Nzambi kena kubokila bantu ya makanda nionso bapusana penepene na yandi na nzila ya kisambu. (Nkunga 65:2) Atako mutindu yina, yandi kekuwaka mpe kendimaka bisambu nionso ve. Na kifuani, yandi kemangaka kuwa bisambu ya bakala yina kena monisa nketo na yandi mpasi. (1 Piere 3:7) Katula yau, ntangu Baisraele tatamanaka kusala mambu ya yimbi, Nzambi mangaka kuwa bisambu na bau. Yau memonisa mbotembote ti kisambulu kele diluaku ya mbote Nzambi mepesa beto. Kasi, yandi lenda kuwa ata bisambu ya bantu yina mesala masumu ya nene kana bau mevilula ntima.​—Tanga Yezaya 1:15; 55:7.

Tala video Nzambi kekuwaka bisambu nionso?

Kisambu kele mosi ya mambu metala nsambudulu ya beto; yau yina beto fueti sambila kaka Yehova, Mvangi na beto. (Matayo 4:10; 6:9) Katula yau, lokola beto kele bantu ya kokondua kulunga, beto fueti sambila na nkumbu ya Yesu samu yandi kufuaka samu na masumu na beto. (Yoane 14:6) Yehova zola ve beto vutukilaka kaka bisambu yina beto mekangaka na yintu to yina bamesonikaka na papye. Yandi kezolaka bisambu na beto katuka na ntima.​—Tanga Matayo 6:7; Bafilipi 4:6, 7.

Mvangi ya beto lenda kuwa bisambu yina mesalama ata na yinsi ya ntima. (1 Samuele 1:12, 13) Yandi kelombaka beto sambila yandi ntangu nionso, na kifuani ntangu beto melamuka, na suka, na mpipa, kana beto zola leka, na ntangu tozola kudia, mpe ntangu beto mekutana na diambu ya mpasi.​—Tanga Nkunga 55:22; Matayo 15:36.

Kupusana penepene na Nzambi kele pete ve samu beto mevuanda na bantu yina kendimaka Nzambi ve mpe kevuezaka nsilulu yina yandi mepesa ya kutula kiyenge na ntoto.  (2 Timoteo 3:1, 4; 2 Piere 3:3, 13) Yau yina beto fueti kutakanaka kintuadi na bampangi ya beto samu beto kindasana.​—Tanga Baebreo 10:24, 25.

Kukutakana na bantu yina kezolaka Nzambi kesadisa beto beto pusana penepene na Nzambi. Balukutakanu ya Bambangi ya Yehova kevuandaka ntangu ya mbote ya kukindusua na kiminu ya bankaka.​—Tanga Baroma 1:11, 12.

Nge lenda pusana penepene na Yehova kana nge kena kuyindula mambu yina nge kena kulonguka na Mpova na yandi. Yindula bisalu na yandi, malongi mpe bansilulu na yandi. Kusambila mpe kuyindula na mpinda lenda sadisa beto tovutula matondo samu na nzola mpe nduenga ya Nzambi.​—Tanga Yozue 1:8; Nkunga 1:1-3.

Nge lenda pusana penepene na Nzambi kaka kana nge metudila yandi ntima mpe nge mendimina yandi. Kiminu kele lokola kima nionso yina kelombaka badikisa yau. Nge lenda kudisa kiminu na nge na kufiongoninaka ntangu nionso malongi yina nge kendiminaka.​—Tanga Matayo 4:4; Baebreo 11:1, 6.

Yehova ketaninaka bantu yina kezolaka yandi. Yandi ketaninaka bau na mambu nionso yina lenda bebisa kiminu na bau mpe kivuvu na bau ya luzingu ya mvula na mvula. (Nkunga 91:1, 2, 7-10) Yandi kekebisaka beto na bikadulu yina lenda bebisa nzutu ya beto mpe kumanisa kiese na beto. Yehova kelongaka beto bikadulu yina kesadisaka beto tovuanda na luzingu ya mbote mpenza.​—Tanga Nkunga 73:27, 28; Yakobo 4:4, 8.