Na ntangu ya baklisto ya ntete, mua kimvuka, ‘bantumua na bambuta na Yerusaleme,’ bavuandaka kimvuka ya ntuadisi samu na kubaka banzengolo ya mfunu samu na kimvuka nionso ya baklisto yina metulama mafuta. (Bisalu 15:2) Samu na kubaka nzengolo yina bau nionso kendima, bavuandaka tadila yina Masonukua metuba mpe kubika mpeve ya Nzambi tuadisa bau. (Bisalu 15:25) Bubu yayi diaka, yau kesalamaka mutindu yina.

Nzambi kena kusadila yau samu na kukokisa luzolo na yandi. Bampangi ya babakala yina metulua mafuta na kimpeve bayina kesalaka na Kimvuka ya Ntuadisi kezolaka mpenza Mpova ya Nzambi mpe bamemesanaka kubaka banzengolo na mambu metala nsambudulu mpe kisalu na beto. Bau kesalaka lukutakanu sabala na sabala samu na kutadila nsatu ya bampangi ya yinza mvimva. Mutindu kaka yavuandaka na ntangu ya baklisto ya ntete, bimvuka kebakaka malongi yina mekatuka na Bibila na nzila ya mikanda to ya bankengidi batambudi to na nzila ya bampangi yankaka. Yau kesalaka ti dibuta ya Nzambi vuanda na bumosi. (Bisalu 16:4, 5) Kimvuka ya Ntuadisi ketuadisaka kisalu ya kukubika madia ya kimpeve, kekindisaka beto nionso, mpe ketuadisaka mambu yina metala kuponama ya bampangi ya babakala yina lenda baka biyekua.

Yau kelandaka lutuadusu ya mpeve ya Nzambi. Kimvuka ya Ntuadisi ketadilaka Yehova, Mfumu Yina Meluta Nionso na luyalanganu ya mvimba, mpe Yesu, Mfumu ya Kimvuka, samu na kubaka lutuadusu. (1 Bakorinto 11:3; Baefezo 5:23) Bampangi yango bakekukimonaka ve lokola bamfumu ya bisadi ya Nzambi. Kasi, kintuadi na baklisto yankaka yina metulua mafuta na kimpeve, bau kena ‘kutatamana kulanda Muana-Dimeme kisika nionso yina yandi kena kuenda.’ (Kusonga 14:4) Kimvuka ya Ntuadisi kesepelaka beto sambilaka samu na bau.

• Banani vuandaka na kimvuka ya ntuadisi na baklisto ya ntete?

• Yinki mutindu Kimvuka ya Ntuadisi kesosaka lutuadusu ya Nzambi bubu yayi?