1. Yinki nzengolo ya mfunu bantu fueti baka?

 BUBU yayi bantu fueti baka nzengolo mosi ya mfunu. Bakepesa maboko na luyalu ya kukuikama ya luyalanganu ya mvimba ya Yehova Nzambi, to bakepesa maboko na mbeni na yandi, Satana Diabulu? Konso muntu fueti pona yinki ndambu yandi kevuanda, muntu mosi ve fueti vuanda na katikati. Konso nzengolo bakebaka yakevuanda na bupusi na luzingu na bau samu na bilumbu kena kuiza. (Mat. 25:31-33, 46) Na ntangu ya ‘mpasi ya nene,’ bakebaka kidimbu samu na kuvuka to samu na kufua.​—Kus. 7:14; 14:9-11; Eze. 9:4, 6.

2. (a) Yinki Baebreo 10:35-39 kena kukindisa beto beto sala? (b) Yinki mutindu mukanda ya Kusonga lenda sadisa beto?

² Tanga Baebreo 10:35-39. Kana nge ponaka kupesa maboko na luyalu ya Yehova, nge bakaka nzengolo ya nduenga. Bubu yayi, nge kele na nsatu ya ngolo ya kusadisa bantu yankaka babaka nzengolo ya mbote. Na yau, nge lenda sadila mambu yina kele na mukanda ya Kusonga samu na kusadisa bau. Mukanda yango yina kebendaka dikebi kena kumonisa mambu yina kekumina bantu yina keteleminaka Yehova, kasi yakena kutubila diaka balusakumunu samu na bantu yina kena kupesa maboko na luyalu na yandi na kukuikama nionso. Beto fueti longuka bakedika yango ya mfunu. Na kusalaka plina beto kekangama kaka na nzengolo na beto ya kutatamana kusadila Yehova. Katula yau, beto lenda sadila mambu yina beto longukaka samu na kusadisa bantu yankaka, babaka nzengolo ya mbote mpe bakangama na yau.

3. Yinki beto ketadila na disolo yayi?

³ Na disolo yayi, beto ketadila biuvu yayi: Yinki kekumina bantu yina kena kupesa luyalu ya Nzambi maboko? Na  ndambu yankaka, yinki kekumina bayina kepesaka maboko na kibulu ya nganzi ya mbuaki, yina bametubila na mukanda ya Kusonga?

4. Yinki grupe ya bantu yina ntumua Yoane kena kumona yina kele kintuadi na Yesu na dizulu?

⁴ Na mbona meso mosi, ntumua Yoane kena kumona bagrupe zole ya bantu yina kena kupesa maboko na luyalu ya Yehova mpe bakena kubaka balusakumunu ya luzingu ya mvula na mvula. Grupe ya ntete kele na bantu 144 000. (Kus. 7:4) Bamekatuka na ntoto mpe bamekuenda na dizulu samu na kusala guvernema, to Kimfumu kintuadi na Yesu. Kintuadi na yandi, bakena kuyadila ntoto. (Kus. 5:9, 10; 14:3, 4) Na mbona meso yango, Yoane kena kumona bau bametelema kintuadi na Yesu na dizulu, na mongo ya Siona.​—Kus. 14:1.

5. Ntama mingi ve, yinki kekumina bantu 144 000 yina kele ntete awa na ntoto?

⁵ Kubanda na siekle ya ntete, mafunda ya bantu ponamaka samu na kukota na kati ya grupe ya bantu 144 000. (Luka 12:32; Bar. 8:17) Kasi batubilaka Yoane ti, kaka ntalu ya fioti ya bantu kati na bantu 144 000 kevuanda na luzingu awa na ntoto na bilumbu ya nsuka. Bantu ‘yina kebikana’ kebaka ‘kidimbu’ ya kundimama na Yehova na bilumbu ya nsuka tekila mpasi ya nene banda. (Kus. 7:2, 3; 12:17) Na manima, na ntangu ya mpasi ya nene, bantu yina kebikana kekuenda na dizulu samu na kukuenda sangana kintuadi na bantu 144 000 yina bikanaka ya kukuikama tii na lufua. Bakeyala kintuadi na Yesu na Kimfumu ya Nzambi.​—Mat. 24:31; Kus. 5:9, 10.

6-7. (a) Yinki kele grupe yankaka ya bantu yina Yoane monaka, mpe yinki dilongi beto mebaka samu na bau? (b) Samu na yinki bantu 144 000 yina kele ntete awa na ntoto mpe ‘kimvuka ya nene’ fueti tula dikebi na mambu yina kele na mukanda ya Kusonga kikapu 7?

⁶ Na manima ya kumona bantu yina kekuenda na dizulu, Yoane memona ‘kimvuka ya nene.’ Na lusuasanu na bantu 144 000, kimvuka ya nene kele na bantu yina beto lenda koka ve kutanga ntalu na bau. (Kus. 7:9, 10) Yinki dilongi beto lenda baka samu na bau? Batubilaka Yoane: ‘Bakele bantu yina mekatuka na mpasi ya nene, bamesukula bamvuela na bau mpe bamekumisa yau mpembe na menga ya muana dimeme.’ (Kus. 7:14) Na manima ya kuvuka na mpasi ya nene, ‘kimvuka ya nene’ kezinga awa na ntoto mpe bakebaka balusakumunu ya kukamua.​—Nk. 37:9-11, 27-29; Bin. 2:21, 22; Kus. 7:16, 17.

⁷ Yavuanda beto kele na kati ya grupe ya bantu yina kekuenda na dizulu to na kati ya grupe ya bantu yina kezinga awa na ntoto, beto kena kukimona beto mosi na kati ya mambu yina mukanda ya Kusonga kikapu 7 metubila? Beto fueti kukindimisa ti beto kemona kukokisama ya mambu yina kele na kati ya kikapu yango. Yakevuanda mpenza ntangu mosi ya kitoko samu na bagrupe yango zole ya bisadi ya Nzambi! Beto kevuanda na kiese mingi na mutindu beto mepona kupesa luyalu ya Yehova maboko. Yinki kele mambu yankaka mukanda ya Kusonga kena kutubila na yina metadila mpasi ya nene?​—Mat. 24:21.

8. Yinki mutindu mpasi ya nene kebanda, mpe yinki mingi ya bantu kesala?

⁸ Mutindu beto monaka yau na disolo lutaka, ntama mingi ve baguvernema ya yinza yayi kenuanisa Babiloni ya nene, ampire ya yinza ya mvimba ya mabundu ya luvunu. (Kus. 17:16, 17) Diambu yango nde kebandisa mpasi ya nene. Kasi yau kesala ti bantu mingi banda kusadila Yehova? Ve. Kutu, mukanda ya Kusonga kikapu 6 memonisa yau ti na ntangu yango ya mpasi, bantu yina kesadilaka ve Yehova kekuenda sosa lutanunu na baguvernema  mpe na bankubukulu ya mumbongo ya yinza yayi, yina mefuanana na bamongo. Lokola bantu yango kepesa ve Kimfumu ya Nzambi maboko, Yehova ketadila bau lokola bambeni.​—Luka 11:23; Kus. 6:15-17.

9. Yinki mutindu bantu kevuanda na dikoki ya kubakusa ti bisadi ya Yehova kele ya kusuasana na bantu yina kena kusadila ve Nzambi na ntangu ya mpasi ya nene, mpe yinki kekumina bisadi ya Yehova?

⁹ Ya kedika, bisadi ya kukuikama ya Yehova kevuanda ya kusuasana na ntangu yango ya mpasi. Bakevuanda grupe mosi kaka awa na ntoto yina kena kusadila Nzambi mpe yina kena kumanga kupesa maboko na ‘kibulu ya nganzi.’ (Kus. 13:14-17) Lokola bakevuandaka ya kukuikama na Yehova, bayina keteleminaka Yehova kekuma na nganzi ya ngolo samu na bau. Yau kesala ti kimvuka ya makanda nuanisa bisadi ya Nzambi ya yinza ya mvimba. Biblia kebokidilaka yau kunuanisa ya Gogi ya Magogi.​—Eze. 38:14-16.

10. Mutindu Kusonga 19:19-21 memonisa yau, yinki Yehova kesala ntangu bakenuanisa bisadi na yandi?

¹⁰ Yinki Yehova kesala ntangu bakenuanisa bisadi na yandi? Yandi metubila beto: ‘Nganzi na munu ya ngolo kepela.’ (Eze. 38:18, 21-23) Kusonga kikapu 19 kena kutubila mambu yina kesalama na manima. Yehova metinda Muana na Yandi samu na kukotila bisadi na yandi mpe kunuanisa bambeni na Yandi. ‘Makesa ya dizulu’ yina mesangisa bambasi ya kukuikama mpe bantu 144 000​—kintuadi na Yesu bakenuanisa Gogi ya Magogi. (Kus. 17:14; 19:11-15) Yinki mutindu mvita yango kemanisa? Bantu mpe bankubukulu nionso yina keteleminaka Yehova kekufua samu na mvimbamvimba!​—Tanga Kusonga 19:19-21.

11. Yinki kele nkinzi ya mfunu mingi yina mukanda ya Kusonga kena kutubila?

¹¹ Kanisa na mutindu bantu ya kukuikama awa na ntoto kekukimona ntangu bakevuka na kubebisama ya bambeni ya Nzambi samu na mvimbamvimba! Yakevuanda mpenza ntangu mosi ya kiese! Atako kiese mosi ya nene kevuanda na dizulu ntangu Babiloni ya nene kebebisama, yakele na diambu yankaka yina kebuela kiese ya nene. (Kus. 19:1-3) Yakele nkinzi mosi ya mfunu mingi yina kele na mukanda ya Kusonga​—‘Dikuela ya Muana-Dimeme.’​—Kus. 19:6-9.

12. Mutindu kusonga 21:1, 2 memonisa yau, yinki ntangu dikuela ya Muana-Dimeme kesalama?

¹² Yinki ntangu dikuela kesalama? Bantu 144 000 nionso kevuanda na dizulu tekila mvita ya Armagedoni banda. Kasi yakevuanda ve ntangu samu na dikuela ya Muana-Dimeme. (Tanga Kusonga 21:1, 2.) Dikuela ya Muana-Dimeme kesalama na manima ya mvita ya Armagedoni mpe bambeni nionso ya Nzambi kekufua.​—Nk. 45:3, 4, 13-17.

13. Yinki mambu kesalama na dikuela ya Muana-Dimeme?

¹³ Yinki mambu kesalama na dikuela ya Muana-Dimeme? Mutindu kaka dikuela kesangisaka bakala mpe nketo, dikuela yango ya kifuani kesangisa Ntinu, Yesu Klisto mpe “nketo” na yandi, bantu 144 000. Nkinzi yango ya mfunu ketula guvernema ya yimpa yina keyadila ntoto samu na bamvula 1000.​—Kus. 20:6.

14-15. Na yinki diambu Kusonga kikapu 21 mefuanikisa bantu 144 000? (Tala foto ya kuvertire.)

¹⁴ Na manima, Kusonga kikapu 21 mefuanikisa bantu 144 000 na mbanza mosi ya kitoko mingi yina bakena kubokidila ‘Yerusaleme ya Yimpa.’ (Kus. 21:2, 9) Mbanza yango mesalama na bafondasion ya mabanga 12 yina na zulu na yau bamesonika ‘bankumbu 12 ya bantumua 12 ya Muana-Dimeme.’ Samu na  yinki diambu yango bendaka dikebi ya Yoane? Samu yandi monaka nkumbu na yandi sonamaka na mosi ya mabanga yango. Yakele mpenza diluaku mosi ya nene!​—Kus. 21:10-14; Efe. 2:20.

¹⁵ Mbanza yango ya kifuani mesuasana na bambanza yankaka. Yakele na nzila mosi ya ngudi ya wolo ya kuvedila, baporte 12 ya mayaka, bibaka mpe bafondasion yango mesalama na mabanga ya valere​—mpe bamesire ya kufuana. (Kus. 21:15-21) Kasi, Yoane bakusaka ti kima mosi vuandaka kondua! Tala diambu yina Yoane metubila beto: ‘Munu monaka ve tempelo na kati na yau, samu Yehova Nzambi Nkua-Ngolo-Nionso mpe Muana-Dimeme kele tempelo na yau. Mpe mbanza vuandaka ve na mfunu ti ntangu to ngonda pesa yau ntemo, samu nkembo ya Nzambi vuandaka pesa yau ntemo, mpe Muana-Dimeme vuandaka muinda na yau.’ (Kus. 21:22, 23) Bantu yina kele na kati ya Yerusaleme ya yimpa bakevuanda kintuadi na Yehova. (Ebr. 7:27; Kus. 22:3, 4) Na yau, Yehova mpe Yesu kele tempelo ya mbanza yango.

16. Yinki mambu kesalama samu na bantu na ntangu ya Luyalu ya bamvula 1 000 ya Kimfumu ya Nzambi?

¹⁶ Yakele diambu ya kiese samu na Baklisto yina metulua mafuta na kimpeve bakanisa na diambu metadila mbanza yango. Kasi bantu yina kele na kivuvu ya kuzinga awa na ntoto kele diaka na mfunu ya kutudila yau dikebi. Na ntangu ya Luyalu ya bamvula 1 000 ya Kimfumu ya Nzambi, Yerusaleme kenata balusakumunu mingi na ntoto. Yoane kena kumona balusakumunu yango kena kukukula ‘lokola nzadi ya maza ya luzingu.’ Mpe na bandambu zole ya nzadi yango yakele na ‘bayinti ya luzingu’ yina kena kubimisa bayinti ‘samu na kubelusa.’ (Kus. 22:1, 2) Na manima, bantu nionso yina kevuanda na luzingu bakevuanda na maluaku ya kubaka mambote na bima yango ya kitoko. Bantu nionso yina kena kuzitisa Yehova kekuma bantu ya kukoka. Maladi, mpasi mpe mansanga ya kiadi kevuandaka diaka ve kuna.​—Kus. 21:3-5.

17. Mutindu Kusonga 20:11-13 memonisa yau, banani kebaka mambote na ntangu ya Luyalu ya bamvula 1 000?

¹⁷ Banani kebaka mambote na bima yango ya kitoko? Ya ntete, kimvuka ya nene ya bantu yina kevuka na mvita ya Armagedoni, kintuadi na konso muana yina kebutuka na yinza ya yimpa. Kusonga kikapu 20 mepesa diaka nsilulu ti bantu ya kufua kefutumuka. (Tanga Kusonga 20:11-13.) Bantu ya ‘lunungu’ ya  kukuikama yina kufuaka na ntama kintuadi na bantu ya ‘kukondua lunungu’​—yina bakaka ve diluaku ya kulonguka mambu yina metadila Yehova—​kefutumuka awa na ntoto. (Bis 24:15; Yoa. 5:28, 29) Yazola monisa ti muntu nionso kefutumuka awa na ntoto na ntangu ya Luyalu ya bamvula 1000? Ve. Bantu yina lozaka na nganzi nionso diluaku ya kusadila Yehova tekila bakufua, bakefutumuka ve. Bavuandaka na diluaku mpe bamonisaka ti bakele ve bantu yina mebonga samu na kuzinga na paradiso awa na ntoto.​—Mat. 25:46; 2 Te. 1:9; Kus. 17:8; 20:15.

18. Yinki mambu kesalama na ntoto na nsuka ya bamvula 1 000?

¹⁸ Na nsuka ya bamvula 1 000, bantu nionso yina kezinga awa na ntoto kekuma bantu ya kukoka. Muntu mosi diaka ve kevuanda na luzingu yina kele na bupusi ya disumu ya Adamu. (Bar. 5:12) Mambu nionso ya yimbi ya disumu ya Adamu kekatuka mbotembote. Mutindu yina nde, bantu yina kevuanda awa na ntoto ‘kevutuka na luzingu’ lokola bantu ya kukoka na nsuka ya bamvula 1 000.​—Kus. 20:5.

19. Samu na yinki kumekama ya nsuka fueti vuanda?

¹⁹ Beto mezaba ti Yesu teleminaka bangolo yina Satana vuandaka sala samu Yesu bika kumonisa kukuikama na yandi na Nzambi. Yandi bikanaka ya kukuikama na Nzambi ata na ntangu ya kumekama. Kasi, bantu nionso ya kukoka kevuanda pene ya kusala mutindu yina ntangu Satana kebaka diluaku ya kutula bau na kumekama? Konso muntu kevuanda na dikoki ya kupesa mvutu na kiuvu yango samu na yandi mosi ntangu Satana kebima na buloko na nsuka ya bamvula 1 000. (Kus. 20:7) Bantu yina kemonisa kukuikama na ntangu ya kumekama ya nsuka bakebaka luzingu ya mvula na mvula mpe nsukansuka bakebaka kimpuanza ya kedika. (Bar. 8:21) Batomboki kekufua samu na mvimbamvimba kintuadi na Diabulu mpe bademo na yandi.​—Kus. 20:8-10.

20. Yinki mutindu nge kena kukimona na yina metadila bambikudulu ya kitoko yina kele na mukanda ya Kusonga?

²⁰ Yinki mutindu nge kena kukimona na manima ya kutadila ndambu ya mambu yina kele na kati ya mukanda ya Kusonga? Yakele ve diambu ya kiese ya kukimona na kati ya bambikudulu yango? Yakena kutinda nge ve nge bokidisa bantu yankaka bakuiza sangana na beto na kati ya nsambudulu ya kuvedila ya Nzambi na beto? (Kus. 22:17) Lokola beto mekatuka kutubila mambu yina kesalama na bilumbu kena kuiza, beto kele na kiese mpe na nsatu ya kutuba mutindu ntumua Yoane tubaka: ‘Amen! Mfumu Yesu, kuiza.’​—Kus. 22:20.