1, 2. Yinki beto fueti bakusa na yina metadila Satana na bademo?

LUZINGU na yinza ya yimpa ya Yehova kevuanda kitoko mingi. Nsuka nsuka, beto kevuanda na luzingu yina Nzambi kanaka samu na beto banda na ntonono. Kasi bubu yayi, beto kena kuzinga na yinza yina Satana na bademo na yandi kena kuyadila. (2 Bakorinto 4:4) Ata kana beto kemonaka bau ve, bakele mpe bakele na kilendo.

² Na kikapu yayi, beto ketubila mutindu beto lenda bikana pene-pene ya Yehova mpe mutindu ya kukitanina samu Satana bika baka beto. Yehova mepesa nsilulu ti yandi kesadisa beto. Kasi, beto fueti bakusa mayele yina Satana na bademo na yandi kesadilaka samu na kuvuna mpe kunuanisa beto.

3. Yinki diambu Diabulu zola sala beto?

³ Satana tubaka ti bantu kesambilaka Yehova samu na mambote na bau mosi mpe bakelemba kusadila yandi kana bamekutana na mambu ya mpasi. (Tanga Yobi 2:4, 5.) Ntangu muntu memonisa ti yandi zola kulonguka mambu ya Yehova, Satana mpe bademo bakemonaka, mpe bakemekaka kupekisa yandi. Bakevuandaka na nganzi ntangu muntu mekukipesa na Yehova mpe yandi mebaka mbotama. Biblia mefuanikisa Diabulu na ‘nkosi yina kena kuboka, yina kena kusosa kudia muntu.’  (1 Piere 5:8) Satana kesosaka kubebisa nguizani na beto na Yehova.—Nkunga 7:1, 2; 2 Timoteo 3:12.

4, 5. (a) Yinki Satana kekoka kusala ve? (b) ‘Kutelemina Diabulu’ zola monisa yinki?

⁴ Kasi beto fueti mona wonga ve Satana mpe bademo na yandi. Yehova tulaka ndilu na mambu yina balenda sala beto. Yehova mepesa nsilulu ti “ndonga ya nene” ya Baklisto ya kedika kevuka na “mpasi ya nene.” (Kusonga 7:9, 14) Diabulu lenda koka ata fioti ve kusala diambu yango, samu Yehova kena kutanina bisadi na Yandi.

 ⁵ Kana beto mebikana pene-pene na Yehova, Satana kenunga ve kubebisa nguizani na beto na Nzambi. Mpova ya Nzambi melaka beto: ‘Yehova kele na beno konso ntangu yina beno kele na yandi.’ (2 Bansangu 15:2; tanga 1 Bakorinto 10:13.) Babakala na banketo mingi ya kukuikama ya ntama lokola Abeli, Enoka, Noa, Sara, mpe Mose, teleminaka Diabulu samu babikanaka pene-pene ya Yehova. (Baebreo 11:4-40) Beto diaka beto lenda sala mutindu yina. Mpova ya Nzambi metubila beto: ‘Beno telemina Diabulu, ebuna yandi ketina ntama na beno.’—Yakobo 4:7.

6. Yinki mutindu Satana kena kunuanisa beto?

⁶ Atako Satana mezaba ti Yehova metudilaka yandi bandilu samu na yina yandi lenda sala beto, yandi kesala kaka nionso samu na kubebisa nguizani na beto na Yehova. Bubu yayi, Diabulu kenuanisaka beto na mitindu mingi, mpe yandi kesadilaka mayele yina yandi mesadilaka banda ntama. Beto tubila ndambu ya mayele yango.

7. Samu na yinki Satana kenuanisaka bisadi ya Yehova?

⁷ Ntumua Yoane sonikaka ti: ‘Yinza ya mvimba kele na yinsi ya luyalu ya muntu ya yimbi.’ (1 Yoane 5:19) Satana kena kuyadila yinza yayi mpe yandi kesosaka diaka kuyadila bisadi ya Yehova. (Mika 4:1; Yoane 15:19; Kusonga 12:12, 17) Diabulu mezaba ti yandi mebikana kaka na ntangu fioti, yau yina yandi kena kutula mosi mosi na beto mbamba ya ngolo samu beto bikana ve ya kukuikama na Nzambi. Na bantangu yankaka Diabulu kenuanisaka beto puelele, kasi na bantangu yankaka yandi kesadilaka mayele yina kemonanaka ve.

8. Yinki diambu konso Muklisto fueti zaba?

⁸ Mukanda ya Baefezo 6:12 metuba: ‘Beto kenuanaka na bampeve ya yimbi yina kele na bisika ya dizulu.’  Konso Muklisto kenuanaka mvita na Diabulu mpe bademo. Beto fueti zaba ti muntu nionso yina mekukipesaka na Yehova kena kunuana mvita yango. Na mukanda yina ntumua Paulo sonikinaka Baklisto ya Efezo, yandi luengisaka bau mbala tatu na “kutelema ngolo.”—Baefezo 6:11, 13, 14.

9. Yinki diambu Satana mpe bademo kesosaka kusala beto?

⁹ Satana na bademo kesosaka kuvuna beto na mitindu mingi. Kana beto nungaka ntambu mosi ya Satana, yazola monisa ve ti beto lenda kubua ve na mintambu na yandi yankaka. Diabulu kesosaka kuzaba bisika yina beto kele ya kulebakana samu yandi zaba yinki ntambu yandi kesadila samu na kukanga beto. Kasi beto fueti bika ve yandi kanga beto, samu Biblia kelongaka beto mintambu yina Diabulu kesadilaka samu na kukanga beto. (2 Bakorinto 2:11; tala Noti ya 31.) Mosi ya mintambu yango kele bisalu ya bademo.

10. (a) Yinki kele bisalu ya bademo? (b) Yinki mutindu Yehova ketadilaka yau?

¹⁰ Bisalu ya bademo mesangisa mambu yina meluta mayele ya kimuntu yina ketulaka muntu na nguizani na bademo, na kifuani kusamuna mambu yina kele ya kusuama, kuloka, to kusosa kusolola na bantu yina mekufuaka. Biblia metuba ti bisalu ya bademo kele mosi ya mambu yina ‘meyinamaka’ mpe yakele ve na nguizani na nsambudulu ya Yehova. (Kulonga 18:10-12; Kusonga 21:8) Baklisto fueti manga mitindu nionso ya bisalu ya bademo.—Baroma 12:9.

11. Kusosa kuzaba mambu yina meluta mayele ya kimuntu lenda nata beto wapi?

¹¹ Satana mezaba ti kana beto kesosaka mambu yina meluta mayele ya kimuntu, yakevuanda mpasi ve yandi  kotisa beto na bisalu ya bademo. Diambu nionso yina kele na nguizani na bisalu ya bademo kebebisaka nguizani na beto na Yehova.

12. Yinki Satana kesosaka kukotisa na mabanza ya bantu?

¹² Satana kesosaka kukotisa mvualangani na mabanza ya bantu. Yandi kekotisaka ntembe malembe malembe tii bantu kebanda banza ti ‘mbote kele yimbi mpe yimbi kele mbote.’ (Yezaya 5:20) Diabulu ketindaka bantu babanza ti Biblia kesadisaka ve mpe bakevuanda na kiese kana bamemanga kuzitisa minsiku ya Nzambi.

13. Yinki mutindu Satana kesosaka kukotisa bantembe?

¹³ Kukotisa ntembe na mabanza ya muntu kele mosi ya mayele ya Satana yina kenungaka mpenza. Yandi kesadilaka mayele yango banda ntama. Na bilanga ya Edeni, yandi mekaka kukotisa ntembe na mabanza ya Eva ntangu yandi yuvusaka yandi: ‘Keti Nzambi tubaka mpenza ti beno fueti kudia ve mbuma ya konso yinti yina kele na bilanga?’ (Kuyantika 3:1) Na manima, na ntangu ya Yobi, Satana yuvusaka Yehova na meso ya bambasi: ‘Keti Yobi kebangaka Nzambi samu na mpamba?’ (Yobi 1:9) Na manima ya mbotama ya Yesu, Satana tudilaka yandi ntembe mpe yandi tubilaka yandi: ‘Kana nge kele muana ya Nzambi, tuba na mabanga yayi yakuma mampa.’—Matayo 4:3.

14. Yinki Satana kesalaka samu bantu bika zaba ti bisalu ya bademo kele kivonza?

¹⁴ Bubu yayi diaka, Diabulu kesosaka kukotisa ntembe na bayintu ya bantu. Yandi kesosaka kutinda bantu bakukiyuvusa kana bisalu ya bademo kele mpenza yimbi na mutindu yandi kesalaka ti bisalu yango yankaka yamonana lokola yakele mbote. Kutu, ata Baklisto yankaka kena kumona diaka bivonza na yau ve. (2 Bakorinto 11:3)  Yau yina, yinki beto fueti sala samu na kukitanina? Yinki mutindu beto lenda zaba kana Satana kena kuvuna beto to ve? Beto tubila, mitindu zole yina beto lenda vunuka na yau: ndutusulu ya ntangu mpe kusosa lusadusu ya munganga.

15. Yinki mutindu muntu lenda kuma na nguizani mingi na bademo na nzila ya ndutusulu ya ntangu?

¹⁵ Bubu yayi, bafilme, bavideo, baemisio ya televizio, bansaka ya ordinatere, mpe basite ya Internet mingi kemonisaka bademo, maji, mpe mambu yina meluta mayele ya kimuntu. Bantu mingi kemonaka ti mambu yango kele kuandi bansaka ya mpamba mpe bakemonaka ve ti yakele kivonza kukotisa bademo na luzingu na bau. Muntu yankaka lenda kukikotisa na bisalu ya bademo na mambu lokola horoscope, kusadila banzila yina kele na diboko, kusadila bakarte, mpe boule de cristal. Diabulu kesalaka ti muntu bika mona kivonza mpe mambu yango kemonanaka lokola mambu ya kuyitukua yina kena benda dikebi mpe kusekisa. Muntu yankaka lenda banza ti kusala diambu yina kena kumonisa bisalu ya bademo to mambu yina meluta mayele ya bademo kele yimbi ve kana yandi mosi yandi kele mpenza ve na nguizani na bademo. Samu na yinki kubanza mutindu yina kele mpenza kivonza?—1 Bakorinto 10:12.

16. Samu na yinki beto fueti manga ndutusulu ya ntangu yina kemonisaka mambu yina meluta mayele ya kimuntu?

¹⁶ Satana mpe bademo kezabaka ve mambu yina kele na kati ya bantima na beto. Kasi balenda zaba mambu yina beto kezolaka mingi mpe mambu yina beto kebanzaka ntangu bakemonaka mambu yina beto keponaka kusala samu na beto mpe dibuta na beto, na kifuani ndutusulu  ya ntangu. Kana beto keponaka bafilme, miziki, to mikanda yina ketubilaka mambu ya bampeve ya yimbi, maji, bisalu ya bademo, kindoki, ba vampire, to mambu yankaka ya mutindu yina, Satana na bademo kezaba ti beto kesosaka kuzaba mambu na bau. Bakesosa kukotisa beto mpenza na bisalu na bau.—Tanga Bagalatia 6:7.

17. Yinki mutindu Satana lenda sadila bansatu na beto ya kusosa kuvuanda na mavimpi ya mbote?

¹⁷ Satana lenda diaka kusadila bansatu na beto ya kusosa kuvuanda na mavimpi ya mbote. Bubu yayi, bantu yankaka kebelaka bamaladi ya yimbi. Yalenda vuanda ti muntu mekaka mingi ya balusadusu mutindu na mutindu ya munganga kasi maladi manisa ve. (Marko 5:25, 26)  Muntu lenda mona ti yandi mekuma na nsuka mpe yandi lenda ndima kumeka balusadusu yankaka. Kasi beto Baklisto, beto fueti keba samu na lusadusu ya munganga yina beto kepona, yabika vuanda na bisalu ya ‘maji.’—Yezaya 1:13.

18. Yinki lusadisu ya munganga Muklisto fueti manga?

¹⁸ Na Yisaele ya ntama, bantu vuandaka sala bisalu ya ‘maji.’ Yehova tubilaka bau: ‘Ntangu beno kezangula maboko na beno, munu kefuka meso na munu samu na kumona beno ve. Ata beno kesala bisambu mingi, munu kekuwa yau ve.’ (Yezaya 1:15) Yindula ntete—Yehova mangaka kuwa ata bisambu na bau! Beto kesosa kusala ata kima mosi ve yina lenda bebisa nguizani na beto na Yehova mpe yina lenda tinda yandi manga kusadisa beto ntangu beto kele maladi. (Nkunga 41:3) Yau yina beto fueti zaba kana lusadusu ya munganga yina beto zola baka kele ve ata fioti na bisalu ya bademo to na mambu yina meluta mayele ya kimuntu. (Matayo 6:13) Kana beto memona ti lusadusu yango kele puelele ve, beto fueti manga yau!—Tala Noti ya 32.

19. Yinki mutindu Diabulu kemonisaka bantu wonga?

¹⁹ Bantu yankaka kebanzaka ti Diabulu na bademo kele ve, kasi bayankaka kendimaka ti bakele samu na mambu yina bau mosi kemonaka. Bantu mingi kebangaka bampeve ya yimbi mpe bakele bananga ya bikilakila. Bantu yankaka kebulaka masolo ya kubangisa ya mambu yina bademo kesalaka samu na kupesa bantu wonga ya bademo. Mbala mingi, bakesepelaka na masolo yango mpe bakezolaka kuzabisa yau bantu yankaka. Masolo yango kesalaka ti bantu kuma kumona Diabulu wonga.

20. Yinki mutindu beto lenda muangisa luvunu ya Satana?

²⁰ Yindula ntete diambu yayi—Satana kezolaka ti bantu  mona yandi wonga. (2 Batesalonika 2:9, 10) Yandi kele muntu ya luvunu yina mezaba mutindu ya kubebisa mabanza ya bantu yina kesepelaka na bisalu ya bademo mpe yandi ketindaka bau bandima mambu yina kele ya luvunu. Bantu yango kebulaka masolo ya mambu yina bakebanzaka ti bamonaka mpe bakuwaka. Ntangu bakena kubula masolo yango mingi, masolo yango mpe kena kuzabana mingi. Beto fueti manga kutuba masolo yango samu beto bika sadisa Satana na kumonisa bantu wonga.—Yoane 8:44; 2 Timoteo 2:16.

21. Na kisika ya kubudila bantu masolo ya bademo, yinki mambu beto lenda tubila?

²¹ Kana Mbangi ya Yehova mosi vuandaka na nguizani na bisalu ya bademo, yandi fueti tubilaka ve bantu masolo yango samu na kusekisa bantu. Bisadi ya Yehova fueti banga ve ata diambu mosi yina Diabulu mpe bademo lenda sala. Kasi, beto fueti tula mabanza na beto na Yesu mpe kilendo yina Yehova pesaka yandi. (Baebreo 12:2) Yesu vuandaka lutisa ntangu na yandi ve na kutubilaka masolo ya bademo na banlonguki na yandi. Yandi tulaka mabanza na yandi na nsangu ya Kimfumu mpe na “mambu ya nene ya Nzambi.”—Bisalu 2:11; Luka 8:1; Baroma 1:11, 12.

22. Yinki nzengolo nge mebaka?

²² Beto bika zimbakana ti Satana kele na lukanu ya kubebisa nguizani na beto na Yehova. Yandi kesosaka kusadila mayele ya mutindu na mutindu samu na kukukisa lukanu yango. Kasi beto mezaba mayele yina Satana kesadilaka mpe beto kele na nzengolo ya kumanga mambu nionso yina kele na nguizani na bademo. Beto ‘kepesa ve Diabulu dibaku’ ya kulembisa nzengolo na beto. (Tanga Baefezo 4:27.) Ya kedika, kana beto metelemina Diabulu, beto kekubua ve na mintambu na yandi mpe Yehova ketanina beto.—Baefezo 6:11.