Bampangi ya babakala mpe ya banketo:

Nzola samu na Nzambi mpe samu na bantu ketindaka beto beto ‘kuenda mpe [beto] kumisa bantu ya makanda nionso banlonguki, [beto] pesa bau mbotama.’ (Mat. 28:19, 20; Mar. 12:28-31) Nzola ya kedika kevuandaka na kilendo. Yalenda simba bantima ya bantu yina kele ‘na kikadulu ya mbote samu na kubaka luzingu ya mvula na mvula.’​—Bis. 13:48.

Na ntama, beto vuandaka tula mingi dikebi na kukanga na yintu mitindu ya kubanda masolo mpe kubikila bantu mikanda. Bubu yayi, beto fueti sala ngolo samu na kukudisa makoki na beto ya kusolola na bantu. Beto kele na nsatu ya kumonisina bantu yankaka nzola na kutubilaka bau mambu yina kesepedisa bau. Yazola monisa beto fueti zaba kusadila mayele mutindu na mutindu mpe kutula dikebi na mambu yina kena kutungisa konso muntu mpe bansatu na yandi. Yinki mutindu mua mukanda yayi lenda sadisa beto samu na kusala yau?

Mua mukanda yayi kele na malongi 12 yina kena kulonga beto bikadulu yina beto fueti kuna samu na kumonisa nzola mpe kukumisa bantu banlonguki. Konso dilongi mesimbama na disolo mosi ya Biblia yina metubila kikadulu mosi yina Yesu to Muklisto yankaka ya siekle ya ntete monisaka na kisalu ya kusamuna. Lukanu na yau kele ve ya kukanga na yintu mutindu ya kubanda disolo, kasi ya kusosa mitindu ya kumonisa nzola na beto na bantu. Atako konso kikadulu kele na mfunu na mambu nionso yina metadila kisalu na beto, beto ketadila yinki mutindu bikadulu yankaka kele mpenza na mfunu ntangu beto kena kubanda masolo, beto kena kuvutukila bantu, to beto kena kutuadisa bandongokolo ya Biblia.

Ntangu nge kena kutadila dilongi mosimosi, kanisa mpenza na mutindu nge lenda monisa kikadulu yango ntangu nge kena kusolola na bantu. Sosa kukumisa nzola na nge samu na Yehova mpe samu na bantu ngolo. Nzola yango, yina meluta mayele nionso yina nge lenda sadila, kesadisa nge na kukokisa lukanu na nge ya kukumisa bantu banlonguki.

Beto kele na kiese na diluaku ya nene ya kusala dipeka na dipeka kintuadi na nge. (Sef. 3:9) Bika Yehova sakumuna nge mingi lokola nge kena kutatamana kuzola bantu mpe kukumisa bau banlonguki!