KIKAPU YA 1
Nzola ya Nzambi Kezingilaka Mvimba-mvimba
‘Nzola ya Nzambi memonisa nde beto zitisa bansiku na yandi; kutu bansiku na yandi kele kilo ve.’—1 YOANE 5:3.
1, 2. Samu na yinki nge kezolaka Yehova Nzambi?
NGE KEZOLAKA Nzambi? Yamemonana ti nge kezolaka yandi mingi samu nge mekukipesaka na yandi. Nge lenda mona ti yandi kele nkundi na nge ya ntima. Kasi tekila nge zola Yehova, yandi nde zolaka nge ya ntete. Biblia ketubaka: ‘Beto ke zolaka, samu yandi zolaka beto ntete.’?—1 Yoane 4:19.
2 Yindula ntete mambu nionso yina Yehova mesalaka samu na kumonisina beto nzola. Yandi pesaka beto ntoto, kisika mosi ya kitoko ya kuvuanda mpe bima nionso yina beto kele na yau nsatu samu beto sepela na luzingu. (Matayo 5:43-48; Kusonga 4:11) Yandi zola beto vuanda na nguizani ya mbote na yandi, mpe yandi mebakaka bankubukulu samu beto zaba mambu na yandi. Beto kekuwaka Yehova ntangu beto ketangaka Biblia. Mpe yandi kekuwaka beto ntangu beto kesambilaka yandi. (Nkunga 65:2) Yandi ketuadisaka beto mpe yandi kekindisaka beto na nzila ya mpeve ya nlongo na yandi. (Luka 11:13) Yandi tindaka diaka Muana na yandi yina yandi kezolaka mingi awa na ntoto samu na kukula beto na masumu mpe lufua.—Tanga Yoane 3:16; Baroma 5:8.
3. Yinki mutindu beto lenda tanina kinkundi ya mbote na Yehova?
3 Yindula ntete mosi ya bankundi na nge ya ntima, yina kebikaka nge ve na ntangu ya kiese mpe ya kiadi. Yakelombaka kusala ngolo samu na kutanina kikundi ya ngolo ya mutindu yina. Yakele mpe kaka mutindu mosi samu na kinkundi na beto na Yehova, nkundi yina meluta bankundi nionso. Kinkundi na beto na yandi lenda zingila mvimba-mvimba. Yau yina Biblia metubila beto: ‘Beno bikana na nzola Nzambi.’? (Yude 21) Yinki mutindu beto lenda sala yau? Biblia mepesa mvutu: ‘Nzola ya Nzambi memonisa nde beto zitisa bansiku na yandi; kutu bansiku na yandi kele kilo ve.’—1 Yoane 5:3.
‘NZOLA YA NZAMBI MEMONISA’
4, 5. (a) ‘Nzola ya Nzambi’ zola monisa yinki? (b) Yinki mutindu nzola na nge samu na Yehova bandaka kukula?
4 Yinki Biblia zola monisa ntangu yaketubaka ‘nzola ya Nzambi’? Yaketubilaka ve nzola ya Nzambi samu na beto kasi nzola ya beto samu na Nzambi. Nge kena kuzaba diaka mbala ya ntete yina nge bandaka kuzola Yehova?
5 Yindula diaka mutindu nge kukimonaka ntangu nge longukaka samu na mbala ya ntete ti Yehova zola nge zinga mvimba-mvimba na yinza na yandi ya yimpa. Nge longukaka mambu nionso yina yandi salaka samu na kukokisa yau, mpe nge kuizaka zaba dikabu ya mfunu yina Yehova pesaka beto ntangu yandi tindaka Muana na yandi kaka mosi awa na ntoto. (Matayo 20:28; Yoane 8:29; Baroma 5:12, 18) Lokola nge longukaka ti Yehova kezolaka nge mingi, yasimbaka ntima na nge, mpe yau nde tindaka nge diaka nge banda kuzola yandi.—Tanga 1 Yoane 4:9, 10.
6. Kuzola muntu mosi kelombaka yinki? Nzola na nge samu na Nzambi tindaka nge, nge sala yinki?
6 Kasi nsatu yina ya kuzola Nzambi vuandaka kaka ebandeli. Na kifuani, ntangu beto mezola muntu mosi, beto kesukaka kaka ve na kutuba ti “Munu kezolaka nge.” Nzola ketindaka beto, beto sala mambu yina kesepedisa muntu yango. Mutindu mosi mpe, nzola na nge samu na Yehova tindaka nge, nge sosa kuvuanda na luzingu yina kesepedisa yandi. Ntangu nzola yango kumaka ngolo, nge kukipesaka na yandi na nzila ya kisambu mpe nge bakaka mbotama. Na mutindu yina, nge pesaka Yehova nsilulu ti nge kesadila yandi mvimba-mvimba. (Tanga Baroma 14:7, 8.) Yinki mutindu nge lenda kokisa nsilulu na nge?
“BETO ZITISA BANSIKU NA YANDI”
7. Kana beto kezolaka Yehova, yinki beto kesala? Tanga ndambu ya bansiku na yandi.
7 Lokola beto kezolaka Yehova, ‘beto kezitisaka bansiku na yandi.’ Yinki mutindu beto kesalaka yau? Beto kesalaka mambu yina yandi kelombaka. Na Biblia beto kelongukaka mutindu ya kuvuanda na luzingu yina kesepedisaka Yehova. Na kifuani, yandi mezabisa beto ti yakele yimbi kukolua malavu, kuyiba to kuvuna, kusangisa nzutu na muntu yina kele ve nkuelani na beto, mpe kusambila muntu to kima mosi na kisika na yandi.—1 Bakorinto 5:11; 6:18; 10:14; Baefezo 4:28; Bakolosai 3:9.
8, 9. Yinki kesadisa beto, beto zaba yina Yehova zola beto sala na diambu yina ata nsiku mosi ve ya Biblia metubila beto puelele yina beto fueti sala? Pesa kifuani.
8 Kasi samu na kusepedisa Yehova, beto fueti suka kaka ve na kuzitisa bansiku na yandi. Yandi mepesaka beto ve liste ya yinda ya bansiku yina beto fueti zitisa na diambu mosi mosi ya luzingu na beto. Yau yina, mbala yankaka beto lenda kutana na diambu mosi yina ata nsiku mosi ve ya Biblia metubila beto puelele yina beto fueti sala. Yinki mutindu beto lenda baka banzengolo ya mbote? (Baefezo 5:17) Na Biblia beto kekuta bansikudukusu, yina kele malongi ya kedika mpe ya mfunu mingi yina kelongaka beto mutindu yina Yehova ketadilaka mambu. Mpe ntangu beto kena kutanga Biblia mbala na mbala, beto kezaba mbote-mbote kimuntu ya Yehova. Beto kezaba mabanza na yandi, mpe mambu yina yandi kezolaka mpe yina yandi kezolaka ve.—Tanga Nkunga 97:10; Bingana 6:16-19; tala Noti ya 1.
9 Na kifuani, Yinki beto lenda sala samu na mambu yina beto ketala na Televizio to na Internet? Yehova tubila beto ve puelele yina beto fueti sala. Kasi, bansikudukusu yina yandi mepesa beto kesadisa beto samu beto baka banzengolo ya mbote. Bubu yayi mambu mingi bakemonisaka na Televizio to na Internet mefuluka na kinkesi mpe pite. Na Biblia, Yehova metubila beto ti “yandi ke mangaka konso muntu yina ke zolaka mobulu” mpe yandi “ta sambisa bantu ya ke salaka pite.” (Nkunga 11:5; Baebreo 13:4) Yinki mutindu bansikudukusu yayi lenda sadisa beto samu beto baka banzengolo ya mbote? Ntangu kaka beto mezaba ti Yehova kemangaka diambu mosi to yandi kemonaka yau mvindu, beto fueti bika yau.
10, 11. Samu na yinki beto kezitisaka Yehova?
10 Samu na yinki beto kezitisaka Yehova? Yakele kaka ve samu na kutina kitumbu to mambu yina lenda kumina beto kana beto mebaka banzengolo ya yimbi. (Bagalatia 6:7) Beto kezitisaka Yehova nde samu beto kezolaka yandi. Yakele kaka lokola bana yina zola sepedisa tata na bau, beto mpe beto zola kusepedisa Tata na beto ya dizulu. Yakele na diambu mosi ve meluta mbote na kuzaba ti Yehova kesepelaka na beto!—Nkunga 5:12; Bingana 12:2; tala Noti ya 2.
11 Beto kezitisaka Yehova ve kaka ntangu yakele mpasi ve to kana beto kele na diambu yankaka ve ya kusala. Mpe beto keponaka ve yinki bansiku mpe bansikudukusu beto fueti zitisa to yina beto fueti zitisa ve. (Kulonga 12:32) Kasi, beto kezitisaka yandi na ntima ya mvimba, mutindu kaka soniki ya nkunga tubaka: ‘Munu ke zolaka bakomandema na nge mingi, ee, munu ke zolaka yau.’ (Nkunga 119:47; Baroma 6:17) Beto zola kuvuanda lokola Noa, yina salaka mambu nionso yina Yehova lombaka yandi samu na kumonisa ti yandi kezolaka yandi. Biblia metuba ti Noa “salaka kaka mutindu yina.” (Kuyantika 6:22) Nge zola mpe Yehova tuba mutindu yina samu na nge?
12. Yinki mutindu beto lenda pesa Yehova kiese?
12 Yinki mutindu Yehova kemonaka ntangu beto kezitisaka yandi? Beto kepesaka “ntima na yandi kiese.” (Bingana 11:20; 27:11) Yindula ntete diambu yango! Beto kepesaka Mvangi ya luyalanganu kiese ntangu beto kezitisaka yandi. Kasi yandi ketindaka beto ve na kingolo na kusala yau. Kasi, yandi pesaka beto kimpuanza ya kupona. Yazola monisa ti beto kele na kimpuanza ya kupona kusala yina kele mbote to yimbi. Yehova zola ti nzola na beto samu na yandi tinda beto, beto baka banzengolo ya mbote samu beto vuanda na luzingu ya mbote kuluta.—Kulonga 30:15, 16, 19, 20; tala Noti ya 3.
“BANSIKU NA YANDI KELE KILO VE”
13, 14. Yinki mutindu beto mezaba ti bansiku ya Nzambi kele mpasi ve na kuzitisa? Pesa kifuani.
13 Bosi kana beto mebanza ti bansiku ya Yehova kele mpasi na kuzitisa to yakesala ti beto vuanda diaka ve na kimpuanza mingi? Biblia ketubaka puelele: “Bansiku na yandi kele kilo ve.” (1 Yoane 5:3) Na Greki, mpova “kilo” zola monisa “kizitu.” Na baverse yankaka, Biblia kesadilaka mpova yayi samu na kutubila bansiku ya ngolo to bantu yina kesosaka kuyadila mpe kuniokola bantu yankaka. (Matayo 23:4; Bisalu 20:29, 30) Bible en kituba mebangula yau mutindu yayi: “Bansiku na yandi kele mpasi ve.” Bansiku ya Yehova kele “kizitu,” ve, yakele ve mpasi mingi na kuzitisa yau. Yandi kevuandaka ntangu nionso na bukatikati samu na mambu yina yandi kelombaka beto.
14 Na kifuani, yindula ntete ti nge kena kusadisa nkundi mosi yina kena kuenda kota na yinzo yankaka. Yandi mekanga bima na yandi nionso na bakarton. Bakarton yankaka kele kilo ve na kunata, kasi yankaka kele kilo mpe yakelomba bantu zole samu na kunanguna yau. Nge mebanza ti nkundi na nge kelomba nge, nge nata nge mosi karton yina kele kilo mingi? Ata fioti ve! Samu na yinki? Samu yandi kezola ve kumonisa nge mpasi. Mutindu mosi na nkundi yina, Yehova lenda lomba beto ata fioti ve beto sala diambu yina kele mpasi mingi. (Kulonga 30:11-14) Yehova kebakusaka mutindu beto kele. Yandi ‘me zaba mbote mutindu yandi mesalaka beto, yandi kezimbakanaka ve ti beto kele fundufundu.’—Nkunga 103:14.
15. Samu na yinki beto lenda ndima ti bansiku ya Yehova kele samu na mambote na beto?
15 Mose tubilaka dikanda ya Yisaele ti bansiku ya Yehova vuandaka samu na ‘mambote na bau ya kukondua nsuka’ mpe ti luzitu na bau zolaka sadisa bau na ‘kutatamana kuzinga.’ (Kulonga 5:28-33; 6:24) Yakele mutindu mosi mpe bubu yayi. Konso diambu yina Yehova kelombaka beto na kusala, yakesadisaka beto na kuzinga mbote. (Tanga Yezaya 48:17.) Tata na beto, Yehova, kezabaka ntangu nionso yina kele mbote samu na beto. (Baroma 11:33) Biblia metubila beto: “Nzambi kele zola.” (1 Yoane 4:8) Yazola monisa ti konso diambu yina Yehova ketubaka mpe yandi kesalaka, yandi kesalaka yau na nzola.
16. Yinki mutindu beto mezaba ti beto lenda zitisa Nzambi atako beto kele bantu ya kukondua kulunga mpe beto kele na yinza ya yimbi?
16 Yakevuandaka ntangu nionso pete ve samu na beto na kuzitisa Nzambi. Beto kena kuzinga na yinza ya yimbi yina meyadulua na Diabulu. Yandi kesosaka kutinda bantu na kusala yina kele yimbi. (1 Yoane 5:19) Katula yina, lokola beto kele bantu ya kukondua kulunga, beto fueti nuanisa bangindu mpe bansatu na beto yina lenda tinda beto na kumanga kuzitisa Nzambi. (Baroma 7:21-25) Kasi nzola na beto samu na Yehova kepesaka beto ngolo ya kusala yina kele mbote. Yandi kemonaka bangolo yina beto kesalaka samu na kuzitisa yandi, mpe yandi kesadisaka beto na mutindu yandi kepesaka beto mpeve ya nlongo na yandi. (1 Samuele 15:22, 23; Bisalu 5:32) Mpeve ya nlongo kesadisaka beto na kukudisa bikadulu yina kesadisaka beto samu beto mona mpasi ve na kuzitisa yandi.—Bagalatia 5:22, 23.
17, 18. (a) Yinki beto kelonguka na mukanda yayi? (b) Yinki beto kelonguka na kikapu melanda?
17 Na mukanda yayi, beto kelonguka yinki mutindu kuvuanda na luzingu yina kesepedisaka Yehova. Beto kelonguka mutindu ya kusadila bansiku na yandi mpe bansikudukusu ya bikadulu ya mbote na luzingu na beto. Kuzimbakana ve ti Yehova kelombaka beto ve na kingolo samu beto zitisa yandi. Ntangu beto keponaka kuzitisa yandi, luzingu na beto kebongaka diaka mpe beto kevuanda na luzingu ya mbote na bilumbu kena kuiza. Diambu meluta mfunu, luzitu na beto kemonisa Nzambi ti beto kezolaka yandi mingi.—Tala Noti ya 4.
18 Yehova mepesaka konso muntu kikansasa samu na kusadisa yandi, na kuzaba mambu ya mbote mpe mambu ya yimbi. Kana beto melonga kikansasa na beto, yalenda sadisa beto na ‘kuzitisa bansiku na yandi.’ Na yau, kikansasa kele yinki, mpe yinki mutindu beto lenda longa yau? Beto tadila yau na kikapu melanda.
