Na bansaka ya Olympiques yina kena kusalama na nsungi ya tiya ya 2024, bakena kukanisa ntalu ya bantu 5 miliare tala bantu kezawulaka yina mekatuka na babuala 206 samu na bansaka yango. Thomas Bach, yina kele prezidan ya komite ya yinza ya mvimba ya bansaka ya Olympiques metuba, “Beto kena kusangana na nsaka mosi yina kesangisaka yinza na kiyenge. Beto sala bansaka yayi ya Olympiques yina kesalaka ti bantu vuanda na kiyenge, bavuanda lokola muntu kaka mosi, yina mesangana atako bakele bantu yina mesuasana.”

 Bansaka ya Olympiques lenda kokisa balukanu yango ya mfunu? Kilumbu yankaka bantu lenda vuanda mpenza na kiyenge mpe na bumosi?

 Bansaka ya Olympiques ya mvula yayi kena kutinda bantu kanisa ti yasuka kaka ve na kuvuanda nsaka. Bansaka yango ketubilaka mambu metadila bantu mpe mambu ya politiki yina kena kukabula bantu. Yamesangisa mambu lokola yinsua ya bantu, kupona bankanda, kukabuana ya mabundu, mpe mambu yina kesalaka ti bantu suasana.

 Bansaka yina kesangisaka yinza ya mvimba, na kifuani bansaka ya Olympiques kesalaka ti bantu lutisa ntangu. Nzokande, bansaka yango kesalaka ti bantu kuma na bikadulu to basala mambu yina kekabulaka na kisika basala mambu yina ketulaka kiyenge mpe bumosi.

 Bibila samunaka bikadulu yina kena kusala ti bumosi vuanda mpasi bubu yayi. (2 Timote 3:1-5) Samu na kuzaba mambu yankaka yina Biblia metubila samu na mbikudulu yango, tanga disolo “Biblia esakolaki makambo oyo bato bazali kokanisa mpe kosala lelo oyo?”

 Biblia mepesa kivuvu ya kedika samu na kiyenge mpe bumosi yina kevuanda na yinza ya mvimba. Yamelaka ti bantu nionso na ntoto kevuanda na bumosi na yinsi ya guvernema mosi ya dizulu yina bakebokidilaka “Kimfumu ya Nzambi.”—Luka 4:43; Matai 6:10.

 Ntinu ya Kimfumu yango, Yesu Klisto, kesala ti kiyenge vuanda na yinza ya mvimba. Biblia metuba:

•   “Bantu ya lunungu kekula lokola matiti ya yimpa, mpe kiyenge kekuma mingi.”—Nzembo 72:7.

•   “Yandi kevukisa mputu yina kena kudila samu na kulomba lusadusu . . . Yandi kevukisa bau na bampasi mpe na kinkesi.”—Nzembo 72:12, 14.

 Ata bubu yayi, malongi ya Yesu mesangisa bamilion ya bantu na babuala 239. Lokola beto kele Baklisto, beto Bambangi ya Yehova na yinza ya mvimba beto melonguka kuvuanda bantu ya kiyenge. Samu na kuzaba mutindu beto kesalaka yau, tanga zulunalo Linɔ́ngi ya Mosɛnzɛli yina kele na yintu ya diambu “Koyinana ekoki kosila?”