1. Yinki mambote beto kebakaka kana beto kena kubula masolo ya mutindu beto zabilaka ‘kedika’?

 “YINKI mutindu nge zabilaka kedika?” Kondua ntembe, nge mepesaka mvutu na kiuvu yango mbala mingi. Yakele mosi na kati ya biuvu yina beto keyuvusaka mpangi ya nketo to ya bakala kana beto kele na nsatu ya kuzaba yandi mbote. Beto kesepelaka kuwa mutindu bampangi na beto zabaka mpe kezolaka Yehova, mpe beto kesepelaka kutubila bau mfunu yina beto kesepelaka kuvuanda Bambangi ya Yehova. (Bar. 1:11) Masolo ya mutindu yina kesadisaka beto beto bika zimbakana valere yina kedika kele na yau. Beto kekumaka diaka na nzengolo mingi ya ‘kutatamana kutambula na kedika’—yazola monisa, kutatamana kuzinga luzingu yina kesala ti beto baka lusakumunu ya Yehova mpe beto ndimama na yandi.—3 Yoa. 4.

2. Yinki beto ketubila na disolo yayi?

² Na disolo yayi, beto kevutukila ndambu ya bamfunu yina kesalaka ti beto zola kedika. Na manima beto ketubila mutindu beto lenda tatamana kumonisa nzola na beto na dikabu yango ya valere. Kondua ntembe kuvutukila yau kesala ti beto sepela diaka mingi na yina Yehova salaka samu na kubenda beto na kedika. (Yoa. 6:44) Yakekumisa diaka nsatu na beto ngolo ya kuzabisa bantu yankaka kedika.

3. Yinki kele mfunu ya nene yina kesalaka ti beto zola kedika?

³ Beto kezolaka kedika samu na bamfunu mingi. Mfunu yina meluta nene kele, beto kezolaka Yehova Nzambi, Yinto ya kedika. Na nzila ya Mpova na yandi Biblia, beto zabaka yandi kaka ve lokola Mvangi nkua-ngolo-nionso ya dizulu mpe ntoto, kasi mpe lokola Tata na beto ya nzola ya dizulu, yina ketudilaka beto  dikebi na nzola nionso. (1 Pi. 5:7) Beto mezaba ti Nzambi na beto kele Nzambi yina ‘kemoninaka bantu kiadi mpe kefuilaka bau nkenda, yandi kekuwaka nganzi nsualu ve mpe yandi kele ya kufuluka na nzola ya kukuikama mpe na kedika.’ (Kub. 34:6) Yehova kezolaka lunungu. (Yez. 61:8) Yakesalaka yandi mpasi kana yandi kena kumona beto beto kena kumona mpasi, mpe yandi kele ya kukubama—ee, yandi kele na nsatu ya ngolo—ya kumanisa bampasi na ntangu yina mefuana. (Yer. 29:11) Beto diaka beto kena kuvingila na nsatu ya ngolo ntangu yango! Yakele mosi ya bamfunu yina kesalaka ti beto zola Yehova mingi!

4-5. Samu na yinki ntumua Paulo fuanikisaka kivuvu na beto na longo?

⁴ Yinki kele mfunu yankaka yina kesalaka ti beto zola kedika? Kedika kenatinaka beto mambote mingi. Beto tadila kifuani mosi. Kedika ya Biblia mesangisa kivuvu na beto samu na bilumbu kena kuiza. Samu na kumonisa mfunu ya kivuvu yango, ntumua Paulo sonikaka: ‘Beto kele na kivuvu yayi lokola longo samu na muela na beto, yakele kedika mpe ngolo.’ (Ebr. 6:19) Mutindu kaka longo kesiamisaka masuwa samu yabika kuningana, kivuvu na beto yina mesimbama na Biblia lenda sadisa beto beto vuanda na kiyenge ntangu beto kena kukutana na mambu ya mpasi na luzingu.

⁵ Na baverse yina kele na kikapu yango, Paulo vuandaka tubila kivuvu ya dizulu yina Baklisto yina metulua mafuta na kimpeve kevuandaka na yau. Kasi bampova na yandi metadila diaka Baklisto yina kele na kivuvu ya kuzinga mvula na mvula na paradiso awa na ntoto. (Yoa. 3:16) Ya kedika, kulonguka kivuvu ya luzingu ya mvula na mvula salaka ti luzingu na beto vuanda na mfunu.

6-7. Yinki mambote Yvonne bakaka na kulongukaka kedika yina metadila bilumbu kena kuiza?

⁶ Beto tadila kifuani ya mpangi mosi ya nketo na nkumbu ya Yvonne. Yandi yundukaka ve na kedika, mpe ntangu yandi vuandaka muana ya fioti yandi vuandaka banga lufua. Yandi kena kubambuka diaka ti yandi tangaka bampova mosi yina mebikanaka na makanisi na yandi: “Yakevuanda na kilumbu mosi yina mbazi kevuanda ve.” Yandi metuba: “Bampova yango salaka ti munu bika leka mpipa ya mvimba na kukanisaka kaka bilumbu kena kuiza. Munu vuandaka kanisa, ‘Yafueti vuanda na mambu yankaka na luzingu.’ ‘Samu na yinki munu kele na luzingu?’ Munu vuandaka ve na nsatu ya kufua!”

⁷ Na manima, ntangu yandi kumaka ntuenia, Yvonne sololaka na Bambangi ya Yehova. Yandi metuba: “Munu bandaka kundima ti munu lenda vuanda na kivuvu ya kuzinga mvula na mvula na Paradiso na ntoto.” Yinki mambote kedika natinaka mpangi na beto ya nketo? Yandi mebuela: “Munu kekonduaka diaka ve bampongi na mpipa samu na kukitungisa na diambu metadila bilumbu kena kuiza to lufua.” Mutindu kaka nge lenda kanisa yau, kedika kele na valere mingi samu na Yvonne, mpe yandi kesepelaka mingi kutubila bantu yankaka kivuvu na yandi samu na bilumbu kena kuiza.—1 Tm. 4:16.

8-9. (a) Na mosi ya masolo ya Yesu, yinki mutindu muntu mosi bakaka na valere kima ya ntalu yina yandi monaka? (b) Yinki valere kedika kele na yau samu na nge?

⁸ Kedika ya Biblia mesangisa diaka nsangu ya mbote samu na Kimfumu ya Nzambi. Yesu fuanikisaka kedika yina metadila Kimfumu yango na kima ya ntalu yina bamesueka. Mutindu kaka Matayo 13:44 memonisa yau, Yesu tubaka: ‘Kimfumu ya dizulu kele lokola kima ya ntalu yina bamesuekaka na bilanga, yina muntu mosi memona mpe yandi mesueka yau; mpe na kiese yina yandi kele na yau, yandi mekuenda mpe yandi meteka bima nionso yina yandi kele na yau mpe yandi mesumba bilanga yango.’ Simba ti muntu yango vuandaka sosa ve kima  ya ntalu. Kasi ntangu yandi monaka yau, yandi salaka bangolo mingi samu na kubaka yau. Na yau, yandi tekaka bima nionso yina yandi vuandaka na yau. Samu na yinki? Yandi zabaka valere ya kima yango ya ntalu. Yavuandaka na mfunu kuluta bima nionso yina yandi sundolaka.

⁹ Mutindu yina nde nge kekukimonaka samu na kedika? Ya kedika yakele mutindu yina! Beto mezaba ti kima mosi ve yina yinza yayi lenda pesa beto lenda kokana na kiese yina beto kevuandaka na yau ya kusadila Yehova bubu yayi, mpe na kivuvu ya mvula na mvula na bilumbu kena kuiza na yinsi ya lutuadusu ya Kimfumu ya Nzambi. Diluaku yina beto kele na yau ya kuvuanda na nguizani ya penepene na Yehova meluta bangolo nionso yina beto fueti sala. Kiese na beto kele ya ‘kusepedisa yandi mpenza.’—Kol. 1:10.

10-11. Yinki tindaka Michael yandi sala bansobolo ya nene na luzingu na yandi?

¹⁰ Mingi kati na beto salaka bangolo mingi samu na kundimama na Yehova. Bayankaka bikaka bisalu (carrières) ya mbote na yinza. Bayankaka bikaka kusosa kukuma bamvuama. Bayankaka sobaka mpenza mutindu na bau ya kuzinga ntangu balongukaka mambu ya Yehova. Yau nde Michael salaka. Yandi yundukaka ve na kedika. Ntangu yandi vuandaka ntuenia, yandi vuandaka longuka karate. Yandi metuba: “Yavuandaka mfunu samu na munu kubikana na nzutu mosi ya mbote. Na bantangu yankaka, munu vuandaka kukimona ti balenda nunga munu ve.” Kasi ntangu yandi bandaka kulonguka Biblia, Michael longukaka mutindu Yehova ketadilaka kinkesi. (Nk. 11:5) Michael metuba samu na bankuelani, Bambangi ya Yehova yina vuandaka longuka na yandi ti: “Bavuandaka tubila munu ata fioti ve ti munu bika kusala karate; batatamanaka kaka nde kulonga munu kedika ya Biblia.”

¹¹ Lokola Michael vuandaka longuka mingi mambu metadila Yehova, nzola na yandi samu na Yehova vuandaka tatamana kukula. Kiadi yina Yehova kevuandaka na yau samu na bisadi na yandi simbaka ntima na yandi. Na manima ya mua ntangu, Michael bakusaka ti yandi fueti baka nzengolo yina kesoba luzingu na yandi. Yandi metuba, “Munu zabaka ti kubika kusala karate vuandaka diambu ya mpasi yina munu salaka sala ntete ve. Kasi munu zabaka diaka ti yakesepedisa Yehova, mpe munu ndimisamaka ti kusadila yandi meluta bangolo nionso.” Michael zabaka ti kedika yina yandi monaka vuandaka na valere mingi, yau yina yandi vuandaka pene ya kusala bansobolo ya nene na luzingu na yandi.—Yak. 1:25.

12-13. Yinki mutindu kedika ya Biblia sadisaka Mayli?

¹² Samu na kumonisa valere ya kedika, Biblia kena kufuanikisa kedika na muinda yina kena kupela na kisika ya kitombe. (Nk. 119:105; Efe. 5:8) Mayli, yina kevuandaka na Azerbaïdjan kesepelaka mingi mpenza na lusadusu yina yandi bakaka na Mpova ya Nzambi. Yandi yundukaka na dibuta yina konso muntu vuandaka na dibundu na yandi. Tata na yandi vuandaka na dibundu ya Islam, mpe mama na yandi na dibundu ya Bayuda. Yandi metuba: “Atako munu vuandaka tula ntembe ve ti Nzambi kele, kasi munu vuandaka na biuvu mingi. Munu vuandaka kukiyuvusa, ‘Samu na yinki Nzambi salaka bantu, mpe samu na yinki muntu fueti niokuama luzingu na yandi ya mvimba mpe na manima kukuenda niokuama diaka mvimbamvimba na bilungi?’ Lokola bantu vuandaka tuba ti mambu nionso yina kekuminaka bantu kele lukanu ya Nzambi, munu vuandaka kukiyuvusa, ‘Nzambi kemonaka bantu lokola bima na yandi ya kusekinina mpe yandi kesepelaka kumona bau baniokuama?’”

¹³ Mayli tatamanaka kusosa bamvutu na biuvu na yandi. Na manima, yandi ndimaka  kulonguka Biblia mpe yandi kotaka na kedika. Yandi metuba, “Malongi ya kundimisa ya Biblia sadisaka munu samu munu kuma muntu ya kiese. Bansasulu ya kundimisa yina munu kutaka na Mpova ya Nzambi natinaka munu kiyenge ya ntima.” Mutindu mosi na Mayli, beto nionso beto kena kukumisa Yehova, ‘Muntu yina bokilaka [beto] na kukatuka na kitombe samu beto kota na ntemo na yandi ya kukamua.’—1 Pi. 2:9.

14. Yinki mutindu beto lenda kumisa nzola na beto samu na kedika ngolo? (Tala diaka ankadre “ Bifuani yankaka.”)

¹⁴ Yayi kele kaka ndambu ya bifuani yina kena kumonisa valere ya kedika. Kondua ntembe, nge lenda kanisa na bifuani mingi yankaka. Samu na yinki ve kusala yau ndongokolo na nge mosi samu na kumona bamfunu yankaka yina beto fueti zodila kedika? Kana beto kena kuzola kedika mingi, beto kemona mitindu ya kumonisina yau nzola na beto.

15. Yinki kele mosi ya mutindu yina beto lenda monisa nzola na beto samu na kedika?

¹⁵ Beto lenda monisa ti beto kezolaka kedika na kulongukaka mbala na mbala Biblia mpe mikanda yina kesasilaka Biblia. Ya kedika, yavuanda bamvula yikua beto mesala na kedika, beto  kevuanda ntangu nionso na mambu mingi ya kulonguka. Nimero ya ntetentete ya zulunalo yayi tubaka: “Kedika kele lokola mua fololo mosi ya fioti kasi ya kitoko na kati ya dezere ya luzingu, mpe yakele ya kuzingama na nzimbala yina kele lokola matiti yina ketulaka yau dikaka. Kana nge kele na nsatu ya kumona yau, nge fueti sosa ntangu nionso. . . . Kana nge kele na nsatu ya kubaka yau, nge fueti yinama samu na kubaka yau. Kusuka kaka ve na kuvuanda na fololo mosi ya kedika. . . . Sangisaka yau kaka ntangu nionso, mpe sosa kumona diaka mingi bakedika ya Biblia.” Kulonguka kele kisalu mosi ya ngolo, kasi yakele na mfunu kusala bangolo.

16. Yinki kele mayele yina nge kemonaka mbote samu na kulonguka? (Bingana 2:4-6)

¹⁶ Bantu nionso ve kati na beto kezolaka kutanga mpe kulonguka. Kasi Yehova kena kulomba beto beto ‘tatamana kusosa’ samu na kubakusa diaka mbote kedika. (Tanga Bingana 2:4-6.) Kana beto kena kusala ngolo ya mutindu yina, beto kebaka ntangu nionso mambote. Na diambu metadila ntangulu na yandi ya Biblia, Corey metuba ti yandi ketulaka dikebi mingimingi kaka na verse mosi. Yandi metuba: “Munu ketangaka konso noti na yinsi ya paje, bareferanse ya baverse yankaka, mpe munu kesosaka mambu yankaka. . . . Kusadila mayele yango kesadisaka munu samu munu longuka mambu mingi!” Yavuanda beto kesadilaka mayele yango to mayele yankaka, beto kemonisa ti beto kesepelaka na kedika kana beto kena kulutisa ntangu mpe beto kena kusala bangolo ya kulonguka yau.—Nk. 1:1-3.

17. Yinki zola monisa kuzinga na kedika? (Yakobo 1:25)

¹⁷ Kasi, beto mezaba ti beto fueti suka kaka ve na kulonguka kedika. Samu na kubaka mambote mingi, beto fueti zinga na kedika, yazola monisa kusadila mambu yina beto kena kulonguka na luzingu na beto. Kaka na manima ya kusala mutindu yina nde kedika kenatina beto kiese ya kedika. (Tanga Yakobo 1:25.) Yinki mutindu beto lenda ndimisama ti beto kena kuzinga na kedika? Mpangi mosi ya bakala metuba ti, na kutalaka luzingu na beto samu na kumona kana beto kena kusadila mambu yina beto kena kulonguka mpe yinki kisika beto fueti sadila yau diaka mingi. Ntumua Paulo tubaka: ‘Yavuanda beto mekuenda na ntuala tii na yinki kitezo, beto tatamana kutambula na mulongo na nzila kaka mosi yayi.’—Fil. 3:16.

18. Samu na yinki beto fueti sala nionso yina beto lenda samu na ‘kutatamana kutambula na kedika’?

¹⁸ Kanisa na mambote yina beto kebaka kana beto kena kusala nionso yina beto lenda samu na ‘kutatamana kutambula na kedika’! Beto kebongisa kaka ve luzingu na beto kasi beto kepesa Yehova mpe bampangi na beto Baklisto kiese. (Bin. 27:11; 3 Yoa. 4) Ya kedika, yakele na bamfunu ya mbote mpenza ya kuzola kedika mpe ya kuzinga na kedika?