Na lapolo mosi bimaka na ngonda ya Juin 2022, prezidan ya grupe ya Banque mondiale tubaka ti: “Ekonomi ya yinza ya mvimba mekuma diaka na kivonza.” Yandi buelaka diaka: “Mbala yayi, kukita ya ekonomi kele ngolo mpe yakena kumonte malembemalembe.”

 Fonds monétaire international metuba ti: “Ntalu ya karbiran mpe ya bima ya kudia memonte na nsualu, yakena kusala mpasi mingi na bantu yina kele na babuala yina kele na makoki mingi ve.

 Biblia kena kusadisa beto samu beto zaba mfunu yina beto kena kukutana na mambu ya mpasi na diambu metadila ekonomi, mutindu beto lenda nunga yau, mpe yinki kele kivuvu samu na solision yina kemanisa yau samu na mvimbamvimba.

•   Biblia mebokidila ntangu yayi beto kena kuzinga na yau “bilumbu ya nsuka.”—2 Timoteo 3:1.

•   Yesu tubaka ti ‘mambu ya kubangisa,’ to mambu yina kepesaka wonga, kevuanda kidimbu yina kemonisa ntangu yayi ya nsuka. (Luka 21:11) Kukita ya ekonomi kena kubangisa. Bantu kena kukitungisa samu na luzinga na bau na bilumbu kena kuiza mpe kana bakevuanda na dikoki ya kukokisa bansatu ya mabuta na bau.

•   Mukanda ya Kusonga (Nzaikusu) samunaka kumonte ya ntalu ya bima ya kudia na ntangu yayi ya nsuka, “Munu kuwaka kima mosi yina kokanaka na ndinga mosi. . . . Yavuandaka tuba, ‘Kilo mosi ya ble to bakilo tatu ya orje kevuanda na ntalu ya salere ya kilumbu mosi ya mvimba.’”—Kusonga 6:6, Easy-to-Read Version.

 Samu na kuzaba mambu yankaka samu na “bilumbu ya nsuka” mpe mbikudulu yina kele na mukanda ya Kusonga, tala video Mokili ebongwani banda na mobu 1914 mpe tanga disolo “Batambwisi-mpunda minei yango bazali banani?”

•   “Baketunga bayinzo mpe bakezinga kuna, bakekuna bilanga ya vinu mpe bakekudia mbuma na yau. Baketunga ve samu muntu yankaka zinga, bakekuna mpe ve samu bantu yankaka kudia.”—Yezaya 65:21, 22.

•   ‘Mbuma kevuanda mingi mpenza na ntoto; Yakefuluka na nsongi ya bamongo.’—Nkunga 72:16.

•   “‘Lokola bantu ya mpasi kena kuniokuama, lokola bamputu kena kudila, Munu ketelema samu na kusala diambu,’ Yehova muntu metuba.”—Nkunga 12:5. a

 Ntama mingi ve Nzambi ketula nsuka na mambu ya mpasi yina metadila ekonomi, kaka na buala mosi ve kasi na yinza ya mvimba. Samu na kuzaba mutindu yakesalama, tanga disolo “Yakevuanda na kilumbu yina diambu metadila mumbongo ya bantu nionso kevuanda mutindu mosi?”

 Kasi ata bubu yayi, Biblia lenda sadisa nge samu nge nunga bampasi yina kebimaka na diambu metadila kumonte ya ntalu ya bima. Na yinki mutindu? Yakele na malongi ya mfunu samu na mutindu ya kusadila mbongo na nduenga. (Bingana 23:4, 5; Longi 7:12) Samu na kuzaba mambu yankaka, tanga masolo “Batelá mbongo mpe biloko na yo ya kobikela” mpe “kotalela mbongo na ndenge ebongi.”