BENO TATAMANA KUKENGA!
2022: Mvula ya minioko—Yinki Biblia metuba?
Na mvula ya mvimba ya 2022, beto vuandaka kuwa kaka bansangu ya bamvita, kukita ya ekonomi, mpe kubebisama ya ngolo ya bisika. Kaka Biblia kena kusasila yinki mambu yango zola monisa mpenza.
Nsasulu ya kedika ya mambu yina mesalama na mvula 2022
Mambu yina mesalama na mvula yayi mekatuka kuluta, kena kumonisa puelele ti beto kena kuzinga na ntangu yina Biblia kena kubokidila “bilubmu ya nsuka.” (2 Timoteo 3:1) Ntangu yango bandaka na mvula 1914. Tala mutindu mambu yina mekatuka kusalama kele na nguizani na mambu yina Biblia samunaka samu na ntangu na beto:
‘Bamvita.’—Matayo 24:6.
“2022 kele mvula yina Europe mekutana diaka na bamvita ya ngolo.” a
Tala disolo “Basoda ya Russie mekota na Ukraine samu na kunuanisa bau.”
‘Nsatu.’—Matayo 24:7.
“2022: Mvula yina nsatu vuandaka ya ngolo kuluta bamvula yankaka na ntuala.” b
Tala disolo “Mvita na Ukraine mesala ti bima ya kudia kuma mpasi na yinza.”
‘Bamaladi ya yimbi.’—Luka 21:11.
“Maladi ya bukabuka vutukaka diaka, maladi bakebokidilaka variole du singe kumaka ngolo, mpe maladi ya COVID-19 kena kutatamana kusala bantu mpasi. Mambu yango monisaka mutindu bamaladi yina ketambakanaka kele mpenza kivonza mpe mutindu yakebakaka bantu na pete nionso.” c
Tala disolo “Bamilion 6 ya bantu mekufua na maladi ya COVID-19.”
‘Mambu ya kubangisa.’—Luka 21:11.
“Kusoba ya klima, kuyuma ya bima, kuyokana ya bamfinda, mpe kufuluka ya maza bimisaka bivonza. Nsungi ya tiya ya ngolo ya 2022 kebikana na mabanza ya bantu samu na mambu ya mpasi yina salamaka yina salaka ti bamilion ya bantu kufua, mpe yina salaka ti bamilion ya bantu tina na bisika yina bakevuandaka na yinza ya mvimba.” d
Tala disolo “Kubuelama ya tiya ya ngolo na yinza ya mvimba.”
‘Mobulu.’—Luka 21:9.
“Lokola bantu vuandaka tatamana kufuema samu na mambu metadila mumbongo, mingimingi na diambu metadila kukita ya ekonomi, yau salaka ti bantu tombokila baguvernema na 2022.” e
Tala disolo “Ekonomi ya yinza ya mvimba kena kutatamana kukita.”
Yinki mambu kesalama na mvula yayi kena kuiza?
Muntu mosi ve lenda tuba na kedika nionso mambu yina kesalama na 2023. Yina beto mezaba kele ti ntama mingi ve, Kimfumu ya Nzambi to guvernema ya dizulu kenata bansobolo ya nene na ntoto. (Daniele 2:44) Guvernema yango kekatula mambu yina kesalaka ti bantu niokuama mpe yakesala ti luzolo ya Nzambi salama na ntoto.—Matayo 6:9, 10.
Beto kena kulomba nge nge sadila malongi ya Yesu Klisto mpe nge ‘tatamana kukenga’ samu na kumona mutindu mambu yina kena kusalama na yinza kena kukokisa bambikudulu ya Biblia. (Marko 13:37) Beto melomba nge nge solola na beto samu na kulonguka mambu mingi na diambu metadila mutindu Biblia lenda sadisa nge banda bubu yayi mpe mutindu yalenda pesa nge mpe dibuta na nge kivuvu ya kedika samu na luzingu ya mbote na bilumbu kena kuiza.
a AP News, “2022 kele mvula yina Europe kutanaka diaka na bamvita ya ngolo,” na Jill Lawless, 8 décembre 2022.
b World Food Programme, “Kukondua ya bima ya kudia na yinza ya mvimba.”
c JAMA Health Forum, “Kuzinga na ntangu ya bamaladi ya yimbi—kubanda na COVID-19 tii na maladi bakebokidilaka Variole du singe, maladi ya Bukabuka, mpe maladi X,” na Lawrence O. Gostin, JD, 22 septembre 2022.
d Earth.Org, “Yinki mambu kusoba ya klima mebimisa na kutadila nsungi ya tiya ya ngolo ya 2022?” na Martina Igini, 24 octobre 2022.
e Carnegie Endowment for International Peace, “Nganzi ya bantu na diambu metadila ekonomi mesala ti bantu tomboka na yinza ya mvimba na 2022,” na Thomas Carothers mpe Benjamin Feldman, 8 décembre 2022.
Tala diaka...
BAMVUTU NA BIUVU YA BIBLIA
Yinki kele kidimbu ya “bilumbu ya nsuka” to ya “ntangu ya nsuka”?
Biblia samunaka mambu mingi yina kana yakena kusalama nzila mosi, yakevuanda “kidimbu” samu na kuzaba bilumbu ya nsuka.
MAMBU YINA METADILA BETO
Lomba muntu mosi kuiza tala nge
Tubila kiuvu mosi ya Biblia, to longuka kuzaba mambu mingi yina metadila Bambangi ya Yehova.
