Kuzimbisa kisalu lenda natina nge mpasi kaka ve na mambu metadila mbongo, kasi mpe na luzingu ya dibuta na nge mpe na makanisi na nge. Kutadila makanisi yayi melanda, yina mesimbama na bansikudukusu ya Biblia lenda sadisa nge nge nunga.

•   Tubila bantu yankaka banguilu na nge.

   Yina Biblia metuba: ‘Nkundi ya kedika kezolaka konso ntangu.’—Bingana 17:17.

   Na manima ya kuzimbisa kisalu, nge lenda kukimona kiadi, nganzi, nge lenda zaba diaka ve diambu yankaka ya kusala, to nge lenda kukimona lokola kaka nge nunga ve. Kana nge mezabisa banguilu na nge na bantu ya dibuta na nge mpe na bankundi na nge ya ntima, balenda pesa nge lusadusu ya makanisi. Balenda pesa nge diaka malongi ya mfunu yina lenda sadisa nge samu nge kuenda na ntuala.

•   Manga kukitungisa kuluta ndilu.

   Yina Biblia metuba: ‘Beno kukitungisa ve samu na kilumbu yina kelanda, samu kilumbu yina kelanda kevuanda na mitungisi na yau.’—Matayo 6:34.

   Biblia kena kukindisa beto na kukibongisa na ntuala. (Bingana 21:5) Kasi, yakena kuluengisa beto diaka beto bika kukitungisa kuluta ndilu samu na bilumbu kena kuiza. Mbala mingi beto kekukitungisaka samu na mambu yina kesala salama ata fioti ve. Yakele mbote kutula makanisi na mambu yina beto lenda sala bubu yayi.

   Biblia kena kupesa malongi mingi ya nduenga samu na mutindu nge lenda nunga kutungisama yina nge kena kumona bubu yayi. Tanga disolo “Oyo okoki kosala mpo na kolonga kotungisama” samu na kuzaba mambu yankaka.

•   Soba mutindu na nge ya kusadila mbongo.

   Yina Biblia metuba: ‘Munu longukaka . . . kuzinga na bima mingi mpe kuzinga kondua bima.’—Bafilipi 4:12.

   Mesana na luzingu yina nge kele na yau bubu yayi. Yamesangisa kusoba mutindu na nge ya kusadila mbongo, na yau sadila mbongo na kutadila makoki na nge. Kuvuanda ve na bamfuka yina mekondua mfunu.—Bingana 22:7.

   Samu na kuzaba makanisi yankaka na diambu metadila makoki yina nge kele na yau bubu, tala disolo “Okosala nini soki ozali lisusu na mbongo mingi te?”

•   Sadila ntangu na nge na nduenga.

   Yina Biblia metuba: ‘Beno tatamana kutambula na nduenga . . . , beno sadila ntangu na beno mbote mpenza.’—Bakolosai 4:5.

   Ata kana kisalu na nge kebakaka nge ntangu mingi, kasi zaba kusadila ntangu na nge mbote. Kusala mutindu yina kesadisa nge nge vuanda na bukatikati na mambu ya luzingu na nge mpe yakesala ti nge kukimona mbote.

•   Zaba kumesana na mambu.

   Yina Biblia metuba: ‘Mambote kevuandaka na konso kisalu ya ngolo.’—Bingana 14:23.

   Vuanda pene ya kusala kisalu yina mesuasana na yina nge vuandaka sala ntete. Nge fueti ndima ata bisalu yina bantu kemonaka ti yakele na mfunu ve to yina kepesa nge kaka mbongo fioti na kutadila kisalu yina nge vuandaka na yau ntete.

•   Tatamana kusosa.

   Yina Biblia metuba: ‘Kuna mbutu na nge na sunka mpe kubika ve ti diboko na nge pema tii na nkokila; samu nge zaba ve yinki kemena.’—Longi 11:6.

   Tatamana kusosa kisalu. Tubila bantu yankaka ti nge kena kusosa kisalu. Tubila bampangi ya dibuta, bantu yina nge mezabana na bau, bankundi na nge ya kisalu ya ntama, mpe bafinangani na nge. Sosa kuzaba kisika bakena sosa bantu na bisalu, bisika bakena sosa bantu sadisa bau na basite ya Internet ya bakompani. Kukibongisa samu na biuvu mingi yina balenda yuvusa nge mpe kuenda bika ba curriculum vitae mingi tekila nge baka kisalu.