Beto nionso kevuandaka na nsatu ya maza ya mbote samu na kuzinga. Kasi António Guterres, yina kele sekretere jenerale ya ONU tubaka ti, “Kukondua ya maza kena kutungisa beto mpenza, nzokande nsatu ya maza kena kutatamana kubuelama na yinza ya mvimba.” Bamilion ya bantu na yinza ya mvimba kele ve na dikoki ya kubaka maza ya mbote.

 Kilumbu yankaka beto kevuanda na maza yina kekokila samu na bantu nionso? To beto ketatamana kukondua maza? Yinki Biblia metuba?

Mambu yina Biblia melaka na diambu metadila kuvuanda na maza mingi

 Biblia metuba ti kilumbu kele yina kukondua maza kevuanda diaka ve. Ya kedika, maza ya bunkete mpe ya kitoko kevuanda mingi.

 ‘Maza kebima na ntoto ya kuyuma, mpe maza kebima na dezere. Ntoto ya kuyuma kekuma dizanga ya maza yina mefuluka na matiti, mpe ntoto ya kukondua maza kekuma bayinto ya maza.’—Yezaya 35:6, 7.

 Samu na yinki beto lenda ndimina nsilulu yango ya Biblia? Beto tadila mambu yina Biblia metuba samu na mutindu mosi yina planeti na beto salaminaka.

Mambu yina Biblia metuba samu na ntoto mpe sikle ya maza

 ‘[Nzambi] semaka . . . ve [ntoto] kaka samu na mpamba, kasi [yandi] salaka yau samu bantu zinga.’—Yezaya 45:18.

 ‘[Nzambi] kebendaka matanga ya maza; yakekangamaka mpe yakekumaka mvula yina kekatukaka na londende na yandi; na manima matuti kenokisaka yau na ntoto, yakenokinaka bantu.’—Yobi 36:27, 28.

 ‘Munu kepesa beno bamvula ya ngolo na ntangu na yau, ntoto kebuta mbuma na yau, mpe bayinti ya bilanga kebuta mbuma na yau.’—Levi 26:4.

 Nzambi lakaka ti yandi kesakumuna Bayisaele ya ntama, dikanda mosi yina kesalaka bilanga, bilanga na bau kebuta bambuma na kupesaka bau ntangu nionso maza mingi. Yandi mezaba ti samu bima ya kudia buta, beto kevuandaka na nsatu ya maza mingi na ntangu yina mebonga.

 Ntama mingi ve Nzambi kesala na ntoto ya mvimba mambu yina yandi salaka na Yisaele ya ntama. (Yezaya 30:23) Tekila ntangu yango koka, kukondua maza kena kutatamana kaka kubuelama na bisika mingi na yinza, mpe mosi ya mambu kena kusala mutindu yina kele kukondua ya bamvula. Yinki diaka Biblia metuba na diambu metadila solision yina kebakama samu na mpasi ya maza yina kele bubu yayi?

Mutindu mpasi ya kukondua maza kemanisa

 Biblia metuba ti, Nzambi na nzila ya Kimfumu na yandi, kebongisa mambu ya mpasi yina kena kukumina planeti na beto, na kifuani mpasi ya kukondua maza yina kele bubu yayi. (Matayo 6:9, 10) Kimfumu ya Nzambi kele guvernema ya dizulu yina keyadila ntoto ya mvimba. (Daniele 2:44; Kusonga 11:15) Katula yau, Kimfumu ya Nzambi kesala mambu yina baguvernema ya bantu kele ve na dikoki ya kusala—yakekatula mambu yina kesalaka ti maza vuanda mpasi.

 Diambu ya mpasi: Kusoba ya klima kena kusala ti sikle ya maza bika salama na mutindu yina mebonga. Yakena kusala ti maza bika vuanda na bisika mingi mpe kufuluka ya nene ya maza yina kena kusalama na bamvula ya ngolo to kumonte ya maza na nzadi.

 Solision: Kimfumu ya Nzambi kebongisa nionso yina mebebaka samu planeti na beto vutuka diaka mbote. Nzambi lakaka: ‘Tala! Munu kena kusala bima nionso ya yimpa.’ (Kusonga 21:5) Bantoto yina meyumaka kekuma na maza mingi ya kitoko, samu luzingu ya bantu vuanda mbote ata na bisika yina bantu kevuandaka diaka ve bubu yayi. (Yezaya 41:17-20) Kimfumu ya Nzambi yina Nzambi mepesa na Yesu Klisto kebaka mambu nionso metadila ntoto na maboko.

 Diambu ya mpasi: Bantu mpe bakompani ya lokoso kena kubebisa maza, banzadi, bamaza yina bakelundaka na yinsi ya ntoto; yau kena kusala ti maza ya bunkete vuanda mpasi.

 Solision: Nzambi kebongisa ntoto mpe bamaza, banzadi, mpe banzadi mungua. Ntoto kekuma paradiso. Biblia metuba na bampova mosi ya kifuani: ‘Dezere mpe ntoto ya kuyuma kevuanda na kiese, mpe ntoto ya zelo na zelo keyangalala mpe yakebimisa bafololo lokola safran.’—Yezaya 35:1.

 Diambu ya mpasi: Bantu kena kusadila maza na mutindu ya yimbi, yau kena kusala ti babebisa maza mingi kuluta yina ntoto lenda bimisa.

 Solision: Na nzila ya Kimfumu ya Nzambi, luzolo ya Nzambi ‘kesalama na ntoto,’ kasi luzolo ya bantu ya muyimi ve. (Matayo 6:9, 10) Kimfumu ya Nzambi kepesa bantu yina yakeyadila malongi yina meluta mbote. Yezaya 11:9 a metuba: ‘Ntoto kefuluka mpenza na nzayilu ya Yehova.’ Na nzila ya nzayilu yango yina meluta nzayilu nionso yankaka, mpe na nzila ya nzola samu na Nzambi mpe bisemua na yandi, bantu ketanina mbotembote planeti na beto ya kitoko mpe bima nionso yina Nzambi salaka na kati na yau.

•    Samu na kuzaba mambu yankaka yina Kimfumu ya Nzambi kesala, tala disolo “Bokonzi ya Nzambe ekosala nini?”

•    Kuenda na Biblia, na mukanda ya Yezaya, kikapu 35, samu nge tanga mutindu ntoto kekuma paradiso.

•    Tala video Mpo na nini Nzambe akelaki mabele? samu na kuzaba mambu yankaka yina metadila lukanu ya Nzambi samu na ntoto mpe bantu.