Na yinza ya mvimba, bantu mingi kesepelaka na madia ya matiti (véganisme).

•   “Véganisme kele filozofi mpe mutindu ya luzingu yina kelombaka kubika—na kitezo mosi ya kufuana mpe na mutindu yina lenda salama—mitindu nionso ya kusadila bibulu mambu na mutindu ya yimbi mpe ya kuniokola, samu na kudia, kusala bilele, to mambu yankaka.”—The Vegan Society.

 Katula yau, bantu yankaka kesepelaka kudia kaka madia yina mekatuka na matiti to bayinti kaka ve samu bakebakaka bibulu na valere, kasi mpe samu na kubongisa kisika bakevuandaka, samu mamvipi na bau vuanda mbote, to samu na kuzitisa nsiku ya dibundu na bau.

•   “Kudia kaka madia yina mekatuka na matiti to bayinti kele diambu yina mesuasana na ba régimes yankaka ya mambu metadila kudia yina muntu lenda kukitudila samu bantu ketadilaka yau lokola bindimeli mosi, lokola nzengolo mosi yina metadila bikadulu ya muntu mpe lokola mutindu yina konso muntu lenda soba yinza samu yakuma diaka mbote.”—Britannica Academic.

 Luzingu ya kudia kaka madia yina mekatuka na matiti to bayinti kele diambu yina kesala ti ntoto kuma mbote kuluta na bilumbu kena kuiza? Yinki Biblia metuba?

 Biblia metuba ti Mvangi na beto Yehova Nzambi, a ketadilaka bantu ti bameluta bibulu mpe yandi pesaka bantu kimfumu na zulu ya bibulu. (Kuyantika 1:27, 28) Nsukansuka, Nzambi bikilaka bantu nzila bakudia bibulu. (Kuyantika 9:3) Kasi yandi kesepelaka ve bantu niokola bibulu.—Bingana 12:10.

 Na kutadila Biblia, kudia to kumanga kudia misuni kele nzengolo ya muntu na muntu. b Nzengolo yina beto kebaka samu na yau kekumisa beto ve bantu yina meluta mbote na meso ya Nzambi. (1 Bakorinto 8:8) Muntu mosi ve fueti vueza nzengolo ya muntu yankaka na diambu metadila kima yina yandi kepona kudia.—Baroma 14:3.

 Biblia memonisa ti mambu yina beto keponaka na luzingu na beto, yau ve kebongisa mambu ya mpasi yina kele na yinza. Mambu mingi ya mpasi kekatukaka na bankubukulu ya politiki, na bankubukulu ya bantu mpe na bankubukulu ya mumbongo ya yinza yayi, yina ata muntu mosi ve lenda bongisa. Biblia metuba:

•   ‘Kima yina kele niokanioka, balenda sungika yau ve.’—Longi 1:15.

 Mvangi na beto kebongisa mambu ya mpasi yina beto kena kukutana na yau bubu yayi. Biblia kesadilaka ntubulu ya kifuani samu na kutubila mambu yina yandi kesala.

•   ‘Mpe, munu monaka dizulu ya yimpa mpe ntoto ya yimpa; samu dizulu ya ntama mpe ntoto ya ntama lutaka, mpe nzadi-mungua vuandaka diaka ve.’—Kusonga 21:1.

 Nzambi ketula ‘dizulu ya yimpa,’ yina kele Kimfumu na yandi ya dizulu na kisika ya baguvernema ya bantu to ‘dizulu ya ntama’. Kimfumu na yandi kekatula “ntoto ya ntama” yazola monisa bantu ya yimbi, mpe yakeyadila na zulu ya ‘ntoto ya yimpa,’ to bantu yina kevuandaka pene ya kuzitisa Kimfumu yango.

 Kaka na yinsi ya lutuadusu ya Kimfumu ya Nzambi nde bantu kelonguka mutindu ya kuzinga na kiyenge na bibulu mpe kubongisa kisika bakevuandaka.—Yezaya 11:6-9.