KIKAPU YA 8
Yinki Kele Kimfumu Ya Nzambi?
1. Yinki kisambu yina mezabana mingi beto ketubila?
BAMILIO ya bantu mezaba kisambu mosi yina mezabana mingi yina bakebokidilaka “Tata na beto” to kisambu ya Mfumu. Yesu sadilaka kisambu yango samu na kulonga banlonguki na yandi yinki mutindu bafueti sambidila. Yandi sambilaka samu na yinki mambu? Mpe samu na yinki kisambu yango kele na mfunu samu na beto bubu yayi?
2. Tanga mambu tatu ya mfunu yina Yesu longaka beto beto sambilaka samu na yau.
2 Yesu tubaka: “Beno fueti sambila mutindu yayi: ‘Tata na beto yina kele na dizulu, nkumbu na nge vuanda ya nlongo. Kimfumu na nge kuiza. Luzolo na nge salama na ntoto, lokola na dizulu.’” (Tanga Matayo 6:9-13.) Samu na yinki Yesu longaka beto, beto sambilaka samu na mambu tatu yina?—Tala Noti ya 20.
3. Yinki beto fueti zaba samu na Kimfumu ya Nzambi?
3 Beto longukaka ti nkumbu ya Nzambi kele Yehova. Mpe beto longukaka diaka yinki kele luzolo ya Nzambi samu na bantu mpe samu na ntoto. Kasi yinki Yesu zolaka tuba ntangu yandi tubaka: ‘Kimfumu na nge kuiza’? Na kikapu yayi, beto kemona yinki kele Kimfumu ya Nzambi, yinki yau kesala mpe yinki mutindu yau kesakumuna nkumbu ya Nzambi.
YINKI KELE KIMFUMU YA NZAMBI?
4. Yinki kele Kimfumu ya Nzambi mpe nani kele Mfumu na yau?
4 Yehova tulaka guvernema mosi na dizulu, mpe yandi ponaka Yesu samu yandi vuanda Mfumu na yau. Biblia kebokidilaka guvernema yango Kimfumu ya Nzambi. Yesu kele ‘Ntinu ya bantu yina kena kuyala lokola bantinu mpe Mfumu ya bantu yina kena kuyala lokola bamfumu.’ (1 Timoteo 6:15) Yesu kele na kilendo ya kusala mingi kuluta konso mfumu, mpe yandi kele na kilendo kuluta bamfumu nionso ata bamesangana.
5. Guvernema ya Nzambi kele wapi, mpe yau keyadila yinki?
5 Bilumbu 40 na manima ya mfutumukunu na yandi, Yesu vutukaka na dizulu. Na manima Yehova tulaka yandi Ntinu ya Kimfumu na yandi. (Bisalu 2:33) Guvernema ya Nzambi kele na dizulu mpe yau keyadila ntoto. (Kusonga 11:15) Yau yina, Biblia kebokidilaka Kimfumu ya Nzambi ‘Kimfumu ya dizulu.’—2 Timoteo 4:18.
6, 7. Samu na yinki Yesu kele Mfumu yina meluta bamfumu nionso ya bantu?
6 Biblia metuba ti Yesu meluta bamfumu nionso ya bantu samu ‘yandi kaka kekufuaka ve.’ (1 Timoteo 6:16) Bamfumu nionso ya bantu kekufuaka, kasi Yesu kesala kufua ve. Mambu nionso ya mbote yina Yesu kesala samu na beto kezingila mvimba-mvimba.
7 Mbikudulu mosi ya Biblia tubaka ti Yesu kevuanda Ntinu mosi ya lunungu mpe ya ntima kiadi: ‘Mpeve ya Yehova kevuanda na zulu na yandi, mpeve ya nduenga mpe ya mayele ya kubakusa mambu, mpeve ya dilongi mpe ya ngolo, mpeve ya nzayilu mpe ya kubanga Yehova; mpe yandi kemona kiese na kubanga Yehova. Yandi kesambisa ve na kutadila mambu yina kemonana na meso na yandi, yandi kesemba mpe ve na kutadila mambu yina makutu na yandi kena kuwa. Yandi kesambisa muntu yina mezanga na mutindu ya mbote.’ (Yezaya 11:2-4) Nge kesepela kuvuanda na Ntinu ya mutindu yina?
8. Yinki mutindu beto mezabila ti Yesu keyadila yandi mosi ve?
8 Nzambi meponaka bantu yankaka samu bayala kintuadi na Yesu na Kimfumu ya dizulu. Na kifuani, ntumua Paulo tubilaka Timoteo: ‘’Kana beto metatamana kukanga ntima, beto keyala mpe na yandi lokola bantinu.’ (2 Timoteo 2:12) Bantu yikua keyala kintuadi na Yesu?
9. (a) Bantu yikua keyala kintuadi na Yesu? (b) Yinki ntangu Nzambi bandaka kupona bau?
9 Mutindu beto longukaka na kikapu ya 7, ntumua Yoane bakaka mona meso (vizio) kuna yandi monaka Yesu lokola Ntinu na dizulu kintuadi na bantinu yankaka na ntalu ya 144 000. Bantu 144 000 kele banani? Yoane metuba ti bavuandaka ‘na nkumbu na yandi [ya Yesu] mpe nkumbu ya Tata na yandi ya kusonama na bambunzu na bau.’ Mpe yandi buelaka diaka: ’Bakele bantu yina kena kutatamana kulanda Muana Dimeme [Yesu] konso kisika yina yandi kena kukuenda. Basumbaka bau na kati ya bantu.’ (Tanga Kusonga 14:1, 4.) Bantu 144 000 bakele Baklisto ya kukuikama yina Nzambi mepona samu ‘bayadila ntoto lokola bantinu kintuadi na Yesu.’ Kana bamekufua, bakefutumukaka samu na kukuenda na dizulu. (Kusonga 5:10) Banda ntangu ya bantumua, Yehova keponaka Baklisto ya kukuikama samu bavuanda na kati ya bamfumu 144 000.
10. Samu na yinki nkubukulu yina Yehova mebaka ya kupona Yesu na bantu 144 000 bayadila beto memonisa ti Yehova kezolaka beto?
10 Yehova kezolaka bantu mingi, yau yina yandi mepona bantu samu bayala kintuadi na Yesu. Yesu kevuanda Mfumu mosi ya mbote samu yandi mezaba kukitula na kisika na beto. Yandi mezaba mpasi yina bantu kemonaka samu yandi vuandaka mpe muntu lokola beto. Ntumua Paulo tubaka ti: Yesu kekukitulaka na kisika na beto, yandi lenda ‘wila beto . . . kiadi.’ mpe ’bamekaka [yandi] na mambu nionso mutindu bamekaka beto.’ (Baebreo 4:15; 5:8) Bantu 144 000 bau diaka mezaba mpasi yina bantu kemonaka samu bavuandaka bantu kolola beto. Bau diaka bavuandaka bantu ya masumu mpe bavuandaka bela. Yau yina, beto fueti tula ntima ti Yesu na bantu 144 000 kesuka kaka ve na kuzaba mutindu beto kekukimonaka, kasi bakezaba mpe bampasi yina beto kena kukutana na yau.
YINKI KIMFUMU YA NZAMBI KESALA?
11. Samu na yinki Yesu longaka banlonguki na yandi basambilaka samu luzolo ya Nzambi yasalama na dizulu?
11 Yesu longaka banlonguki na yandi basambilaka samu luzolo ya Nzambi yasalama na dizulu. Samu na yinki? Na Kikapu ya 3 beto longukaka ti Satana Diabulu tombokilaka Yehova. Na manima ya butomboki, Yehova bikaka Satana na bambasi yina landaka yandi babikana na dizulu samu na mua ntangu. Yau yina bisemua nionso ve kuna na dizulu vuandaka sala luzolo ya Nzambi. Na Kikapu ya 10 beto kelonguka mambu mingi yina metadila Satana mpe bademo.
12. Tanga mambu zole ya mfunu yina Kusonga 12:10 metubila.
12 Biblia metuba ti ntangu fioti na manima ya kukuma Mfumu na Kimfumu ya Nzambi, Yesu nuanaka na Satana. (Tanga Kusonga 12:7-10.) Verse ya 10 metubila mambu zole ya mfunu. Ya ntete, Kimfumu ya Nzambi yina Yesu Klisto kele Mfumu na yau mebanda kuyadila mpe ya zole, bamekuka Satana na dizulu mpe bameloza yandi na ntoto. Mutindu beto kelonguka yau, mambu yango mesalamaka.
13. Yinki salamaka na dizulu ntangu bakukaka Satana?
13 Biblia kena kutubila kiese yina bambasi vuandaka na yau ntangu bakukaka Satana na bademo na yandi na dizulu. Beto metanga: ‘Dizulu mpe beno bantu yina kezingaka kuna, beno vuanda na kiese!’ (Kusonga 12:12) Kiyenge mpe bumosi kele na dizulu samu bambasi nionso kena kusala luzolo ya Nzambi.
Banda ntangu bakukaka Satana mpe bademo na dizulu, bampasi buelamaka awa na ntoto. Ntama ve bampasi yango kemanisa
14. Yinki kena kusalama awa na ntoto lokola bakukaka Satana na dizulu?
14 Kasi luzingu kele mutindu yankaka awa na ntoto. Bantu kena kutana na mambu ya mpasi mingi ‘samu Diabulu mekita’ na ntoto mpe yandi ‘kele na nganzi ya ngolo, samu yandi mezaba ti yandi kele na ntangu fioti.’ (Kusonga 12:12) Satana kele na nganzi ya ngolo. Bakukaka yandi na dizulu, mpe yandi mezaba ti ntama ve bakekufua yandi. Yandi kena kusala nionso samu na kubimisa mavuanga, bamvita mpe mambu ya mpasi na yinza ya mvimba.
15. Yinki kele luzolo ya Nzambi samu na ntoto?
15 Kasi luzolo ya Nzambi samu na ntoto shanje ve. Yandi zola kaka ti bantu ya kukoka zinga mvimba-mvimbana Paradiso awa na ntoto. (Nkunga 37:29) Kasi yinki mutindu Kimfumu ya Nzambi kekokisila yau?
16, 17. Yinki Daniele 2:44 metubila beto samu na Kimfumu ya Nzambi?
16 Mbikudulu yina kele na Daniele 2:44 metuba ti: ‘Na bilumbu ya bamfumu yango, Nzambi ya dizulu ketula Kimfumu mosi yina kekufua ve ata fioti. Kimfumu yango kekuenda ve na bantu yankaka. Yakebebisa mpe yakesukisa bimfumu yayi nionso, mpe yau kaka kebikana mvimba-mvimba.’ Yinki mbikudulu yayi melonga beto na yina metadila Kimfumu ya Nzambi?
17 Ya ntete, yakena kutubila beto ti Kimfumu ya Nzambi kebanda kuyadila ‘na bilumbu ya bamfumu yango.’ Yazola monisa ti baguvernema yankaka kevuanda na ntoto ntangu Kimfumu ya Nzambi kebanda kuyadila. Ya zole, yakena kuzabisa beto ti Kimfumu ya Nzambi kezingila mvimba-mvimba mpe guvernema mosi ve kebaka kisika na yau. Ya tatu, Kimfumu ya Nzambi kenuana mvita na baguvernema ya yinza yayi. Kimfumu ya Nzambi kenunga mvita yango mpe yakebikana kaka guvernema mosi samu na kuyadila ntoto ya mvimba. Na yau, bantu kebaka guvernema yina meluta mbote.
18. Yinki kele nkumbu ya mvita ya nsuka yina Kimfumu ya Nzambi kenuana na baguvernema ya yinza?
18 Yinki mutindu Kimfumu ya Nzambi kebanda kuyadila ntoto ya mvimba? Tekila mvita ya nsuka yina bamebokidila Armagedoni, bademo kevuna ‘bamfumu ya ntoto ya mvimba, samu na kusangisa bau samu na mvita ya kilumbu ya nene ya Nzambi Nkua-Ngolo Nionso.’ Ee, baguvernema ya bantu kenuanisa Kimfumu ya Nzambi.—Kusonga 16:14, 16; tala Noti ya 10.
19, 20. Samu na yinki beto kele na nsatu Kimfumu ya Nzambi yadila ntoto ya mvimba?
19 Samu na yinki beto kele na nsatu ya Kimfumu ya Nzambi? Yakele samu na bamfunu kana tatu. Ya ntete, beto kele bantu ya masumu, yau yina beto kebelaka mpe beto kekufuaka. Kasi, Biblia metuba ti na nzila ya Kimfumu ya Nzambi beto kezinga mvimba-mvimba. Kutu Yoane 3:16 metuba ti: ‘Nzambi zolaka yinza mingi mpenza yau yina, yandi pesaka Muana na yandi mosi kaka yina butukaka samu konso muntu yina kemonisa kiminu na Muana kufua ve kasi yandi baka luzingu ya mvula na mvula.’
20 Ya zole, beto kele na nsatu ya Kimfumu ya Nzambi samu beto kele na yinza yina mefuluka na bantu ya yimbi. Bantu mingi kevunaka, keyibaka mpe kesalaka mambu ya yimbi. Beto lenda pekisa bau ve basala mambu ya yimbi. Kaka Nzambi nde kekatula bau. Bantu yina kena kutatamana kusala yimbi kekufua na Armagedoni. (Tanga Nkunga 37:10.) Ya tatu, beto kele na nsatu ya Kimfumu ya Nzambi samu baguvernema ya bantu kele na ngolo ve, yakele na kinkesi mpe yakele na luvunu. Yakesadisaka bantu ve samu bazitisa Nzambi. Biblia metuba ti ‘muntu meyadila muntu samu na kumonisa yandi mpasi.’—Longi 8:9.
21. Yinki mutindu Kimfumu ya Nzambi kesala ti luzolo na yandi yasalama awa na ntoto?
21 Na manima ya Armagedoni, Kimfumu ya Nzambi kesala ti luzolo ya Nzambi salama awa na ntoto. Na kifuani, yakekatula Satana na bademo na yandi. (Kusonga 20:1-3) Nsukansuka, ata muntu mosi ve kebela diaka mpe kekufua. Samu na nzila ya nkudulu, bantu nionso ya kukuikama kezinga mvimba-mvimba na Paradiso. (Kusonga 22:1-3) Kimfumu yango kekumisa nlongo (kesantisa) nkumbu ya Nzambi. Yinki yazola monisa? Yazola monisa ti ntangu Kimfumu ya Nzambi keyadila ntoto, bantu nionso kepesa nkumbu ya Yehova lukumu.—Tala Noti ya 21.
YINKI NTANGU YESU KUMAKA NTINU?
22. Yinki mutindu beto mezabila ti Yesu kumaka ve Ntinu ntangu yandi vuandaka awa na ntoto to mbala mosi na manima ya mfutumukunu na yandi?
22 Yesu longaka banlonguki na yandi basambilaka ti: ‘Kimfumu na nge kuiza.’ Yazola tuba ti guvernema ya Nzambi fueti kuiza na bilumbu kena kuiza. Yehova fueti tula ntete guvernema na yandi mpe kutula Yesu yandi vuanda Mfumu na yau. Yesu kumaka Ntinu mbala mosi ntangu yandi vutukaka na dizulu? Ve. Yandi vingilaka. Mua bamvula na manima ya mfutumukunu ya Yesu, ntumua Petelo na ntuma Paulo monisaka yau ntangu basadilaka mbikudulu yayi kele na Nkunga 110:1 samu na kutubila Yesu. Na mbikudulu yango, Yehova metuba: ’Vuanda na diboko na munu ya kibakala tii ntangu munu ketula bambeni na nge lokola ebonga samu na makulu na nge.’ (Bisalu 2:32-35; Baebreo 10:12, 13) Yalombaka ti Yesu vingila ntangu yikua tekila Yehova tula yandi Mfumu?
Kimfumu ya Nzambi kesala ti luzolo ya Nzambi salama awa na ntoto
23. (a) Yinki ntangu Yesu kumaka Ntinu na Kimfumu ya Nzambi? (b) Yinki beto kelonguka na kikapu yina melanda?
23 Bamvula mingi na ntuala ya mvula 1914, kimvuka mosi ya Baklisto ya kukuikama babakusaka ti mvula 1914 kevuanda mvula mosi ya mfunu na yina metadila bambikudulu ya Biblia. Mambu yina kena kusalama na yinza banda mvula 1914 kena kumonisa ti bavunukaka ve. Na mvula yango nde Yesu kumaka Ntinu. (Nkunga 110:2) Ntangu fioti na manima na yau, Satana lozukaka awa na ntoto mpe bubu yayi ‘yandi mebikana kaka na ntangu ya fioti.’ (Kusonga 12:12) Na kikapu yina melanda, beto kemona mambu mingi yina kena kumonisa ti beto kena kuzinga na ntangu yango. Beto kemona diaka ti ntama mingi ve Kimfumu ya Nzambi kesala ti luzolo na yandi yasalama awa na ntoto.—Tala Noti ya 22.
