1. Yinki kikadulu ya mbote beto kemonaka na bisadi ya Yehova?

BAMVULA mingi na ntuala, Biblia samunaka ti bisadi ya Nzambi ‘kekukipesa na luzolo na bau mosi’ na kisalu ya Yehova na yinsi ya lutuadusu ya Muana na yandi. (Nk. 110:3) Kondua ntembe, mbikudulu yango kena kukokisama bubu yayi. Konso mvula, bisadi ya vema ya Yehova kelutisaka bankama ya bamilion ya bawola na kisalu ya kusamuna. Bakesalaka yau na luzolo na bau mosi mpe bakefutaka bau ve samu na yau. Bakelutisaka diaka ntangu samu na kusadisa bampangi na bau Baklisto na kinsuni, na makanisi, mpe na kimpeve. Bankulutu mpe bansadisi na kisalu kelutisaka bawola mingi samu na kubongisa balukutakanu mpe bakekuendaka tala bampangi na bau ya babakala mpe ya banketo samu na kukindisa bau. Yinki ketindaka bisadi ya Yehova samu basala bisalu nionso yina? Yakele nzola—nzola samu na Yehova mpe samu na bafinangani na bau.—Mat. 22:37-39.

2. Mutindu Baroma 15:1-3 memonisa yau, yinki kifuani Yesu bikaka?

² Yesu bikaka kifuani ya mbote na diambu metadila kutula bansatu ya bantu yankaka na kisika ya ntete. Beto kena kusala nionso yina beto lenda samu na kuvuanda lokola yandi. (Tanga Baroma 15:1-3.) Kana beto melanda kifuani na yandi beto kebaka mambote. Yesu tubaka: ‘Kiese ya kupesa kevuandaka mingi kuluta ya kubaka.’—Bis. 20:35.

3. Yinki beto ketadila na disolo yayi?

³ Na disolo yayi, beto ketadila ndambu ya mambu yina Yesu salaka samu na kusadisa bantu yankaka mpe beto kemona mutindu beto lenda landa kifuani na yandi. Beto kemona diaka mutindu beto lenda kudisa nsatu na beto ya kusadila bantu yankaka.

4. Yinki mutindu Yesu tulaka bansatu ya bantu yankaka na kisika ya ntete?

⁴Yesu vuandaka sadisa bantu yankaka ata ntangu yandi vuandaka ya kulemba. Kanisa diambu Yesu salaka ntangu bantu mingi kuendaka kutana na yandi pembeni ya mongo, yalenda vuanda pembeni ya Kapernaume. Yesu lutisaka mpipa ya mvimba na kusambila. Yalenda vuanda yandi vuandaka ya kulemba mpenza, kasi ntangu yandi monaka grupe ya bantu, yandi monaka kiadi samu na bamputu mpe bantu ya maladi yina vuandaka kati na bantu yango. Yandi sukaka kaka ve na kubelusa bau, kasi yandi salaka diaka diskur mosi ya kukindisa yina meluta badiskur nionso yina mesalamaka tii bubu yayi—Disolo na zulu ya mongo.—Luka 6:12-20.

5. Yinki mutindu bamfumu ya mabuta kelandaka kifuani ya kikadulu ya kukiyimina ya Yesu ntangu bakele ya kulemba?

⁵Mutindu bamfumu ya mabuta kelandaka kifuani ya Yesu. Kanisa ntete diambu yayi: Na manima ya kulutisa kilumbu ya mvimba na kisalu, mfumu ya dibuta mevutuka na yinzo ya kulemba. Atako yandi kele na nsatu ya kubika kutuadisa nsambudulu ya dibuta yina kesalamaka na nkokila ya kilumbu yango, yandi melomba Yehova pesa yandi ngolo ya kutuadisa ndongokolo. Yehova mepesa mvutu na kisambu na yandi, mpe yandi mesala ndongokolo kintuadi na dibuta mutindu yandi kesalaka konso sabala. Bana mebaka dilongi ya mfunu na nkokila yango, ti samu na bibuti na bau, kutula mambu ya kimpeve na kisika ya ntete kele diambu yina meluta mfunu.

6. Pesa kifuani mosi yina kena kumonisa mutindu Yesu sadilaka ntangu na yandi samu na kusadisa bantu yankaka.

⁶Yesu vuandaka lutisa ntangu na bantu yankaka ata kana yandi vuandaka na nsatu ya kuvuanda kaka yandi mosi. Nge lenda kanisa mutindu Yesu kukimonaka ntangu yandi kuwaka ti bamekufua nkundi na yandi Yoane mbotiki? Kondua ntembe, Yesu vuandaka na kiadi ya ngolo. Biblia metuba: ‘Ntangu Yesu kuwaka [mambu metadila lufua ya Yoane], yandi katukaka vana na masuwa mpe yandi kuendaka na kisika mosi.’ (Mat. 14:10-13) Beto lenda bakusa samu na yinki yandi vuandaka na nsatu ya kuvuanda yandi mosi. Bantu mingi kesepelaka kudila kisika yina bakele kaka bau mosi. Kasi, Yesu vuandaka na dikoki ve ya kuvuanda kaka yandi mosi. Grupe mosi ya bantu mingi kuizaka na kisika yina yandi  ponaka samu na kuvuanda kaka yandi mosi tekila kutu yandi kuma vana. Yinki Yesu salaka? Yandi kanisaka samu na bansatu ya bantu yango, mpe yandi ‘wilaka bau kiadi.’ Yesu bakusaka ti bavuandaka na nsatu ya lusadusu mpe ya lukindusu yina mekatuka na Nzambi, yau yina Yesu bandaka mbala mosi kusadisa bau. Na yau, ‘yandi bandaka kulonga bau mambu fioti ve, kasi mambu mingi.’—Mar. 6:31-34; Luka 9:10, 11.

7-8. Pesa kifuani mosi yina kena kumonisa mutindu bankulutu ya nzola kelandaka kifuani ya Yesu ntangu muntu mosi kele na nsatu ya lusadusu na kimvuka.

⁷Mutindu bankulutu ya nzola kelandaka kifuani ya Yesu. Beto kele na butondi samu na kisalu yina bankulutu na beto yina kele na kikadulu ya kukiyimina kesalaka samu na beto! Bampangi mingi na kimvuka kezabaka ve kisalu nionso yina bakesalaka. Na kifuani, kana yakena kulomba lusadusu ya nsualu ya munganga pesama, bampangi ya Komite samu na kusolola na minganga kesadisaka bampangi na bau na nsualu. Mbala mingi, nsatu ya lusadusu yango ya nsualu kekuizaka na mpipa ya ngolo! Kasi, kiadi samu na bampangi na bau yina kele na mpasi ketindaka bankulutu yango, kintuadi na mabuta na bau, na kutula bansatu ya bampangi na bau na kisika ya ntete.

⁸ Bankulutu kepesaka diaka lusadusu samu na kutunga Bayinzo ya Kimfumu mpe bayinzo yankaka ya teokrasi buela diaka kupesa lusadusu na ntangu ya bisumbula ya nene. Mpe bakelutisaka ntangu na bau mingi samu na kulonga, kukindisa, mpe kusadisa beto. Bampangi yango nionso mpe mabuta na bau mebonga kubaka bafelisitasion na beto. Bika Yehova sakumuna mpeve yina bekemonisaka! Ya kedika, mutindu kaka yamelombama samu na muntu nionso, bankulutu fueti vuanda na bukatikati. Bafueti manga kulutisa ntangu mingi na mambu ya kimvuka,  kasi kukondua ntangu ya kukokisa bansatu ya mabuta na bau.

9. Na kutadila Bafilipi 2:4, 5, yinki makanisi beto nionso Baklisto beto fueti kudisa?

⁹ Tanga Bafilipi 2:4, 5. Ya kedika, beto nionso ve kele bankulutu, kasi beto nionso lenda longuka kikadulu ya Yesu ya kukiyimina. Biblia metuba ti yandi ‘kumaka lokola nanga.’ (Fil 2:7) Kanisa na dilongi yina beto lenda baka na verse yango. Nanga to kisadi yina mebonga, kesosaka maluaku samu na kusepedisa mfumu na yandi. Lokola beto kele bananga ya Yehova mpe bisadi ya bampangi na beto, beto kele na nsatu ya kuvuanda na mfunu mingi samu na Yehova mpe samu na bampangi na beto. Beto lenda sala yau na kutadilaka mambu yayi melanda.

10. Yinki biuvu beto lenda kukiyuvusa?

¹⁰Tadila makanisi na nge. Kukiyuvusa biuvu lokola yayi: ‘Munu kevuandaka pene ya kukiyimina samu na kusadisa bantu yankaka? Na kifuani, yinki mulenda sala kana bamelomba munu mukuenda tala mpangi mosi ya kiboba na yinzo yina biboba kekuendaka vuanda to mukuenda baka mpangi mosi ya nketo ya kiboba samu yandi kuiza na balukutakanu? Munu kepesaka lusadusu na munu na nsualu kana yakena kulomba bavolontere samu na kusala bunkete na kisika ya balukutakanu ya nene to kubongisa Yinzo ya Kimfumu?’ Ntangu beto kukipesaka na Yehova beto lakaka yandi ti beto kepesa nionso yina beto kele na yau samu na kusadila yandi. Yandi zola beto sadila ntangu, ngolo, mpe bima na beto ya kinsuni samu na kusadisa bantu yankaka. Na yau yandi kevuandaka na kiese ntangu beto kena kukiyimina samu na kusala plina. Kana beto memona ti beto fueti sala bansobolo na kisika mosi, yinki beto lenda sala?

11. Yinki mutindu kisambu lenda sadisa nge nge kuna kikadulu ya kukiyimina?

¹¹Sambila Yehova na ntima ya mvimba. Kanisa ntete nge memona ti nge fueti sala bansobolo ya mfunu na diambu mosi, kasi nge kele ve na makoki ya kusala yau. Na ntangu yango, sambila Yehova na ntima ya mvimba. Zibudila yandi ntima. Zabisa Yehova mutindu nge kena kukimona, mpe lomba yandi yandi pesa nge ‘nsatu mpe ngolo ya kusala mambu.’—Fil 2:13.

12. Yinki mutindu bantuenia ya babakala yina mekatuka baka mbotama lenda sadisa bimvuka na bau?

¹² Kana nge kele mpangi ya ntuenia yina mekatuka baka mbotama, lomba Yehova sadisa nge nge kuna nsatu ya kusala mingi samu nge sadisa bampangi na kimvuka. Na babuala yankaka, bankulutu kele mingi kuluta bansadisi na kisalu, mpe mingi kati na bansadisi na kisalu yango kele bambuta. Lokola nkubukulu kena kutatamana kukuenda na ntuala, beto kele na nsatu ya bampangi ya babakala ya bantuenia mingi samu na kutanina bisadi ya Yehova. Kana nge kele pene ya kusala na mutindu mosi yina bakele na nsatu na nge, nge kevuanda na kiese. Samu na yinki? Samu nge kesepedisa Yehova, bampangi kemona ti nge kele pene samu na kusadisa bantu yankaka, mpe nge kevuanda na kiese yina kemonanaka na manima ya kusadisa bantu yankaka.

13-14. Yinki beto lenda sala samu na kusadisa bampangi na beto ya babakala mpe ya banketo? (Tala foto ya kuvertire.)

¹³Vuanda pene ya kumona bantu yina kele na nsatu ya lusadusu. Ntumua Paulo tubilaka Baklisto yina vuandaka zinga na Yuda ti: ‘Beno zimbakana ve kusala mambu ya mbote mpe kukabula na bayankaka bima yina beno kele na yau, samu Nzambi kemonaka kiese na bankayilu ya mutindu yina.’ (Ebr 13:16) Yavuandaka malongi ya mfunu mingi! Ntangu fioti kaka na manima ya kubaka letre yango, yalombaka na Baklisto ya Yuda na kubika bayinzo na bau, mumbongo na bau, mpe bampangi na bau yina vuandaka Baklisto ve mpe ‘kubanda kutina na bamongo.’ (Mat. 24:16) Na ntangu yango, kondua ntembe yavuandaka mpenza na mfunu samu na bau basalasana. Kana tekila  diambu yango salama bavuandaka sadila malongi ya Paulo samu na kukabasana bima yina bavuandaka na yau, yazolaka vuanda pete samu na bau na kumesana na luzingu na bau ya yimpa.

¹⁴ Bampangi na beto ya babakala mpe ya banketo lenda tubila beto ve ntangu nionso bansatu na bau. Na kifuani, mpangi ya bakala lenda fuila nketo. Mpangi na beto ya bakala kele na nsatu ya muntu mosi yina kesadisa yandi na kima ya kudia, na transpore, mpe na bisalu ya yinzo? Yandi lenda lomba beto ve lusadusu samu yandi kele ve na nsatu beto mona ti yandi kena kutungisa beto. Kasi yandi kesepela mingi kana beto mesadisa yandi kondua kutu yandi lomba beto lusadusu. Beto fueti kanisa ve ti muntu yankaka kesadisa yandi to yandi kebanda kuzabisa beto ntangu nionso yina yandi kele na yau nsatu. Kukiyuvusa, ‘Kana mambu ya mutindu yina mekumina munu, yinki lusadusu munu kevuanda na yau mpenza nsatu?’

15. Yinki beto fueti sala kana beto kele na nsatu ya kusadisa bantu yankaka?

¹⁵Vuanda muntu yina bantu kebangaka ve kupusana pembeni na yandi. Kondua ntembe, nge mezaba bampangi ya babakala mpe ya banketo na kimvuka na beno yina kevuandaka ntangu nionso pene samu na kusadisa bayankaka. Bakemonisaka ve ti bakele ve na ntangu samu na kusadisa beto. Beto mezaba ti beto lenda tudila bau ntima kana beto kele na nsatu ya lusadusu, mpe beto kesepelaka kuvuanda lokola bau! Alan, nkulutu mosi yina kele na bamvula kana 40, yandi vuandaka na nsatu ya kuvuanda muntu yina bantu kebangaka ve kupusana pembeni na yandi. Na kukanisaka na kifuani ya Yesu, Alan metuba: “Yesu vuandaka na mambu mingi ya kusala, kasi bantu ya bamvula ya kusuasana vuandaka pusana penepene na yandi mpe bavuandaka banga ve kulomba yandi lusadusu. Bazabaka ti yandi vuandaka muntu yina vuandaka tudila bau mpenza dikebi. Muzola  vuanda lokola Yesu mpe kuzabana lokola muntu yina bantu kebangaka ve kupusana pembeni na yandi, muntu yina kesepelaka kusala kinkundi na bantu, mpe muntu yina ketudilaka bantu dikebi.”

16. Yinki mutindu kusadila Nkunga 119:59, 60 lenda sadisa beto samu beto landa mbotembote kifuani ya Yesu?

¹⁶ Beto fueti lemba nzutu ve kana beto kena kukoka ve kulanda kifuani ya Yesu mbotembote. (Yak. 3:2) Muntu yina kena kulonguka kisalu lenda kokana ve na mambu nionso na nlongisi na yandi. Kasi lokola banzimbala na yandi kena kulonga yandi, mpe yandi kena kusala bangolo samu na kulanda kifuani ya nlongisi na yandi na kuvuandaka pene na yandi, nlonguki ketatamana kubongisa mambu mingi. Mutindu mosi, kana beto kena kutatamana kusadila mambu yina beto kelongukaka na ndongokolo na beto ya Biblia mpe beto kena kutatamana kubongisa mambu yankaka, beto kelanda mbotembote kifuani ya Yesu.—Tanga Nkunga 119:59, 60.

17-18. Yinki mambote beto kebaka kana beto kena kulanda kifuani ya kikadulu ya kukiyimina ya Yesu?

¹⁷ Kana beto kele na kikadulu ya kukiyimina, bantu yankaka diaka lenda kuma na kikadulu yango. Nkulutu mosi na nkumbu ya Tim metuba: “Beto kele na bampangi yina meyela na kimpeve mpe bamekuma bansadisi na kisalu—ndambu na bau kele mpenza bantuenia—yakele samu bamonaka mutindu bampangi yankaka vuandaka pene samu na kusadisa bantu yankaka, mpe bavuandaka na nsatu ya kuvuanda lokola bau. Bampangi yango ya bantuenia kena kusadisa kimvuka na beto mpe bakena kupesa bankulutu maboko.”

¹⁸ Beto kena kuzinga na yinza yayi bantu kele na kikadulu ya muyimi. Kasi bisadi ya Yehova kele ve lokola bantu yango. Mpeve ya kukiyimina ya Yesu kesimbaka bantima na beto, mpe beto kele na nzengolo ya kulanda kifuani na yandi. Beto kele ve na dikoki ya kulanda bitambi na yandi na mutindu ya kukoka, kasi beto lenda ‘landa bitambi na yandi mbotembote.’ (1 Pi 2:21) Kana beto kena kusala nionso samu na kulanda kifuani ya kikadulu ya kukiyimina ya Yesu, beto diaka beto kevuanda na kiese samu beto kena kusepedisa Yehova.