Biblia lenda sadisa nge samu nge katuka na kinanga ya kusadila badrogi?
Konso mvula, bamilion ya bantu kekufuaka mbala mosi to na manima ya mua bamvula samu basadilaka bansunga ya ngolo, ata mpe badrogi. Na ntangu ya maladi ya yimbi ya COVID-19, diambu yango buelamaka diaka ngolo. Nduenga ya Biblia sadisaka bantu mingi samu banunga kinanga ya kunua badrogi. Kana nge kena kusala ngolo samu na kununga diambu yango, nduenga yango lenda sadisa diaka nge. a
Na disolo yayi
Mambu yiya yina Biblia metubila kesadisa samu na kukatuka na kinanga ya kusadila badrogi
Baverse ya Biblia yina lenda sadisa nge samu nge nunga kinanga ya kusadila badrogi
Masolo yankaka ya luzingu ya bantu yina: Biblia sadisaka samu banunga
Biblia kepekisaka kusadila lusadusu ya munganga samu na kukatuka na kinanga ya kusadila badrogi?
Biblia kepekisaka kusadila badrogi lokola bilongo ya munganga?
Samu na yinki beto fueti sadila Biblia samu yasadisa beto beto katuka na kinanga ya kusadila badrogi?
Bantu yina kesosasosaka memonisa ti mbala mingi bantu kekumaka na kinanga ya kunuaka badrogi samu bakevuandaka na banguilu ya kukimona ti bakele kaka bau mosi, ya kulemba nzutu, mpe bakena kutungisama na makanisi. Biblia lenda sadisa nge samu nge kuma na kivuvu ya ngolo yina nge kele na yau nsatu samu nge nunga mambu ya mpasi yina metadila kinanga ya kusadila badrogi. Yakena kumonisa mutindu nge lenda vuanda na kinkundi ya ngolo na Nzambi. (Nkunga 25:14) Na lusadusu ya Nzambi, nge lenda nunga mambu ya mpasi yina nge lenda vuanda na mukakatano ya kununga nge mosi.—Marko 11:22-24.
Mambu yiya yina Biblia metubila kesadisa samu na kukatuka na kinanga ya kusadila badrogi
1. Longuka kuzaba Yehova b Nzambi. (Yoane 17:3) Yandi kele Mvangi mpe Yinto ya kilendo yina mezanga nsuka. Diambu yina meluta kele, yandi kele Tata na nge ya dizulu ya nzola. Yandi kele na nsatu ya kuvuanda na nguizani ya penepene na nge mpe kusadila kilendo na yandi samu na kusadisa nge. (Yezaya 40:29-31; Yakobo 4:8) Yandi melaka mambu ya mbote na bilumbu kena kuiza samu na nge kana nge mepona kubaka mambote na nzola na yandi.—Yeremia 29:11; Yoane 3:16.
2. Lomba Yehova sadisa nge. Sambila Nzambi mpe lomba yandi yandi sadisa nge nge nunga kinanga ya kusadila badrogi samu nge vuanda na dikoki ya kuvuanda ‘nlongo [to, kuvedila] mpe muntu yina mendimama na [yandi].’ (Baroma 12:1) Na nzila ya mpeve ya nlongo na yandi, to ngolo na yandi yina kesalaka kisalu, yandi kepesa nge ‘ngolo yina meluta ngolo ya bantu.’ (2 Bakorinto 4:7; Luka 11:13) Ngolo yango kesadisa nge samu nge bika kukibebisa na badrogi mpe samu nge kudisa ‘kimuntu ya yimpa’ yina kele na nguizani na lukanu na yandi.—Bakolosai 3:9, 10.
3. Fulusa mabanza na nge na makanisi ya Nzambi. (Yezaya 55:9) Yandi kesadisa nge samu nge ‘kuma ya yimpa na ngolo yina ketuadisaka mabanza,’ to nge soba mutindu na nge ya kukanisa, yina kesadisa nge nge bika diaka kuvuanda na kinanga ya kusadila badrogi. (Baefezo 4:23) Makanisi ya Nzambi kele na kati ya Biblia, na yau yakele mbote nge tangaka yau mbala na mbala. (Nkunga 1:1-3) Bantu mingi bakaka lusadusu samu na kubakusa mambu yina Biblia kelongaka. (Bisalu 8:30, 31) Bambangi ya Yehova kelongukaka na bantu Biblia ofele. Beto melomba nge diaka nge kuiza na balukutakanu na beto, kisika yina beto kelongukaka mambu yina Biblia metuba mpe mutindu beto lenda sadila malongi na yau na luzingu na beto.
4. Pona bankundi ya mbote. Bankundi yina nge keponaka lenda vuanda na bupusi ya ngolo samu na nge, na diambu metadila kusala mbote to yimbi, samu na mvita yina nge kena kunuana samu na kubika kuvuanda na kinanga ya kusadila badrogi. (Bingana 13:20) Nzambi mepesa beto bankundi ya mbote na kati ya bisadi na yandi, mpe yandi kele na nsatu nge vuanda nkundi na bau. (Nkunga 119:63; Baroma 1:12) Ponaka bandutusulu ya ntangu ya mbote, samu yakevuandaka lokola kaka nge kena kulutisa ntangu na bantu yina nge kena kutala, nge kena kuwa, to nge kena kutanga mambu na bau. Manga mambu nionso yina lenda lembisa nzengolo na nge ya kusala mambu yina kele mbote.—Nkunga 101:3; Amosi 5:14.
Baverse ya Biblia yina lenda sadisa nge samu nge nunga kinanga ya kusadila badrogi
Nkunga 27:10: ‘Ata kana tata mpe mama na munu mesundola munu, Yehova yandi mosi kebaka munu.’
Munu salaka zaba ve tata na munu yina butaka munu, mpe yasalaka ti munu kukimona mpamba na kati na munu. Ntangu kaka munu zabaka Yehova Nzambi lokola muntu ya kedika yina kezolaka munu mpenza, munu monaka mfunu ya luzingu mpe munu kumaka na dikoki ya kununga kinanga ya kusadila badrogi.”—Wilby, na Haïti.
Nkunga 50:15: ‘Bokila munu na ntangu ya mpasi. Munu kevukisa nge.’
“Mbala mingi verse yango vuandaka pesa munu ngolo samu munu tatamana kununga kikadulu na munu ya kuvuanda na kinanga ya kusadila badrogi ata kana mekutana diaka na ntotolo. Yehova vuandaka kokisa nsilulu na yandi.”—Serhiy, na Ukraine.
Bingana 3:5, 6: ‘Tudila Yehova ntima na nge ya mvimba, mpe kutula ve ntima na mayele na nge mosi. Na banzila na nge nionso yindula yandi, mpe yandi kesungika banzila na nge.’
“Baverse yango sadisaka munu samu munu kukitudila ve ntima, kasi munu tudila nde Yehova ntima. Na ngolo na yandi, munu vuandaka na dikoki ya kusala bansobolo na luzingu na munu ya mvimba.”—Michele, na Italie.
Yezaya 41:10: ‘Kubanga ve, samu munu kele kintuadi na nge. Kukitungisa ve, samu munu kele Nzambi na nge. Munu kepesa nge ngolo, ee, Munu kesadisa nge, Munu kesimba nge mpenza na diboko na munu ya kibakala ya lunungu.’
“Munu vuandaka tungisama ngolo na makanisi ntangu munu vuandaka diaka ve na dikoki ya kunua badrogi. Verse yayi ndimisaka munu ti Nzambi lendaka sadisa munu samu munu nunga kutungisama na munu na makanisi, mpe yandi sadisaka munu.”—Andy, na Afrique du Sud.
1 Bakorinto 15:33: ‘Beno kukivuna ve. Bankundi ya yimbi kebebisaka bikadulu ya mbote.
“Bankundi ya yimbi nde longisaka munu kunua badrogi mpe basalaka ti munu kuma nanga na yau. Munu vuandaka na dikoki ya kubika badrogi kaka kana munu mezenga kinkundi na bau mpe munu mesala kinkundi na bantu ya kuvedila yina vuandaka na mutindu ya luzingu yina munu vuandaka sepela na yau.”—Isaac, na Kenya.
2 Bakorinto 7:1: ‘Beto katula na nzutu na beto mvindu nionso ya kinsuni mpe ya mpeve.’
“Bampova yango tindaka munu munu tatamana kusala ngolo samu munu kumisa nzutu na munu ya kuvedila mpe kusoba luzingu na munu na diambu metadila kuvuanda nanga ya badrogi mpe kusala mambu yina vuandaka bebisa munu nzutu.”—Rosa, na Colombie.
Bafilipi 4:13: ‘Na mambu nionso, munu kele na ngolo na nzila ya muntu yina kepesaka munu ngolo.’
“Munu zabaka ti munu mosi munu vuandaka ve na ngolo ya kulemba kunua badrogi, yau yina munu sambilaka Nzambi sadisa munu. Yandi pesaka munu ngolo yina munu vuandaka na yau nsatu.”—Patrizia, na Italie.
Masolo yankaka ya luzingu ya bantu yina: Biblia sadisaka samu banunga
Joseph Ehrenbogen yandi yundukaka na mbanza yina fulukaka na mambu ya kinkesi mpe yandi kumaka nanga ya kunua malavu, tabaka, marijuana, mpe héroïne. Mbala mingi, yandi vuandaka kuma pene ya lufua samu yandi lutikisaka doze. Verse mosi ya Biblia ndimisaka yandi ti yandi lenda soba. Tanga mambu metadila yandi na disolo “Nayekolaki komemya basi mpe komipesa kilo.”
Dmitry Korshunov yandi mekaka mbala mingi kubika kinanga ya kunua malavu. Tala video ‘Nalɛmbaki bomoi oyo nazalaki na yango’ samu na kumona mambu yina sadisaka yandi samu yandi nunga.
Biblia kepekisaka kusadila lusadusu ya munganga samu na kukatuka na kinanga ya kusadila badrogi?
Ve. Biblia mezaba ti: ‘Bantu yina kele na mavimpi ya mbote kevuandaka na mfunu ya munganga ve, kasi bantu yina kele na maladi kevuandaka na mfunu na yandi.’ (Matayo 9:12) Na kifuani, nkubukulu ya buala ya Amérique yina ketadilaka kukibebisa na badrogi metuba: “Kusadila badrogi kele maladi mosi ya mpasi, mpe mbala mingi kubika kusadila yau kelombaka kaka ve kuvuanda na makanisi ya mbote to luzolo ya mbote ya kubika yau.” Kasi, lusadusu yina Nzambi kepesaka kele ngolo kuluta luzolo yina konso muntu lenda vuanda na yau. Na yau, bantu mingi yina bikaka kusadila badrogi na kulandaka malongi ya Biblia, bavuandaka diaka na nsatu ya lusadusu ya munganga. c Na kifuani, bakala mosi na nkumbu ya Allen metuba: “Ntangu munu vuandaka bika kunua malavu, munu vuandaka mona mpasi na nzutu. Na yau munu kuizaka bakusa ti katula lusadusu ya kimpeve yina munu bakaka, munu vuandaka diaka na nsatu ya lusadusu ya munganga.”
Biblia kepekisaka kusadila badrogi lokola bilongo ya munganga?
Ve. Kutu Biblia memonisa ti malavu lenda sadulua samu na kubelusa maladi to samu na kukitisa mpasi ya muntu yina mekuma pene ya lufua. (Bingana 31:6; 1 Timoteo 5:23) Kasi, mutindu kaka yakele samu na malavu, badrogi yina bakesadilaka samu na kukitisa mpasi lenda kumisa muntu nanga. Kasi, yakele diambu ya nduenga kuzaba kivonza yina yalenda bimisa mpe kukenga samu na mutindu ya kusadila baordonanse ya minganga samu na bilongo yina kekitisaka mpasi.—Bingana 22:3.
a Atako disolo yayi kena kutubila mingimingi kinanga ya kusadila badrogi, kasi bansikudukusu ya Biblia yina beto metubila awa lenda sadulua diaka ata na mambu yankaka, lokola kuvuanda bananga ya malavu, ya tabaka, ya kudia mingi, ya kubula bansaka ya mbongo, ya pornografi, to ya kusadila basite ya Internet ya kusolola na bantu.
b Yehova kele nkumbu ya Nzambi. (Nkunga 83:18) Tala disolo “Yehova azali nani?”
c Baopitale, mpe baprograme mingi ya kubelusa lenda pesa lusadusu. Konso muntu fueti tadila na dikebi opitale, to programe yina kele mbote mpe na manima kubaka nzengolo kana yinki lusadusu ya munganga yina kele mbote kuluta.—Bingana 14:15.
Tala diaka...
MAMBU YANKAKA
Yinki nge lenda sala samu nge bika kunua malavu na kulutisaka ndilu?
Mambu tanu yina kesadisa nge samu nge bika kunua malavu na kulutisaka ndilu, ata na ntangu nge kena kukitungisa mingi na makanisi.
MAMBU YINA METADILA BETO
Lomba muntu mosi kuiza tala nge
Tubila kiuvu mosi ya Biblia, to longuka kuzaba mambu mingi yina metadila Bambangi ya Yehova.
