BENO TATAMANA KUKENGA!
Ntoto kena kubebisama—Yinki Biblia metuba?
Na lapolo mosi ya lukutakanu ya yinza ya mvimba yina kesangisaka bantu ya mayele yina ketadilaka kubebisama ya klima yina salamaka na kilumbu ya 4 Avril 2022, António Guterres, yina kele mfumu ya ONU tubaka: “Bantu kena kusala mambu mingi yina kesala ti ntama mingi ve na bilumbu kena kuiza, klima bebisama ngolo. Bambanza ya nene kena kufuluka na maza. Tamperatire ya ngolo yina salama ntete ve. Mipepe ya ngolo ya wonga. Kukondua maza ya kunua na bisika mingi. Kuzimbana ya bamilion ya mitindu ya bayinti mpe ya bibulu. Yakele bisavu ve, kasi yakena kusalama mpenza. Yakele mambu yina sianse kena kutubila beto yina kesalama kana baguvernema soba ve mutindu na bau ya kusadila énergie.”
Zulunalo mosi (The New York Times, “Flooding Chaos in Yellowstone, a Sign of Crises to Come”) tubaka na kilumbu ya 15 Juin 2022 ti: “Bantu ya sianse meluengisa ti na bamvula kena kuiza kusoba ya klima kebebisa baparke pene ya 423 ya buala ya Etats-Unis, yina lenda bebisama ntangu nionso kana kumonte ya tamperatire mesalama. Mambu ya yimbi yina kena kusalama mefuanana na mambu yina beto ketangaka na Biblia: kuyokana ya bamfinda mpe kufuluka ya maza, kupanzana ya mabanga ya baglase, kubuelama ya maza na banzadi mpe kubuelama ya tamperatire.”
Solision lenda bakama samu na mambu ya mpasi yina kena kusalama na ntoto? Kana mvutu kele ee, nani kemanisa mambu yango ya mpasi? Beto tadila yina Biblia metuba.
Biblia samunaka kubebisama ya ntoto
Biblia metuba ti Nzambi ‘kebebisa bantu yina kebebisaka ntoto.’ (Kusonga 11:18) Verse yango kena kulonga mambu tatu:
1. Bisalu ya bantu kebebisa mpenza ntoto.
2. Nsuka kevuanda samu na kubebisama ya ntoto.
3. Nzambi nde kemanisa mambu ya mpasi yina kena kusalama na ntoto, kasi bantu ve.
Ntoto, yina kele yinzo na beto kevuanda na lutanunu na bilumbu kena kuiza
Biblia metuba ti ‘ntoto kebikana samu na mvimbamvimba.’ (Longi 1:4) Bantu mpe bibulu kezinga kuna samu na mvimbamvimba.
‘Bantu ya lunungu kebaka ntoto, mpe bakezinga mvula na mvula na zulu na yau.’—Nkunga 37:29.
Ntoto kebonga mbotembote.
‘Dezere mpe ntoto ya kuyuma keyangalala, mpe ntoto ya zelo zelo vuanda na kiese mpe yakebimisa bafololo lokola safran.’—Yezaya 35:1.
Tala diaka...
MALONGI YA NGUDI YA BIBLIA
Samu na yinki Nzambi semaka ntoto?
Yinza na beto kele ya kufuluka na bima ya kitoko. Distance yina mekabula yau na muini kele mpenza ya kufuana, yatuluaka na angle mosi ya mbote, mpe yakebalukaka na vitesi ya mbote. Samu na yinki Nzambi bimisaka ngolo nionso yina samu na kusala ntoto?
MAMBU YINA METADILA BETO
Kukuenda na lukutakanu
Tala mambu yina metadila balukutakanu na beto. Tala kisika yina balukutakanu na beto kesalamaka penepene na beno.
