“Mavimpi ya bantuenia mingi kena kubeba, na yau yakena kulomba lusadusu ya nsualu—mpe basite ya kusolola na bantu kele mosi ya bima yina kena kusala ti mavimpi ya bantuenia beba.”—Dr. Vivek Murthy, U.S. surgeon general, New York Times, 17 juin 2024.

 Yinki mutindu bibuti lenda tanina bana na bau na bivonza yina basite ya kusolola na bantu kena kubimisa? Biblia mepesa malongi ya mfunu.

 Beto tadila bansikudukusu ya Biblia.

 “Muntu ya kukenga kekanisaka tekila yandi sala diambu.”—Masese 14:15.

 Lokola bivonza kena kuma kaka mingi, yakena kulomba ve nge bika kaka nzila na bana na nge basadila basite ya kusolola na bantu. Tekila nge bika nzila na muana na nge na kusadila basite ya kusolola na bantu, kukindimisa ti yandi kekoka kuzitisa bandilu na diambu metadila ntangu yina yandi kelutisa na yau, kutanina kinkundi ya mbote, mpe kumanga mambu to bima yina bonga ve.

•   Samu na kuzaba mambu yankaka, tanga disolo “Muana na munu fueti sadila basite ya Internet samu na kusolola na bantu?” mpe “Mutindu ya kusadila mbote basite ya Internet samu na kusolola na bantu.”

 “Beno sadila ntangu na beno mbote mpenza.”—Baefese 5:16.

 Kana nge mebika nzila muana na nge sadila basite ya kusolola na bantu, tula malako yina yandi kelanda na diambu metadila kusadila yau mpe sasila yandi mutindu malako yango ketanina yandi. Sosa kuzaba konso nsobolo yina muana kesala na bikadulu na yandi samu nge zaba kana yakelomba nge tudila yandi bandilu samu na kusadila basite ya kusolola na bantu.

•   Sadila video Kebá na basite Internet ya kosolola na baninga samu na kusadisa muana na nge yandi zaba samu na yinki kutula bandilu kele na mfunu.

  Biblia metuba beto kena kuzinga na “ntangu mosi ya mpasi mpe ya mikakatano.” (2 Timote 3:1-5) Kaka na ntangu yango, yakena kupesa malongi na ntangu yina mebonga samu yasadisa beto beto nunga. Nge lenda mona liste ya mambu 20 yina mekatuka na Biblia samu na bibuti mpe bana na disolo Maladi ya kuniokuama na makanisi kena tatamana kubuelama na bantuenia.