DILONGI 16
Yinki Yesu salaka ntangu yandi vuandaka na ntoto?
Bantu mingi ketadilaka Yesu lokola mua muana ya fioti yina balenda sadisa ve, mbikudi ya mayele, to muntu mosi yina vuandaka na mpasi ya lufua. Kasi beto lenda longuka mambu mingi metadila yandi na kutadilaka luzingu na yandi awa na ntoto? Na dilongi yayi, beto ketadila ndambu ya mambu ya mfunu yina Yesu salaka mpe mutindu yalenda sadisa nge.
1. Yinki vuandaka kisalu meluta mfunu samu na Yesu?
Kisalu yina lutaka mfunu samu na Yesu vuandaka ‘kuzabisa nsangu ya mbote ya Kimfumu ya Nzambi.’ (Tanga Luka 4:43.) Yandi longaka nsangu ya mbote ti Nzambi ketula Kimfumu to guvernema mosi yina kemanisa bampasi ya bantu. a Yesu lembaka ve kusamuna nsangu yango ya mbote bamvula tatu na ndambu.—Matayo 9:35.
2. Samu na yinki Yesu vuandaka sala bimangu?
Biblia kena kutubila mingi ya ‘bisalu ya kilendo, bimangu, mpe bidimbu yina Nzambi salaka na nzila ya [Yesu].’ (Bisalu 2:22) Na ngolo ya Nzambi, Yesu vuandaka na dikoki ya kupekisa ata mupepe ya ngolo, kudikila bantu mingi, kubelusa bantu ya maladi mpe ata kufutumuna bantu ya kufua. (Matayo 8:23-27; 14:15-21; Marko 6:56; Luka 7:11-17) Bimangu ya Yesu monisaka ti Nzambi tindaka yandi. Yavuandaka monisa diaka ti Nzambi kele na makoki ya kumanisa bampasi na beto nionso.
3. Yinki dilongi beto lenda baka na luzingu ya Yesu?
Yesu vuandaka zitisa Yehova, Tata na yandi, na mambu nionso. (Tanga Yoane 8:29.) Atako bateleminaka yandi, Yesu zitisaka Tata na yandi tii na lufua. Yandi monisaka ti dikoki kele samu na bantu basadila Nzambi atako bampasi kele. Na yau, Yesu bikilaka beto ‘kifuani samu [beno] landa bitambi na yandi mbotembote.’—1 Piere 2:21.
KOTA NA MPINDA
Tadila mutindu Yesu samunaka nsangu ya mbote mpe mutindu yandi salaka bimangu.
4. Yesu samunaka nsangu ya mbote
Yesu tambulaka bakilometre mingi na makulu na banzila ya ntoto, samu na kusamuna nsangu ya mbote na bantu mingi yina yandi lendaka kutana na bau. Tanga Luka 8:1, mpe na manima tadila biuvu yayi:
-
Yesu longaka kaka bantu yina vuandaka zunga yandi samu na kuwa yandi?
-
Yinki ngolo Yesu vuandaka sala samu na kukutana na bantu?
Nzambi samunaka ti Masiya kesamuna nsangu ya mbote. Tanga Yezaya 61:1, 2, mpe na manima tadila biuvu yayi:
-
Yinki mutindu Yesu kokisaka mbikudulu yango?
-
Nge mekanisa ti bubu yayi bantu kele na nsatu ya kuwa nsangu ya mbote?
5. Yesu longaka bakedika ya mfunu
Katula kusamuna nsangu ya mbote yina metadila Kimfumu ya Nzambi, Yesu longaka malongi yina lenda sadisa na luzingu. Tadila mua ndambu ya bifuani yina yandi tubilaka na disolo na yandi na zulu ya mongo. Tanga Matayo 6:14, 34 mpe 7:12, mpe na manima tadila biuvu yayi:
-
Yinki malongi yina lenda sadisa na luzingu Yesu pesaka na baverse yayi?
-
Nge mekanisa ti malongi yango kele kaka na mfunu tii bubu yayi?
6. Yesu salaka bimangu
Yehova pesaka Yesu ngolo ya kusala bimangu mingi. Samu na kumona kifuani mosi, tanga Marko 5:25-34 to tula VIDEO. Mpe na manima tadila biuvu yayi melanda.
-
Na video yango, yinki nketo ya maladi zabaka na ntima mosi?
-
Yinki mesepedisa nge na kimangu yango?
Tanga Yoane 5:36, mpe na manima tadila kiuvu yayi:
-
Yinki “kimbangi” kimangu ya Yesu pesaka mpe yinki yamonisaka samu na Yesu?
Nge zabaka yau?
Mambu mingi yina beto mezaba na yina metadila Yesu mekatuka na mikanda yiya ya Biblia bakebokidilaka Baevanjile—Matayo, Marko, Luka, mpe Yoane. Konso nsoniki ya Evanjile kotisaka mambu ya sikisiki metadila Yesu. Kana beto metanga mikanda yango yiya, beto kezaba mbotembote luzingu ya Yesu.
-
MATAYO
sonikaka mukanda ya ntete. Yaketubilaka malongi ya Yesu, mingi mingi malongi metadila Kimfumu ya Nzambi.
-
MARKO
sonikaka mukanda yina lutaka fioti. Yaketubilaka masolo mingi na mutindu mosi ya nkufi kasi ya puelele.
-
LUKA
tubilaka mingi bisambu mpe mutindu Yesu vuandaka tadila banketo.
-
YOANE
memonisa kimuntu ya Yesu na kutubilaka masolo mingi yina Yesu vuandaka solola na bankundi na yandi mpe bantu yankaka.
BANTU YANKAKA METUBA: “Yesu vuandaka kaka muntu ya mbote, kasi Masiya ve.”
-
Yinki nge mekanisa?
BUNKUFI
Yesu vuandaka samuna Kimfumu ya Nzambi, yandi salaka bimangu mpe yandi zitisaka Yehova na mambu nionso.
Mvutukulu
-
Yinki kisalu lutaka mfunu samu na Yesu awa na ntoto?
-
Yinki bimangu ya Yesu kemonisaka?
-
Yinki malongi yina lenda sadisa na luzingu Yesu longisaka?
SOSA
Yinki diambu Yesu tubilaka mingi kuluta?
Tadila samu na yinki beto lenda ndima ti bimangu ya Yesu salamaka mpenza.
“Makamwisi ya Yesu ekoki koteya yo nini?” (Linɔ́ngi ya Mosɛnzɛli ya 15 Juillet 2004)
Tanga yinki mutindu kifuani ya luzingu ya kukipesa ya Yesu sadisaka muntu mosi.
“Nazalaki koluka kaka matomba na ngai moko” (Linɔ́ngi ya Mosɛnzɛli ya 1 Octobre 2014)
Tala mutindu kisalu ya mfunu ya Yesu salamaka konso diambu na ntangu na yau.
a Malongi 31-33 ketubila na mpinda Kimfumu ya Nzambi.
Tala diaka...
BIUVU YINA BANTU KEYUVUSAKA MINGI
Yinki mutindu Bambangi ya Yehova kelongukaka Biblia na bantu?
Na nzila ya programe ya ndongokolo ya kusolola ofele na Bambangi ya Yehova, nge lenda sadila konso mbangudulu ya Biblia. Nge kele na yinsua ya kubokidisa dibuta na nge ya mvimba to bankundi na nge bakuiza sangana na nge.
