1-2. Sasila mutindu bansikudukusu ya Biblia lenda kuma na mfunu mingi samu na beto ntangu mambu ya luzingu na beto mesoba.

 KANA bantu zole mekuelana, mbala mingi bakesadilaka bau diskur yina mesimbama na Biblia samu na dikuela na bau. Baverse yina baketangilaka bau na diskur yango kevuandaka ve ya yimpa samu na bau. Kasi na ntangu yina, baverse yango kekumaka na mfunu samu na bau. Samu na yinki? Samu bakesadila yau na luzingu na bau ya dikuela.

² Yakele mutindu mosi kana bankuelani yina kele Baklisto mekuma bibuti. Banda bamvula, yalenda vuanda ti bakekuwaka badiskur mingi yina ketubilaka mutindu ya kuyundula bana. Kasi ntangu yayi, bansikudukusu yango kekuma na mfunu mingi samu na bau. Bakevuanda na muana na bau mosi yina bakebanda kuyundula. Yakele mpenza kiyekua mosi ya nene! Na yau, ntangu mambu mesoba na luzingu na beto, baverse yankaka kekumaka diaka mfunu mingi samu na beto. Yau kele mosi ya mfunu yina bisadi ya Yehova ketangaka Biblia, mutindu bavuandaka tubila bantinu ya Yisaele basala, kuyindula na zulu na yau ‘bilumbu nionso’ ya luzingu na bau.​—Kul. 17:19.

3. Yinki beto ketubila na disolo yayi?

³ Bibuti, beno kele na kiyekua mosi ya nene yina Muklisto lenda vuanda na yau, yakele kulonga bana na beno mambu metadila Yehova. Kasi beno fueti suka kaka ve na kulonga bau mambu metadila Yehova. Beno fueti sadisa bau bazola yandi mingi. Yinki beno lenda sala samu na kusadisa bana na beno bazola Yehova? Na disolo yayi, beto ketubila bansikudukusu yiya ya Biblia yina lenda sadisa beno bibuti. (2 Tm. 3:16) Beto kemona diaka mutindu bibuti yina kele Baklisto lenda baka mambote na kusadilaka malongi ya Biblia.

4. Yinki kele nsikudukusu mosi yina lenda sadisa bibuti bakudisa nzola ya Yehova na ntima ya bana na bau? (Yakobo 1:5)

⁴ Nsikudukusu ya ntete: Sosa lutuadusu ya Yehova. Lomba Yehova yandi pesa nge nduenga yina nge kele na yau nsatu samu na kusadisa bana na nge bakudisa nzola samu na yandi. (Tanga Yakobo 1:5.) Yandi kele muntu yina meluta mbote samu na kupesa malongi. Yakele na bamfunu mingi. Beto tadila zole. Ya ntete, Yehova mezaba mbotembote yina zola monisa kuvuanda kibuti. (Nk. 36:9) Mpe ya zole, malongi ya nduenga yina yandi kepesaka kenataka ntangu nionso mambote.​—Yez. 48:17.

5. (a) Yinki lusadusu nkubukulu ya Yehova kepesaka na bibuti? (b) Mutindu video memonisa yau, yinki dilongi nge mebaka na mutindu mpangi ya bakala mpe ya nketo Amorim yundulaka bana na bau?

⁵ Na nzila ya Mpova na yandi mpe ya nkubukulu na yandi, Yehova kepesaka madia mingi ya kimpeve yina lenda sadisa beno beno sadisa bana na beno bazola Yehova. (Mat. 24:45) Na kifuani, beno lenda mona malongi mingi ya mfunu na disolo “Lisalisi mpo na libota,” yina vuandaka bima na zulunalo Lamuká! banda bamvula mingi mpe bubu yayi yakele na site na beto. Katula yau, bavideo mingi kele na site na beto jw.org yina lenda sadisa bibuti basadila malongi ya Yehova ntangu bakena kuyundula bana na bau. *​—Bin. 2:4-6.

6. Yinki mutindu tata mosi kekukimonaka na lutuadusu yina yandi mpe nketo na yandi kebakaka na nzila ya nkubukulu ya Yehova?

⁶ Bibuti mingi monisaka butondi samu na lusadusu yina Yehova kepesaka na nzila ya nkubukulu na yandi. Tata mosi na nkumbu ya Joe metuba: “Kuyundula bana tatu na kedika kele kiyekua mosi ya pete ve. Munu mpe nketo na munu beto kesambilaka ntangu nionso Yehova samu yandi sadisa beto. Mpe beto kemonaka ntangu nionso ti disolo to video mosi kekuizaka na ntangu yina mefuana samu na kusadisa beto beto nunga. Beto ketulaka ntangu nionso ntima na lutuadusu ya Yehova.” Joe mpe nketo na yandi bakusaka ti bankubukulu ya mutindu yina kena kusadisa bana na bau samu bapusana penepene ya Yehova.

7. Samu na yinki yakele mfunu na bibuti bavuanda bifuani ya mbote samu na bana na bau? (Baroma 2:21)

⁷ Nsikudukusu ya zole: Vuanda kifuani ya  mbote. Bana ketalaka mbotembote mambu yina bibuti na bau kesalaka mpe mbala mingi bakelandaka bifuani na bau na mambu yina bakemonaka. Ya kedika, kibuti mosi ve kele ya kukoka. (Bar. 3:23) Atako plina, bibuti yina kele na nduenga kesalaka nionso yina balenda samu bavuanda bifuani ya mbote samu na bana na bau. (Tanga Baroma 2:21.) Na kutubilaka diambu metadila bana, kibuti mosi metuba: “Bakele lokola bashifon yina keminaka konso kima.” Yandi mebuela: “Baketubila beto kana bamemona ti beto mosi beto kena kusadila ve mambu yina beto kena kulonga bau.” Na yau, kana beto zola ti bana na beto zola Yehova, nzola na beto mosi samu na yandi fueti vuanda ngolo mpe yafueti monana na bisalu.

8-9. Yinki dilongi nge mebaka na kifuani ya Andrew mpe Emma?

⁸ Yakele na mitindu mingi yina bibuti lenda sadila samu na kulonga bana na bau bazola Yehova. Tala mambu yina ntuenia mosi ya bakala na nkumbu ya Andrew yina kele na bamvula 17 metuba: “Bibuti na munu ketubilaka munu ntangu nionso ti kisambu kele mpenza na mfunu. Konso nkokila, tata na munu kesalaka kisambu kintuadi na munu atako munu salaka deja kisambu na munu. Bibuti na munu kebambulaka munu ntangu nionso ti: ‘Nge lenda solola na Yehova mbala mingi yina nge zola.’ Samu na yau, kisambu kumaka kima mosi ya mfunu samu na munu, mpe bubu yayi yakele pete samu na munu kusala kisambu mpe kukimona ti Yehova kele Tata yina kezolaka munu.” Bibuti, beno zimbakana ve ti nzola na beno samu na Yehova lenda sadisa diaka bana na beno bazola yandi.

⁹ Beto tadila diaka kifuani ya Emma. Ntangu tata na yandi sundolaka dibuta, yandi bikaka mama na yandi na bamfuka mingi. Emma metuba: “Mama na munu vuandaka kutana na mikakatano mingi na yina metadila mbongo, kasi yandi vuandaka ntangu nionso kutubila mutindu Yehova ketaninaka mpe kekokisaka bansatu ya bisadi na yandi. Nzingulu na yandi vuandaka monisa ti yandi kendiminaka mambu yango. Mama na munu kesadilaka mambu yina yandi ketubilaka munu.” Yinki kele dilongi? Bibuti lenda longa bana na bau na nzila ya bifuani ata na ntangu ya mpasi.​—Bag. 6:9.

10. Yinki maluaku yina bibuti mingi ya Yisaele vuandaka na yau samu na kusolola na bana na bau? (Kulonga 6:6, 7)

¹⁰ Nsikudukusu ya tatu: Sololaka na bana na nge mbala na mbala. Yehova zabisaka Bayisaele ya ntama balonga bana na bau mambu metadila yandi mbala na mbala. (Tanga Kulonga 6:6, 7.) Bibuti yango vuandaka na maluaku mingi konso kilumbu ya kusolola na bana na bau mpe kusadisa bau bazola Yehova. Na kifuani, ntuenia ya bakala yina kele Muyisaele lenda lutisa bawola mingi samu na kusadisa tata na kukuna bilanga mpe kubuka. Mpangi na yandi ya nketo lenda lutisa ntangu mingi na kilumbu kintuadi na mama na yandi samu na kutunga bilele mpe kusala bisalu yankaka ya yinzo. Kana bibuti mpe bana kena kusala kintuadi, balenda tubila mambu mingi ya mfunu. Na kifuani, balenda tubila bikadulu ya mbote ya Yehova mpe mutindu yandi kesadisaka dibuta.

11. Bubu yayi, yinki ntangu bibuti fueti solola na bana na bau?

¹¹ Bubu yayi, luzingu kele ya kusuasana na yina ya ntama. Na babuala mingi, bibuti mpe bana lenda lutisa ve ntangu kintuadi na kilumbu. Bibuti lenda vuanda na kisalu, mpe bana lenda vuanda na kalasi. Na yau, bibuti fueti sosa maluaku samu na kusolola na bana na bau. (Efe. 5:15, 16; Fil. 1:10) Nsambudulu ya dibuta kevuandaka mosi ya maluaku yango. Mpangi mosi ya ntuenia ya bakala na nkumbu ya Alexander metuba: “Tata na munu kebakaka ntangu nionso bankubukulu samu na nsambudulu ya dibuta, mpe yandi kebikaka ata  kima mosi ve pekisa beto beto lutisa ntangu yango ya kitoko kintuadi. Na manima ya ndongokolo, beto kesololaka mambu ya mfunu.”

12. Yinki mambu mfumu ya dibuta fueti vuanda na yau na makanisi ntangu bakena kusala nsambudulu na kati ya dibuta?

¹² Kana nge kele mfumu ya dibuta, yinki nge lenda sala samu bana na nge basepela na nsambudulu ya dibuta? Samu na yinki ve kulonguka kintuadi na bana na nge na nzila ya mukanda na beto ya yimpa Zinga mvula na mvula na kiese! Ndongokolo yango kepesa diluaku mosi ya mbote samu na kusolola masolo ya mbote. Kana nge zola bana na nge tubila nge mambu yina kena kutungisa bau, kusadila ve ntangu ya nsambudulu ya dibuta samu na kupesa bau malongi to kutemina bau. Mpe kusosa ve kufuema kana bana na nge kena kupesa mabanza yina kele ve na nguizani na bansikudukusu ya Biblia. Kasi, sepela na mutindu bakena kutuba na puelele nionso banguilu na bau, mpe kindisaka bau batubilaka banguilu na bau kondua mukakatano. Nge lenda sadisa bana na nge na mutindu ya mbote kaka kana nge mezaba mambu yina kena kutungisa bau.

13. Yinki maluaku yankaka yina bibuti kele na yau samu na kusadisa bana na bau bapusana penepene ya Yehova?

¹³ Bibuti, beno sosa maluaku na kilumbu samu na kusadisa bana na beno bapusana penepene na Yehova. Beno kele ve na nsatu ya kuvingila kaka na ntangu ya ndongokolo ya Biblia samu na kulonga bau mambu metadila Nzambi na beto ya nzola. Tala diambu yina mama mosi na nkumbu ya Lisa metuba: “Beto kesadilaka konso kima yina kevuandaka nzinganzinga na beto samu na kulonga bana na beto mambu metadila Yehova. Na kifuani, ntangu yimbua na beto vuandaka sala diambu yina vuandaka tinda bana na beto baseka, beto vuandaka zabisa bau ti yakena kumonisa ti Yehova Nzambi na beto kele Nzambi ya kiese, mpe yandi kesalaka nionso samu beto vuanda na kiese mpe beto sepela na bima yina kesekisaka.”

14. Samu na yinki yakele na mfunu samu na bibuti basadisa bana na bau bapona bankundi na nduenga? (Bingana 13:20)

¹⁴ Nsikudukusu ya yiya: Sadisa bana na beno bapona bankundi ya mbote. Mpova ya Nzambi kena kumonisa puelele ti bankundi na beto kevuandaka na bupusi na zulu na beto​—yavuanda kana bakele bankundi ya mbote  to ya yimbi. (Tanga Bingana 13:20.) Bibuti, beno mezaba bankundi ya bana na beno? Beno mekutanaka na bau mpe beno melutisaka ntangu kintuadi na bau? Yinki beno lenda sala samu na kusadisa bana na beno bavuanda na bankundi yina kezolaka Yehova? (1 Bk. 15:33) Beno lenda sadisa bana na beno bapona bankundi ya mbote na kubokidisaka ndambu ya bampangi yina kele na nguizani ya mbote na Yehova samu na kupesa beno maboko na bisalu na beno ya dibuta.​—Nk. 119:63.

15. Yinki bibuti lenda sala samu na kusadisa bana na bau babaka bankundi ya mbote?

¹⁵ Beto tadila kifuani ya tata mosi na nkumbu ya Tony. Yandi kena kusasila yina yandi mpe nketo na yandi basalaka samu na kusadisa bana na bau bapona bankundi ya mbote, yandi metuba: “Banda bamvula mingi, munu mpe nketo na munu beto kebokidisaka na yinzo na beto bampangi ya babakala mpe ya banketo yina kele na bamvula mpe babuala ya kusuasana. Bakekudiaka kintuadi na beto mpe bakesanganaka na beto na nsambudulu ya dibuta. Yakele mutindu mosi ya mbote samu na kuzaba bantu yina kezolaka mpe kesadilaka Yehova na kiese. Beto bakaka balusakumunu na mutindu beto vuandaka yamba na yinzo na beto bankengi ya kizungidila, bamisionere, mpe bantu yankaka. Mambu yina bamezaba, vema, mpe kikadulu na bau ya kukipesa vuandaka na bupusi ya nene na bana na beto mpe yasadisaka bau bapusana penepene ya Yehova.” Bibuti, beno baka nzengolo ya kusadisa bana na beno babaka bankundi ya mbote.

16. Yinki nge kesala kana muana mosi metuba ti yandi zola ve kusadila Yehova?

¹⁶ Yinki nge kesala kana mosi ya bana na nge metuba ti yandi kesadila ve Yehova atako bangolo yina nge salaka? Kutuba ve ti nge nunga ve na kiyekua na nge lokola kibuti. Yehova pesaka beto nionso​—yavuanda muana na nge—​kimpuanza ya kupona, dikoki ya kupona kana beto kesadila Nzambi to ve. Kana muana na nge mebaka nzengolo ya kubika Yehova, vuanda na kivuvu ti kilumbu kele yandi kevutuka. Kanisa na kifuani ya muana ya mutomboki. (Luka 15:11-19, 22-24) Ntuenia yango ya bakala salaka mambu mingi ya yimbi, kasi nsukansuka,  yandi vutukaka. Bantu yankaka lenda tuba, “Yavuandaka kaka kifuani.” “Yalenda salama na luzingu ya kedika?” Ee, yalenda salama! Kutu, yau kuminaka ntuenia mosi ya bakala na nkumbu ya Elie.

17. Yinki mutindu disolo ya Elie kena kukindisa nge?

¹⁷ Na kutubilaka diambu metadila bibuti na yandi, Elie metuba: “Basalaka nionso yina balenda samu na kusadisa munu munu zola Yehova mpe Mpova na yandi, Biblia. Kasi ntangu munu kumaka ntuenia, munu kumaka mutomboki.” Elie bandaka kuvuanda na nzingulu zole, mpe yandi lozaka bangolo yina bibuti na yandi salaka samu na kusadisa yandi na kimpeve. Na manima ya kubika yinzo, yandi kumaka na bikadulu ya yimbi. Atako plina, na bantangu yankaka yandi vuandaka solola mambu metadila Biblia na mosi ya bankundi na yandi. Elie metuba: “Ntangu muvuandaka tubila mambu metadila Yehova na nkundi na munu, mutindu yina nde muvuandaka baka ntangu ya kukanisa na mambu metadila Yehova. Kasi malembemalembe mpe na kukindimisa nionso, bambutu ya kedika ya Biblia yina vuandaka na ntima na munu​—bambutu yina bibuti na munu vuandaka sadila kisalu ya ngolo samu na kukuna—​bandaka kukula.” Na manima ya mua ntangu, Elie vutukilaka kedika. * Kanisa na kiese yina bibuti na yandi vuandaka na yau samu na mutindu basalaka ngolo samu na kulonga yandi yandi zola Yehova ntangu yandi vuandaka ntete muana fioti!​—2 Tm. 3:14, 15.

18. Yinki mutindu nge kena kukimona na diambu metadila bibuti yina kesalaka kisalu ya ngolo samu na kulonga bana na bau bazola Yehova?

¹⁸ Bibuti, Yehova pesaka beno diluaku mosi ya kitoko, yakele, kuyundula mbandu ya yimpa ya bisadi ya Yehova. (Nk. 78:4-6) Yakele kiyekua mosi yina kele pete ve, mpe beto mepesa beno bafelisitasion samu na bangolo yina beno kena kusala samu na kusadisa bana na beno! Kana beno kena kutatamana kusala yina beno lenda samu na kusadisa bana na beno bazola Yehova mpe kulonga bau bazitisa yandi, beno lenda ndimisama ti Tata na beto ya nzola ya dizulu kevuanda na kiese.​—Efe. 6:4.