1-2. (a) Yinki ntangu beto kekanisaka bantu beto vuandaka zola mingi yina mekufuaka? (b) Yinki Yesu salaka na mpipa ya nsuka tekila yandi kufua?

YAVUANDA kana yameluta bamvula mingi banda beto mefuilaka bantu yina beto kezolaka mingi, beto zimbakana bau ve. Beto kekanisaka bau mingi mingi kana beto mekuma na dati yina bakufuaka.

² Konso mvula, beto kevuandaka na kati ya bamilion ya bantu yina kesanganaka na yinza ya mvimba samu na kukanisa lufua ya muntu yina beto kezolaka mingi—Yesu Klisto. (1 Pi. 1:8) Beto kekutakanaka samu na kukanisa muntu yina pesaka luzingu na yandi lokola nkudulu samu na kuvukisa beto na disumu mpe na lufua. (Mat. 20:28) Kutu, Yesu zolaka banlonguki na yandi bakanisaka lufua na yandi. Na mpipa ya nsuka tekila yandi kufua, yandi bandisaka madia ya nkokila mosi ya mfunu mpe yandi pesaka ntumu ti: ‘Beno tatamana kusala yau samu na kubambukila munu.’—Luka 22:19.

3. Yinki beto ketadila na disolo yayi?

³ Kati na bantu yina kesalaka Mbambukulu ya lufua ya Klisto, yakele kaka na ndambu ya bantu yina kele na kivuvu ya kukuenda zinga na dizulu. Kasi bamilion ya bantu yankaka kele na kivuvu ya kuzinga na ntoto. Na disolo yayi, beto ketadila bamfunu zole yina bagrupe yango zole kevuandaka na nsatu ya ngolo ya kusala Mbambukulu konso mvula. Beto ketadila diaka mambote yina beto kebakaka na kusalaka yau. Beto banda ntete kutubila bamfunu yina Baklisto yina metulua mafuta na kimpeve kesalaka Mbambukulu.

4. Samu na yinki Baklisto yina metulua mafuta na kimpeve kekudiaka dimpa mpe kekunuaka vinu ya Mbambukulu?

⁴ Konso mvula, Baklisto yina metulua mafuta na kimpeve kekudiaka dimpa mpe kekunuaka vinu ya Mbambukulu. Samu na yinki bakekudiaka dimpa mpe bakekunuaka vinu? Samu na kubaka mvutu, beto tadila mambu yina salamaka na mpipa ya nsuka ya luzingu ya Yesu awa na ntoto. Na manima ya kudia madia ya Paki, Yesu salaka nkinzi yina mezabana na nkumbu ya Madia ya nkokila ya Mfumu. Yandi lutisaka dimpa mpe vinu na bantumua na yandi ya kukuikama 11 mpe yandi zabisaka bau bakudia mpe bakunua. Yesu zabisaka bau diambu metadila baluwawanu zole—luwawanu ya yimpa mpe luwawanu ya Kimfumu. * (Luka 22:19, 20, 28-30) Baluwawanu yango zibulaka nzila samu na bantumua yango mpe samu na ntalu ya fioti ya bantu yankaka yina kekuma bamfumu mpe banganga-nzambi na dizulu. (Kus. 5:10; 14:1) Kaka ndambu ya Baklisto yina metulua mafuta na kimpeve yina kele ntete na ntoto, yina kele na kati ya baluwawanu yango zole, lenda kudia dimpa mpe kunua vinu ya Mbambukulu.

5. Yinki Baklisto yina metulua mafuta na kimpeve mezaba na diambu metadila kivuvu yina bamepesa bau?

⁵ Tala mfunu yankaka yina kesalaka ti Baklisto yina metulua mafuta na kimpeve vuanda na nsatu ya ngolo ya kusala Mbambukulu: Kusala yau kepesaka bau diluaku ya kukanisa kivuvu na bau. Yehova pesaka bau kivuvu mosi ya kukamua—kuvuanda na luzingu yina kele na nzutu yina kekufuaka ve mpe kebolaka ve na dizulu, kuyala kintuadi na Yesu Klisto yina bakaka nkembo mpe bantu 144000 yankaka, mpe yina meluta nionso, kuvuanda mpenza na ntuala ya Yehova Nzambi! (1Bk. 15:51-53; 1 Yoa. 3:2) Baklisto yina metulua mafuta na kimpeve mezaba ti bamebokulua samu na kubaka maluaku yango na dizulu. Kasi samu na kukuenda na dizulu, bafueti bikana ya kukuikama tii na lufua na bau. (2 Tm. 4:7, 8) Kukanisa na kivuvu na bau ya dizulu kepesaka Baklisto yina metulua mafuta na kimpeve kiese mingi. (Tito 2:13) Yinki beto ketuba samu na “mameme yankaka”? (Yoa. 10:16) Yinki kele bamfunu yina kesalaka ti basala Mbambukulu?

6. Samu na yinki mameme yankaka kesalaka Mbambukulu konso mvula?

⁶ Mameme yankaka kesalaka Mbambukulu, nzokande bakekudiaka ve dimpa mpe bakekunuaka ve vinu, kasi bakevuandaka na kiese ya kuvuanda vana. Na 1938, bayina kele na kivuvu ya kuzinga awa na ntoto kutakanaka samu na mbala ya ntete na Mbambukulu. Yinzo’a zulu ya Nkengi ya 1 Mars 1938 na Anglais, tubaka: “Yakevuanda mpenza mbote samu na [mameme yankaka] na kukutakana na lukutakanu yango mpe kutala mutindu yakesalama. . . . Yafueti vuanda mpe yakele ntangu mosi ya kusepela samu na bau diaka.” Mutindu kaka bantu yina bakebokidisaka na feti ya dikuela kevuandaka na kiese ya kumona nkinzi yango, mameme yankaka diaka kevuandaka na kiese ya kuvuanda na Mbambukulu.

7. Samu na yinki mameme yankaka kevuandaka na kiese ya kuwa diskur ya Mbambukulu?

⁷ Mutindu mosi na Baklisto yina metulua mafuta na kimpeve, mameme yankaka diaka kekanisaka kivuvu na bau. Bakevuandaka na kiese ya kuwa diskur ya Mbambukulu, samu na mambu mingi yina Klisto mpe bantu 144000 kesala samu na bantu ya kukuikama na Luyalu ya  bamvula 1000. Na lutuadusu ya Ntinu na bau Yesu Klisto, bayina keyala na dizulu kepesa maboko samu na kukumisa ntoto paradiso mpe kusadisa bantu ya luzitu samu bakuma bantu ya kukoka. Yakele diambu ya kiese samu na bamilion ya mameme yankaka yina kesalaka Mbambukulu na kukanisa kukokisama ya bambikudulu ya Biblia, yina kesalama na bilumbu kena kuiza lokola yina beto kekuta na Yezaya 35:5, 6; 65:21-23; mpe Kusonga 21:3, 4. Na kukimonaka kintuadi na bantu yina bavuandaka zola mingi na yinza ya yimpa, bakekumisaka kivuvu na bau samu na bilumbu kena kuiza mpe nzengolo na bau ya kubika ve kusadila Yehova ngolo.—Mat. 24:13; Bag. 6:9.

8. Yinki kele mfunu yankaka yina mameme yankaka kesalaka Mbambukulu?

⁸ Beto tadila mfunu yankaka yina mameme yankaka kesalaka Mbambukulu. Bakevuandaka na nsatu ya kumonisa nzola mpe lusadusu na bau na Baklisto yina metulua mafuta na kimpeve. Mpova ya Nzambi samunaka ti Baklisto yina metulua mafuta na kimpeve mpe bayina kele na kivuvu ya kuzinga na ntoto kesala mpenza kintuadi. Yinki mutindu? Beto tadila ndambu ya bifuani.

9. Mbikudulu yina kele na Zekaria 8:23 kena kumonisa ti mameme yankaka kekukimonaka yinki mutindu samu na Baklisto yina metulua mafuta na kimpeve?

⁹ Tanga Zekaria 8:23. Mbikudulu yango kena kumonisa mutindu mameme yankaka kekukimonaka samu na bampangi na bau yina metulua mafuta na kimpeve. Bampova “Muyuda” mpe “beno” kena kumonisa grupe kaka mosi—Baklisto yina metulua mafuta na kimpeve yina kele ntete na ntoto. (Bar. 2:28, 29) Bantu “kumi ya bandinga nionso ya makanda” kena kumonisa mameme yankaka. “Bakesimbaka ngolo”—na kukangamaka na kukuikama nionso—na Baklisto yina metulua mafuta na kimpeve, na kusanganaka na bau na nsambudulu ya kuvedila. Na yau, na nkokila ya kilumbu ya Mbambukulu, mameme yankaka kemonisaka kukangama na bau na Baklisto yina metulua mafuta na kimpeve na kuvuandaka kintuadi na bau.

10. Yinki Yehova salaka samu na kukokisa mbikudulu yina kele na Ezekiele 37:15-19, 24, 25?

¹⁰ Tanga Ezekiele 37:15-19, 24, 25. Yehova kokisaka mbikudulu yango na kusalaka ti Baklisto yina metulua mafuta na kimpeve mpe mameme yankaka basala mpenza kintuadi. Mbikudulu yango kena kutubila bayinti zole. Bantu yina kele na kivuvu ya kuzinga na dizulu kele lokola yinti ya “Yuda” (dikanda yina bavuandaka ponina bantinu ya Yisaele), mpe bayina kele na kivuvu ya kuzinga na ntoto bakele lokola yinti ya “Efrayimi.” * Yalombaka Yehova sangisa bagrupe yango zole samu yakuma kaka “yinti mosi.” Yazola monisa ti bakesalaka na bumosi na yinsi ya lutuadusu ya Ntinu na bau kaka mosi, Klisto Yesu. Konso mvula, Baklisto yina metulua mafuta na kimpeve mpe mameme yankaka kesalaka ve Mbambukulu lokola bagrupe zole ya kuvambana, kasi lokola “kimvuka mosi” na yinsi ya lutuadusu ya ‘mvungi mosi.’—Yoa. 10:16.

11. Yinki mutindu mameme yina Matayo 25:31-36, 40 metubila kemonisaka ti bakepesaka bampangi ya Klisto maboko?

¹¹ Tanga Matayo 25:31-36, 40. Mameme yina Yesu metubila kena kumonisa bantu ya lunungu na bilumbu ya nsuka yina kele na kivuvu ya kuzinga na ntoto—bau nde, mameme yankaka. Bakepesaka na kukuikama nionso bampangi ya Klisto maboko mingi mingi na kusadisaka bau na kukokisa kiyekua ya nene yina bakele na yau—kisalu ya kusamuna mpe ya kukumisa bantu banlonguki na yinza ya mvimba.—Mat. 24:14; 28:19, 20.

12-13. Yinki kele mitindu yankaka yina mameme yankaka kemonisaka ti bakepesaka bampangi ya Klisto maboko?

 ¹² Konso mvula na basabala yina kevuandaka tekila kilumbu ya Mbambukulu, mameme yankaka kemonisaka ti bakepesaka bampangi ya Klisto maboko na kusalaka kampanye ya nene ya kubokidisa bantu yina kesepelaka na Mbambukulu. (Tala ankadre “ Nge kena kukibongisila programe samu na ntangu ya Mbambukulu?”) Bakepesaka diaka maboko samu na kubaka bankubukulu yina mefuana samu Mbambukulu koka kuluta na konso kimvuka ya yinza ya mvimba, ata kana na kimvuka na bau yakele ata na muntu mosi ve yina kele Muklisto yina metulua mafuta na kimpeve. Mameme yankaka kevuandaka na kiese ya kupesa bampangi ya Klisto maboko na mitindu yango. Mameme yango mezaba ti Yesu ketadilaka mambu yina bakesalaka samu na bampangi na yandi yina metulua mafuta na kimpeve lokola kaka bakena kusala yau na yandi mosi.—Mat. 25:37-40.

¹³ Yinki kele bamfunu yankaka yina kesalaka ti beto nionso beto sala Mbambukulu, yavuanda kana beto kele na yinki kivuvu?

14. Yinki mutindu Yehova mpe Yesu monisaka ti bakezolaka beto mingi?

¹⁴Beto kevuandaka na butondi samu na nzola yina Yehova mpe Yesu monisaka samu na beto. Yehova monisaka nzola na yandi samu na beto na mitindu mingi, kasi yakele na mutindu mosi yina meluta nionso. Nzambi na beto monisaka beto nzola na yandi ya nene yina mekondua muyimi na kutindaka Muana na yandi yina yandi kezolaka mingi samu na kuniokuama mpe kufua samu na beto. (Yoa. 3:16) Beto mezaba ti Yesu diaka monisaka nzola ya nene na kuvuandaka pene ya kupesa luzingu na yandi samu na beto. (Yoa. 15:13) Beto kekoka ve kufuta Yehova mpe Yesu samu na nzola yina bamonisaka samu na beto. Kasi beto lenda monisa butondi na beto na mutindu beto kesadilaka mambu na luzingu na beto ya konso kilumbu. (Kol. 3:15) Mpe beto kekuendaka na Mbambukulu samu na kumonisa ti beto kena kukanisa na nzola yina bamonisaka samu na beto, na mutindu yango beto diaka beto kemonisaka ti beto kezolaka bau.

15. Samu na yinki Baklisto yina metulua mafuta na kimpeve mpe mameme yankaka kebakaka dikabu ya nkudulu na valere mingi?

¹⁵Beto kevuandaka na butondi mingi samu na dikabu ya nkudulu. (Mat. 20:28) Baklisto yina metulua mafuta na kimpeve kebakaka nkudulu na valere mingi, samu yau kena kusala ti kivuvu na bau kokisama. Lokola bakele na kiminu na nkayilu ya Klisto, Yehova memona ti bakele bantu ya lunungu mpe yandi mendima bau lokola bana na yandi. (Bar. 5:1; 8:15-17, 23) Mameme yankaka diaka kevuandaka na butondi mingi samu na nkudulu. Lokola bakele na kiminu na nkayilu ya Klisto, bakele na kikansasa ya kuvedila na ntadisi ya Nzambi, balenda sadila yandi kisalu ya nlongo, mpe bakele na kivuvu ya kuvuanda bantu yina mekatuka na ‘mpasi ya nene.’ (Kus. 7:13-15) Mosi ya mitindu yina Baklisto yina metulua mafuta na kimpeve mpe mameme yankaka kemonisaka butondi na bau samu na nkudulu kele na kuvuandaka na Mbambukulu konso mvula.

16. Yinki kele mfunu yankaka yina kesalaka ti beto kutakana na Mbambukulu?

¹⁶ Mfunu yankaka yina beto kekutakanaka na Mbambukulu kele, beto kevuandaka na nsatu ya kuzitisa Yesu. Yavuanda yinki kivuvu yina beto kele na yau samu na bilumbu kena kuiza, mosi mosi na beto fueti zitisa ntumu ya Yesu yina yandi pesaka na mpipa yina yandi bandisaka Mbambukulu: ‘Beno tatamana kusala yau samu na kubambukila munu.’—1Bk. 11:23, 24.

17. Yinki mutindu Mbambukulu kesadisaka beto beto pusana penepene na Yehova?

¹⁷Beto kepusanaka penepene na Yehova. (Yak. 4:8) Mutindu kaka beto longukaka yau, Mbambukulu kepesaka beto diluaku ya kukanisa samu na kivuvu yina Yehova pesaka beto mpe kukanisa na mpinda samu na nzola ya nene yina yandi monisaka samu na beto. (Yer. 29:11; 1 Yoa. 4:8-10) Ntangu beto kena kukanisa samu na kivuvu ya kedika yina beto kele na yau samu na bilumbu kena kuiza mpe na nzola ya Nzambi yina kemanisaka ve samu na beto, beto kekumisa nzola na beto samu na Yehova mpe kinkundi na beto na yandi ngolo.—Bar. 8:38, 39.

18. Kukanisa na kifuani ya Yesu ketinda beto beto sala yinki?

¹⁸Yaketindaka beto beto landa kifuani ya Yesu. (1 Pi. 2:21) Na bilumbu yina kevuandaka tekila Mbambukulu, beto ketulaka makanisi na beto na masolo ya Biblia yina metadila sabala ya nsuka ya luzingu ya Yesu awa na ntoto, lufua na yandi, mpe mfutumukunu na yandi. Mpe na nkokila ya kilumbu ya Mbambukulu, diskur kebambulaka beto nzola ya Yesu samu na beto. (Efe 5:2; 1 Yoa. 3:16) Kana beto kena kutanga kifuani ya kukiyimina ya Yesu mpe beto kena kuyindula na mpinda na zulu na yau, beto kekukimona ti beto fueti tatamana ‘kutambula mutindu muntu yango tambulaka.’—1 Yoa. 2:6.

19. Yinki mutindu beto lenda bikana na nzola ya Yehova?

¹⁹Yaketindaka beto beto bikana na kati ya nzola ya Nzambi. (Yude 20, 21) Beto kebikana na nzola ya Nzambi kana beto kena kusala nionso yina beto lenda samu na kuzitisa yandi, kukumisa nkumbu na yandi nlongo, mpe kusepedisa ntima na yandi. (Bin. 27:11; Mat. 6:9; 1 Yoa. 5:3) Kusala Mbambukulu ketindaka beto beto vuanda na nzengolo ya kuzinga konso kilumbu na mutindu yina kemonana lokola beto kena kutuba na Yehova, ‘Munu zola kubikana na nzola na nge samu na mvula na mvula!’

20. Yinki bamfunu ya mbote yina beto kele na yau ya kukutakana na Mbambukulu?

²⁰ Yavuanda kivuvu na beto kele ya kuzinga mvula na mvula na dizulu to na ntoto, beto kele na bamfunu ya mbote ya kusala Mbambukulu. Konso mvula ntangu beto mekutakana kintuadi na kilumbu yango, beto kebambukilaka lufua ya muntu yina beto kezolaka, Yesu Klisto. Yina meluta nionso, beto kebambukilaka nzola yina meluta nene—nzola yina Yehova monisaka samu na beto na kupesaka Muana na yandi lokola nkudulu. Mvula yayi, Mbambukulu kevuanda na nkokila ya Kilumbu ya tanu, 15 Avril 2022. Beto kezolaka Yehova mpe Muana na yandi, na yau na kilumbu yina Muana na yandi kufuaka, kima mosi ve lenda vuanda na mfunu samu na beto kuluta kukutakana na Mbambukulu.