1. Yinki kele lukanu ya Yehova bubu yayi?

 BUBU yayi, lukanu ya Nzambi kele, nsangu ya mbote ya Kimfumu samunua na ntoto ya mvimba. (Mar. 13:10; 1 Tm. 2:3, 4) Yakele kisalu ya Yehova, mpe yandi ponaka Muana na yandi yina yandi kezolaka mingi samu yandi tuadisa kisalu yango. Beto lenda kukindimisa ti lokola Yesu kele ntuadisi mosi ya makoki, kisalu ya kusamuna kesalama mutindu Yehova mezodila yau tekila nsuka kuiza.​—Mat. 24:14.

2. Yinki beto ketadila na disolo yayi?

² Na disolo yayi, beto kemona mutindu Yesu kena kusadila ‘nanga ya kukuikama mpe ya mayele’ samu na kupesa madia ya kimpeve mpe kubongisa banlonguki na yandi samu na kampanye ya nene ya kisalu ya kusamuna yina mesalamaka ntete ve. (Mat. 24:45) Beto kemona diaka yina konso muntu kati na beto lenda sala samu na kupesa Yesu mpe nanga ya kukuikama maboko.

3. Yinki kimfumu bapesaka Yesu?

³ Yesu kena kutuadisa kisalu ya kusamuna. Yinki lenda ndimisa beto yau? Ntangu fioti tekila yandi kuenda na dizulu, Yesu kutakanaka na ndambu ya banlonguki na yandi ya kukuikama na mongo ya Galile. Yandi tubilaka bau: ‘Bamepesaka munu kimfumu nionso na dizulu mpe na ntoto.’ Tala bampova yina yandi tubaka na manima na yau: ‘Beno kuenda, mpe beno kumisa bantu ya makanda nionso banlonguki.’ (Mat. 28:18, 19) Na yau, katula mambu yankaka, bapesaka Yesu kimfumu ya kutuadisa kisalu ya kusamuna.

4. Samu na yinki beto lenda ndimisama ti Yesu kena kutatamana kutuadisa kisalu ya kusamuna?

 ⁴ Yesu tubaka ti kisalu ya kusamuna mpe ya kukumisa bantu banlonguki kesalama na ‘makanda nionso’ mpe yandi kevuanda kintuadi na banlonguki na yandi ‘bilumbu nionso tii na nsuka ya mambu ya ntangu yayi.’ (Mat. 28:20) Bampova yango kena kumonisa puelele ti kisalu ya kusamuna ketatamana kusalama na yinsi ya lutuadusu ya Yesu tii na bilumbu na beto.

5. Yinki mutindu beto kena kupesa maboko samu Nkunga 110:3 kokisama?

⁵ Yesu vuandaka kukitungisa ve samu bisadi vuanda mingi na bilumbu ya nsuka. Yandi zabaka ti bampova ya mbikudulu ya nsoniki ya nkunga kekokisama: ‘Bantu na nge kekukipesa na luzolo na bau mosi na kilumbu yina nge ketuadisa basoda na nge ya mvita.’ (Nk. 110:3) Kana nge kesamunaka nsangu ya mbote, nge kena kupesa Yesu mpe nanga ya kukuikama maboko mpe nge kena kupesa maboko samu mbikudulu yango kokisama. Kisalu ya kusamuna kena kuenda na ntuala, kasi yakele na mambu ya mpasi.

6. Yinki kele mukakatano yina bansamuni ya Kimfumu ya Nzambi kekutanaka na yau bubu yayi?

⁶ Mosi ya mambu ya mpasi yina bansamuni ya Kimfumu kena kukutana na yau kele bakena kutelemina bau. Bapengui, bamfumu ya mabundu, mpe bantu ya politiki tubilaka bantu mingi mambu ya luvunu samu na kisalu na beto. Kana bantu ya dibuta na beto, bantu yina beto mezaba, mpe bankundi na beto ya kisalu kena kundima luvunu yango, balenda tinda beto beto bika kusadila Yehova mpe beto bika kusamuna. Na babuala yankaka, bambeni na beto kesalaka bampangi na beto mpasi, bakenuanisaka bau, bakekangaka bau, bakekotisaka bau ata mpe na buloko. Beto kekamuaka ve kumona mutindu bantu yango kesadilaka beto mambu mutindu yina. Yesu samunaka ti: ‘Makanda nionso keyina beno samu na nkumbu na munu.’ (Mat. 24:9) Kumona mutindu bakeyinaka beto kena kumonisa ti Yehova kendimaka beto. (Mat. 5:11, 12) Diabulu nde ketindaka bantu yango telemina beto. Kasi Yesu kele na kilendo mingi kuluta Satana! Na lusadusu ya Yesu, nsangu ya mbote kena kusamunua na bantu ya makanda nionso. Beto tadila mambu yina kena kundimisa yau.

7. Yinki bidimbu nge kena kumona yina kena kumonisa ti Kusonga 14:6, 7 kena kukokisama?

⁷ Diambu yankaka ya mpasi beto kekutanaka na yau ntangu beto kena kusamuna kele, bantu mingi ketubaka bandinga yina mesuasana. Na vizion yina Yesu pesaka ntumua Yoane, yandi samunaka ti na bilumbu na beto nsangu ya mbote kekutana na mambu yango ya mpasi. (Tanga Kusonga 14:6, 7.) Na yinki mutindu? Beto kena kupesa bantu mingi diluaku ya kundima nsangu ya Kimfumu. Bubu yayi, bantu na yinza ya mvimba lenda tanga mikanda yina kesasilaka Biblia na site na beto jw.org samu yakele na bansangu na bandinga kuluta 1 000! Kimvuka ya ntuadisi pesaka nzila ti mukanda Zinga mvula na mvula na kiese!​—yina kele kisadulu na beto ya ngudi bangulua samu na kukumisa bantu banlonguki—​na bandinga kuluta 700! Madia ya kimpeve kena kupesama diaka na nzila ya baanrejistrema ya bavideo samu na mababa mpe bantu yina kekuwaka mbote ve mpe na nzila ya mikanda samu na bantu yina kemonaka ve. Beto kena kumona kukokisama ya bambikudulu ya Biblia. Bantu ya ‘bandinga nionso ya makanda’ kena kulonguka kutuba ‘ndinga ya kuvedila’ ya kedika ya Biblia. (Zek. 8:23; Sef. 3:9) Nionso yina kena kukokisama na yinsi ya lutuadusu ya ntuadisi ya makoki Yesu Klisto.

8. Yinki mambote kisalu na beto kena kubimisa bubu yayi?

⁸ Bubu yayi, bantu kuluta 8 000 000 yina kele na babuala 240 kena kusangana na nkubukulu ya Yehova, mpe konso mvula mafunda ya  bantu kena kubaka mbotama! Kasi diambu meluta mpenza mfunu kele bikadulu ya Buklisto, ‘kimuntu ya yimpa,’ yina banlonguki yango ya yimpa kekunaka. (Kol. 3:8-10) Mingi kati na bau nungaka kubika mambu lokola mambu ya nsoni, kinkensi, kukanisina bantu yimbi, mpe kuvuanda na nzola ya buala. Mbikudulu yina kele na Yezaya 2:4 kena kukokisama; ‘bakelonguka mpe diaka ve mvita.’ Lokola beto kena kusala ngolo samu na kuvuata kimuntu ya yimpa, beto kena kusadisa bantu bakuiza na nkubukulu ya Nzambi mpe beto kena kumonisa ti beto kena kulanda ntuadisi na beto Klisto Yesu. (Yoa. 13:35; 1 Pi. 2:12) Samu na yinki yakena kusalama mutindu yina? Samu Yesu kena kupesa beto lusadusu yina beto kele na yau nsatu.

9. Na kutadila Matayo 24:45-47, yinki mambu basamunaka samu na bilumbu ya nsuka?

⁹ Tanga Matayo 24:45-47. Yesu samunaka ti na bilumbu ya nsuka, yandi ketula ‘nanga ya kukuikama mpe ya mayele’ samu na kupesa madia ya kimpeve. Na yau beto kekukivingilaka ti nanga yango sala kisalu ya ngolo na bilumbu na beto. Yakena kusalama mpe mutindu yina. Ntuadisi na beto Yesu sadilaka grupe mosi ya fioti ya babakala yina metulua mafuta na kimpeve samu na kupesa bantu ya Nzambi mpe bantu yina kena kusepela na mambu ya kimpeve ‘madia na ntangu yina mefuana.’ Babakala yango kekukimonaka ve lokola bamfumu ya kiminu ya bantu yankaka. (2 Bk. 1:24) Kasi, bakezabaka ti Yesu Klisto kele ‘ntuadisi mpe komanda’ ya bantu na yandi.​—Yez. 55:4.

10. Yinki kele mukanda na kati ya mikanda yina bametanga ndimisaka nge samu nge banda kusadila Yehova?

¹⁰ Banda 1919 nanga ya kukuikama bongisaka mikanda ya mutindu na mutindu yina pesaka bantu ya yimpa yina vuandaka sepela, diluaku na bau ya ntete ya kulonguka kedika ya Mpova ya Nzambi. Na 1921 nanga ya kukuikama bongisaka mukanda La Harpe de Dieu samu na kusadisa bantu ya yimpa yina vuandaka sepela  balonguka malongi ya ngudi ya Biblia. Na manima ya bamvula, mikanda yankaka bimaka. Yinki mukanda sadisaka nge nge zaba mpe nge zola Tata na beto ya dizulu? Yavuandaka mukanda “Que Dieu soit reconnu pour vrai!,” La vérité qui conduit à la vie éternelle, Vous pouvez vivre éternellement sur une terre qui deviendra un paradis, Boyebi oyo ezali komema na bomoi ya seko, Biblia eteyaka mpenza nini?, Yinki Biblia Kelongaka Beto?, to Zinga mvula na mvula na kiese!, mukanda na beto ya yimpa? Mikanda yango nionso salamaka samu yasadisa beto beto kumisa bantu banlonguki. Mpe yavuandaka bisadulu yina beto vuandaka na yau nsatu ntangu yabimisamaka.

11. Samu na yinki yakele na mfunu na beto nionso beto baka madia ya kimpeve?

¹¹ Bantu ya yimpa kaka ve kevuandaka na nsatu ya kukudisa nzayilu na bau samu na Yehova mpe Biblia. Beto nionso. Ntumua Paulo sonikaka: ‘Madia ya ngolo kele samu na bantu ya kuyela.’ Paulo buelaka ti kusadila mambu yina beto kelongukaka na Biblia kesadisa beto ‘na kusuasikisa mambu ya mbote mpe ya yimbi.’ (Ebr. 5:14) Yalenda vuanda mpasi kuzitisa bansikudukusu ya Yehova bubu yayi samu bantu mingi kele na bikadulu ya yimbi mpenza. Kasi Yesu kena kusala nionso samu beto baka ngolo yina beto kele na yau nsatu na nzila ya madia ya kimpeve ya kitoko. Madia yango kekatukaka na Biblia Mpova ya Nzambi, yina mepemama. Nanga ya kukuikama kebongisaka mpe kekabulaka madia yango na yinsi ya lutuadusu ya Yesu.

12. Mutindu mosi na Yesu, yinki mutindu beto kepesaka nkumbu ya Nzambi lokumu?

¹² Mutindu mosi na Yesu, beto pesaka nkumbu ya Nzambi lokumu yina mebonga na yau. (Yoa. 17:6, 26) Na kifuani, na 1931 beto bakaka nkumbu yina katukaka na Masonukua, Bambangi ya Yehova, na kubakaka nkumbu yango beto monisaka ti nkumbu ya Nzambi kele na mfunu mingi samu na beto mpe beto vuandaka na nsatu bantu zaba beto na nkumbu ya  Tata na beto ya dizulu. (Yez. 43:10-12) Mpe banda na ngonda ya Octobre ya mvula yango, nkumbu yango bandaka kumonana na kuvertire ya ntuala ya konso nimero ya zulunalo yayi. Katula yau, Biblia Mbalula ya Nsi-Ntoto ya Mpa vutulaka nkumbu ya Nzambi na kisika yina mebonga na yau na Mpova na yandi. Yakele mpenza lusuasanu ya ngolo na mabundu ya Buklisto yina katulaka nkumbu ya Yehova na bambangudulu na bau mingi ya Biblia!

13. Yinki kena kundimisa nge ti Yesu kena kusadila ‘nanga ya kukuikama mpe ya mayele’ bubu yayi? (Yoane 6:68)

¹³ Na nzila ya ‘nanga ya kukuikama mpe ya mayele,’ Yesu salaka nkubukulu mosi ya kukamua na ntoto samu na kubimisa nsambudulu ya kedika. Yinki mutindu nge kekukimonaka samu na nkubukulu yango? Mbala yankaka nge kekukimonaka mutindu mosi na ntumua Petelo, yina tubilaka Yesu: ‘Na nani beto kekuenda? Nge kele na bampova ya luzingu ya mvula na mvula.’ (Yoa. 6:68) Yinki kisika mosimosi na beto zolaka vuanda bubu yayi kana yandi kotaka ve na nkubukulu ya Yehova? Na nzila ya nkubukulu yango, Klisto kesalaka nionso samu beto vuanda na nionso yina beto kele na yau nsatu samu beto bikana ya kukuikama na Nzambi. Yandi kena kupesa beto diaka formasion samu beto kokisa mbotembote kisalu na beto. Diaka, yandi kena kusadisa beto samu beto vuata ‘kimuntu ya yimpa,’ samu beto ndimama na meso ya Yehova.​—Efe. 4:24.

14. Yinki mambote nge mebaka na kuvuandaka na kati ya nkubukulu ya Yehova na ntangu ya maladi yayi ya COVID-19?

¹⁴ Yesu kepesaka lutuadusu ya nduenga na ntangu ya mpasi. Mambote ya lutuadusu yango monanaka puelele ntangu COVID-19 bandaka. Na ntangu bantu mingi na yinza vuandaka  zaba ve diambu bafueti sala, Yesu salaka nionso samu beto baka lutuadusu ya puelele samu na kukitanina. Bakindisaka beto beto vuataka bamaske ntangu beto kele na kisika ya bantu mingi mpe beto tanina badistanse yina lombamaka. Balombaka na bankulutu basololaka ntangu nionso na bampangi nionso ya kimvuka mpe bazaba bansatu na bau ya kinsuni mpe ya kimpeve. (Yez. 32:1, 2) Beto bakaka balutuadusu mpe balukindusu yankaka na nzila ya balapolo ya Kimvuka ya Ntuadisi.

15. Yinki lutuadusu beto bakaka samu na mutindu ya kusala balukutakanu mpe kusala kisalu ya kusamuna na ntangu yayi ya COVID-19, mpe yinki mambote yamebimisa?

¹⁵ Na ntangu ya maladi yayi ya COVID-19, beto bakaka diaka balutuadusu ya puelele samu na mutindu ya kusala balukutakanu ya kimvuka mpe kusala kisalu ya kusamuna. Na nsualu nionso, beto bandaka kusangana na balukutakanu ya Buklisto, na balukutakanu ya nene na nzila ya vidéoconférence. Beto bandaka diaka kusamuna na nzila ya baletre mpe telefone. Yehova sakumunaka bangolo na beto. Bafiliale mingi tindaka balapolo ya ntalu mosi ya zulu ya bansamuni. Ya kedika, bantu mingi kutanaka na mambu ya kukindisa na ntangu yayi.​—Tala ankadre “ Yehova kena kusakumuna kisalu na beto ya kusamuna.”

16. Na yinki beto lenda kukindimisa?

¹⁶ Mbala yankaka bantu yankaka kukimonaka lokola nkubukulu kena kulutisa ndilu na diambu metadila kukenga na ntangu yayi ya COVID-19. Kasi mbala na mbala yakumaka kumonana puelele ti lutuadusu beto vuandaka baka vuandaka mpenza ya nduenga. (Mat. 11:19) Mpe ntangu beto kena kuyindula na mpinda na mutindu ya nzola yina Yesu kena kutuadisila bantu na yandi, beto kekukindimisaka ti yavuanda yinki diambu kekumina beto na bilumbu kena kuiza, Yehova mpe Muana na yandi ya nzola kevuanda kintuadi na beto.​—Tanga Baebreo 13:5, 6.

17. Yinki mutindu nge kekukimonaka na diambu metadila kusala na yinsi ya lutuadusu ya Yesu?

¹⁷ Beto kele mpenza na kiese mutindu Yesu kele ntuadisi na beto! Beto kele bantu ya nkubukulu mosi yina kele ve ya kukabuka na banzingulu, na makanda, mpe na bandinga. Beto kebakaka malako mingi yina kekatukaka na Mpova ya Nzambi, mpe beto kena kubaka formasion nionso yina beto kele na yau nsatu samu beto sala kisalu ya kusamuna. Konso muntu kati na beto kena kubaka lusadusu samu na kuvuata kimuntu ya yimpa mpe beto kena kulonguka kuzolana. Beto kele mpenza na mfunu ya kuvuanda fiere samu na ntuadisi na beto Yesu!