ya Bayuda vuandaka zaba ve. Bamfumu ya dibundu yango ya luvunu vuandaka tuba ti bakelongaka bantu mambu ya Nzambi, nzokande bavuandaka sala mambu yina Nzambi keyinaka. (Tito 1:16) Paulo vuandaka mutindu mosi ve na bau, yandi ponaka ve bitini ya Mpova ya Nzambi yina yandi fueti ndimina. Yandi vuandaka pene ya kulonga mpe kusadila ‘mambu nionso yina Nzambi kanaka.’—Bis. 20:27.
3. Beto fueti baka bamvutu na biuvu na beto nionso samu beto ndimisama ti beto kele na kedika? (Tala diaka ankadre “ Bisalu mpe makanisi ya Yehova ‘kele mingi kuluta yina beto lenda tubila.’”)
3 Bantu yankaka kekanisaka ti dibundu ya kedika fueti vuanda na dikoki ya kupesa mvutu na konso kiuvu, ata kana Biblia pesa ve bamvutu na biuvu yango. Yakele dibanza ya mbote? Beto tadila kifuani ya Paulo. Yandi kindisaka bampangi na ‘kusosa kuzaba mambu nionso,’ kasi yandi tubaka diaka ti yavuandaka na mambu mingi yina yandi bakusaka ve. (1Te 5:21) Yandi sonikaka ti: ‘Beto kele na nzayilu ndambu,’ yandi buelaka, ‘beto kena kutala na lusadusu ya ditalatala ya kisengo yina lenda monisa ve puelele.’ (1Bk. 13:9, 12) Paulo vuandaka bakusa ve konso diambu; beto diaka beto kebakusaka ve mambu nionso. Kasi Paulo bakusaka bakedika ya ngudi yina metadila lukanu ya Yehova. Yandi zabaka mambu ya kufuana yina ndimisaka yandi ti mambu yina yandi vuandaka ndimina vuandaka kedika!
4. Yinki mutindu beto lenda ndimisama ngolo ti beto kele na kedika, mpe yinki beto ketadila samu na Baklisto ya kedika?
4 Mutindu mosi yina beto lenda ndimisama ngolo ti beto kele na kedika kele na kufuanikisaka kifuani ya nsambudulu yina Yesu bandisaka mpe yina Bambangi ya Yehova kena kusala bubu yayi. Na disolo yayi, beto kemona mutindu Baklisto ya kedika (1) kemangaka nsambudulu ya biteke, (2) kezitisaka nkumbu ya Yehova, (3) kezolaka kedika, mpe (4) kezolanaka ngolo.
BETO KEMANGAKA NSAMBUDULU YA BITEKE
5. Yinki dilongi beto mebaka na kifuani ya Yesu na diambu metadila mutindu ya kusambila Nzambi, mpe yinki mutindu beto lenda sadila mambu yina yandi longaka?
5 Lokola Yesu vuandaka zola Yehova mingi, yandi vuandaka sambila kaka Yehova, yavuanda ntangu yandi vuandaka na dizulu mpe ntangu yandi vuandaka na ntoto. (Luka 4:8) Yandi longaka banlonguki na yandi diaka basambila kaka Yehova. Yavuanda Yesu to banlonguki na yandi ya kukuikama, mosi ve kati na bau sadilaka biteke na nsambudulu na bau. Lokola Nzambi kele Mpeve, muntu mosi ve lenda sala kima yina kekokana na yandi! (Yez. 46:5) Kasi yinki beto ketuba samu na biteke yina bantu kekanisaka ti yakele nlongo mpe kusambila yau? Na nsiku ya zole kati na bansiku kumi, Yehova tubaka: ‘Nge fueti kukisadila ve kiteke to kima mosi yina mefuanana na konso kima yina kele na dizulu to na ntoto . . . Nge fueti fukamina yau ve.’ (Kub. 20:4, 5) Bantu yina kezolaka kusepedisa Nzambi kebakusaka ti yandi kezolaka ve beto sambila biteke.
6. Yinki kifuani ya nsambudulu Bambangi ya Yehova kelandaka bubu yayi?
6 Bantu ya istuare metuba ti na ntangu ya bantumua, Baklisto vuandaka sambila kaka Nzambi. Na kifuani, mukanda mosi (History of the Christian Church) metuba ti Baklisto ya siekle ya ntete “vuandaka yina” dibanza ya kusadila biteke na bisika ya nsambudulu. Bubu yayi, Bambangi ya Yehova kelandaka kifuani yina Baklisto ya siekle ya ntete bikaka. Beto kesambilaka ve biteke ya “banlongo” to ya bambasi; beto kesambilaka ve Yesu. Mpe beto kepesaka ve drapo to kima yankaka mbote ya lokumu yina lendaka sala ti beto sambila baguvernema. Yavuanda muntu zola sala beto yinki, beto kevuandaka na nzengolo ya kuzitisa bampova ya Yesu: ‘Nge fueti sambila Yehova Nzambi na nge.’—Mat. 4:10.
7. Na yinki mambu Bambangi ya Yehova kevuandaka ya kusuasana mpenza na mabundu yankaka?
7 Bubu yayi, bantu mingi kesepelaka kuwa bamfumu ya mabundu yina mezabana. Bakesepelaka mingi na banlongi yango, yakesalaka ti bakuma kusambila bau. Bantu mingi kekuendaka na mabundu na bau, bakesumbaka mikanda na bau, mpe bakepesaka bau mbongo mingi samu na kupesa maboko na nkubukulu na bau. Bantu kendimaka konso diambu yina bamfumu ya mabundu yango ketubaka. Yakele mpasi kukanisa ti bantu yango lendaka vuanda na kiese mingi kuluta kana yandi mosi Yesu biminaka bau! Nzokande, Bansambidi ya kedika ya Yehova, bakevuandaka ve na muntu mosi yina kele mfumu na bau. Atako beto kezitisaka bantu yina kena kutuadisa beto, beto kelandaka dilongi ya puelele ya Yesu yina metuba: ‘Beno nionso beno kele bampangi.’ (Mat. 23:8-10) Beto kepesaka ve bantu nsambudulu, yavuanda bakele bamfumu ya mabundu to bamfumu ya politiki. Mpe beto kepesaka ve mabundu to balukanu na bau ya politiki maboko. Kutu, beto kekotaka ve na mambu ya politiki mpe beto kevuandaka ya kukabuana na yinza. Samu na yau, beto kevuandaka ya kusuasana mpenza na mabundu yankaka yina ketubaka ti bakele Baklisto.—Yoa. 18:36.
BETO KEZITISAKA NKUMBU YA YEHOVA
Baklisto ya kedika kevuandaka na lokumu ya kuzabisa bantu yankaka mambu metadila Yehova (Tala baparagrafe 8-10) *
8. Yinki mutindu beto mezaba ti Yehova zola beto zaba nkumbu na yandi mpe beto zabisa yau bantu yankaka?
8 Na diluaku mosi, Yesu sambilaka ti: ‘Tata, pesa nkumbu na nge nkembo.’ Yehova yandi mosi pesaka mvutu na kisambu yango na ndinga ya ngolo kukatuka na dizulu, na kulakaka ti yandi kepesa nkumbu na yandi nkembo. (Yoa. 12:28) Ntangu nionso yina yandi salaka kisalu na yandi ya kusamuna awa na ntoto, Yesu pesaka nkumbu ya Tata na yandi nkembo. (Yoa. 17:26) Na yau, Baklisto ya kedika kemonaka ti yakele lokumu kusadila nkumbu ya Nzambi mpe kuzabisa yau bantu yankaka.
9. Yinki mutindu Baklisto ya siekle ya ntete monisaka ti bavuandaka zitisa nkumbu ya Nzambi?
9 Na siekle ya ntete ya N.B., ntangu fioti kaka na manima ya kusalama ya kimvuka ya Buklisto, Yehova ‘Nzambi tulaka dikebi samu na mbala ya ntete na makanda samu na kubimisa bantu na kati na bau samu na kunata nkumbu na yandi.’ (Bis. 15:14) Yavuandaka lokumu samu na Baklisto yango ya siekle ya ntete kusadila nkumbu ya Nzambi mpe kuzabisa yau bantu yankaka. Bavuandaka sadila nkumbu ya Nzambi ntangu bavuandaka samuna mpe ntangu bavuandaka sonika mikanda ya Biblia. * Na mutindu yina nde bamonisaka ti bau kaka nde vuandaka dibuta samu na nkumbu ya Nzambi.—Bis. 2:14, 21.
10. Yinki kena kumonisa ti Bambangi ya Yehova kele dibuta samu na nkumbu ya Yehova?
10 Bambangi ya Yehova kele dibuta samu na nkumbu ya Yehova? Beto tadila mambu yina kena kundimisa beto yau. Bubu yayi bamfumu ya mabundu salaka nionso yina kele na kilendo na bau samu na kusueka nkumbu ya Nzambi. Bakatulaka yau na bambangudulu ya Babiblia na bau, mpe babikaka ve nzila ti bantu sadila nkumbu ya Nzambi na mabundu na bau. * Nani lenda manga kundima ti Bambangi ya Yehova kaka nde kele bantu yina kepesaka nkumbu ya Nzambi luzitu mpe lokumu yina mefuana na yau? Beto kena kuzabisa nkumbu ya Nzambi na bantu mingi kuluta mabundu yankaka! Na yau, beto kena kusala yina beto lenda samu na kuzinga na nguizani na nkumbu na beto, Bambangi ya Yehova. (Yez. 43:10-12) Beto bimisaka Babiblia Libongoli ya Mokili ya Sika kuluta bamilion 240, yina kele na nkumbu ya Yehova na bisika yina bakatulaka yau na bambangudi. Mpe beto kebimisaka mikanda yina kesasilaka Biblia yina kele na nkumbu ya Yehova na bandinga kuluta 1 000!
BETO KEZOLAKA KEDIKA
11. Yinki mutindu Baklisto ya siekle ya ntete monisaka ti bakezolaka kedika?
11 Yesu vuandaka zola kedika, yazola monisa, kedika metadila Nzambi mpe lukanu na Yandi. Yesu vuandaka zinga na nguizani na kedika yango, mpe yandi vuandaka zabisa bantu yankaka kedika yango. (Yoa. 18:37) Banlonguki ya kedika ya Yesu diaka zolaka kedika mingi. (Yoa. 4:23, 24) Na yau, ntumua Petelo bokidilaka kiminu ya Buklisto na nkumbu ya ‘nzila ya kedika.’ (2Pi. 2:2) Lokola bavuandaka zola kedika ngolo, Baklisto ya siekle ya ntete mangaka makanisi ya mabundu, mimeseno ya kinkulu, mpe makanisi ya bantu yina vuandaka ve na nguizani na kedika. (Kol. 2:8) Bubu yayi diaka, Baklisto ya kedika kesalaka ngolo samu na ‘kutatamana kutambula na kedika’ na kusadilaka Mpova ya Nzambi na mambu nionso yina bakendiminaka mpe na nzingulu na bau.—3Yn 3, 4.
12. Yinki kesalamaka kana Kimvuka ya Ntuadisi memona ti mbakusulu na beto fueti soba, mpe samu na yinki bakesalaka bansobolo yango?
12 Bambangi ya Yehova ketubaka ve ti bakebakusaka konso diambu yina kele na kati ya Biblia. Na bantangu yankaka, basalaka banzimbala na mutindu na bau ya kusasila malongi ya Biblia mpe mutindu ya kutuadisa kimvuka. Yafueti kamuisa beto ve. Masonukua memonisa yau puelele ti nzayilu ya sikisiki kekulaka ntangu bamvula kena kupusana. (Kol. 1:9, 10) Yehova kemonisaka kedika malembe malembe, mpe beto fueti vuanda pene na kuvingila na mvibudulu nionso samu kukia ya kedika lezima. (Bin. 4:18) Kana Kimvuka ya Ntuadisi memona ti beto fueti soba mbakusulu na beto samu na diambu to dilongi mosi, bakesalaka nsobolo kondua kuvingila. Mabundu mingi bubu yayi kesobaka malongi na bau samu na kusepedisa bankuikizi na bau to samu bazabana na yinza. Kasi Bambangi ya Yehova kesalaka bansobolo samu na kuvuanda pene ya Nzambi mpe kusambila yandi na mutindu yina Yesu salaka. (Yak. 4:4) Kana beto mesala nsobolo, yakevuandaka ve samu dibanza ya bantu na yinza mesoba, kasi nde samu beto mebaka mbakusulu ya puelele ya Biblia. Beto kezolaka kedika!—1Te 2:3, 4.
BETO KEZOLANAKA NGOLO
13. Yinki kele kikadulu ya mfunu yina Baklisto ya kedika monisaka, mpe yinki mutindu yakemonanaka na Bambangi ya Yehova bubu yayi?
13 Baklisto ya siekle ya ntete zabanaka na bikadulu mingi ya mbote, kasi kikadulu ya mfunu mingi yina bazabanaka na yau vuandaka nzola. Yesu tubaka: ‘Na diambu yayi nde bantu nionso kezaba ti beno kele banlonguki na munu—kana beno kezolanaka beno na beno.’ (Yoa. 13:34, 35) Bubu yayi, Bambangi ya Yehova na yinza ya mvimba kemonisaka nzola ya kedika mpe bumosi. Beto kele ya kusuasana na mabundu nionso samu beto kele lokola dibuta kaka mosi atako beto kele bantu ya babuala mpe banzingulu yina mesuasana. Beto kemonaka mambu yina kemonisaka nzola ya kedika na balukutakanu na beto, mpe na balukutakanu ya nene. Yau kendimisaka beto diaka ti beto kesambilaka Yehova na mutindu yina yandi kendimaka.
14. Na kutadila Bakolosai 3:12-14, yinki kele mutindu meluta mbote beto lenda monisa nzola kati na bampangi?
14 Biblia mekindisa beto beto ‘zolana ngolo.’ (1Pi 4:8) Mosi ya mutindu beto kemonisaka nzola ya mutindu yina kele na kunlemvukilanaka mpe na kukangaka ntima na banzimbala ya bampangi na beto. Beto kesosaka diaka maluaku ya kumonisa kikadulu ya kukaba mpe ya kuyamba banzenza na bantu nionso na kimvuka, ata na bantu yina salaka beto mambu ya yimbi. (Tanga Bakolosai 3:12-14.) Ntangu beto kemonisaka nzola ya mutindu yina, yakendimisaka ti beto kele Baklisto ya kedika.
‘KIMINU MOSI’
15. Na yinki mitindu diaka beto kelandaka kifuani ya nsambudulu yina kimvuka ya Buklisto ya siekle ya ntete bikaka?
15 Beto kelandaka kifuani ya nsambudulu yina kimvuka ya Buklisto ya siekle ya ntete bikaka na mitindu yankaka diaka. Na kifuani, nkubukulu na beto mekokana na ya Baklisto yango—beto kele na bankengi bantambudi, bankulutu, mpe bansadisi na kisalu—mutindu mosi kaka na nkubukulu yina bantumua na siekle ya ntete vuandaka sala. (Fil 1:1; Tito 1:5) Mutindu mosi kaka na bau, beto kezitisaka bansiku ya Yehova na diambu metadila kusangisa nzutu mpe dikuela, yina Nzambi metuba samu na mutindu ya kusadila menga, mpe beto ketaninaka kimvuka na bantu yina kemangaka kubalula ntima kana bamesala diambu ya yimbi.—Bis. 15:28, 29; 1Bk. 5:11-13; 6:9, 10; Ebr 13:4.
16. Yinki dilongi beto mebaka na bampova yina kele na Baefezo 4:4-6?
16 Yesu tubaka ti bantu mingi ketuba ti bakele Baklisto kasi bau nionso ve kevuanda mutindu Baklisto ya kedika fueti vuanda. (Mat. 7:21-23) Biblia samunaka ti na bilumbu ya nsuka, bantu mingi ‘kemonana nde bakezolaka mambu ya Nzambi.’ (2Tm. 3:1, 5) Nzokande, Biblia metubila beto puelele ti yakele na ‘kiminu mosi’ yina Nzambi kendimaka.—Tanga Baefezo 4:4-6.
17. Banani kena kulanda kifuani ya Yesu mpe kena kumonisa kiminu kaka mosi ya kedika bubu yayi?
17 Banani kena kumonisa kiminu kaka mosi ya kedika bubu yayi? Beto mekatuka tadila bidimbu. Beto memona kifuani yina Yesu longaka mpe yina Baklisto ya siekle ya ntete salaka. Mvutu kele kaka mosi—Bambangi ya Yehova. Yakele lokumu mingi samu na beto kuvuanda dibuta kaka mosi ya Yehova mpe kuzaba kedika yina metadila Yehova mpe lukanu na yandi! Bika beto tatamana kukindimisa ti beto kele na kedika.
MUYIMBU 3 Nguya na ngai, elikya na ngai, makasi na ngai
^ par. 5 Na disolo yayi, beto kemona kifuani yina Yesu bandisaka samu na nsambudulu ya kedika mpe beto ketadila mutindu banlonguki na yandi ya siekle ya ntete landaka kifuani yango. Beto kemona diaka mambu yina kena kundimisa ti Bambangi ya Yehova kena kulanda kifuani ya nsambudulu ya kedika bubu yayi.
^ par. 9 Tala ankadre “Bakristo ya liboso basalelaki nkombo ya Nzambe?” na Linɔ́ngi ya Mosɛnzɛli ya 1 Juillet 2010, p. 6.
^ par. 10 Na kifuani, na 2008, Pape Benoît XVI tubaka ti nkumbu ya Nzambi fueti “sadulua to kutubulua ve” na mabundu ya Katoliki, na miyimbu na bau to na bisambu na bau.
^ par. 63 NSASULU YA FOTO: Nkubukulu ya Yehova bimisaka Biblia—Libongoli ya Mokili ya Sika na bandinga kuluta 200, yina bantu lenda tanga na bandinga na bau, Biblia yina kele na nkumbu ya Nzambi.
