Mutindu mvula 2023 mebanda, beto nionso beto kele na kivuvu ti mambu ya mbote kekumina beto mpe mabuta na beto. Samu na yinki beto lenda vuanda na kivuvu ti mambu kevuanda mbote na bilumbu kena kuiza?

 Biblia mepesa nsangu ya mbote ti mambu nionso ya mpasi yina beto kena kukutana na yau bubu yayi kele kaka samu na mua ntangu mpe ntama mingi ve yakemanisa. Na yau, Biblia ‘sonamaka samu na kulonga beto, samu na nzila . . . ya kubomba yina kekatukaka na Masonukua beto vuanda na kivuvu.’—Baroma 15:4.

•   Samu na kuzaba mambu mingi na yina metadila bansilulu ya Biblia, tanga disolo “Elikya ya solosolo mpo na mikolo ezali koya.”

 Kivuvu ya Biblia lenda vuanda lokola ‘longo samu na luzingu na beto.’ (Baebreo 6:19, noti na yinsi ya paje) Kivuvu yango lenda sala ti beto ningana ve. Yalenda sadisa beto na kukanga ntima na bampasi yina beto kena kukutana na yau bubu yayi, na kutula kivuvu ti mambu kebonga na bilumbu kena kuiza, mpe kuvuanda na kiese ntangu nionso. Na kifuani:

•   Tala mutindu kivuvu ya Biblia sadisaka bakala mosi yina vuandaka nuana na kinanga ya kikadulu mosi ya yimbi. Tala video Nalɛmbaki bomoi oyo nazalaki na yango.

•   Tala mutindu kivuvu ya Biblia lenda sadisa beto ntangu beto mefuila muntu mosi yina beto vuandaka zola. Tala video Lukindusu samu na bantu yina mefuila.

 Bantu mingi kevuandaka na kivuvu ti mambu ya mbote kesalama, kasi bakendimaka ve ti bivuvu na bau kekokisama. Yina Biblia melaka mesuasana. Samu na yinki? Samu bansilulu ya Biblia kekatukaka na yandi mosi Yehova Nzambi a, ‘yina lenda vuna ve.’ (Tito 1:2) Kaka Yehova kele na kilendo ya kukokisa bansilulu na yandi nionso; yandi lenda sala ‘mambu nionso yina yandi kezolaka kusala.’—Nkunga 135:5, 6.

 Beto melomba nge na kiese nionso nge baka mambote na kivuvu ya kedika ya Biblia. Nge lenda kumisa yau ngolo na ‘kutadilaka Masonukua mbotembote.’ (Bisalu 17:11) Nge lenda mona yau nge mosi na kumekaka ndongokolo na beto ya Biblia ya ofele. Banda mvula 2023 na kuvuandaka na kivuvu mosi ya mbote samu na bilumbu kena kuiza!