Kilumbu ya 27 janvier 2023, kevuanda kilumbu yina bantu mingi na yinza ya mvimba kekanisa Bayuda yina Banazi kufuaka (Holocauste). Mambu ya mpasi mpe ya kikensi yina salamaka yameluta bamvula 75 lenda tinda nge nge kukiyuvusa samu na yinki Nzambi bikaka nzila ti Banazi kufua Bayuda.

•   Samu na kumona yina Biblia metuba, tanga disolo “Samu na yinki lufua ya Bayuda salamaka (Holocauste)? Samu na yinki Nzambi pekisaka yau ve?”

 Bayuda niokuamaka mingi samu bau nde Banazi vuandaka zola kufua. Bakufuaka bamilion kati na bau na mutindu mosi yina bongisamaka mbote. Baniokolaka diaka bantu ya makanda yankaka mpe bakufuaka bau na ntangu yango. Bambangi ya Yehova diaka vuandaka na kati na bau, baniokolaka bau samu na bindimeli na bau yina mesimbama na Biblia.

•   Samu na kuzaba mambu yankaka, tanga disolo “Makambo nini Batatoli ya Yehova bakutanaki na yango na eleko ya Banazi?”

 Bantu mingi kebangaka ti diambu mosi yina kele lokola lufua ya Bayuda (Holocauste) lendaka salama diaka. Diambu ya kiese kele ti, Biblia mepesa nsilulu ti na bilumbu kena kuiza, mambu ya mpasi ya mutindu yina kesalama diaka ve.

•   “‘Samu munu mezaba mbote makanisi yina munu kena kukanisa samu na beno,’ Yehova muntu metuba, ‘makanisi ya kiyenge, kasi ya mpasi ve, samu na kupesa beno luzingu ya mbote na bilumbu kena kuiza mpe kivuvu.’”—Yeremia 29:11. a

 Kivuvu yango kekokisama ntangu Yehova Nzambi kekatula mambu ya yimbi mpe mambu ya mpasi yina yimbi yango mebimisaka. Ntama mingi ve Yandi:

•   Kekatula bantu yina kesadilaka bantu yankaka mambu ya yimbi.—Bingana 2:22.

•   Kebelusa bantu nionso yina kena kumona mpasi.—Kusonga 21:4.

•   Kevutula na luzingu bantu yina mekufuaka samu bavuanda diaka na ntoto.—Yoane 5:28, 29.

 Nge lenda tula ntima na kivuvu ya kubomba yina Biblia mepesa. Samu na kuzaba samu na yinki, beto melomba nge nge longuka Biblia ofele kintuadi na beto.