Kuningana ya ngolo ya ntoto—Yinki Biblia samunaka samu na yau?
Konso mvula, mafunda ya kuningana ya ntoto kesalamaka. Atako mingi kati na yau kevuandaka ya fioti, kuningana ya nene ya ntoto lenda bebisa bima, lenda bimisa bampasi, mpe yalenda kufua bantu mingi. Kuningana ya ntoto yankaka kebimisaka ba Tsunamis yina kebebisaka bisika yina kevuandaka pembeni ya maza, mpe yakekufuaka bantu mingi yina kezingaka kuna. Biblia samunaka kuningana ya ngolo ya ntoto yango?
Na disolo yayi
Biblia samunaka kuningana ya ntoto?
Yesu tubilaka kuningana ya ntoto na mbikudulu yina kele na Biblia. Bampova na yandi kele na mikanda tatu ya Biblia yayi melanda:
‘Yinsi mosi kenuanisa yinsi yankaka mpe kimfumu mosi kenuanisa kimfumu yankaka, mpe nsatu kevuanda mpe ntoto keningana na bisika ya mutindu na mutindu.’—Matayo 24:7.
‘Yinsi mosi kenuanisa yinsi yankaka mpe kimfumu mosi kenuanisa kimfumu yankaka; ntoto keningana na bisika ya mutindu na mutindu; nsatu diaka kevuanda.’—Marko 13:8.
‘Ntoto keningana ngolo, mpe nsatu mpe bamaladi ya yimbi kevuanda na bisika ya mutindu na mutindu.’—Luka 21:11.
Na yau Yesu samunaka ti ‘ntoto keningana ngolo’ na ‘bisika ya mutindu na mutindu’ nzila mosi na bamvita, nsatu, mpe bamaladi ya yimbi. Ntangu mambu yango nionso kesalama mbala mosi, yakemonisa puelele ti beto kena kuzinga na ‘nsuka ya mambu ya ntangu yayi,’ to “bilumbu ya nsuka.” (Matayo 24:3; 2 Timoteo 3:1) Kana beto metadila bakalkile ya ntangu yina Biblia metubila, beto kemona ti “bilumbu ya nsuka” bandaka na 1914 kasi yamanisa ntete ve.
Kuningana ya ntoto yina kena kusalama na bilumbu na beto kena kukokisa mbikudulu ya Biblia?
Ee. Mbikudulu ya Yesu, buela diaka yina yandi tubaka samu na kuningana ya ntoto, kele na nguizani na mambu yina beto kena kumona na bilumbu na beto. Banda 1914, kuningana ya ntoto kuluta 1 950 mesalamaka, yina salaka ti bantu kuluta bamilion zole kufua. a Beto tadila ndambu ya bifuani ya siekle na beto.
2004—Océan Indien. Kuningana ya ntoto ya ba magnitude 9.1 bimisaka tsunamis yina sabukaka na babuala kana 12 mpe yakufuaka kana bantu 225 000.
2008—Chine. Kuningana ya ntoto ya ba magnitude 7.9 bebisaka babuala mpe bambanza, mpe bantu ketubaka ti yalenda vuanda yakufuaka bantu 90 000, mpe bantu 375 000 yankaka lualaka, mpe yabebisaka bayinzo ya bamilion ya bantu.
2010—Haïti. Kuningana ya ntoto ya ba magnitude 7.0 salamaka, buela diaka kuningana ya ntoto mingi ya fiotifioti, yakufuaka bantu kuluta 300 000 mpe yabebisaka bayinzo ya bamilion ya bantu.
2011—Japon. Kuningana ya ntoto ya ba magnitude 9.0 mpe tsunamis salamaka, mpe yakufuaka bantu kana 18 500 mpe yasalaka ti mafunda ya bantu tina. Izini nucléaire ya Fukushima bimisaka kivonza ya nene. Bamvula 10 na manima, bantu kana 40 000 vuandaka kaka ve na dikoki ya kuvutuka na bayinzo na bau yina vuandaka pene ya izini yango, samu yavuandaka bimisa kaka bivonza.
Mambu yina Biblia samunaka samu na kuningana ya ntoto zola monisa yinki samu na beto?
Bambikudulu ya Biblia samu na diambu metadila kuningana ya ntoto kena kutubila beto mambu yina kesalama ntama mingi ve na bilumbu kena kuiza. Yesu tubaka: ‘Ntangu beno kemona mambu yango kena kusalama, beno zaba ti Kimfumu ya Nzambi mekuma pene.’—Luka 21:31.
Biblia memonisa ti Kimfumu ya Nzambi kele guvernema ya kedika yina kele na dizulu mpe Yesu Klisto nde kele Ntinu na yau. Yau nde kele Kimfumu yina Yesu longaka banlonguki na yandi balombaka na bisambu.—Matayo 6:10.
Ntangu Kimfumu ya Nzambi keyadila ntoto, Nzambi kesala ti bisumbula yina kebimaka yau mosi, kati na yau kuningana ya ntoto, yabika diaka kusala bantu mpasi. (Yezaya 32:18) Diaka, yandi kebelusa bakieta mpe kutungisama na makanisi yina bantu mekumaka na yau samu na kuningana ya ntoto. (Yezaya 65:17; Kusonga 21:3, 4) Samu na kuzaba mambu yankaka, tanga disolo “Bokonzi ya Nzambe ekosala makambo nini?”
a Ntalu ya bisumbula ya nene yina kesalamaka na yinza ya mvimba mekatuka na nkubukulu ya États-Unis yina ketadilaka ntoto (United States National Geophysical Data Center).
