Masonukua ya Greki ya Buklisto ketubilaka mbala na mbala Barnabasi na ntumua Paulo. Babakala yango bavuandaka bankengidi batambudi, yazola tuba bavuandaka sala bavuayaje samu na kutala bimvuka ya ntete. Samu na yinki? Samu bavuandaka kukibanza mpenza samu na mambote ya bampangi ya bau baklisto. Paulo tubaka ti yandi vuandaka na nsatu ya ‘kuvutuka samu na kwenda kutala’ bampangi samu na kumona mutindu bakele. Yandi vuandaka ndima kusala bavuayaje ya bankama ya bakilometre samu na kukuenda kindisa bampangi. (Bisalau 15:36) Bubu yayi diaka, bankengidi batambudi ya beto kesalaka mutindu yina.

Bau kekuizaka samu na kukindisa beto. Nkengidi ya kizungidila mosimosi ketalaka bimvuka kana 20 mpe yandi kelutisaka sabala mosi na kimvuka mosimosi mbala zole na mvula. Kifuani ya bau mpe ya banketo ya bau, kana bau kele ya kukuela, lenda kindisa beto mingi. Bankengidi ya kizungidila na banketo ya bau bakesalaka ngolo bazaba bampangi nionso, yavuanda bantuenia to bambuta, mpe bau kesepelaka kubima kintuadi na beto na kisalu ya kusamuna mpe ya kulonguka Biblia na bantu. Bankengidi yango, kintuadi na bankulutu, bakekuendaka tala bampangi samu na kukindisa bau. Bakesalaka diaka badiskur ya kukindisa na balukutakanu ya bimvuka mpe na balukutakanu ya nene.​—Bisalu 15:35.

Bau ketudilaka muntu nionso dikebi. Bankengedi ya kizungidila bakesosaka mpenza kuzaba kana kimvuka mosimosi kele na nguizani ya mbote na Nzambi. Bau kekutakanaka na bankulutu mpe bisadi na kisalu samu na kutala mutindu kimvuka kena kudiatila, mpe kupesa bau malongi yina mefuana samu bakokisa biyekua na bau mbote. Bau kesadisaka bampasudi-nzila samu basala kisalu ya bau ya kusamuna mbote, mpe bau kesepelaka kuzabana na bantu ya yimpa mpe kuwa mutindu kiminu ya bau kena kukudila. Nkengidi mosimosi kekukipesaka mpenza samu yandi vuanda muntu yina kesala kintuadi na beto ‘samu na mambote ya beto.’ (2 Bakorinto 8:23) Beto fueti landa kiminu ya bau mpe luvema ya bau na kisalu ya Nzambi.​—Baebreo 13:7.

• Samu na yinki bankengidi ya kizungidila kekuendaka tala bimvuka?

• Yinki mutindu nguizulu ya bau na kimvuka lenda sadisa nge?