Na 2023, bantu yina ketalaka mambu ya mavimpi monaka ti kana muntu kena kukimona yandi mosi, yakele yimbi samu na mavimpi; yau yina bafueti sala diambu mosi samu bantu kukimona ve mutindu yina. Yinki lenda manisa diambu yango?

•   Doktere Vivek Murthy yina kesalaka baoperasion mpe yina kezingaka na États-unis metuba ti: “Kana beto kena kukimona beto mosi mpe beto mekukivambula, beto kevuanda ve na mavimpi ya mbote mpe beto kevuanda ve na kiese. Yandi mebuela diaka ti: “Beto lenda sala diambu mosi samu na kukimona diaka mutindu yina ve.” Yinki beto fueti sala? Yandi mebuela: “Beto lenda sala mambu ya fiotifioti konso kilumbu samu na kukumisa kinkundi na beto na bantu yankaka ngolo.” a

 Diambu kesalaka ti muntu kukimona yandi mosi kele kaka ve kukivambula. Bantu yankaka kekukimonaka bau mosi ata kana bakele kisika mosi na bantu yankaka. Biblia lenda sadisa beto, yavuanda yinki diambu yina kena kusala ti beto kukimona beto mosi. Biblia kele na malongi ya mfunu yina lenda sadisa beto na kuzaba mutindu ya kuvuanda na bankundi samu beto kukimona ve beto mosi.

 Sololaka mbote na bantu. Yazola monisa kaka ve ti beto fueti tubilaka bantu yankaka banguilu na beto, kasi beto fueti kuwaka bau diaka mbote ntangu bakena kutuba. Kana nge kena kumonisa muntu yankaka ti nge ketudilaka yandi dikebi, kinkundi na beno kekuma ngolo.

•   Nsikudukusu ya Biblia: “Beno sosa kaka ve mambote na beno mosi, kasi mpe mambote ya bantu yankaka.”—Bafilipi 2:4.

 Vuanda na bankundi ya mutindu na mutindu. Vuanda pene ya kusala kinkundi na bantu yina kele bambuta na nge, to bantu yina kele baleki na nge, to bantu yina kele na mimeseno ya kusuasana na nge, to bantu yina kele bantu ya buala yankaka.

•   Nsikudukusu ya Biblia: “Beno zibula mpenza ntima na beno.”—2 Bakorinti 6:13.

 Samu na kuzaba mambu mingi na yina metadila mutindu nge lenda kumisa kinkundi na nge na bantu yankaka ngolo, tanga disolo “Comment combler notre besoin d’amitié.”