Na beno nionso yina kezolaka Yehova Nzambi mpe Mpova na yandi, Biblia:

Yesu tubaka: ‘Beno kezaba kedika, mpe kedika kekatula beno na kinanga.’ (Yoane 8:32) Yindula mutindu nge kukimonaka ntangu nge zabaka kedika ya Biblia samu na mbala ya ntete! Yavuandaka kiese na kuzaba ti na yinza yayi mefuluka na luvunu, beto lenda zaba kedika.—2 Timoteo 3:1.

Yehova Nzambi zola beto zaba kedika. Mpe lokola beto kezolaka bantu, beto kezolaka kuzabisa bau yau. Kasi kusadila Nzambi kelombaka mambu mingi. Beto fueti sala nionso yina beto lenda samu beto vuanda na luzingu yina kena kumonisa ti beto kele Baklisto samu beto kezitisa mpenza bansikudukusu ya Yehova. Yesu monisaka mutindu ya mbote ya kumonisa Nzambi ti beto kezolaka yandi. Yandi tubaka: ‘Kana beno kezitisa bansiku na munu, beno kebikana na nzola na munu, mutindu munu kezitisaka bansiku ya Tata mpe kebikana na nzola na yandi.’—Yoane 15:10.

Yesu kezolaka mpenza Tata na yandi, mpe yandi kesalaka nionso yina Tata na yandi kelombaka yandi sala. Kana beto melanda kifuani ya Yesu na luzingu na beto, Yehova kezola beto mpe beto kevuanda mpenza na kiese. Mutindu Yesu tubaka: ‘Kana beno mezaba mambu yayi, beno kevuanda na kiese kana beno kesaladila yau.’—Yoane 13:17.

Beto kele na kivuvu ti mukanda yayi kesadisa nge nge longuka kuvuanda na luzingu yina kele na nguizani na kedika ya Biblia mpe nge kuma nkundi ya Nzambi. Beto kena kusambila Nzambi sadisa nge nge zola yandi diaka mingi mpe nge bikana na ‘nzola ya Nzambi yina kenata na luzingu ya mvula na mvula.’—Yude 21.