Bisika mingi na yinza, bantu mingi kena kuniokuama na kufuluka ya maza yina kena kubimisa bivonza. Na kifuani, tala balapolo yayi melanda:

•   “Bilumbu yayi meluta, kubanda kilumbu ya samedi tii mercredi, na buala ya kimfumu ya Chine, bamvula ya ngolo fulusaka maza mpe nivo ya maza monteke tii na. . . . 744.8 milimètres. Yavuandaka bamvula ya ngolo yina salaka noka ve na bamvula kana 140 yayi meluta.”—AP News, 2 août 2023.

•   “Mupepe ya ngolo yina bakebokidilaka Typhon Khanun nokisaka bamvula ya mupepe ya ngolo na sud ya Japon na kilumbu ya mvimba ya mercredi mpe jeudi, mpe yakufuaka bantu zole. . . . Yamemonana ti mupepe yango kenokisa bamvula ya ngolo mpenza na Taïwan, mbanza yina kele na mongo.”—Deutsche Welle, 3 août 2023.

•   “Kufuluka ya maza yina salamaka na weekend [na Nouvelle-Écosse] katukaka na bamvula ya ngolo yina nokaka na kizunga ya Canada atlantique, yavuandaka bamvula yina meluta ngolo yina salaka noka ve na bamvula 50 yayi meluta.”—BBC News, 24 juillet 2023.

 Yinki Biblia metuba samu na mambu ya mutindu yayi?

 Biblia memonisa ti beto kena kuzinga na kilokola yina bamebokidila “bilumbu ya nsuka.” (2 Timoteo 3:1) Yesu samunaka ti na ntangu na beto, beto kemona ‘mambu yina kepesa wonga,’ to mambu yina kebangisa. (Luka 21:11) Kusoba ya klima mesala ti bamvula mpe mipepe ya ngolo banda kusalama mingi mpe na mutindu ya ngolo kuluta.

 Biblia metubila beto ti mambu mingi ya wonga yina kena kusalama bubu yayi na yinza, fueti suka kaka ve na kubangisa beto, kasi yafueti pesa beto mpe kivuvu. Samu na yinki? Yesu tubaka: ‘Ntangu beno kemona mambu yayi kena kusalama, beno zaba ti Kimfumu ya Nzambi mekuma pene.’—Luka 21:31; Matayo 24:3.

 Mambu yina kena kusalama na yinza kena kumonisa beto ti ntama mingi ve Kimfumu ya Nzambi kevuanda na kilendo na zulu ya bima yina Nzambi mesalaka, na kifuani maza.—Yobi 36:27, 28; Nkunga 107:29.

 Samu na kuzaba mambu yankaka na mutindu Kimfumu ya Nzambi kebongisa ntoto, tala disolo “Qui sauvera la terre?”